¹ Ja̧u̧ 'cuäopäji o'ca'a, Job ucuocu chutä uhuäpächinometä̧ surojönä pä'äcuähuinö. ² Ja̧u̧ pä'inö: ³ "Ji̧yȩnö̧ mo̧ro̧ chuhuäpächoca'a ji̧nö̧ttö̧tä̧ adihua'a, yodomä pä'inätö̧: "Ji̧'qui̧cha̧hua̧rö̧ uhuäbecuäjäju." ⁴ Ja̧u̧nu̧ mo̧ro̧ 'cuäopinö ttieruhuadó; Ju'toju kö̧ Dios ttamucuädöjuiyönä jȩa̧tö̧do, kä̧hua̧ kä̧dȩpö̧'i̧nä̧ ja̧u̧ru̧ kä̧dȩpö̧ juiyado. ⁵ Yo̧ö̧mä̧ ja̧'hua̧ta̧'a̧nö hua'are tto̧ȩpä̧rö̧'i̧nä̧ tta̧mo̧nä̧tä̧ jö̧ jahuä. Ajiya isoppatä a̧ttä̧di̧a̧rö̧do̧ ja̧u̧ru̧mä̧; O'cajuiyönä yo̧ö̧nä̧ jö̧mä̧ isopäi'önätä yettecunä. ⁶ Ji̧yȩnö̧ yodo ji̧nö̧mä̧, yo̧ö̧ yodotä a̧ttä̧chi̧'na̧ttö̧hue. Cuesehuätucuä yaute mo̧ro'i̧nä̧ ya'ate a̧'ȩttö̧mä̧; ttö̧'o̧cui̧'ö̧ juiyado kä̧hua̧ttö̧ pa̧ja̧cuo̧mȩ'i̧nä̧. ⁷ Topätucui, ja̧u̧nu̧ yodomä ya̧tȩn'i̧nä̧ uhuäpächö juiyinado; cuesehuätucu juiyö'anö ji̧na̧'a̧ ji̧yȩnö̧ mo̧ro̧mä̧. ⁸ Suronä ja̧ pä'ö pättä pä'ö ja̧'a̧ ji̧yȩnö̧ mo̧ro̧, jitö dä'ähuotö buo äca ö'orächönä jȩpö̧ huo̧juä̧tö̧mä̧. ⁹ Mo̧ro̧ ä'cacu siri'cä'inä ji̧yȩnö̧ mo̧ro̧mä̧. Ji̧yȩnö̧ pä̧nä̧ mo̧ro̧ ttusomenä'inä, ttö̧'o̧cui̧ö̧ juiyinado; Mo̧ro̧ juo̧a̧'a̧'i̧nä̧ tottöäjuiyönä, ¹⁰ dä̧bu̧ mu̧ȩcuä̧cho̧ca̧'a̧ ji̧na̧'a̧jä̧ttö̧ cha̧ju̧ttu̧ chu'uttächi'omemä, ttörö huȩnȩ jö̧mä̧ tochö juiyönä dajahuächinado ¹¹ ¿Dä̧ pe'ö 'corö́ pädiocaa ji̧na̧a̧jä̧ttö̧ chuhuächinö̧tä̧? ¿Dä̧ pe'ö chä̧'cua̧rö̧hua̧rö̧ chiyähuocaa ji̧na̧'a̧ttö̧ kuhuä beönötä̧ chä̧jú̧? ¹² ¿Dä̧ pe'ö kuäbecuinättö̧ttö̧ kihue'quiyunä kä̧mä̧dö̧? ¿Ta̧'a̧nö̧ pe'ö kajecuinättö̧ttö̧ ttörömä? ¹³ Ja̧'hua̧nö̧ ju̧ttö̧mä̧ jitämä pa̧ji̧sä̧ 'corönätä̧. Chäinö̧ttö̧mä̧ 'cuäächö pa̧ji̧sä̧. ¹⁴ Pi̧jä̧́ rȩjȩ́ ruhuotöcu ja̧'hua̧ta̧'a̧nö̧ huȩnȩ́ qui̧ȩpä̧rä̧tu̧cu̧'i̧nä̧, jitämä juiätö jitötä huatö oba ttaditina'a̧ttö̧. ¹⁵ Ruhuotö tti̧tti̧mö̧cu̧ ttä'ecuä'chinö̧ttö̧mä̧ttö̧, ya'tenä juätömä oro ku̧nä̧ri̧nä̧tö̧, juätömä̧ ttojusodenämä̧ platatä rö̧ä̧nä̧ ku̧nä̧ri̧tö̧. ¹⁶ 'Corujuo'ächinätö̧tä̧ ttuhuäpächinö̧ttö̧mä̧ttö̧, ppö'ä̧tö̧ yorö'iso tȩa̧u̧ topocotö jä̧'i̧ja̧'a̧nö̧. ¹⁷ Juoröttötä, suropätömä huȩnȩmä̧ juhua'a yabonö jȩpo̧co̧tö̧ ttäcuotö; juoröttötä mȩ'o̧pä̧rä̧tö̧mä̧ 'cuä'ächi'ö ttö̧'ä̧jä̧cuo̧tö̧. ¹⁸ Juoröttötä, cärenä pȩjä̧tö̧mä̧ yo̧mȩtȩnä̧ 'cuä'ächi'ö ttö̧'ȩjä̧cuo̧tö̧; jahuätömä tturuhuotö hue'ö huottö ttö̧ju̧cuo̧ca̧'a̧ttö̧. ¹⁹ Juoröttömä ta̧ju̧cuäyotö ka̧cuä̧tö̧, ppo̧'ä̧tö̧'i̧nä̧ tä̧mö̧'i̧nä̧; juoröttömä tturuhuotö huettömä̧ jȩpo̧co̧tö̧ ttäcuotö. ²⁰ ¿Tta̧'a̧nö̧ pä'ö ttuhuäpächönä jȩ'cua̧'a̧ttö̧ usurä ttȩmä̧huä̧cua̧'a̧nä̧mä̧? ¿Tta̧'a̧nö̧ pä'ö usurä ȩmä̧huä̧tö̧rö̧mä̧ yabonö a̧'cua̧rö̧ ttö̧jö̧nä̧ jȩpö̧jä̧ttö̧; ²¹ ya̧tȩ'i̧nä̧ micuä päi'önä jȩo̧co̧cö̧ ja̧'a̧nä̧ 'corujuoächatä pä'örömä; 'corujuoächäcuähuätä usurumä rö̧ä̧nä̧ micuäu dajö icuähuä ttusa'a jä̧'i̧nö̧'a̧nö̧? ²² ¿Tta̧'a̧nö̧ pä'ö a̧'cua̧rö̧ ttu̧ju̧nä̧ jȩä̧u̧jä̧ttö̧, hua'arenä pä̧nö̧tä̧ ttesehua'anö huotörömä̧? ²³ ¿Tta̧'a̧nö̧ pä'ö a̧'cua̧rö̧ iyöjä̧ttö̧ ya̧tȩ u̧mä̧nä̧'i̧nä̧ dajö dajahuächäcurumä, ya̧tȩ Dios tto'epö u̧ju̧nä̧cu̧ru̧mä̧? ²⁴ Ja̧'hua̧nö̧ ja̧'a̧, ttu̧cuä̧ ttucuajueimä, ajautä ajausä; chajaumä ajiya jä̧'i̧nö̧'a̧nö̧ huerächa'a. ²⁵ Ja̧'hua̧nö̧ ja̧'a̧ ttö yedecunä̧ ji̧nö̧mä̧ ttörötä ma̧ä̧mi̧nä̧cu̧sä̧; ttö chedecuinö̧mä̧ rȩbȩjui̧nä̧cu̧sä̧. ²⁶ U̧ni̧chä̧rö̧mä̧ chu̧ju̧juiyönä̧ jä̧cu̧sä̧, 'coruchi'ö'i̧nä̧ ja̧'hua̧ta̧'a̧nö̧ cuä'ächi'ö'i̧nä̧ chu̧ja̧jueimä huȩnȩtä̧ kä̧cu̧sä̧.