¹ Ja̧u̧nu̧ o'ca'a Jobmä ädätö pä'inö: ² "Ttömä ja̧u̧ jö̧ta̧'a̧nö̧ jö̧ ä̧ju̧cuä̧'i̧jö̧sä̧; ucutumä o'catoi'önä tta̧'cua̧ ttȩmö̧nä̧ ppädäcuähuämä̧ jui'ätöjä. ³ ¿Ttucuocu micuähuocömä röjinä̧mä̧ beipächä̧cuä̧di̧? ¿Ucutumä däjé päi'ätucuäcuttö, ja̧'hua̧nö̧ cuädätäcucunä̧mä̧? ⁴ Ttö'i̧nä̧ ucutumä chucuocua'anö̧ ja̧'a̧ ucutucumä, Ucutu ttö chö̧jo̧mȩ cu̧tä̧tu̧cu̧ttö̧mä̧; ttömä ca̧ca̧to̧po̧'ö̧ ja̧'hua̧ta̧'a̧nö̧ cui̧huȩnȩtu̧cu̧ ji̧nä̧ yo̧mȩtȩ päi'önä jȩpö̧ uturu suronä pädö'anö̧ ja̧'a̧ ja̧'hua̧ta̧'a̧nö̧ chu yäcapö ya̧dä̧hua̧'a̧nö̧ ja̧'a̧. ⁵ ¡Oh, tocu chucuocu'anö̧ttö̧ ttesehuipönä̧mä̧! ¡tocu chättömä tta̧'cua̧ adiu päi'önä chucuocu'anöttö̧ ba̧ra̧huä̧ji̧ jȩa̧cha̧ pä'ömä! ⁶ Ttö chucuocuttö'i̧nä̧ ttörö baraumä ppeächi'oca'a; chucuocuoca'a jö̧ttö̧'i̧nä̧, ¿tocu ppä̧ttä̧dä̧cua̧sä̧ttö̧? ⁷ Ja̧'hua̧nö̧ ja̧'a̧ Dios, täcö 'cuä'ächi'ösä; chahuaruhuärömä o'catoi'önä̧rö̧tä̧ cuä'äu icuinö̧jä̧. ⁸ Chidepä'i̧nä̧ joipächönä̧ jȩ'cui̧nä̧cu̧sä̧, ttö̧ja̧mä̧ surojö jȩpi̧nö̧ pä'ötä pättäcusä; chidepä siähua'a topömä suronä̧ jȩpi̧nö̧ pättäcusä ja̧'hua̧ta̧nö̧ chi'ä'i̧nä̧ jiähua'a. ⁹ Diosmä u̧ra̧huä̧rö̧nä̧ 'chu'ädinö̧'ca̧, ru̧huä̧rä̧cu̧sä̧; ja̧u̧mä̧ ä̧chi̧nö̧ jȩä̧cu̧sä̧, cha̧bo̧i̧yo̧tö̧mä̧ to̧ttä̧rä̧cu̧sä̧, chupparohuächi'a'anä̧. ¹⁰ Ttö̧ja̧mä̧ nö̧'ä̧chö̧ to̧ttä̧rä̧cu̧sä̧ ja̧'hua̧ta̧nö̧ ttätä ätta to̧pä̧rä̧tö̧ ttörömä; suronä jȩpö̧ chi'ebabanä cuäcuättäcusä; jahuätömä ttörö to'ija̧'a̧cu̧ a̧mö̧cuädö ji̧nä̧ yo̧mȩtȩ pȩjä̧mä̧jä̧tö̧. ¹¹ Diosmä iyäcusä ttö̧ja̧ suronä jȩpä̧tö̧rö̧tä̧, ja̧'hua̧ta̧nö̧ icu u̧ju̧nä̧cu̧sä̧ suropätö ttu̧mu̧nä̧tä̧. ¹² Ttömä ä'canämä adiunä ki̧nö̧sä̧, ja̧'hua̧nö̧ ja̧'a̧nä̧ JA̧U̧TÄ̧ 'cho'ipinäcu̧sä̧. Jueönämä, JA̧U̧TÄ̧ chu̧ru̧pä̧'quȩnä̧ 'chuädö rȩjȩtä̧ pädiönä jȩpu̧ icuinä̧cu̧sä̧; ja̧'hua̧nö̧ ja̧'a̧nä̧'i̧nä̧ JA̧U̧MÄ̧ ttörötä pätetö topinö. ¹³ Ja̧u̧ umuhuäyotö ppoäcuä ttö̧ja̧ ttörö sobucuächönä ka̧cuä̧tö̧ ; Dios'inä ttö chöjäcuorätenä ppuratö ppoäcusä rȩrö̧jö̧nä̧'i̧nä̧ to'ococusä; ja̧'hua̧ta̧nö̧ ttö cha̧ttö̧ soya rȩjȩ huerachönä jȩä̧cu̧sä̧. ¹⁴ JA̧U̧MÄ̧ ttörö ttoecuä'ca pparachiönä jȩä̧cu̧sä̧ yautetämä̧'cö̧; JA̧U̧MÄ̧ curä rocuöcuähuäcuä i̧sa̧ jä̧i̧nä̧'anö̧ jopu ttö chö̧ja̧'a̧cu̧. ¹⁵ Rettömä ciliciotö 'tö̧'ä̧hua̧'a̧tö̧ attopösä chi̧jȩta̧mä̧; churuhuo'inä rȩjȩtä̧ pä̧cu̧sä̧. ¹⁶ Rö̧ä̧nä̧ chajuähua'a chi'ä'inä tuhuäcä jä̧cu̧sä̧; Chi'äriyä'inä 'corujuo'ächätö tti'äre 'cua̧ra̧sä̧ ¹⁷ ttu̧mu̧nä̧'i̧nä̧ 'tattoca'anä, ttömä adiunätä ucuocusä chu̧ru̧hua̧cu̧mä̧. ¹⁸ Chucuojamä rȩjȩ'i̧nä̧, 'cucuächöjuiyädó; ttörö 'cuäopömä o'catoi'önä ttu̧huo̧jua̧ ji'ähuätucui. ¹⁹ Ja̧'hua̧nö̧ ja̧'a̧nä̧'i̧nä̧ jitämä, tocu'äcuotöjä, Iso päi'önä ja̧'a̧ pä̧cua̧mä̧ mo̧ro̧jä̧ra̧'a̧ kö̧; JA̧U̧TÄ̧, ttönä ji̧ä̧huä̧cua̧mä̧, ju'toju mo̧ro̧jä̧ ra̧'a̧tä̧ kö̧. ²⁰ Ttö chahuaruhuämä ttörö ya̧a̧huä̧'chä̧tö̧, ja̧'hua̧nö̧ ja̧'a̧nä̧ ttö chi̧'chȩrejamä DIOSRÖTÄ dahuipoya chajahuomenä. ²¹ Ttö jädepäcujä moro̧jä̧ttö̧'i̧nä̧ huo̧juä̧jä̧, DIOS huo̧jua̧jä̧ pide ttö̧ja̧sä̧rö̧mä̧, ttö̧ja̧sä̧ ippeyanä kö̧rö̧ jȩä̧i̧ya̧'a̧nö̧. ²² Ja̧'hua̧nö̧ ja̧'a̧ yaute duó 'cuäpäjittömä , chi̧'chä̧cua̧sä̧ yo̧mȩtȩ jua'attömä ttömä ppa̧dä̧chi̧yä̧cua̧sä̧.