¹ Ja̧'hua̧nö̧ ja̧'a̧ Job ädätö pä'inö: ² ''Jeruhuoca'a ucutumä ttö̧ja̧jä̧; huo̧juä̧huä̧ huȩnȩmä̧ ucutucutä 'corujuoächäcua'a. ³ Ja̧'hua̧nö̧ ja̧'a̧nä̧ ttö'inä ku̧nä̧rö̧sä̧ huo̧jä̧chi̧'ä̧cuä̧huä̧mä̧ ucutu jö̧ta'anö yoreteunä̧; Ucutu cui̧dȩ'a̧tu̧cu̧nä̧mä̧ huocösä. Isopäi'önä̧tä̧, ¿Ditä jä̧ttö̧ jȩru̧pa̧mä̧ pi̧yȩ jö̧'a̧nö̧ jö̧mä̧? ⁴ Ttö chahuäruhuä chippeyänä ko̧cuä̧tö̧mä̧ ya̧'tä̧cuä̧cu̧sä̧ - chi̧ä̧nä̧hua̧ Diosrö huopu jädepi̧yä̧u̧, !JA̧U̧TÄ̧ ja̧'a̧ttö̧ ttö jädepu ädätömä! ttömä huȩnȩmä̧ jui̧'a̧sä̧- ja̧'hua̧nö̧ ja̧'a̧nä̧ jitämä ya̧'a̧huö̧tä̧ ya̧tta̧huä̧cu̧sä̧. ⁵ Ttö̧ja̧ huȩnȩ juiyönä ka̧cuä̧tö̧jä̧ pä'ätö̧mä̧ ya̧'a̧huä̧'chä̧tö̧ huȩnȩ huotörömä kö'cöjui'ö; juhua'a yabocu surajatö pä'ötä jȩpä̧'chä̧tö̧ jahuätömä. ⁶ Nä̧u̧huä̧rä̧tö̧mä̧ adiu jö̧nä̧tä̧ ka̧cuä̧tö̧, ja̧'hua̧nö̧ ja̧'a̧nä̧'i̧nä̧ Diosrö suronä pä'ä'chö ka̧cuä̧tö huȩnȩ juiya'a pä'ö ; 'tamonä ttumunä ttaditötä ucuo teähuätö. ⁷ Ja̧'hua̧nö̧ ja̧'a̧nä̧ jitämä, jä'epi de'a isotörö, ja'huätötä ucuturu ttu̧huo̧juȩtä̧cuo̧tö̧; jä'epi ju'tojunä co̧'ä̧rä̧tö̧ ppi̧yu̧ru̧, ja'huätötä ucuturu pättäcuotö. ⁸ Ja̧'hua̧nö̧ jö̧ juiyöttömä pi̧jä̧ rȩjȩrö̧ ucuocuätucui; ja'huätötä ucuturu ttu̧huo̧juȩtä̧cuo̧tö̧; Dä'ähuotö po̧i̧tä̧ ucuturu huäjunä jittähuäcuotö. ⁹ ¿Isotöttö dijä̧ttö̧ jȩru̧pa̧mä̧ TÖ̧Ä̧NÄ̧HUÄ̧TÄ̧ ja̧'a̧ pa̧'a̧nä̧ aditinömä pä'ömä? ¹⁰ Ja̧u̧ u̧mu̧nä̧tä̧ ka̧'a̧ o'cajuiyönä pi̧jä̧nä̧ ko̧cuä̧tö̧ tta̧'cua̧rö̧mä̧ ja̧'hua̧ta̧'a̧nö̧ pi̧jä̧ ttö̧jä̧ ttä̧'cua̧roppa'inä. ¹¹ ¿Cucutaanö huo̧jua̧jä̧ ö̧nö̧ä̧mä̧ ja̧'hua̧a̧ta̧'a̧nö̧ ttöcuocuaa cuä̧ju̧cu̧mä̧ a̧ju̧cu̧tä̧ huo̧jua̧jä̧? ¹² Buäcuächätönämä huo̧juä̧huä̧ ka̧a̧; huo̧jua̧hua̧mä̧ kö̧nä̧rä̧tö̧ recuó moró̧ tti̧jä̧mȩttö̧tä̧. ¹³ Huo̧juä̧huä̧'i̧nä̧ ujurö'inä DIOSNÄTÄ̧ ka̧a̧; jiäcuähuä'inä ttö̧huȩ pä̧rä̧chi̧ä̧cuä̧huä̧'i̧nä̧ juo̧u̧nä̧tä̧ ka̧a̧. ¹⁴ Ä̧ju̧cui̧, juo̧u̧tä̧ jȩpu̧'icumä, pääjita'anömä aditö könähuo̧cö̧; juo̧ú̧ ya̧tȩrö̧ cärenä utomenämä, räepu tticua pe'ömä juiyaa. ¹⁵ Ä̧ju̧cui̧, juo̧ú̧ ajiya hueocaa jö̧ttö̧mä̧, juȩnȩmä̧ joichaa; ja̧'hua̧nö̧ ja̧'a̧nä̧ juo̧ú̧ ajiya hueöttömä, pi̧jä̧́ o'cajuiyönä ichaa. ¹⁶ Tujurumä Ja̧u̧nä̧tä̧ ka̧'a̧ ja̧'hua̧ta̧'a̧nö̧ huo̧juä̧huä̧ huȩnȩ'i̧nä̧, ttö̧ja̧ yapare ji̧ttä̧huä̧u̧'i̧nä̧ ja̧'hua̧ta̧'a̧nö̧ yapare ji'äumä todärecue'ö ujuru ku̧nä̧rö̧. ¹⁷ Ja̧u̧tä̧ ja̧'a̧ o'ipumä rö̧'ȩpö̧ jiäcuähuä ttö̧ja̧rö̧'inä otonä̧tä̧, ttö̧jä̧pu̧ i̧säya jui'ö dä'ä ttö̧'ätö, Ja̧u̧mä̧ pärotö pärotö icu röji pä'ö icuätörömä jerupätö jö̧nä̧tä̧. ¹⁸ Ja̧u̧mä̧ jȩpö̧ icu cärenä̧sa̧ ruhuotö ttucuo jö̧nä̧ jä̧sa̧mä̧, ja̧u̧mä̧ ttäcänä kärocuächönä i̧sä̧ta̧ rö̧nö̧. ¹⁹ Ja̧u̧mä̧ oto ȩpö̧ sacerdotetö̧rö̧mä̧, ttö̧jä̧pu̧ isäya jui'ö dä'ätötö̧nätä ja̧'hua̧ta̧'a̧nö̧ juruhuätörö'i̧nä̧ si'epö icu. ²⁰ Ja̧u̧mä̧ pärötö icu jitö tta̧'cua̧ huȩnȩrä̧tö̧rö̧'i̧nä̧ ja̧'hua̧ta̧'a̧nö̧ cho'ipu tä̧mö̧ huo̧juä̧tö̧rö̧'i̧nä̧. ²¹ Ja̧u̧mä̧ ppȩrȩtö surojö ruhuotö̧ru̧'i̧nä̧ ttöhuämä ja̧'hua̧ta̧'a̧nö̧ juruhuätö ttu̧juru juittächi'önä jȩpu̧. ²² Ja̧u̧mä̧ yo̧u̧ jacuä ka̧cu̧ dajö icuähuä'i̧nä̧ i̧jȩpö̧ ja̧'hua̧ta̧'a̧nö̧ hua'inä̧tö̧ ttö̧'o̧mȩ yo̧mȩttö̧'i̧nä̧ tȩya̧u̧ra̧'a̧cu̧ rä'epö ku̧nö̧. ²³ Ja̧u̧mä̧ ttö̧ja̧rö̧ ttujuruhuächönä jȩpö̧ ja̧'hua̧ta̧'a̧nö̧ si'epö'i̧nä̧ icu; Ja̧u̧mä̧ ttö̧ja̧rö̧mä̧ rö̧ttä̧chö̧'i̧nä̧ jȩpö̧ juhua'atäcu cärenä pȩjä̧tö̧rö̧ ottipa'a jä̧'i̧nö̧'a̧nö̧ o'ipö. ²⁴ Pi̧jä̧nä̧ ka̧cuä̧tö̧ ttö̧ja̧ tturuhuotö ttu̧huo̧juö̧'i̧nä̧ 'cho'ipö; Ja̧u̧mä̧ de'a jui̧yä̧nä̧ mä̧nä̧'i̧nä̧ juiyome cuettächönä jȩpö̧. ²⁵ Jahuätömä tȩya̧u̧ juiyome cue'ächö kä̧nö̧ rättopächa pä'ö borepäcuähuätö; Ja̧u̧mä̧ ya̧tȩ tä̧'ä̧mö̧ 'tobäbänö i̧'cha̧'a̧ jä̧'i̧nö̧'a̧nö̧ tti̧'chö̧nä̧ jȩä̧cuo̧tö̧.