¹ Ja̧u̧nö̧ o'ca'a Jobmä̧ päi'nö̧: ² "¡Tocu ppäcuäda'anö̧ ja̧'a̧ttö̧ yä̧tȩ ujuru'i̧nä̧ jui̧'a̧rö̧mä̧! ¡Tocu ö̧ji̧po̧nä̧ jȩ'cu̧'a̧nö̧ ja̧'a̧ttö̧ öjonä̧'i̧nä̧ ujurumä̧ jui̧'a̧rö̧mä̧! ³ ¡Tocu jicuähua'anö̧ ja̧'a̧ttö̧ ya̧tȩ huo̧juȩcu̧nä̧ a̧mu̧cuädäcuähuä jui̧'a̧rö̧mä̧ ja̧'hua̧ta̧nö̧ jiäcuähuättö huo̧jui̧'ä̧cuä̧huä̧ ttucuocua'a rä̧mipö̧nä̧'i̧nä̧! ⁴ ¿Di ppäda'anä̧ cuocuäjättö pi̧yȩ huȩnȩmä̧? ¿Di a̧'cua̧ru̧hua̧ ichinä̧ttö̧ ucurumä̧? ⁵ 'Corujuo'ächätömä̧ ye'ecu tti̧ä̧huä̧tö̧, jitö aje dȩa̧'a̧ ka̧cuä̧tö̧'i̧nä̧ ja̧'hua̧ta̧nö̧ o'catoi'önä̧tä̧ ju̧huȩnȩ ka̧cuä̧tö̧mä̧. ⁶ Hua'are rejumä̧ Dios ä'ca jo̧mȩttö̧mä̧ bahuecua'atä ka̧'a̧, a̧mö̧nä̧ pa̧ja̧tö̧ si'ecu icuähua pä'ömä mö̧ȩcua̧'a̧tä̧ ja̧'a̧ Ja̧u̧nä̧mä̧. ⁷ JA̧U̧MÄ̧ cäepu rö̧ni̧nö juiyomettö̧ mo̧ro̧ji̧yä̧mä̧ ka̧cua̧ u̧cuo̧jua̧'a̧cu̧ttu̧, ja̧'hua̧ta̧nö̧ juiyomettö̧ rö̧ni̧nö rȩjȩ'i̧nä̧. ⁸ JA̧U̧MÄ̧ ajiya isoppa ri'oppa ca̧ca̧tö̧ rö̧ni̧nö, ja̧'hua̧'a̧nö̧ ja̧'a̧nä̧'i̧nä̧ juoppamä 'quȩrä̧hui̧ocoppa jua'attömä. ⁹ JA̧U̧MÄ̧ yodo ka̧cua̧ ö̧ro̧mȩ'i̧nä̧ ajiya isoppa a̧tta̧chi̧'ö̧nä̧ jȩpu̧. ¹⁰ JA̧U̧MÄ̧ aje dähuoto jo̧mȩttö̧ ȩmu 'quȩ'ȩpu̧ ku̧ni̧nö̧ mo̧ro̧ ja̧cuä̧'i̧nä̧ ja̧'hua̧ta̧nö̧ yo̧'ö̧ ja̧cuä̧'i̧nä̧. ¹¹ Mo̧ro̧jä̧ 'chu̧'ä̧rö̧ o'ca'inä ye'ecui'ö ttö̧'ä̧hua̧'a̧ CHUTA amisurächiu'omenämä. ¹² Ja̧u̧mä dä'ähuoto ppahuomenä'inä ujurunä huirodö rö̧nö̧; Chutä u̧huo̧juo̧mȩnä̧ si'epö icuinö Rahab'rö'inä ¹³ Amiyu isoppanä ppö'ö rö̧ni̧nö̧ mo̧ro̧jä̧'i̧nä̧; ucurä'chu ppurahui'önä ta'inä äca tö'ipächörö. ¹⁴ Topi, pi̧yȩ ji̧'qui̧cha̧nö̧tä̧ ja̧'a̧ ujuruttu i̧jȩpö̧mä̧; ¡Ujutumä seppappanö ucuocua'atä ä̧ju̧cuä̧tö̧jä̧ ja̧u̧ru̧mä̧! ¿Dijä̧ttö̧ u̧huo̧juä̧chi̧'a̧nö̧ hua̧mä̧ ujuruttu pä̧i̧cu̧nä̧ rä̧mi̧pa̧'a̧mä̧?"