¹ Ttö̧ cha̧'cua̧ru̧hua̧mä̧ täcö yoyonö beipächa'a, ja̧'hua̧ta̧'a̧nö̧ chu̧mo̧ro̧mä̧ beipächa'a, hua'arebamä jo̧mȩnö̧ tta̧huä̧ra̧'a̧ ttörömä. ² Isopä'iönätä̧ ttörö ya̧'a̧huȩ'ä̧tö̧mä̧ ka̧cuä̧tö̧, ttö chi'äremä 'cuäopönä̧tä̧ to̧ä̧ra̧'a̧ chö̧ra̧huä̧ra̧ pä'ö jȩpä̧'chu̧tä̧. ³ Ya'ute cuiya päcuinö iyittö, huo̧jua̧sä̧ ja̧u̧tä̧ ja̧'a̧ ttö ucucu todeönä chu̧ju̧mä̧; ¿dijättö̧ ca̧ra̧ juȩnȩ ku̧mä̧ ttörö ppadö'anö̧ hua̧mä̧? ⁴ Isopäi'önä ucu, Diosmä, ttamiso'qui oto juoächönä jȩpi̧nö̧jä̧ huo̧jui̧'ä̧cuä̧huä̧mä̧; ja̧'hua̧nö̧ ja̧'a̧ttö̧, ucumä hue'ocö pi̧nö̧jä̧ ttörö 'cuätto'a pä'ömä. ⁵ Ja̧u̧ ya̧tȩ ahuaruhuä tti̧yä̧cuȩ jä̧ji̧ ji'äu icuttömä, i̧tti̧mö̧mä̧ jahuätönä usurä ttȩhuä̧cuo̧tö̧. ⁶ Ja̧'hua̧nö̧ ja̧'a̧nä̧ Ja̧u̧mä̧ ttö̧ja̧ ji̧yȩtȩ pätta̧'a̧ ja̧'i̧nö̧'a̧nö̧tä̧ pärohuächinösä̧; jahuätömä chi'änä surepätö. ⁷ Chi'äremä̧ ä̧to̧cä̧cha̧'a̧ barahuomettö̧, chidepämä̧ o'cajuiyötä hui̧ä̧chä̧cha̧'a̧ yo̧o̧ppa jä̧'i̧nö̧'a̧nö̧. ⁸ Ttö̧ja̧ adiu jȩpä̧tö̧mä̧ pi̧yȩ usurä ttemä̧u̧nä̧, ttö̧ja̧sa̧ huȩnȩ jui̧'a̧mä̧ a̧mi̧suru to̧ä̧cua̧ ttö̧ja̧sa̧ su̧ro̧pa̧rö̧. ⁹ Ttö̧ja̧sa̧ huȩnȩ jui̧'a̧mä̧ 'qui̧yu̧nä̧ 'chu'ä̧rä̧cuä̧u̧ ö̧jä̧cua̧, chu adiu jȩpö̧mä̧ ujuruhuächä̧cua̧ juhua'a yabonö̧tä̧. ¹⁰ Ja̧'hua̧nö̧ ja̧'a̧nä̧ ucutu o'catoi'önä̧mä̧, pocu ichätucui; ttömä huo̧juȩcu̧nä̧ a̧mö̧cuädörömä po̧cui̧po̧cö̧ chä̧cua̧sä̧ ucuttumä. ¹¹ Chumo̧ro̧ ji̧nö̧mä̧ 'cuäopächina'a; jȩcha̧ja̧ pädinömä hueyecuächina'a, ja̧'hua̧ta̧'a̧nö̧ pa̧'a̧nö̧tä̧ ja̧'a̧ chamiso'qui ku'quecumä̧. ¹² Pitö ttö̧ja̧mä̧, ya̧huä̧huä̧cuä̧huä̧ ttö̧ja̧mä̧, mo̧ro̧mä̧ yodo jö̧nä̧tä̧ pärotätöä tȩya̧u̧mä̧; tȩya̧u̧mä̧ tö'cö ka̧'a̧ yo̧u̧ttö̧mä̧. ¹³ Hua'are rejumä chojusode 'cua̧rö̧nä̧tä̧ a̧mö̧cuädösä; yo̧mȩtä̧ rötinö̧sä̧ chä̧'ä̧ppä̧mä̧; ¹⁴ Rejura̧'a̧ttö̧ pä'inö̧sä̧: "Ucumä chä'ojä, ja̧'hua̧ta̧'a̧nö̧ mi̧yu̧huä̧'i̧nä̧: "Ucumä cha̧ju̧cö̧, chijähuajucö̧, ¹⁵ ja̧'hua̧nö̧ jö̧ttö̧mä̧ tȩnȩ ka̧'a̧ttö̧ ttö tta̧dä̧rö̧mä̧? ¿Ttö tta̧dä̧rö̧mä̧ ditä toö'anö ja̧'ttö̧? ¹⁶ ¿Tta̧dä̧rö̧mä̧ ttötäcu mȩyȩhua̧'a̧ ja̧'a̧ hua'are äpate jubö rȩjȩ i̧sa̧ppȩra̧'a̧cu̧ ti̧mȩyȩhuo̧mȩnä̧mä̧?