¹ Ja̧'hua̧nö̧ ja̧'a̧, Elifaz temanita ttö̧ja̧ i̧sa̧ ädätö pä'inö: ² "Ya̧tȩ ucucu ucuocua pä'ö jȩö̧ttö̧mä̧, ¿cuami 'quicuächi'ö'anö ja̧'a̧ tä̧ji̧?. Ja̧'hua̧nö̧ ja̧'a̧nä̧, ¿Ditä ro̧ȩpa̧'rö̧'a̧nö̧ ja̧'a̧ttö̧ cucuocua pä'ömä?. ³ Topi, ucumä recuätörö huo̧juȩtä̧ji̧jä̧; 'cuä'ächiätörö ucumä ttujuru iyö pä'ädäjijä. ⁴ Ucu cui̧huȩnȩmä̧ kiyönä 'chu̧ä̧ra̧'a̧ mo̧ttä̧cha̧'a̧nö̧ cuotörö, ucumä kiyönä ttö̧jö̧nä̧ jȩpä̧ji̧jä̧ 'cuä'achiätörö. ⁵ Ja̧'hua̧nö̧ ja̧'a̧nä̧ jitämä ucurutä huȩnȩ ichäcujä ämä'cönä; ja̧'hua̧ta̧nö̧ 'cuä'ächi'ö'inä 'cuäcuächi'önä jä̧cu̧jä̧. ⁶ ¿Yecuecu juiyönä cua'cua huä̧närö̧jä̧ta̧ji̧, ja̧'hua̧ta̧nö̧ surojö'inä juiyönä cu̧ä̧nä̧hua̧rö̧tä̧ a̧mu̧cuä̧rö̧ 'chö̧jä̧ tä̧ji̧?. ⁷ Cu'arodoca'a, pi̧yȩ ötö'cö amucuädi: ¿Dijä̧ttö̧ surähuinömä suronä'inä jȩo̧ca̧'a̧nä̧? ja̧'hua̧nö̧ jö̧ juiyöttö'inä ¿Ti̧yȩnö̧ adiunä jȩpä̧tö̧rö̧ 'cui'opömä tticuinä? ⁸ 'Cuäopomettö̧ tochomenä, jitö tta̧mo̧nä̧tä̧ korotörö suronä jȩpä̧tö̧rö̧ ja̧'hua̧ta̧'a̧nö̧ huȩnȩ jö̧nä̧tä̧ jȩpä̧'chä̧tö̧mä̧, ja̧'hua̧nö̧ jö̧tä̧ ȩmä̧tö̧. ⁹ Dios amiyuppanä ppuomenämä jahuätömä chä̧cuä̧hui̧'o̧co̧u̧; CHUTÄ amisurächi'omenämäcu ppöomenämä cuo'ötä icuätö. ¹⁰ Mö yähui duruhuomenä, mö yähui ro̧huä̧rö̧ huoöttö'inä, mö yä̧hui̧tö̧ möäyotö ttacupiyä'inä - jahuätömä 'torö icuähuäcuotö. ¹¹ Mö yähui bu̧o̧sa̧ u̧cuä̧ juiyäcu ja̧'i̧nö̧'a̧nö̧; Mö̧ yä̧hui̧tö̧ tti̧tti̧mö̧mä̧ pperetö icuähuotö pi̧jä̧ o'cajuiyönä. ¹² Rȩbȩhui̧nä̧cu̧sä̧ ya̧nä̧́ jähuä ttörö, ja̧'hua̧nö̧ seppappanö ä̧ju̧cui̧nö̧sä̧ juo̧mä̧. ¹³ Ihueye täcunä ttääita'anö Chäa̧ra̧'a̧nä̧tä̧ ä̧ju̧cui̧nö̧sä̧ ya̧nä̧ jähuä. ¹⁴ Chihue'quiyu täcu ri̧ȩnä̧ ye'ö tti̧ä̧hui̧pi̧nö̧sä̧. ¹⁵ Ja̧'hua̧ta̧'a̧nö̧ jä̧ttä̧pä̧ya̧ 'chȩtá̧ päi'inö̧sä̧ chiänä isoppa ttii 'cuäo'omenä. ¹⁶ Adihuä a̧'cua̧ ru̧hua̧mä̧ ja'a̧tä̧ ki̧nö̧, ja̧'hua̧nö̧ ja̧'a̧nä̧ ja̧u̧ a̧'cuä̧juä̧mä̧ ja̧u̧ ja̧'a̧ pä'ömä jerupinö̧sä̧. Ji̧yȩtȩ a̧'cuä̧juä̧ ttö chä'ca jo̧mȩ 'corujueinä̧ kö̧mä̧; ji̧yȩtȩ pa̧'a̧nö̧ pä'a ä̧ju̧cui̧nö̧sä̧. ¹⁷ Ya̧tȩ hua'are ttö̧ja̧sa̧mä̧ Diosttö'i̧nä̧ yabonä̧nö̧ adihuä i̧sa̧ tä̧ji̧? ¿Ya̧tȩ ttö̧ja̧sa̧mä̧ uhuäbe'inö̧ttö̧'i̧nä̧ yabonä̧nö̧ päcuäitä hua̧ tä̧ji̧? ¹⁸ Topittö̧, Dios u̧mö̧huäyotörö a̧'cua̧ ö̧huȩnä̧ro̧ca̧'a̧ jö̧ttö̧mä̧; Ja̧u̧ u̧mö̧huäyotö ángelesrä micuähuocotö päöttömä, ¹⁹ ¿tta̧'a̧nö̧ jä̧cua̧'a̧ttö̧ jitö isode redä'cattö tätähuodenä̧ ka̧cuä̧tö̧mä̧, i̧sä̧ppȩttö̧ 'chu̧huä̧rodenä, juätömä kȩdö̧ icuähuotö ttäcuotö jurunä̧nö̧ ppȩrȩpö̧ jä̧'i̧nö̧'a̧nö̧? ²⁰ Mo̧ro̧ päi'acu jö̧ttö̧'i̧nä̧, ni̧pä̧ro̧mȩcu̧ jö̧ttö̧'i̧nä̧ jahuätömä si'epö tticuäu̧; jahuätömä ya'utecutä hua'ö tticuäcuotö, yotute'i̧nä̧ tottö juiyönä̧tä̧. ²¹ ¿Ttoju odehuiyä appiyämä̧ jo̧ca̧'a̧ jahuätö 'torö tticumä? Jahuätömä hua'ö icuätö; jahuätömä huo̧juä̧ huȩnȩ'i̧nä̧ jui'ätötä hua'ö tticuäcuotö.