¹ Jitä ttöttö'inä abonänö muäyotömä yori'iso juiätö ttörötä ya̧'a̧cuä̧tö̧, pitö muäyotö ttä̧o̧tö̧rä̧mä̧ ttucu ttadita pä'ö'inä chöjö'cö juiya'anö ja̧cu̧sä̧ chä̧ji̧mu̧rö̧ tta̧'a̧rä̧tö̧ ä̧hui̧ri̧tö̧ tippeyä'inä. ² Jueönämä, ¿tocu jö̧nä̧ ppättädö'anö ja̧'a̧ttö̧ jahuatö ttä̧o̧tö̧ biecuächätö ttujuru'inä juiyönä jiyupächätömä? ³ Jahuatömä usurä isotö ja̧'a̧ttö̧ ppäittö siähuächinätö̧; dea jui̧yä̧jä̧ttö̧ yodomä ihuehui appiyätä 'chainätö̧ jahuätömä. ⁴ Jahuätömä dea isä'che reä'chetä queinä̧tö̧ ja̧'hua̧ta̧nö̧ dau ojiyä'inä ja̧'a̧nä̧; retamä dau ihuehui appiyätä ji̧nä'a̧ ttu̧cuä̧mä̧. ⁵ Jahuätömä 'kö'kö jui'ö huopu räepu icuähuotö juinätö̧ nä̧u̧cuä̧rö̧rö̧ o'ca'anä ru̧ä̧rö̧ huotta'a jä̧i̧nö̧'anö. ⁶ Ja̧'hua̧'a̧nö̧ ja̧'a̧ttö̧ jahuätömä i̧huö̧mä̧ ka̧cui̧nä̧tö̧ dea pämäroppä ajehuiyä juttä ja̧'a̧nä̧ i̧nä̧huiyätä redähuacu jo̧mȩ. ⁷ Surä'cua jacuättö huopinätö̧ burrotö̧ huotta'a jä̧'i̧nö̧'a̧nö̧; ppäsecu ko̧cui̧nä̧tö̧ dauhuiyä dȩa̧'a̧, iso päi'önämä, ttö̧ja̧ tti̧tti̧mö̧ 'cua̧rö̧ juiyönä huinätö̧. ⁸ Ja'huätömä rä'epö tti̧cui̧nä̧u̧ ttö̧ja̧rö̧ cuä'ähuotörö 'cua̧rö̧nä̧. ⁹ Ja̧'hua̧nö̧ ja̧'a̧nä̧ jitämä, ja'huätö tti̧tti̧mu̧mä̧ ttörö 'cuäopinömä ra̧ra̧pö̧ ya̧ttä̧huȩ'ö̧nä̧tä̧ jȩpä̧tö̧. ¹⁰ Ja'huätö ttörömä kö'cöcötö ja̧'hua̧nö̧ ja̧'a̧tö̧ ttöttömä ototä ko̧cuä̧tö̧; ja'huätömä ichi'ömä chi'änä suttäcusä. ¹¹ Diostä ja̧'a̧ chu'popobö isappä'inä juiyudinömä u̧huo̧jua̧'a̧ttö̧ ttö chamöcuädö, jittö ttörö ya̧'a̧huä̧'chä̧'i̧jä̧tö̧mä̧ yettecuoca'atä chä'cajo̧mȩtö̧ ya̧'a̧huä̧'chä̧tö̧. ¹² Chu̧huo̧jua̧'a̧nä̧ chu̧mu̧nä̧tä̧ cä̧'ȩpä̧u̧ surojö huȩnȩ́ cuocuätörömä; juätömä otó ttȩpä̧cu̧sä̧ ja̧'hua̧nö̧ ja̧'a̧ttö̧ toicutä amucuädätö ttörömä. ¹³ Chujunärö̧'i̧nä̧ ttȩmi̧pi̧ni̧yä̧cu̧sä̧ ja̧'hua̧nö̧ jȩpu̧ siepu tticuiniyä̧cu̧sä̧, juätörö ttoepu ppäädaji'inä toäcusä. ¹⁴ Juätö ttichinäcu̧sä̧ suro̧da̧u̧ curä rohuähuö ttichaa jä̧i̧nö̧'a̧nö̧ ötähuiyä 'quiädö kö̧nä̧huä'ca jäyänä; juätö ttä̧u̧ta̧'a̧ttö̧ ttörö 'chottipinäcu̧sä̧. ¹⁵ Ja̧'hua̧nö̧ jo̧mȩnä̧ yeecue'inösä̧; ttö chucuomä ajiya isoppa otó ȩmi̧pa̧a̧ ja̧i̧nö̧a̧nö̧ ȩpi̧cu̧i̧nä̧cu̧sä̧; ttö chiäremä ajiya