¹ Jitämä̧ huopi; ¿Yä̧tȩ ädätacuja̧ pä'ötä? ¿ suröju jui'ätömä̧ tiderö jäcue päcuä'ajattö̧ ppädacu pä'ömä̧? ² Ja̧'hua̧nö̧ ja̧'a̧ pä̧i̧mä̧ ttö̧ja̧sa̧ huo̧juȩcu̧nä̧ a̧mu̧cuädocörö cuä'ö icu; a'cuoyäcuähuämä̧ huo̧juȩcu̧ a̧mö̧cuädocörö cuä'ö icu. ³ Ttömä̧ topä'isä yä̧tȩ ttö̧ja̧sa̧ huo̧juȩcu̧nä̧ a̧mu̧huä̧docömä̧ isojuo'epö rȩbȩu̧, ja̧'hua̧nö̧ ja̧'a̧nä̧ ojusodenä̧mä̧ u̧ni̧chä̧ra̧'a̧nä̧ surönä̧ ja̧'a̧rö̧ pä'ötä jȩpö̧ chu̧ju̧ni̧nä̧cu̧. ⁴ Cui̧tti̧mö̧'i̧nä̧ surojöttö ttö̧ji̧pa̧ pä'ömä̧ oto ttäcuotö; juätömä̧ ötajuiyä ä'ca mö̧ä̧cuodätä jö̧rä̧dö̧ i̧cuä̧cuä̧u̧. Yä̧tȩ'i̧nä toa'a juorö ttö̧ji̧pu̧nä̧ ppä̧dä̧cua̧mä̧. ⁵ Ttucua ppäicuätömä ttu̧ju̧nä̧huä̧ttö̧ cuätö; juätömä̧ ji̧nä̧ so̧'ö̧ 'cä̧ti̧yä̧ttö̧ ca̧ca̧tä̧tö̧. Ttähua a̧di̧ri̧jä̧u̧mä̧ yabonö̧tä̧ ruhuotö juo'ätö. ⁶ Ja̧'hua̧nö̧ ja̧'a̧nä̧ surojömä rȩjȩttö̧mä̧ puttächiocö; huȩnȩ jö̧'i̧nä̧mä̧ rȩjȩttö̧mä̧ bahui'ocö. ⁷ Ja̧'hua̧nö̧ ja̧'a̧ttö̧ ttö̧ja̧mä̧ uhuäpächätö huȩnȩ ttu̧ju̧nära̧ pä'ö, ocurä i̧sa̧rö̧ ju'tojucu coacha'a jä̧'i̧nö̧'a̧nö̧ ja̧'a̧ pä'ö. ⁸ Ja̧'hua̧nö̧ ja̧'a̧nä̧, ttötämä chö̧ä̧nä̧hua̧ Diosrötä chu̧sä̧cua̧sä̧; ⁹ JA̧U̧TÄ̧ ja̧'a̧ rö̧ä̧ö̧nä̧ putächiönä̧ adihuä juäi jȩpu̧mä̧ pa̧ja̧cuo̧me'inä juiyönä. ¹⁰ JA̧U̧MÄ̧ ajiya'inä iyö rȩjȩ ja̧'hua̧ta̧nö̧ hue'ö ajiya dea isarära'acu'inä. ¹¹ Ja̧u̧mȩ jȩpö̧ ju'toju jo̧mȩ cä'epö u̧huä̧na̧ pä'ö jitö suräu kä̧tö̧rö̧; ro̧huä̧pi̧jö̧ juiyome u̧huä̧nä̧ pä'ö jitö tta̧'cua̧tta̧'ȩcu̧ ko̧cuä̧tö̧rö̧. ¹² Suronä amucuädätö jȩtta̧ pättö'inä jȩttö̧ juiyönä jȩpö̧, ttu̧mu̧nä̧ jȩttö̧'i̧nä̧ iso juottepö juiyönä. ¹³ Ja̧u̧mä̧ huo̧juä̧tö̧jä̧ pä'ö jȩttö'inä tta̧mo̧nä̧tä̧ ttȩki̧pö̧nä̧ jȩpö̧; suronä amucuädö jurunä jȩttö̧mä̧ tta̧mo̧nä̧ be'ipö kä̧nö̧ jȩpä̧tö̧. ¹⁴ Ja'huätömä yo̧ö̧tä̧ po̧cui̧pä̧tö̧ mo̧ro̧ kä'cottö'inä, Kä̧hua̧ jueö ko̧ro̧'i̧nä̧ yodo tti̧'cha̧'a̧ ja̧'i̧nö̧'a̧nä̧tä̧ 'chä̧tö̧. ¹⁵ Ja̧'hua̧nö̧ ja̧'a̧nä̧ Ja̧u̧mä̧ ppä'adö ttö̧ja̧ usurä isotörö suronä pättä'chä̧u̧ru̧'i̧nä̧ ja̧'hua̧ta̧'a̧nö̧ recuärö̧jä̧u̧ru̧ ruhuotö pä̧i̧cu̧nä̧ huettä'anä kä̧tö̧rö̧. ¹⁶ Usurä'isa̧'i̧nä̧ ppädäcuähuö u̧ju̧nä̧ra̧ pä'ö, Ja̧'hua̧ta̧'a̧nö̧ jȩttä̧cö̧tä̧ pättä'chäcua'anö. ¹⁷ Ä̧ju̧cui̧, ttö̧ja̧sä̧rö̧ DIOS tä̧bo̧tö̧ jiähuäcumä adiunätä̧ ö̧jö̧nä̧ jȩä̧cua̧; ja̧'hua̧nö̧ ja̧'a̧ttö̧, O'cajuiyönä ju̧ru̧hua̧ i̧tä̧bo̧tö̧mä̧ cujö'quiyunä to'cuä. ¹⁸ Juo̧ú̧ ttöttä päi'önä jȩo̧mȩmä̧ juo̧nu̧'ca'amä juäopu kunu̧; ja̧'hua̧nö̧ ja̧'a̧ ttöttä päi'önä jeo̧mȩmä̧ chutä u̧mu̧nä̧tä̧ aditicu. ¹⁹ Juo̧u̧tä̧ ppä̧dä̧cua̧jä̧ koro muttö̧nö̧ yautenö huȩnȩ́ cu̧ju̧nä̧rö̧mä̧; ja̧'hua̧ta̧'a̧nö̧, koro muttö̧nö̧ yautenö huȩnȩ́ cu̧ju̧nä̧rö̧mä̧ ji̧yȩtȩ'i̧nä̧ surojömä 'cuäopi̧ yä̧cuá̧jä̧. ²⁰ Juo̧u̧tä̧ ppä̧dä̧cuä̧jä̧ ppäi pänä'i̧nä̧ 'corupäcuiacu, ja̧'hua̧ta̧'a̧nö̧ curä rohuähuätö ttäre espadattö'inä ppä̧dä̧cua̧jä̧ cuä'ö tticuiyönä. ²¹ Ucuru suronä pättöttö'inä yecue cu'i̧yä̧cua̧jä̧; juo̧u̧ suronä pättömä suro joepocaa. ²² Ri̧ȩnä̧ ppärö̧jö̧mä̧ ucumä ya̧a̧u̧tä̧ ya̧cua̧huä̧cua̧jä̧, ja̧'hua̧ta̧'a̧nö̧ dea isotörö'inä yecue cu'i̧yä̧cua̧jä̧. ²³ Ja̧'hua̧nö̧ ja̧'a̧ ucumä̧ esecuinöjä̧ inä̧hui̧yä pättanä ka̧cu̧nä̧tä̧, ja̧'hua̧nö̧ jo̧mȩnä̧ isotö de'a ka̧cuä̧tö̧mä̧ ucucumä huȩnȩ juiyönä̧tä̧ ttö̧jä̧cuo̧tö̧. i̧so̧ttö̧ttä̧ jä̧'cuä̧'a̧ cua̧hua̧rö̧huä̧mä̧. ²⁴ Ucu cuojusodemä ra̧huä̧pi̧jö̧ttö̧ ki̧'ä̧cua̧'a̧; cuä̧ji̧mö̧rö̧ do'ächö cui̧'chä̧cua̧jä̧ ja̧'hua̧nö̧ jo̧mȩnä̧ ji̧yȩtȩ'i̧nä̧ recuä rö̧jo̧ca̧'a̧ jä̧cua̧'a̧. ²⁵ Ucu'i̧nä̧ ku̧ju̧nä̧huä̧mä̧ rö̧ä̧chä̧cua̧'a̧, cui̧tti̧mö̧'i̧nä̧ mȩje'ca̧ mȩji̧yä̧'chȩ jä̧'i̧nö̧'a̧nö ttäcuotö. ²⁶ Ucu bö̧o̧sa̧ juocuächomenämä hua'ötä cui̧cuä̧cua̧jä̧, cuähuä jo̧mȩnö̧ huȩju̧ mo̧ro̧ jä̧'i̧nö̧'a̧nö̧. ²⁷ Topittö, pi̧yȩmä̧ ka̧cuä̧mö̧ totinö; ja̧'hua̧nö̧tä̧; ä̧ju̧cui̧rö̧ ä̧ju̧cu̧ huo̧jui̧'i̧rö̧ ucutä cua̧mä̧nä̧ pa̧ja̧tä̧tä̧."