¹ Ja̧'hua̧nö̧ ja̧'a̧ Zofar naamat ttö̧ja̧sa̧ ädätömä̧ pä'inö̧: ² "Cha̧mö̧cuädönämä̧ jurunä̧nö̧ chädäta pä'ö hueäcusä, ucu päcunä cha̧'cua̧ rodecumä. ³ Päcu chä̧ju̧cu̧mä̧ ttörömä suronä päcutä ja̧'a̧, ja̧'hua̧nö̧ ja̧'a̧nä̧ 'cha̧'cua̧ru̧hua̧nä̧ huo̧juä̧chi̧'ö̧mä̧ chädäcujä. ⁴ ¿Ucumä jȩru̧pa̧jä̧ mo̧ täbocu 'cuäopinömä, Dios ttö̧ja̧sa̧rö̧ pi̧jä̧ rȩjȩnä̧ u̧ju̧ni̧nö̧mä̧: ⁵ ttö̧ja̧sa̧ su̧ro̧pa̧mä̧ isojuoepömä jurunä̧tä̧ ja̧'a̧ pä'ömä, ja̧'hua̧ta̧nö̧ ttö̧ja̧sa̧ su̧ro̧pa̧mä̧ jurunä̧tä̧ eseu pä'ömä? ⁶ Ttämonä ucuo tettähuömä mo̧ro̧ jä̧ra̧'a̧ rä̧bȩcua̧'a̧nä̧'i̧nä̧, ja̧'hua̧ta̧nö̧ ttu'inä ajiya isoppara'a rä̧bȩcua̧'anä, ⁷ jahuätömä ttödäpähuächäcuotö 'cuä'opunätä̧ ttamonä ttite 'cua̧rö̧nä̧; jitö ja̧u̧ru̧ topäjätömä pättacuotö:'? Tene ö̧jä̧ ja̧u̧mä̧?'. ⁸ Ja̧u̧mä̧ 'cuo̧ti̧ cua̧rö̧nä̧ ö̧dä̧pä̧cuä̧'chä̧cua̧ ja̧'hua̧ta̧nö̧ po̧cui̧cuo̧cö̧ jä̧cua̧, yodotä tottö o'ca'a jä̧i̧nä̧'anö u̧ni̧chi̧ä̧cuä̧huä̧cua̧. ⁹ Ttöärenä topinätö̧'i̧nä̧ juhua'a yabocumä to̧tti̧yä̧cua̧; ahuäruhuä'inä pä'äjita'anämä totti̧yä̧cua̧. ¹⁰ I̧tti̧mö̧mä̧ pä'äjita'anö esecu ttucuocuäcuotö usurä isotörö; suronä jȩpi̧nä̧tö̧mä̧ pä'äjita'anö ppa̧ttä̧dä̧cuo̧tö̧ micuäu juäi tȩmipi̧nö̧mä̧. Muä̧ya̧ ujuruhua'a jä̧'i̧nö̧'a̧nö̧ ujuruhuätö ttidepänämä. ¹¹ Ja̧'hua̧nö̧ ja̧'a̧nä̧ chutäcu rȩjȩ jacua rȩä̧dö̧ i̧cuä̧huä̧cuä̧. ¹² Ja̧'hgu̧a̧nö̧ ja̧'a̧nä̧ suronä jȩä̧cuä̧huä̧mä̧ adihua'a adiunä a̧dö̧ juäi cucua'a 'cua̧rö̧nä̧, jua'amä i̧nȩ de'a dajó icuähua'a ȩnä̧ra̧'a̧nä̧ jȩpö̧, ¹³ jua'amä juȩnȩtä̧ ȩnä̧rö̧ ja̧'hua̧nö̧ jȩpö̧ rä'epö icuä'inä pä'ocö ättömä-- ¹⁴ Tu̧cuä̧ ttucuomenä ttu̧huä̧sa̧ jacuättömä ä̧'ti̧pä̧chö̧; Äca u̧mä̧nȩhuä̧ jä̧'i̧nö̧'a̧nö̧ pärohuächäcu ja̧u̧ jacuättömä. ¹⁵ Juo̧u̧mä̧ äre micuäujei u̧ju̧nä̧rö̧mä̧ huaadötä kö̧nö̧, ja̧'hua̧nö̧ ja̧'a̧nä̧ juo̧u̧mä̧ pääjita'anö i̧mi̧cu̧ räepu'icú; u̧ju̧nä̧rö̧ jacuätöttä DIOSTÄ räepu'i̧cuä̧cua̧. ¹⁶ Juo̧u̧rö̧ surojötä