¹ Topittö, ttö chi'äremä o'cajuiyönä̧tä̧ pi̧yȩmä̧ toina'a; chä̧ja̧ ä̧ju̧cu̧mä̧ huo̧juä̧chi̧'i̧na̧'a̧. ² Ucu cu̧huo̧juö̧mä̧ ttö'i̧nä̧ chu̧huo̧ju̧, ttömä ucu cui̧dȩ'a̧dä̧mö̧ huocösä. ³ Pa̧'a̧nö̧ ja̧'a̧nä̧'i̧nä̧, ttömä o'cajuiyönä ju̧ru̧hua̧cu̧mä̧ chucuocu'anö ja̧'a̧; ttömä Dioscumä pa̧'a̧nö̧ ja̧'a̧ pä'ö jidähuipö'anö̧ ja̧'a̧. ⁴ Ja̧'hua̧nö̧ ja̧'a̧nä̧ ucutumä isopäi'önä huȩnȩmä̧ yapare huȩnȩnä̧tä̧ mö̧'ȩpö̧ icuätöjä̧; ucutumä jahuapö ruhuä cuätucua'anö̧ nattä̧chö̧ adicuä jerupätöjä. ⁵ ¡Oh, ucutu o'catoi'önä 'coruchi'ö cu̧'ȩjä̧tu̧cu̧ttö̧mä̧! Huo̧juȩcu̧nä̧ ucuocuätö 'cua̧rö̧nä̧ huajatäjä. ⁶ Jitämä ttö amucuädö pädö ttu̧huȩcuä̧nä̧nö̧ ä̧ju̧cuä̧tu̧cui̧. ⁷ ¿Ucutumä suronä pä'ä'chöcänö cucuohuäcuotöjä ta̧ji̧ Diosrömä ja̧'hua̧ta̧nö̧ amonä̧tä̧ cucuohuäcuotöjä kö JA̧U̧NÄ̧MÄ̧? ⁸ ¿Ucutumä jueönätä̧ jui̧jȩpä̧cuo̧tö̧jä̧ tä̧ji̧ repeähuämä JA̧U̧RU̧? ¿Ucutu Dios ä'cattö jueönä päcuätucua'anö ja̧'a̧ tä̧ji̧?. ⁹ ?Adihuäcua'a tä̧ji̧ JA̧U̧ ka̧cuä̧mu̧ to'omenämä ucuturu? ¿Ucutumä yapare jihuäcuotöjä kö ja̧u̧ru̧mä̧ ttö̧ja̧rö̧ jicuähuä'iyätucua'anötä̧? ¹⁰ JA̧U̧MÄ̧ juȩö̧nä̧tä ro̧ȩpä̧cuo̧tö̧jä̧ ucutumä koro da̧ja̧rö̧nö̧ päcuätucuttumä. ¹¹ ¿Yecuecu juiyönä ja̧'a̧ ucuyo ku̧nä̧rö̧rö̧'i̧nä̧? ¿Yecuecu juijä̧tu̧cu̧nä̧ ja̧'a̧ ja̧u̧ ro̧ȩpö̧'a̧nö̧ jö̧mä̧? ¹² Ucutu ji̧yȩtȩ päcuätucumä ä̧ya̧ri̧ isoppa jä̧'i̧nä̧ta̧'a̧nö̧tä̧ ja̧'a̧; Ttocuecuätucumä dau huä̧mä̧ isä'cua jä̧'i̧nö̧'a̧nö̧tä̧ huotöjä. ¹³ Mä̧cuä̧ 'coruchi'ätucui, katätä ku̧ni̧pä̧tu̧cui̧ttö̧, ja̧'hua̧nö̧ jö̧ttö̧tä̧ chucuocu'anö ja̧'a̧, hua̧i̧nä̧ 'cuäopa'a 'cuäopa'anö jö̧mä̧. ¹⁴ Cha̧mo̧nä̧ chidepätä chi̧yä̧huä̧cua̧sä̧; cha̧mo̧nä̧ cha̧'cua̧rö̧tä̧ chȩmä̧huä̧cua̧sä̧. ¹⁵ Topätucui, huä̧i̧nä̧ ja̧'a̧ ttörö cuä'ö icuttu̧'i̧nä̧, jȩcha̧ji̧mä̧ jui̧'a̧sä̧; ja̧'hua̧nö̧ ja̧'a̧nä̧, chutä ä'ca jo̧mȩtö̧ pä̧dä̧cua̧sä̧ ttö chamucuädömä. ¹⁶ Pi̧yȩ ja̧a̧ pä'anö hua̧sä̧ ttörö, ya̧tȩ ttö̧ja̧sä̧ a̧'cua̧ huȩnä̧ro̧cö̧ jä̧i̧nö̧'a̧nö̧ juo̧ú̧ a'cajo̧mȩ chi̧jä̧mä̧do̧mȩnä̧. ¹⁷ Ttö chucuocumä ttö̧ȩpä̧rö̧nö̧ ä̧ju̧cu̧jä̧ DIOS; ttö pädömä rȩbȩhua̧a̧ ucú cuä̧ju̧cu̧nä̧. ¹⁸ Jitä ä̧ju̧cui̧, ttö amucuädäjisä jidähua pe'ö; ttömä huo̧jua̧sä̧ surojömä jȩpo̧cö̧sä̧. ¹⁹ ¿Hueitä toa'acö̧ ttörö toicu päajimä pä'ö icuähuomettö̧? Ttörö toicu pä'ö cuichöttömä, cui̧jȩ pa̧cu̧sä̧ ttö jäyö jȩchi̧nö̧ ja̧'hua̧nö̧ jö̧ttö̧mä̧ jäyä́ jȩchi̧nö̧cu̧tä̧ 'coruchiötä ka̧ji̧sä̧. ²⁰ Dios, ttönämä todärenä jähuätä jȩpi̧, ja̧'hua̧nö̧ jo̧mȩnä̧ dajahuächocösä ucuttömä. ²¹ cu̧mö̧ ttörö suronä jȩä̧mö̧mä̧ ȩmö̧ icui, ja̧'hua̧ta̧nö̧ ucuttö ra̧huä̧pi̧jö̧ surojuoepa'anä̧mä̧ ja̧'a̧tä̧mä̧ to'cuä̧ttö̧. ²² Ja̧'hua̧nö̧ ja̧'a̧ttö̧ huopittö, ja̧'hua̧ta̧'a̧nö̧ ttömä̧ chä̧dä̧tä̧cua̧sä̧, ttö chucuocua'anä ä̧ju̧cui̧ttö̧, ja̧'hua̧ta̧'a̧nö̧ ucumä ädätittö. ²³ ¿Tta̧'a̧nö̧ rö̧ä̧nä̧ ja̧'a̧ttö̧ ttö surojönä jȩchö̧mä̧? Suronä jȩchö̧ chu̧huo̧jua̧ ji'ähuittö? ²⁴ ¿Tta̧'a̧nö̧ pä'ö cudahuächa'attö ttörumä, cuabo'iya̧ a̧'cua̧rö̧ jȩttö̧'a̧nö̧ jȩ'cuä̧cu̧sä̧ttö̧? ²⁵ ¿Ucumä isojä koojä o'ca'anä ru̧cuä̧cusä̧ttö̧? ¿Oba joipächinömä cusächa'a tä̧ji̧? ²⁶ Ja̧'hua̧nö̧ ja̧'a̧nä̧ ttörömä to'ija̧'a̧cu̧ jö̧ reö jähuätä huȩnȩtä̧'chö̧jä̧; mö̧ä̧ya̧ chö̧jä̧i̧ surojö jȩchi̧nö̧tä̧ ji̧nä̧ jȩpö̧jä̧ päcuäcusä. ²⁷ Ja̧'hua̧ta̧'a̧nö̧ chö̧jä̧pi̧yä̧nä̧ cärenäsa̧ cu̧nä̧cu̧sä̧; jȩchö̧mä̧ o'cajuiyötä to̧'cuä̧rä̧cu̧sä̧; chu̧jä̧pö̧ rȩjȩ kȩdä̧huä̧cho̧mȩ'i̧nä̧ ka̧cuä̧mȩ'ö̧ to'cuäcusä; ²⁸ isopäi'önä, ttömä korojuei yoyoja̧'a̧ pparuhuächö jä̧'i̧na̧'a̧nö̧, pö̧jä̧ta̧ isotö ttu̧cui̧'ä̧ta̧ jä̧'i̧nö̧'a̧nö̧ hua̧sä̧.