¹ TÖ̧Ä̧NÄ̧HUA̧MÄ̧ yabocutä ucuocuinö Job-rö; Ja̧u̧ päinäcu̧: ² ¿Ya̧tȩ i̧mi̧cu̧nä̧ pä'cha pä'ömä, juepö'anö ja̧'a̧ o'cajuiyönä u̧ru̧hua̧rö̧mä̧? Dioscu ucuocumä, Chutä ädäta'anä ä̧ju̧cui̧. ³ Ja̧'hua̧nö̧ ja̧'a̧ Job TÖ̧Ä̧NÄ̧HUA̧RÖ̧ ädätö pä'inö: ⁴ "Topittö, ttömä micuähuocösä; ¿Tta̧'a̧nö̧ chädätacujättö ttömä? Ttömä chu̧mu̧nä̧ chätä mu'ȩcu̧sa̧. ⁵ Ttö ya'utenä ucuocuinösä̧, ja̧'hua̧nö̧ ja̧'a̧ttö̧ ädätocöchä̧cuä̧sä̧; ja̧'hua̧nö̧ ja̧'a̧nä̧'i̧nä̧, todärenätä̧, ja̧'hua̧nö̧ ja̧'a̧nä̧ jua'a yabocumä jȩpo̧cö̧ chä̧cua̧sa̧ä̧." ⁶ Ja̧'hua̧nö̧ ja̧'a̧ TÖ̧Ä̧NÄ̧HUA̧ adätinö Job-rö pä̧i̧cu̧nä̧ cu'upä cuähua'a jacuänä pa̧'a̧nö̧ pä̧'ö̧: ⁷ "Jitämä jo̧mȩnö kä̧hui̧ pä̧i̧cu̧nä̧ cuaditä ubo 'cua̧rö̧nä, TTÖTÄ jä̧dȩpä̧cua̧jä̧, ja̧'hua̧nö̧ jädepomenämä ttörömä cuä̧dä̧tä̧cua̧jä̧. ⁸ ¿Ttörömä iso päi'önätä ya̧pa̧rȩhua̧ pä'öjä ucumä? ¿Ttörö ro̧cuȩpä̧cua̧jä̧ adiunätä jȩpö̧jä̧ pädöttömä? ¿Ucumä ju̧ru̧hua̧jä̧ Dios öjo jö̧ta̧'a̧nö̧? ⁹ ¿Ucumä cu'upä örohua'a jä̧'i̧nö̧'a̧nä̧ huocu'u'anä hua̧j ja̧u̧ huoä'ijö'anö? ¹⁰ Jitämä 'catehui'ö kähui curuhuottö ja̧hua̧nö̧ topö tucuotäcua'anö; ucutä cua̧mo̧nä̧ adicui'ö kä̧hui̧ ttucuotönä ru̧hua̧ 'cua̧rö̧nä̧. ¹¹ Cu̧'ä̧i̧ tottönä i̧jȩpi; topi o'catoi'önärö̧ huo̧juä̧tö̧jä̧ pä'ätörö pättöjuiyönä 'cu̧'u̧ cuicuatö. ¹² Topi o'catoi'önärö̧ huo̧juä̧tö̧jä̧ pä'ätörömä pättöjuiyönä rȩjȩcu̧tä̧ jui'ädätucuitö; Ja̧'hua̧nö̧ jarodätö ttö̧jo̧cuo̧mȩmä̧ usätucui kä̧dö̧ cuicuätucua. ¹³ O'catoi'önärö̧tä̧ ji̧nä̧ yo̧mȩtȩtä̧ rȩjȩ jacuä rȩä̧dö̧ icuätucui; ttö̧ja̧'i̧nä̧ toächoime dajö icu ti̧'ä̧dö̧ ku̧nä̧tu̧cui̧. ¹⁴ Ja̧'hua̧nö̧ jȩcu̧'u̧ttu̧tä̧ ttötä pä̧dä̧cua̧jä̧ iso päi'önä cuaa̧mo̧nä̧ cu̧mu̧ ujurunätä iso juo'epöjä cu̧ji̧pa̧ pä'ömä. ¹⁵ Jitämä̧ topi Behemotrö, ttö chaditinä̧cu̧ ucuru chaditinö̧ta̧'a̧nö̧; ja̧u̧mä̧ isä'cua cu päcäyä jä̧'i̧ja̧'a̧nö̧ jö̧nä̧. ¹⁶ jitämä̧ topittö̧, ujurumä̧ abonä̧tä̧ ka̧'a̧; ujurumä u̧cuä̧ba̧ jacuä idepänätä ka̧'a̧. ¹⁷ I̧hui̧ri̧'pa̧mä̧ cedro dau hui'cua'a jä̧'i̧nö̧'a̧nö̧ juä̧'a̧; idepämä̧ koro idepäcu todehua'a. ¹⁸ ihue'quiyumä̧ bronce ona jä̧i̧'nö̧'a̧nö̧; ö̧'a̧jui̧yä̧mä̧ cuorä̧u̧jä̧ jä̧'i̧nö̧'a̧nö̧. ¹⁹ Ja̧u̧mä̧ Dios u̧huä̧bȩ'i̧nä̧u̧ ttu̧ru̧hua̧ ja̧'a̧, Ya̧tȩ Dios ja̧'a̧ uhuäbe'inömä, kä'ö icua pä'ö'i̧nä̧ hua̧. ²⁰ Ja̧'hua̧nö̧ ja̧'a̧ po̧ri̧yä̧'tä̧ päi'omȩttö̧ u̧cuä̧mä̧ ucuäjetäcu; de'a isotömä tö'cönä̧nö̧ järehuätö. ²¹ Ja̧u̧mä̧ Loto pä'ö micuäi dȩa̧'a̧ 'cuä'ächi'ö pä̧mä̧dö̧ duboriyanä ka̧cu̧ obö 'cä̧tȩ dajahuächö. ²² Loto pä'ö micu 'cä̧tȩ yo̧'cu̧sa̧ jo̧mȩ daju icuäcu; aje i̧sä̧rä̧nä̧ ka̧cu̧tä̧ jäyänä̧ sobucuächönä tto̧ȩpä̧rä̧cu̧. ²³ To̧pi̧ttö̧, aje puruhuoto jäyoto'i̧nä̧ suädi'öttömä̧, ja̧u̧mä̧ ttö̧'ä̧huo̧cö̧; ja̧u̧mä̧ a̧'cua̧ huȩnä̧rö̧, Jordán aje'i̧nä̧ i̧ji̧yu̧ jubö suhuädi'öttö'i̧nä̧. ²⁴ ¿Ya̧tȩ ja̧u̧ru̧ isobönä äcuädö 'chuhuäda'anö tä̧ji̧, ja̧'hua̧nö̧ jo̧ca̧'a̧ttö̧'i̧nä̧ chutä ä̧tȩcuä̧ jähuänä̧ i̧ji̧yu̧nä̧ 'tä̧'ȩpa̧'a̧nö̧ tä̧ji̧?