¹ Job yabocu ucuocu pä'inö: ² " Isottö̧, Dios ä̧cuo̧mȩnä̧ kä̧hua̧nä̧ tta̧huä̧rä̧ji̧'a̧nö̧ tta̧huä̧rä̧ttö̧hué, ³ chutä i̧tȩa̧u̧mä̧ chuyunä kä̧dȩpä̧jä̧cu̧sä̧, ja̧'hua̧nö̧ ja̧'a̧nä̧'i̧nä̧ yo̧mȩ'i̧nä̧ chutä i̧tȩa̧nä̧tä̧ cueächäjisä. ⁴ ¡Isottö̧, ttö möä̧ya̧ chö̧ji̧no̧mȩ ji̧ya̧ttö̧huȩ, Diosma cha̧hua̧ru̧hua̧ jö̧nä̧ chojusode'inä tta̧'a̧ri̧nö̧, ⁵ o'cajuiyönä JU̧RU̧HUA̧ ji̧nä̧ ttucu ö̧ji̧nö̧mä̧, ja̧'hua̧nö̧ ja̧'a̧ttö̧ chi̧tti̧mu̧'i̧nä̧ ttötä chippeyanä ko̧cui̧nä̧tö̧, ⁶ ji̧yȩnö̧ pä̧nä̧ chu̧mä̧nä̧nä̧ päcayä atateja isähua'inä a̧ttä̧chi̧na̧'a̧, ja̧'hua̧nö̧ ja̧'a̧nä̧'i̧nä̧ inähuättömä rä'opö huerächina'a a̧dȩja̧. ⁷ Ötahuiyänä dodächomenämä o'catoinä ca̧ca̧cu̧ tti̧ä̧mä̧do̧mȩtä̧ pä̧huä̧di̧'ȩnö̧sä̧ chö̧o̧mȩ päi'önä ötahuiyättömä, ⁸ u̧mä̧tö̧ muäyotö'inä ucuotönö tottinäcu̧sä̧ otonätä̧, ja̧'hua̧ta̧'a̧nö̧ buäcuächätö'inä ucuotönö ä̧rä̧mi̧'i̧nä̧tö̧ ttörö. ⁹ Ruhuotö tti̧tti̧mu̧'i̧nä̧ chichomenämä ttöcuococa'atä ki̧nä̧tö̧; ttänämä ttö̧mu̧tä̧ mu̧ȩcui̧nä̧tö̧ juätömä. ¹⁰ Tti̧huȩnȩ'i̧nä̧ raepocotö pinätö̧ ja̧'hua̧nö̧ ja̧'a̧ttö̧ ttättömä pättä pe'ömä juinätö̧. ¹¹ Ja̧'hua̧nö̧ ja̧'a̧, chucuocuäji ttä̧jö̧cuä̧ji̧ o'ca'a, jahuätömä adiunä jö̧nä̧tä̧ pä̧ttä̧cua̧sä̧; topi'ö o'cotömä, jahuätömä chutö'cö ji'ähuinä̧tö̧ ja̧'hua̧nö̧ ji'äu isopäi'önä ja̧'a̧ pä'inä̧tö̧ ¹² isopäi'önä ttö ji̧na̧'a̧ ja̧u̧ usurä i̧sa̧rö̧ u̧ji̧pö̧nä̧ ppä'ädinö ttörö huopönö jäepomenä̧mä̧ ja̧'hua̧ta̧'a̧nö̧ ya̧tȩ jä'o to̧'a̧mä̧, ppädö'anö hua̧ toiyäcumä. ¹³ Adiu pähuämä ttörö ichina̧'a̧ chu toepächa pä'ö huäjinä̧mä̧; ttömä recua kamiso'quinä eseäcuähuä ra̧jö̧nä̧ jȩpi̧nö̧sä̧. ¹⁴ Adihuomenä̧ jȩpi̧nö̧sä̧ ja̧'hua̧nö̧ jȩchä̧ji̧mä̧ ttörötä a̧ttä̧di̧'i̧na̧'a̧; adiu