isoppa toepächaa ja̧i̧nö̧'a̧nö̧tä̧ ja̧cu̧sä̧. ¹⁶ Ja̧'hua̧nö̧ ja̧'a̧ jitämä cha̧'cua̧rö̧mä̧ 'corujuoächometä̧ ja̧'a̧; recuo mo̧ro̧ usurä ȩmä̧cuä̧huä̧tä̧ 'chuädi'inä̧cu̧sä̧. ¹⁷ Yodomä chihue'quiyömä 'tä̧rä̧chä̧cha̧'a̧; baraumä juächumä cha̧'cua̧ chȩmö̧ juiyönä ja̧'a̧. ¹⁸ Dios ö̧rö̧ä̧mä̧ chu̧'ca̧tä̧huä̧ti̧yu̧nä̧ 'chuhuädi'ina'a; pärochina'a ttö'ca̧tä̧huä̧ta̧ u̧rä̧u̧sa̧ jä̧i̧nö̧'a̧nö̧. ¹⁹ Ja̧u̧mä̧ redähuara̧'cu̧ icuinäcu; redä'ca i̧sa̧ppȩ 'cua̧ru̧nä̧tä̧ ja̧'hua̧ta̧'a̧nö̧ ä̧ya̧ri̧sa 'cua̧rö̧nä̧tä̧ juo'ächinö̧sä̧. ²⁰ Ttömä ucuru jä'epösä, ja̧'hua̧nö̧ jädepa'a ucumä ädätocöjä; chä̧rä̧mi̧'o̧mȩnä̧mä̧, yotäcu to'cuäcusä. ²¹ Ucumä pärotähuö ttörömä suronätä̧ jȩpä̧'i̧jö̧jä̧; cujurunä̧tä̧ ttörömä rö̧'ä̧rö̧jä̧. ²² Ucumä ttörö cä'epä'ijujä isoppacutä ja̧'hua̧nö̧ oto ȩpö̧ yabocutä cuicuä'ijäcusä juhua'atäcu cu'upä rohuome'i̧nä̧ yabonä. ²³ Ja̧'hua̧nö̧ ja̧'a̧ttö̧ hua'arera̧'a̧tä̧ cuȩpä̧cua̧sä̧ pä'ömä̧ huo̧jua̧sä̧, hua'ö tticuäcuomemä o'catoi'önä a̧'cuä̧rä̧tö̧mä̧ juhua'atä pätecuotö. ²⁴ Ja̧'hua̧nö̧ ja̧'a̧nä̧ ¿dijä̧ttö̧ ma̧ä̧cho̧mȩnä̧ ppäda pä'ö u̧mö̧ tȩä̧dä̧cua̧mä̧? ¿Dijä̧ttö̧ huȩnȩ jä̧cu̧ ppättädarö pä'ö jä'epocömä? ²⁵ ¿Ja̧u̧ huȩnȩ hua̧rö̧mä̧ ajahuocö pi̧nö̧sä̧ tä̧ji̧? ¿Recuä rjä̧cu̧ru̧mä̧ u̧su̧rä̧ i̧sa̧ jö̧nä̧ jȩpo̧cö̧ pinösä̧ tä̧ji̧? ²⁶ Ttöma adiu juäi chusomenämä, surojötä rȩbȩhui̧na̧'a̧; tȩya̧u̧ tta̧dä̧ro̧mȩnä̧mä̧, ja̧u̧ tȩya̧u̧ ka̧ pä'ö jo̧mȩmä̧ yo̧ö̧tä̧ rȩbȩhui̧na̧'a̧. ²⁷ Chamiso'quimä a̧'cua̧ tta̧huȩcua̧'a̧ ja̧'hua̧ta̧nö̧ a̧'cua̧'i̧nä̧ ȩmo̧ca̧'a̧; usurä ȩmä̧cuä̧huä̧ mo̧ro̧mä̧ huȩnȩcuä̧chö̧nä̧tä̧ ichina'a. ²⁸ Ttömä ppa̧'ä̧chä̧rö̧ cue'ächö kä̧'i̧jö̧sä̧ yo̧ö̧nä̧ kä̧nö̧mä̧, ja̧u̧ yo̧ö̧mä̧ mo̧ro̧ kä̧hua̧ jähuämäcö̧ ja̧'a̧; ttö̧ja̧ ttö̧'cä̧trttö̧ ä̧rä̧mi̧'ö̧ huopäjisä ppättädattö pä'ö. ²⁹ Ttomä de'a ä̧hui̧ri̧tö̧ tta̧hua̧ru̧hua̧sä̧, recuätö avestrus pä̧ttä̧u̧'i̧nä̧. ³⁰ Ttö chi̧jȩta̧mä̧ idicua'a ja̧hua̧ta̧nö̧ mo̧ä̧chö̧'i̧nä̧ mo̧ä̧chä̧cu̧sä̧; chihue'kiyu'inä duottö cuo'ö icuäcusä. ³¹ Ja̧hua̧nö̧ ja̧'a̧ttö̧ , ttö chiäre arpamä ka̧'a̧ cua'are rä̧cuä̧cuä̧ta̧, ttö chiäre mä̧rä̧nä̧mä̧ jitö ajahuätörö rä̧cuä̧cuä̧ta̧ ka̧'a̧.