¹ Iso päi'önä ka̧'a̧ 'cua̧ra̧'a̧ plata sattome, ja̧'hua̧ta̧'a̧nö̧ oro päcuäitä päi'önä 'cu tticuome'inä. ² Cuoräumä rättepö ja̧'a̧ rȩjȩttö̧; Cobremä 'cu icuähua inähuattö räopächa pä'ö. ³ Ttä̧ja̧sa̧mä yo̧ö̧ si'epö tȩa̧u̧ttö̧ ȩpö̧ ja̧'hua̧ta̧'a̧nö̧ usu oto bȩtti̧pä̧ro̧mȩttö̧, yo̧mȩ jacuä pȩjö̧'i̧nä̧ usätö ja̧'hua̧ta̧'a̧nö̧ täcua'a jacuä pȩ'ö̧'i̧nä̧. ⁴ Ja̧u̧mä̧ reju sa'ö ttö̧ja̧ ttö̧jo̧cuo̧mȩttö̧'i̧nä̧ oto, ya̧tȩttö̧'i̧nä̧ cue'ächö i̧'cho̧co̧mȩ. Ja̧u̧mä̧ ototä kö̧ ttö̧ja̧ttö̧'i̧nä̧; ja̧u̧mä̧ isappänä ti̧ä̧dä̧cuä̧hua̧'a̧tä̧ hui'cupö kö̧. ⁵ Cuähuä'inä rȩjȩttö̧tä̧ bahuö́, ucurähua'inä deanamä huihuacuaa. ⁶ Safiro o'qui'inä ka̧a̧ juä̧jä̧nä̧ttö̧tä̧ cuo̧cui̧cua̧a̧, ja̧'hua̧ta̧'nö̧ juo̧ú̧ i̧sa̧ppȩnä̧mä̧ ka̧a̧ oro'inä. ⁷ Korotö isotörö cui'inä jȩru̧pa̧ juo̧ú̧ ö̧jo̧mȩmä̧ ja̧'hua̧ta̧'a̧nö̧ pare'inä toocome. ⁸ Isotö adihuätö'inä juȩnȩmä̧ cuettächocome ja̧'hua̧ta̧'a̧nö̧ pä̧i̧cua̧ mö̧ yähui'inä juȩnȩnä̧mä̧ 'cuäopocome ⁹ Ttö̧ja̧sa̧mä̧ inäcä 'quiya'a sa'ö icu; inähuä kada'ca jo̧mȩ jubu sa'ö. ¹⁰ Inähuiyä kä̧tȩnä̧ isäju sa'ö; ja̧'hua̧nö̧ sa'ö jua'attö topö micuäu juäi. Aje huerächö juiyönä sasapä cuä̧tä̧dö̧ icuätö; ¹¹ jua'a jacuä dajö icuähua'a pejö, Ja̧u̧mä̧ panä tottönä päi'önä i̧jȩpö̧. ¹² ¿Torö po̧cui̧cua̧'a̧ jä̧ttö̧ huo̧juä̧hua̧ hȩnȩmä̧? ¿Tȩnȩjä̧ttö̧ huo̧juä̧huä̧ kada'cahuoimemä? ¹³ Ttö̧ja̧sa̧mä̧ jȩru̧pa̧ ja̧u̧ imicuäumä; pi̧ji̧ ttö̧ja̧ttö̧mä̧ po̧cui̧cuo̧cö̧ huo̧juä̧huä̧mä̧. ¹⁴ Aje täcuomettö'inä ja̧'hua̧ta̧'a̧nö̧ rȩjȩ jacuättö'inä pä'ätö: Ttönämä ko̧ca̧'a̧; dä'ähuoto'onä päa'a: Ttucumä ko̧cö̧, ¹⁵ Oronä'i̧nä̧ mitömä̧ ȩmä̧huo̧cö̧; ja̧'hua̧ta̧nö̧ platanä'i̧nä̧ mi̧cuähuöcumä pa̧ja̧tä̧cuä̧huo̧cö̧ ja̧'a̧. ¹⁶ Ofirttö oro'i̧nä̧ ónix'inä, Safiro'inä micuäucumä̧. ¹⁷ Oromä̧, Cristal pättöcumä imicuämä yorätehuoca'a; ja̧'hua̧ta̧nö̧ rö̧ä̧nä̧ micuäu oro adihuäjueicumä päroäcuähuoca'a. ¹⁸ Yabonä coral imicuäcu'inä jazpe imicuäcu̧'i̧nä̧ ttu̧huȩnȩta̧ pä'ömä jo̧ca̧'a̧, huo̧juä̧huä̧ huȩnȩmä̧ rubíes micuähuomȩttö̧'i̧nä̧ yabonänö micuäu ja̧'a̧. ¹⁹ Etipíattö topacio pättöcu'i̧nä̧ yorätehuoca'a, ja̧'hua̧ta̧'a̧nö̧ päcuäi orocu'i̧nä̧ ja̧u̧ mi̧cuäu'a̧nö̧mä̧ micuähuoca'a. ²⁰ ¿Ja̧'hua̧nö̧ ja̧'a̧ huo̧juä̧huä̧ huȩnȩmä̧ tottö icha'attö̧? ¿Torö kadä'cahua'attö huo̧jui̧'ä̧cuä̧huä̧ huȩnȩmä̧? ²¹ O'catoi'önä tta̧'cua̧rö̧ ku̧nä̧rä̧tö̧rö̧mä̧ tottö juiyönä daju ku̧nä̧hua̧'a̧ huo̧juä̧huä̧ huȩnȩmä̧ ja̧'hua̧ta̧'a̧nö̧ ppi̧yu̧ mo̧ro̧jä̧nä̧ co̧'ä̧rä̧tö̧'i̧nä̧ ja̧u̧mä̧ topocotö. ²² Si'epö icuähuä'i̧nä̧ ja̧'hua̧ta̧nö̧ hua'are'i̧nä̧ pa̧'a̧nö̧ pä'a: ujutumä suro rä̧mi̧pö̧tä̧ ja̧u̧ tö'cömä tä̧ja̧nä̧mä̧ ä̧ju̧cui̧nä̧tö̧jä̧. ²³ Dios pa̧'a̧nö̧ po̧cui̧cuä̧ pä'ö huo̧jua̧ ja̧u̧mä̧; Ja̧u̧mä̧ ja̧u̧ ko̧mȩ'i̧nä̧ huo̧jua̧. ²⁴ Ja̧'hua̧nö̧ ja̧'a̧ Ja̧u̧mä̧ pi̧jä̧ rȩjȩttö̧ tti'äre beipa'a ka̧cu̧'i̧nä̧ topö ja̧'hua̧ta̧'a̧nö̧ o'cajuiyönä mo̧ro̧jä̧ dȩa̧'a̧ ka̧cu̧ topö. ²⁵ Ja̧u̧tä̧ ja̧'a̧ isoppa ujuru'i̧nä̧ iyinö juhua'atäcu ajiya ro̧mȩ pö̧nä̧'i̧nä̧ huo̧jua̧mä̧. ²⁶ JA̧U̧MÄ̧ hueähuänä pä'ö ku̧ni̧nö̧ ajiya jä̧cuä̧mä̧ ja̧'hua̧ta̧nö̧ cu'upä köröächomenä u̧mä̧nä̧ jä̧cuä̧'i̧nä̧ jȩpi̧nö̧. ²⁷ Ja̧'hua̧nö̧ ja̧'a̧ttö̧ JA̧U̧MÄ̧ huo̧jä̧cuä̧mä̧ topinö jȩttö̧ttö̧ micuäcua'a pä'ö ku̧ni̧nö̧, ja̧'hua̧ta̧nö̧ ka̧cuä̧mu̧'i̧nä̧ topinö JA̧U̧MÄ̧. ²⁸ JA̧U̧MÄ̧ päinö ttö̧ja̧rö̧mä̧: CUÄ̧NÄ̧HUA̧TU̧CU̧RU̧MÄ̧ ye'ecunö topätucui ja̧u̧mä̧ huo̧jä̧cuä̧ ja̧'a̧; surojöttö töipächäcuäcuämä huo̧jä̧chi̧'ä̧cuä̧cuä̧ ja̧'a̧.