¹ Ja̧'hua̧nö̧ ja̧'a̧ Job ädätömä̧ pä'inö̧: ² "¿Ti̧yȩnö̧ jubö ttörömä usurä chȩmä̧u̧nä̧ jȩ'cuä̧tu̧cuä̧cua̧'a̧ttö̧ ja̧'hua̧ta̧nö̧ cui̧huȩnȩtu̧cu̧nä̧ chu'toruhuächunä̧tä̧? ³ Ucutu ttörö suronä päcuätucumä dieznö̧ jo̧mȩnä̧ ja̧'a̧; ucutumä dä'ärö̧jo̧co̧u̧jä̧ ttörö pä̧i̧cu̧nä̧ päcuä'chätucua'amä. ⁴ Isopäi'önä surojö jäyä jȩchi̧nö̧ttö̧mä̧, suronä̧ jȩchi̧nö̧mä̧ ttönätä̧tä̧ ki̧'ä̧cua̧'a̧. ⁵ Ucutumä ttöttö'inä abonänö adihuä isotöjä pä'äcuätöjä ja̧'hua̧nö̧ ja̧'a̧ttö̧ ttö chusuräumä ya̧'a̧cuȩä̧tö̧jä̧ ⁶ ucutumä cu̧huo̧juä̧tu̧cua̧'a̧nö̧ ja̧'a̧ Diosmä̧ suronä jȩchä̧ji̧tä̧ chuädö ku̧nö̧ ro̧ȩpä̧cu̧sä̧. ⁷ Ja̧'hua̧nö̧ ja̧'a̧ttö, ttömä huopu jäepusä: ¡ppädattö pä'ö! ja̧'hua̧nö̧ ja̧'a̧nä̧ ya̧tȩinä ädätococusä. ⁸ Ttömä ajahuö huopusä ppädattö pä'ö, ja̧'hua̧nö̧ ja̧'a̧nä̧ ppädäcuäcuämä juiya'a. JA̧U̧MÄ̧ ttö chumänä 'toecuäbä cuä̧ta̧dö̧ ku̧ni̧nä̧ 'cuädoö juiyönä, ja̧'hua̧nö̧ ja̧'a̧na̧ inä JA̧U̧MÄ̧ ttö chu̧mä̧nä̧mä̧ yo̧ö̧nä̧ta̧ jȩä̧cu̧sä̧. ⁹ JA̧U̧TÄ̧ pporädö icuäcusä churuhuo'inä,ja̧'hua̧ta̧nö̧ JA̧U̧TÄ̧ 'choipäcusä chunä huo̧bu̧ pö̧ttä̧huo̧bu̧'inä. ¹⁰ Ja̧u̧mä̧ o'cajuiyönä juidönätä̧ jȩä̧cu̧sä̧, ja̧'hua̧nö̧ ja̧'a̧ttö̧ koro jȩcha̧ji̧mä̧ jui̧'a̧sä̧; Cha̧u̧ chu̧huä̧nä̧ro̧mȩ'i̧nä̧ juiyönätä dau ke'opö tticua'a jä̧'i̧nö̧'a̧nö̧ ke'opö icuäcusä. ¹¹ Ja̧'hua̧ta̧'a̧nö̧ ja̧u̧mä̧ ttärötä öätetö ö̧'ä̧i̧mä̧; Ttörömä abo'iyotörö toa'a 'cua̧rö̧nä̧tä̧ to̧ä̧cu̧sä̧. ¹² Umuhuäyotö su̧ro̧do̧u̧mä̧ ji̧nä̧ yo̧mȩtȩ ppäsecu ichätö; Jahuätömä ttujurucu ichätö ttö chö̧ja̧'a̧cu̧ ja̧'hua̧nö̧ ichö kö̧cuä̧tö̧ kojusode sobucuächönä. ¹³ Chi̧jä̧huä̧tö̧rö̧'i̧nä̧ ttöttö otonätä̧ ttö̧jö̧nä̧ jȩpö̧; jä'ecu kö̧jä̧u̧'i̧nä̧ ttörömä ttamisurutä topätö. ¹⁴ Ttötä isotö'inä ppättäda pä'ocotö; Ttö'cönä chahuaruhuä'inä ttunichi'inäcu̧sä̧. ¹⁵ Jitö ji̧nä̧́ chojusodenä ka̧cui̧ pi̧nä̧tö̧mä̧, ja̧'hua̧ta̧'a̧nö̧ ttö huedö