ttö jȩchä̧ji̧mä̧ ttö̧'ca̧tä̧huä̧ta̧ jä̧'i̧nö̧'a̧nö̧, ttucäyuhuä'ca jä̧'i̧nö̧'a̧nö̧ ji̧na̧'a̧. ¹⁵ Ttömä ä̧to̧ca̧ i'äre jä̧'i̧nö̧'a̧nö̧ huinösä̧, ppi̧sä̧ppi̧sä̧ 'chu̧ jä̧'i̧nö̧'a̧nö̧ huinö̧sä̧. ¹⁶ Recuä rö̧jä̧cu̧ jä'o jö̧nä̧ huinö̧sä̧; ttömä ka̧cuä̧mö̧ topä'chinö̧sä̧ ji̧nä̧ chi̧ȩru̧huä̧u̧rö̧mä̧. ¹⁷ Ttömä ttö̧ja̧sa̧ su̧ro̧pa̧ äcä dö'ö icuinö̧sä̧. Ttömä ttö̧'o̧ya̧rö̧ ȩmö̧ icuinö̧sä̧ ttajupiyä 'cä̧tȩttö̧. ¹⁸ Ja̧u̧nu̧ o'ca'a pä'inösä̧: Ttömä chä̧'ta̧nä̧ hua'ö chi̧cuä̧cua̧sä̧; ttö chu̧mo̧ro̧mä̧ yabonö rö̧ä̧chä̧cua̧'a̧ rȩba̧ o̧tȩ jä̧'i̧nö̧'a̧nö̧. ¹⁹ Ttörö 'chu̧huä̧ro̧mȩmä̧ ajecu 'chu̧huä̧rö̧nä̧ ka̧'a̧, ja̧'hua̧ta̧nö̧ yodo 'cuäo'önä chä̧na̧jui̧yä̧ 'cho̧ru̧huö̧tä̧ acuäbe'a'a. ²⁰ Ucuotäcuähuämä jareö jö̧nä̧ 'cuäopönä̧tä̧ ka̧'a̧, ja̧'hua̧ta̧nö̧ 'po'obö jareobö jä̧'i̧nö̧'a̧nö̧ 'cuäopönä̧tä̧ chujurumä ka̧'a̧ chu̧mö̧nä̧mä̧. ²¹ Ttö̧ja̧mä̧ ttö pädömä ä̧ju̧cuä̧tö̧; jahuätömä ttörö tta̧'ä̧ri̧nä̧tö̧; jahuätömä 'coruchi'ö pȩji̧nä̧tö̧ ro̧'ȩpö̧ jidähua'a ttä̧ju̧cua̧ pä'ö. ²² Ucuocu cädädomȩnä̧, jahuätömä yabonä̧nö̧ ucuocuinä̧tö̧; ttö̧ chucuocumä jahuätörö maina'a ajiya dahuipa'a jä̧'i̧nö̧'a̧nö̧. ²³ Jahuätömä ttörö tta̧'ä̧ri̧'ä̧nä̧tö̧, ajiya tta̧ttä̧ra̧'a̧ jä̧'i̧nö̧'a̧nö̧; jahuätömä ttä ba'epinä̧tö̧ ttö chucuocu ttahua pä'ömä, ajiya röji ja̧'a̧cu̧ ichoya jȩa̧'a̧ jä̧'i̧nö̧'a̧nö̧. ²⁴ Ttönä ya̧'a̧hui̧nö̧sä̧ jahuätö ttörö tta̧ttä̧ro̧co̧mȩnä̧; jahuätömä ya'ocuocotö pinä̧tö̧ chi'änä tȩya̧u̧mä̧. ²⁵ Ttö ji̧na̧'a̧ jahuätö jȩttä̧cuȩ a̧mö̧cuädinö̧mä̧ ja̧'hua̧nö̧ jo̧mȩnä̧ ttu̧ru̧hua̧ jö̧nä̧ ki̧nö̧sä̧; su̧ro̧da̧u̧ ttu̧ru̧hua̧ jä̧'i̧ja̧'a̧nö̧ ki̧nö̧sä̧, usurä ȩmä̧huä̧tö̧rö̧ tta̧'cua̧ ttȩmö̧nä̧ ppä̧dä̧cuä̧huä̧ i̧sa̧ 'cua̧rö̧nä̧.