¹ Ja̧'hua̧nö̧ ja̧'a̧ Elifaz teman ttö̧ja̧sa̧mä̧ ädätömä̧ pä'inö: ² ¿Ya̧tȩ tta̧ja̧sa̧ huo̧jua̧mä̧ u̧huo̧jö̧ ja̧'a̧nä̧ micuähuocönä ädäta'anö ja̧'a̧ ja̧'hua̧ta̧nö̧ a̧mö̧nä̧ pa̧ja̧tö̧tä̧ kä̧hua̧ räopa'acuttö ichoppatä ȩnä̧hua̧'a̧nö̧ ja̧'a̧ tä̧ji̧? ³ ¿Ucuocuäjimä̧ kada'cahuome a̧mö̧cuädö juiyö'anö̧ ja̧'a̧ ja̧'hua̧nö̧ jo̧ca̧'a̧ttö̧'i̧nö̧ rö̧ä̧nä̧ ucuocumä adiunä ppädömä ucuocuocö? ⁴ Ja̧'hua̧nö̧ ja̧'a̧, ucumä Diosrö ucuotähuä̧mä juiyudö icujä, ucumä ja̧u̧ru̧ a̧mö̧cuädäcuähuämä tto'epöjä, ⁵ Ucu suronä cuamucuädömä̧ cuätä jiähua'a; cucuocumä huo̧jua̧ ucuocua'a 'cua̧rö̧nä̧ ucuocujä. ⁶ Cua̧mö̧nä̧ cuätä suronä̧ päcujä. ttö pädömä̧cö̧; ja̧'hua̧nö̧ ja̧'a̧, cua̧mö̧nä̧ cuätä suronä̧ ucuocu pä'ö jiähuäcujä. ⁷ ¿Ucu ja̧'a̧ ä̧cuo̧mȩnä̧ ttö̧ja̧sa̧ uhuäpächinö̧mä̧? ¿Mö̧ä̧quiyu'i̧nä̧ ä'canä u̧huä̧bȩ'ä̧cuä̧hua̧ jö̧nä̧ ki̧nö̧jä̧? ⁸ ¿Ucumä Dios u̧huo̧juö̧ i̧jȩcuä̧cho̧cö̧ ä̧ju̧cuä̧'i̧jö̧jä̧? ¿Ucu ya̧tȩ ja̧'a̧ huo̧juä̧huä̧ huȩnȩ ku̧nä̧rö̧mä̧? ⁹ ¿Ujutu tu̧huo̧juö̧ttö̧nä̧ ti̧yȩpö̧nä̧tä̧ ku̧huo̧jua̧'a̧ttö̧? ¿Ujutu tu̧huo̧jui̧po̧cö̧mä̧ ucumä huo̧jui̧'ö̧jä̧? ¹⁰ Ujutumä yorätehuätöjä, uhuo'che tȩ'a̧ttö̧'i̧nä̧ ja̧'hua̧ta̧'a̧nö̧ bö̧o̧sa̧ttö̧'i̧nä̧, ucu cuä'ottö yabonänö̧ böecuättö̧'i̧nä̧. ¹¹ ¿Cua̧'cua̧ cuȩmö̧nä̧ Dios ppädömä juiyo a̧'u̧cu̧ ja̧'a̧ ucurumä̧, eseäcuähuä ttucuocu huȩnȩ'i̧nä̧mä̧? ¹² ¿Tta̧'a̧nö̧ pä'ö cuamiso'quimä ȩma̧u̧ cuicua'attö? ¿Tta̧'a̧nö̧ pä'ö cui'äremä ra̧huä̧rä̧tö̧ ja̧'a̧ttö̧ ¹³ tocu pä'ö cua̧'cua̧ru̧hua̧rö̧mä̧ Diosrö to'ija̧'a̧cu̧ jȩpö̧ ppa̧cuä̧dä̧cuä̧hua̧'a̧ttö̧ ja̧'hua̧ta̧'a̧nö̧ cui̧huȩnȩnä̧mä̧ pä̧i̧cu̧nä̧ päcua'attö̧? ¹⁴ ¿Tidejua̧'a̧ ttö̧ja̧sa̧ttö̧ surojö jui̧'a̧ kö̧mä̧? ¿Tidejua̧'a̧ttö̧ isajuttö uhuäpächinö adiu jȩpö̧mä̧? ¹⁵ ¡To̧pä̧jä̧, Diosmä 'cä̧'ȩpö̧ u̧ju̧nä̧cu̧rö̧'i̧nä̧ a̧'cua̧mä̧ huȩnä̧ro̧cö̧, ja̧'hua̧ta̧'a̧nö̧ ja̧u̧ toomenämä mo̧ro̧jä̧'i̧nä̧ adihuocojä̧; ¹⁶ Yorö'iso adihuocö su̧ro̧tä̧cuä̧hua̧mä̧ ja̧'hua̧ta̧'a̧nö̧ adiu jȩpo̧cö̧mä̧, ttö̧ja̧sa̧ surojö ajiya ttahua'a jä̧'i̧nö̧'a̧nö̧ au. ¹⁷ Ä̧ju̧cui̧ttö̧, ttötä ji̧dä̧cuä̧cua̧jä̧;ttö töchinömä ji̧dä̧cuä̧cua̧sä̧, ¹⁸ ttä̧mu̧ ttä'otö̧ huo̧juä̧tö̧ juhua'a yabo ji̧ttäcuinömä, ttädo̧tö̧ minättö̧ huäjuönä tu̧huo̧jui̧'i̧nö̧mä̧. ¹⁹ Pi̧yȩmä̧ ttä̧do̧tö̧ minä jahuä jinä'a̧, jähuätörötä