jȩpä̧tu̧'i̧nä̧ i̧mi̧cu̧nä̧ tottäcusä; kara'attö ichö́ jä̧i̧nö̧'a̧nö̧ ttä'cattömä. ¹⁶ Ttö huedäcuru huochomenä'inä, juo̧u̧mä̧ ädätococusä, ttö ucuocu jädepomenä'inä. ¹⁷ Ttö chamepu̧ttö̧ kö'cocoju chirecua'inä; ttö chaju̧tö̧ huäpächinätö̧ ttömä suro̧pä̧sä̧. ¹⁸ ja̧'hua̧ta̧'a̧nö̧ ppo̧ä̧tö̧'i̧nä̧ mu̧ä̧yotö'inä ttöjö'cococusä; ttö ä̧rä̧mi̧ö̧ chucuocuomenä'inä, jähuätömä ttörö toicutä cuocuätö. ¹⁹ O'catoinä tö'cönä chahuaruhuä'inä ttöjö'cococusä, jitö ttö rȩpȩdä̧u̧'i̧nä̧ ttörömä kö'cocotö. ²⁰ Chihue'quiyumä chi̧jȩta̧nä̧ bä̧i̧pä̧ra̧'a̧ ja̧'hua̧ta̧nö̧ chidepä'i̧nä̧; ttömä chu̧ju̧juiyö'anö ja̧'a̧nä̧ kö̧sä̧. ²¹ Ttörö rȩrö̧jö̧nä̧ topätucuittö, ttörö rȩrö̧jö̧nä̧ topätucuittö, chahuaruhuä, Dios u̧mö̧mä̧ ttörö mȩä̧huä̧cha̧ja̧'a̧. ²² ¿Ucutumä tta̧'a̧nö̧ pä'ö ru̧cuä̧rä̧tu̧cuä̧cu̧sä̧ttö̧ Dios jä̧'i̧ja̧'a̧nö̧mä̧? ¿Tta̧'a̧nö̧ pä'ö chidepä 'cuäipächa'anä̧mä̧ yabonö̧mä̧ usurä ȩmä̧u̧ juiyadó päcuätucuococösättö? ²³ ¡Oh, chucuocumä jitämä huȩyu̧tö̧ rötiyottó! ¡Oh, ja̧u̧ huȩnȩmä̧ cuyäru'tänä huȩyu̧ti̧yo̧ttó! ²⁴ ¡Oh, huȩyu̧cuo̧'qui cuoräuttö adicuo'quinä̧ ja̧'hua̧ta̧nö̧ cu'upä isähuanä 'co̧'ö̧ ino'quinä ttötadó 'cuäopönä̧ pö̧nä̧! ²⁵ Ja̧'hua̧nö̧ ja̧'a̧nä̧ ttö chutö'cömä, ttörö ppä̧dä̧cua̧mä̧ kö̧ pä'ömä̧ huo̧jua̧sä̧, ja̧'hua̧nö̧ ja̧'a̧ röji päi'omȩnä̧ ja̧u̧mä̧ pi̧jä̧ rȩjȩnä̧ 'cuä̧o̧pä̧cua̧; ²⁶ chi̧jȩta̧ dȩa̧'a̧nä̧ kö̧ chidepämä̧, to̧ȩpä̧chä̧cuȩ, ja̧'hua̧nö̧ jo̧mȩnä̧ chidepänämä Diosrömä to̧chä̧cua̧sä̧. ²⁷ Ttömä cha̧mö̧nä̧ chi'ärenä to̧chä̧cua̧sä̧, ka̧ra̧nä̧mä̧cö̧. Chamiso'quimä jacuänättö̧ adiumä aditoca'a. ²⁸ Ucutu päcuätucuttömä: "¡Tocu ujutumä o'ca'anä rutäcua'attö̧ ja̧u̧ru̧mä̧! Ja̧u̧ttö̧ huȩnȩ jö̧nä̧ jö̧mä̧ chunätä̧ ka̧'a̧, ²⁹ ja̧'hua̧nö̧ jö̧ttö̧mä̧ curä'chutä ye'ecui, isopäi'önä Dios ö̧ra̧huä̧rö̧mä̧ curä'chunä̧ ro̧ȩpä̧cua̧, Diosmä ro̧'ȩpö̧ pä'ö cu̧huo̧juä̧tu̧cuä̧cua̧'a̧nö̧."