¹ Ja̧u̧nu̧ o'ca'a Suhita ädätö pä'inö: ² ''¿Ucumä ti̧yȩnö̧tä̧ cäcuädäcua'ajä̧tö̧ ucuocumä? Amucuädi pi̧yȩ, ja̧u̧nö̧ o'ca'a ujutu'inä tucuocua ³ ¿Tocu pä'ö de'a isotö 'cuarö̧nä̧ to'cuätö; ttamucuädö'inä juiätö 'cua̧rö̧nä̧tä̧ to̧'cuä̧u̧jä̧ ucumä? ⁴ Ucutä cuamonä cuami suräcu serocu icuäujä?Rȩjȩmä̧ jaroi'öanö ja̧'a̧ ucunä ja̧'hua̧ta̧nö̧ inähuiyä'inä koromȩcu̧ pporächiöanö ja̧'a̧? ⁵ Iso päi'önätä̧, ttö̧ja̧sa̧ a̧'cua̧rö̧mä̧ tȩa̧u̧ na̧hui̧'a̧'a̧ jä̧'i̧nö̧'a̧nö̧tä̧ na̧hui̧'ä̧cua̧; ocurä cuomenä'inä kä̧dȩpö̧ jui̧yä̧cua̧. ⁶ Ttȩa̧u̧mä̧ ojusode ttö'inä yo̧ä̧cua̧; Chutä ö̧ra̧pa̧ra̧'i̧nä̧ na̧'ȩpö̧ä̧ i̧cuä̧hui̧yä̧cua̧. ⁷ Otonänö i̧'cha̧ pä'ö'inä ujurumä jui̧'ä̧cua̧; amonä amucuädö jȩö̧mä̧ churutä surojuepäcua̧. ⁸ A̧mo̧nä̧ ä̧tȩcuä̧ setädö rötähuomecu̧ i̧'chö̧nä̧ ki̧tto̧pä̧cu̧ya̧; ja̧u̧mä̧ i̧'chi̧cua̧ 'cu̧tȩ ko̧mȩcu̧. ⁹ Ya'ute 'cäro̧ca̧ isappättö 'ti̧ȩpä̧rä̧cua̧jä̧ cui̧jä̧pu̧nä̧ ti̧'ä̧chi̧'ö̧; ¹⁰ juo̧u̧rö̧ amucuädö u̧mä̧nä̧nä̧ ka̧cua̧a̧ ya'ute 'cä̧ro̧ca̧ isappä dajicuähuaa rȩjȩ́ jacuänä. ¹¹ Ye'ecumä kä̧cua̧'a̧ pätecutä; jahuätömä i̧'chö̧nä̧tä̧ tti̧'chä̧cuo̧tö̧. ¹² Cuäre micuäujei cuju̧na̧ra̧'a̧nä̧ pärotö i̧cuä̧cua̧jä̧ u̧su̧rä̧sä̧ joö ppäittöcunä ja̧'hua̧nö̧ ja̧'a̧ttö̧ surojö cujunärö̧tä̧ tta̧huä̧rä̧cu̧jä̧ cuippeyänä. ¹³ Cuidepänä nacuä̧chö̧tä̧ jiyudu icuäcujä; ja̧'hua̧nö̧ ja̧'a̧ttö̧, ä̧cuo̧mȩnä̧ cumäricheitä cuidepänä o'cajuiyönä jiyudu cuä'ö icuäcujä. ¹⁴ Ja̧u̧mä̧ ojusodenä 'quiya'a ö̧jo̧mȩttö̧mä̧ rä'epö i̧cuä̧huä̧cua̧ ja̧'hua̧ta̧'a̧nö̧ hue'ö i̧cuä̧huä̧cua̧, hua'are hue'ö ö̧ja̧'a̧cu̧tä̧. ¹⁵ Chutä ahuaruhuämä ko̧co̧tö̧ ttäcuotö chutä ojusodenämä, azufre pättö riripö icuähua'a tottö o'ca'amä̧. ¹⁶ Dȩa̧'a̧dä̧ttö̧ ihuehui apiyämä̧ joächächäcua'a; ju'tojunä̧ttö̧mä̧ ä̧na̧jui̧yä̧mä̧ 'ca̧rä̧u̧ i̧cuä̧huä̧cuȩ. ¹⁷ Ya̧tȩ'i̧nä̧ ja̧huä̧jä̧ rȩjȩttö̧ a̧mö̧cuädäcuähuocö jä̧cuȩ; mä̧nä̧ttö̧'i̧nä̧ ja̧u̧ i̧mi̧mä̧ juiyäcua'a. ¹⁸ Ja̧u̧mä̧ tȩya̧u̧ttu̧mä̧ yo̧u̧ra̧'a̧cu̧tä̧ ȩcuä̧cua̧ ja̧'hua̧ta̧nö̧ pi̧jä̧ttö̧mä̧ rä'epötä i̧cuä̧huä̧cua̧. ¹⁹ Ja̧u̧mä̧ i̧tti̧ uborömä ku̧nä̧ro̧cö̧ jä̧cua̧, i̧tti̧ juhua'a yabo i̧tti̧mö̧ttö̧'i̧nä̧ ahuaruhuättömä, ja̧'hua̧ta̧'a̧nö̧ ahuaruhuä totte'ächa'anä ka̧cui̧pi̧nä̧tö̧ttö̧'i̧nä̧. ²⁰ Jitö kä̧hua̧ ma̧ä̧cha̧'a̧cu̧ ka̧cuä̧tö̧mä̧ ya'ute mo̧ro̧ ja̧u̧cu̧mä̧ usurä ȩmä̧u̧tä̧ 'cuättopäcuotö; jitö kä̧hua̧ räopa'acu ka̧cuä̧tö̧mä̧ pi̧yȩnä̧ yettepä'chäcuotö. ²¹ Isopäi'önä ja̧'hua̧nö̧tä̧ huotö ttäcuotö adiunä jȩpo̧cö̧ ahuaruhuä, Diosrö jerupätömä."