ȩpi̧cuä̧cua̧; suronä ucuocutä äcá u̧mä̧nȩhuä̧ jä̧i̧nö̧'a̧nö̧ cuäötä̧ i̧cuä̧cua̧ ¹⁷ Adihuäjuei iyömä ȩmi̧yä̧cua̧ juo̧u̧mä̧, maya ju̧ttö̧'i̧nä̧ ja̧'hua̧ta̧'a̧nö̧ i̧ä̧de'ca'inä. ¹⁸ Aditähuättö'inä ppa̧a̧dö̧ tti̧cuä̧cua̧ ja̧'hua̧ta̧'a̧nö̧ cuänö'inä ucuiyä̧cua̧. Iäre micuäu juäittö ȩmu̧'i̧nä̧ ärehuiyä̧cua̧ juo̧u̧mä̧. ¹⁹ Ja̧'hua̧nö̧ ja̧a̧ ucuo teähuaattö unöchi'inö ttö̧ja̧ usurä isotörö; aditocode ji̧no̧dȩnä̧ ucuo juiyönä doächinö̧ juo̧u̧mä̧. ²⁰ Dä̧bu̧ pe'ö chutä eseu i̧ji̧nö̧mä̧ ttö̧huȩpä̧rä̧chi̧o̧ca̧a̧ ji̧na̧'a̧ttö̧, chutä u̧ju̧nä̧ri̧nö̧ttö̧ a̧mu̧nä̧ ö̧ji̧pa̧ peömä ju'i̧a̧. ²¹ Juo̧u̧mä̧ yoriso ji̧'qui̧cha̧nö̧'i̧nä̧ kö̧ni̧po̧cö̧ pinö; ja̧'hua̧nö̧ ja̧'a̧ttö̧ u̧mu̧jähuä rö̧ä̧chö̧'i̧nä̧ recuomä ö̧ju̧nä̧ri̧yä̧cua̧. ²² Ri̧ȩnä̧ micuäu juei ö̧ju̧nä̧ra̧'a̧nä̧ huȩnȩ́ jö̧tä̧ jȩä̧cua̧; juo̧ú̧ u̧mu̧jähuä usurä isotö o'catoinä ttȩmi̧pi̧ni̧ya̧cu̧. ²³ Ja̧u̧ u'cäbiyu u̧cuȩ suhuädi'önä päi'omenä̧, Diosmä̧ a̧mi̧su̧rächi'äcu ja̧u̧rö̧ ö̧'ä̧i̧mä̧ i̧cuä̧cua̧; Diosmä̧ rö̧ȩpö̧ ja̧u̧rö̧ ma̧ä̧mö̧nä̧ jȩä̧cua̧ cuä̧nö̧ ö̧'a̧'a̧nä̧. ²⁴ ja̧u̧mä̧ curä rohuähuäcuähuä ȩpä̧tö̧ttö̧ tö̧i̧pä̧chä̧cua̧, 'po'obu broncetö isopunä̧ 'po̧'ä̧huä̧cua̧. ²⁵ 'Cu̧'u̧pa̧ri̧mä̧ anane 'cä̧tȩ doächi'ä̧cua̧ ja̧'hua̧ta̧nö̧ ppurahui'önä; isopäi'önätä̧ päjure so̧'o̧mȩ saruhuomemä atiyanä ppurahui'ö räo'äcua'a; rö̧ä̧nä̧ yecuäcuähuämä ja̧u̧rö̧ icha'a. ²⁶ Yorö'iso yo̧u̧tä̧ a̧ttä̧di̧a̧'a̧ rö̧ä̧nä̧ micuäu jähuämä; ocurä ttö̧ja̧ kuhuähuocarämä kutä icuäcuarä; ojusodenä ka̧cu̧'i̧nä̧ o'cajuiyötä ku icuäcua'a. ²⁷ Mo̧ro̧jä̧nä̧ ka̧cuä̧tö̧mä̧ suronä̧ jȩä̧ji̧ tti̧jȩpä̧cuo̧tö̧ ja̧'hua̧ta̧nö̧ pi̧jä̧ rȩjȩnä̧ ka̧cuä̧tö̧mä̧ ja̧u̧cu̧ tturohuähuäcuotö jiäcuähuä jö̧nä̧tä̧. ²⁸ Cuojusodettö ruhuo juocumä̧ to̧ȩpä̧chä̧cuȩ; öäremä räopäcua'a Dios ö̧ra̧huä̧rö̧ mo̧ro̧. ²⁹ Pi̧yȩ ja̧'a̧ su̧ro̧pa̧rö̧ 'cuä̧o̧pä̧cuȩ Dios a̧mö̧cuädö u̧ju̧ni̧nö̧mä̧, ja̧u̧ru̧ iya pä'ö Dios yȩnȩtȩ u̧ju̧ni̧nö̧mä̧.