¹ Job yabocu ucuocu ju̧o̧u̧ru̧ pä'inö: ² DIOSMÄ kö̧ päösä, ttö chusuräu'inä ȩmi̧pu̧nö̧, ö'cajuiyönä ju̧ru̧hua̧mä̧, ttö cha̧'cua̧rö̧'i̧nä̧ cha̧'cua̧ tta̧dȩcu̧nä̧ jȩpi̧näcu̧sä̧, ³ ji̧nä̧ cha̧'cua̧rȩ'i̧mä̧, DIOS amiyoppamä chi̧ji̧yu̧nä̧tä̧ ka̧a̧. jua̧'a̧nö̧tä̧ chi̧jä̧cua̧sä̧. ⁴ Ttö chättömä iso jo̧cö̧mä̧ chucuocuiyä̧cua̧sä̧ ja̧'hua̧ta̧'a̧nö̧ chi̧nȩttö̧'i̧nä̧ iso jo̧cö̧mä̧ chucuocui̧yä̧cua̧sä̧; ⁵ ttömä ucutu päcuätucumä iso ja̧a̧ jö̧nä̧mä̧ päocösä; huaö́ chicuomejubu huäjunä chi̧jä̧i̧mä̧ ä̧ppu̧tä̧ro̧cö̧sä̧. ⁶ Ttömä huȩnȩ jui̧'a̧sä̧ pädäutä 'quiyönä chu̧dä̧rä̧cuä̧huä̧cua̧sä̧ ja̧'hua̧nö̧ ja̧'a̧ttö̧ ttö jinä cha̧'cua̧rä̧i̧mä̧ chamucuädäjäjimä cä'ädi'ocö chä̧cua̧sä̧. ⁷ Ttö cha̧bo̧'cha su̧ro̧pa̧ hua̧mä̧ ro̧ȩcuä̧ i̧sa̧tä̧ ro̧ȩpa̧rö̧ pä'ö; ja̧'hua̧nö̧ ja̧'a̧ttö̧ ttö cha̧bo̧'cha̧ päi'önä kö̧rö̧mä̧ ro̧ȩcua̧tä̧ ö̧jä̧cua̧. ⁸ Ja̧'hua̧nö̧ jö̧ttö̧mä̧, ¿Tta̧'a̧nö̧ ja̧'a̧jä̧ttö̧ su̧ro̧pa̧ a̧'cua̧ u̧huä̧nä̧rö̧mä̧ Dios ja̧u̧ a̧'cua̧rö̧ 'cho'ipö ȩmi̧po̧mȩnä̧mä̧? ⁹ ¿Diosmä ä̧ju̧cuä̧cua̧tä̧ji̧ ajuäunu jäepömä ja̧u̧ru̧ huȩnȩ jö̧ ichomenämä? ¹⁰ ¿Esehuäcua̧tä̧ji̧ o'cajuiyönä ju̧ru̧hua̧rö̧mä̧ ja'huatanö 'cuä'opönä jä̧ȩpä̧cua̧ tä̧ji̧ Diosrömä?. ¹¹ Ttömä ucuturu Dios ujuru chu̧huo̧juȩtä̧cuo̧tö̧jä̧; ttömä o'cajuiyönä ju̧ru̧hua̧ a̧mö̧cuädömä̧ daju icuocö chä̧cua̧sä̧. ¹² Topätucui, ucutu o'catoi'önä cua̧mö̧nä̧ pa̧ja̧tö̧ topinä̧tö̧jä̧; ¿ja̧u̧nu̧mä̧ tta̧'a̧nö̧ pä'ö ja̧u̧ micuähuocömä cucuocuätucua'attö̧? ¹³ Diosmä a̧mö̧cuädö ku̧ni̧nö̧ ttö̧ja̧sa̧ su̧ro̧pa̧ i̧rȩbȩhuä̧cuo̧mȩmä̧, pi̧yȩtä̧ i̧yä̧cua̧ o'cajuiyönä ju̧ru̧hua̧mä̧ ja̧u̧ suronä jȩpö̧rö̧ iya päinö̧mä̧: ¹⁴ I̧tti̧mö̧ recuätörö ku̧nä̧rö̧mä̧ curä'chunä cuä'äu i̧cuä̧hui̧yä̧cua̧; ja̧u̧ i̧tti̧mö̧mä̧ ttu̧cuä̧'i̧nä̧ yorö'iso juittäcuotö. ¹⁵ Jitö hua'au tticuinö o'ca ka̧cui̧pi̧nä̧tö̧mä̧ mä̧richeittö hua'ö tticuäcuotö, ja̧'hua̧ta̧nö̧ rȩcua̧mö̧mä̧ juätörömä̧ ajahuocotö ttäcuotö. ¹⁶ Ya̧tȩ ttö̧ja̧sa̧ sö̧ro̧pa̧mä̧ pärätä'i̧nä̧ redä'ca i̧sa̧ppȩmä̧ jä̧'i̧nö̧'a̧nö̧ ca̧ca̧tö̧ uta'anä ja̧'hua̧ta̧'a̧nö̧ pu̧jä̧ti̧yu̧'i̧nä̧ redä'ca jä̧'i̧nö̧'a̧nö̧ ö̧ca̧ca̧ta̧'a̧nä̧, ¹⁷ ja̧u̧mä̧ ppu̧jä̧ti̧yu̧'i̧nä̧ ö̧'ca̧ca̧ta̧'a̧nä̧ ttö̧ja̧ adiu jȩpä̧tö̧mä̧ ttötäcuotö ja̧'hua̧ta̧nö̧ ttö̧ja̧ suronä̧ jȩpo̧co̧tö̧mä̧ pärätämä̧ jitötä tta̧mö̧nä̧ 'cä̧'ȩcu̧ ttiyä'chäcuähuäcuotö. ¹⁸ Ja̧u̧mä̧ äucä adita'a jä̧'i̧nö̧'a̧nö̧ aditö ojusodemä, tta̧huä̧rä̧cuä̧huä̧ ttö̧ja̧sa̧ udahuochome adita'a jä̧'i̧nö̧'a̧nö̧. ¹⁹ Ja̧u̧mä̧ ruhuotö ttä̧'ä̧ppä̧nä̧ ä'ö, ja̧'hua̧nö̧ ja̧'a̧nä̧ juhua'a yabonömä̧ ja̧'hua̧nö̧mä̧ jȩa̧ pä'ömä huocö; iäre ye'ädö toomenä̧ o'cajuiyönä toepächa'atä ji̧na̧'a̧. ²⁰ Yecunä jö̧nä̧ rȩbȩcuä̧cu̧ aje 'cua̧rö̧nä̧; yodo cu'upätä cuä'ö ȩmi̧pä̧cu̧. ²¹ Ka̧cua̧ rä'opa'acutu ichoppa oto ȩmi̧pä̧cu̧; ojusode ö̧jo̧mȩttö̧'i̧nä̧ u̧mi̧cu̧ juatädö räepu icuäcu. ²² Juoppa cuächi'oca'a ppu'ö icuäcu ja̧u̧mä̧; huoppatö töipächapä'ö jȩa̧nä̧'i̧nä̧ töipächiyönä ja̧cu̧. ²³ Ja̧u̧mä̧ u̧mu̧ ppȩö̧tä̧ ya̧cuä̧cuä̧'chä̧cu̧; amonä ojusodettö juanö rä̧mi̧pu̧nä̧ räepu icuäcu.