iyähuina'a̧ tti̧rȩjä̧mä̧, ja̧'hua̧nö̧ ja̧'a̧ttö̧ ya̧tȩ i̧chä̧cua̧hua̧mä̧ doächa pä'ömä juiyina'a̧. ²⁰ Ya̧tȩ ubo suronä jȩpä̧'chö̧mä̧ 'cuä'opunä mo̧ro̧ jö̧ta̧'a̧nö̧ suräu ko̧, ttö̧ä̧nä̧hua̧tä̧ 'cä̧ȩpu̧ ku̧ni̧nö̧ jarodö usurä cuapä'ö 'cuä'opunä duo jö̧ta'anö. ²¹ A̧ja̧nä̧mä̧ rä̧mi̧pä̧cu̧ ye'cuächönä; adiu jo̧mȩnä̧ ko̧sä̧ pä'omenämä, ja̧u̧mä̧ a̧bo̧'cha̧ i̧chä̧cua̧. ²² Ja̧u̧mä̧ amucuädocö yo̧mȩ ppa̧dä̧chä̧cua̧sä̧ pä'ö'inä; curä'chutä ttä̧huä̧rä̧cu̧ ja̧u̧mä̧. ²³ U̧cuä̧ u̧sä̧rö̧ koromenö cue'ächötä kö̧, pa̧'a̧nö̧ pä'ä'chö: ¿To cu̧jä̧? Ja̧u̧mä̧ juo̧juä̧cuä̧u̧ to̧dȩ'ä̧cua̧sä̧ pä'ömä. ²⁴ A̧'cua̧ ro'ecu ye'ecu na̧'a̧chö̧; ja̧u̧tä̧ rö̧ä̧nä̧ cuä'ö rötäcu ja̧u̧mä̧, ru̧hua̧ curä rohuäu i̧'chä̧cua̧'a̧ jä̧cu̧ a̧'cua̧ roecua'a cua̧rö̧nä̧. ²⁵ Ja̧u̧mä̧ Diosrö kö'cö jui'ö umu cä'epö huoina'a̧ttö̧ ja̧'hua̧nö̧ jȩpö̧ ucuo te'ähuinö ttötäsä pä'ö TÖ̧Ä̧NÄ̧HUA̧ ju̧ru̧hua̧ ä'cajo̧mȩttö̧, ²⁶ ppide tö̧ja̧sa̧ jarodömä Dios ö̧ja̧'a̧cu̧ jopö ja̧rȩyu̧nu̧ pä'i'ö, 'toecuäbä pöäbä ttoecuänö. ²⁷ Pi̧yȩmä̧ jeaa, ji̧nä̧́ iä́ bä̧rȩpa̧mä̧ abo'inä bä̧rȩpa̧mä̧ i'ä a̧tto̧cu̧ juo̧u̧mä̧, ²⁸ ja̧'hua̧ta̧'a̧nö̧ ötahuiya jȩpi̧cuähuome ki̧nö̧; ahuaruhuä'inä tti̧jo̧co̧mȩ ji̧no̧mȩ ja̧hua̧nö̧ ja̧'a̧ttö̧ jui'ö tti̧ji̧po̧mȩ ki̧i̧pi̧nä̧tö ttiärettömä. ²⁹ Juo̧u̧mä̧ järe ru̧hua̧ i̧ji̧yä̧cua̧; järe u̧ju̧nä̧rö̧'i̧nä̧ recuomä kö̧nä̧ro̧cö̧; a̧'cua̧juȩ yo̧'cö̧ jö̧i̧nä̧ recuomä i̧ji̧yä̧cua̧ pi̧jä̧ rȩjȩnä̧mä̧. ³⁰ Yo̧'cö̧́ ja̧a̧ttö̧mä̧ juo̧u̧mä̧ rä̧o̧pi̧yä̧cua̧; u̧ju̧nä̧rö̧mä̧ 'cho̧i̧pä̧cua̧; DIOS ättö ro̧ȩpo̧mȩnä̧mä̧ juo̧u̧mä̧ hua'ö i̧cuä̧cua̧. ³¹ Micuähuocö jähuämä cua̧'cua̧ cu̧huȩnä̧rä̧, a̧mö̧nä̧ pa̧ja̧tö̧tä̧ ttuyapareäcuäumä, ja̧'hua̧nö̧ ja̧'a̧, micuä'i̧nä̧ juiyötä jä̧cua̧'a̧ ja̧u̧rö̧ i̧yä̧huä̧cuȩmä̧. ³² Hua'ö i̧cuä̧cuȩ pä̧nä̧ ä'canä 'cuäopäcua'a pi̧yȩmä̧, ä̧na̧jui̧yä̧mä̧ täcö ja̧'tu̧huoo̧ca̧'a̧ jä̧cua̧'a̧ ³³ Uva daumä u̧huä̧ju̧ ji̧nä̧ ja̧'tu̧hua̧'a̧nä̧ sahuepächäcua'a; ja̧u̧mä̧ ȩ'u̧ yȩ'ȩpu̧ icuäcua'a olivo dau yȩ'ȩpö̧ icua'a jä̧'i̧nö̧'a̧nö̧. ³⁴ Ttö̧ja̧ suronä jȩpä̧tö̧mä̧ tti̧tti̧mö̧ tottäcuotö; ocurätä ku icuiyäcuotö ttojusode mitäu ttȩmi̧no̧demä̧. ³⁵ Jahuätömä̧ surojötä muchotö juo'ätö ja̧'hua̧nö̧ ja̧'a̧mä̧ surojötä uhuäbecuätö, ttöcuä̧ba̧mä̧ yaparetäcuähuätä muchotö juo'ätö."