¹ ¿Ucumä huo̧jua̧jä̧ de'a cabrastö̧ tti̧tti̧mö̧rö̧ inähuiyära̧'a̧cu̧ ttȩpö̧ mo̧ro̧mä̧? ² ¿Ucutumä to'cuätucu'anö ja̧'a̧ yä̧mö̧ tti̧tti̧mö̧rö̧ ttu̧ju̧nä̧ra̧'a̧? ¿Ucumä ju̧huȩnȩnä̧ kä̧hua̧tö̧ jo̧mȩnä̧ ttu̧cuä̧ba̧mä̧ ru̧nä̧rä̧tö̧ pä'ö cu̧'a̧ta̧'a̧nö̧ ja̧'a̧? ¿Ucumä huo̧jua̧jä̧ tti̧tti̧mö̧rö̧ o'cajuottäcuȩ mo̧ro̧mä̧? ³ Jahuätömä rȩjȩ pä̧mä̧dä̧tö̧ ja̧'hua̧nö̧ pä̧mä̧dö̧ tti̧tti̧mö̧ po̧'ä̧tö̧rö̧ o'cajuo'ätö ja̧u̧nu̧ o'ca'amä o'cajuottomenä barahuäjimä ppȩä̧chi̧'ä̧u̧. ⁴ Tti̧tti̧mö̧mä̧ yabonö juruhuächätö ja̧'hua̧nö̧ ja̧'a̧mä̧ de'a i̧sä̧jä̧ttö̧tä̧ böo juo'ätö; jahuätö rä'opätömä pä'äjita'anö̧mä̧ ppa̧'ä̧cho̧co̧tö̧ ttäcuotö. ⁵ ¿Di jä̧ttö̧ burro dea i̧sa̧rö̧ pä̧cuä̧rö̧jö̧ anö ö̧jö̧nä̧ hueinömä? ¿Di jä̧ttö̧ burrorö ju̧ru̧hua̧rö̧ ti̧ä̧dä̧cuähuappä ejädö icuinömä, ⁶ ja̧'huatanö TTÖTÄ jinä'a̧ ja̧u̧ ojusode Arabah ö̧ja̧ pä'ö jȩpi̧nö̧'i̧nä, 'cäruhuäbu sa̧dä̧jä̧nä̧ ojusode'inä ? ⁷ Ja̧u̧mä̧ öjö'cö juiyönä jä̧cu̧ ötahuiyättö huo'ömä;ja̧'hua̧ta̧nö̧ ja̧u̧mä̧ ä̧ju̧huo̧cö̧ o'ihuä i̧sa̧ huo'ö'inä ⁸ .Ja̧u̧mä̧ cueächö deatä ucuä'che jö̧ta̧'anö; ja̧u̧mä̧ juä̧nȩtä̧ usu ucuade ja̧ttu̧cua̧de ucua pä'ö. ⁹ ¿De'a päcayäma eseunu ö̧ja̧'a̧ tä̧ji̧ ucuru u̧ru̧hua̧ päi'önä kä̧nä̧mä̧? ¿Ja̧u̧mä̧ ucu cuä̧ji̧mö̧ ttucuome ö̧ja̧ pä'a tä̧ji̧? ¹⁰ ¿De'a päcayärömä isappänä ti̧'ä̧dö̧ cu̧ju̧nä̧cuo̧mȩ sahuiyacupä'ö huȩcuä̧rö̧'a̧nö̧ to̧ji̧ ucumä? ¿Ja̧u̧mä̧ de'a pämäroppänä ucunä cueächö'anö tä̧ji̧? ¹¹ ¿Ju̧ru̧hua̧ pä'ö ja̧u̧ru̧ cua̧u̧ cu̧huä̧nä̧rö̧'a̧nö̧ tä̧ji̧? ¿Cuaditähuä'inä aditiyacu pä'ö cuiyö'anö tä̧ji̧ ja̧u̧ru̧? ¹² ¿Ja̧u̧ru̧ta̧ tta̧cuä̧rö̧'a̧nö̧ ja̧'a̧ cu̧cuä̧ u̧huä̧ju̧ ote cuojusodera̧'a̧ i'chächiyacu pä'ömä, u̧huä̧ju̧ ote ö̧ca̧ca̧ti̧ya̧cu̧ pä'ö pojopö icuähuaränä? ¹³ ¿Avestruz ujuabä cue'ö eseu, ja̧'hua̧nö̧ ja̧'a̧nä̧ ja'huätömä eseu cuetta'a tä̧ji̧? ¹⁴ Ja'huätömä rȩjȩtä̧ rötätö ttiädumä, rȩjȩ i̧sa̧ppȩnä̧ du̧'o̧sȩnö̧ rȩba̧nö̧ pa̧ pä'ö; ¹⁵ Ja'huätömä unichi'ätö ö̧jä̧pö̧ ji̧'u̧tȩnä̧tä̧ kä̧dö̧ icu'anö huottöjä pä'ömä ja̧'hua̧nö̧ ja̧'a̧nä̧'i̧nä̧ de'a isotö 'cuȩ'cu̧ tticu'anö ja̧'a̧ pä'ö'inä. ¹⁶ jitämä̧ topi, curumä̧ ka̧'a̧ cuäbo ja̧'a̧nä̧; cu̧huä̧ba̧ jahuänä̧tä ka̧'a̧ cujurumä̧. ¹⁷ i̧cui̧ri̧'pa̧mä̧ cedro dau hui'cuä'a jä̧'i̧nö̧ ja̧'a̧nö̧ jo̧nä̧ juä̧'a̧; idepämä̧ körö idepäcu ppächi'a'a. ¹⁸ ihue'quichumä̧ bronce tubos jä̧i̧'nö̧ jo̧nä̧ jui'nö̧; ö̧'a̧jui̧yä̧mä̧ cuo̧rä̧u̧nä̧ ja̧i̧'nö̧ jo̧nä̧ jui̧nö̧. ¹⁹ ¿Ucumä cabayu ujuru iyinö̧jä̧? ¿Ucu ji̧na̧'a̧ cabayu u̧ru̧pä̧'quȩnä̧ uhuo'che ru̧ni̧nö̧mä̧? ²⁰ ¿Ya'utenämä ucumä märäcäyuhuä töa'a jä̧'i̧nö̧'a̧nö̧ tö'inä̧jä̧? Ucuo ru̧hua̧mä̧ yettecui'önä̧ juäpö ja̧'a̧. ²¹ Ja̧u̧mä̧ ujurucu te'chäu ja̧'hua̧nö̧ jo̧mȩnä̧ ujurumä esehua'a; ja̧u̧mä̧ jurunä jopö curä urohuähua pä'ö. ²² Ja̧u̧mä̧ yecuäcuähuämä ya̧'a̧huȩ'ö̧tä̧ rötö ja̧'hua̧ta̧'a̧nö̧ na̧'a̧chi̧po̧cö̧; curä'chu ye'ecumä tu'ipächocö. ²³ 'Ti̧'tä̧na̧mä̧ jäyänä rä̧nö̧ huoa'a, dacuodäcu cuäecuächära̧'a̧ ja̧'hua̧ta̧'a̧nö̧ dacuä'chucu. ²⁴ Ja̧u̧mä̧ rȩjȩnä̧mä̧ jurunä jopö ja̧'hua̧ta̧'a̧nö̧ ujurucu; trompeta rä̧mi̧po̧mȩnä̧, ja̧u̧mä̧ yȩnȩtä̧mä̧ huirochi'ömä ko̧cö̧. ²⁵ Trompeta rä̧mi̧po̧mȩnä̧mä̧ ja̧u̧mä̧ pä'ö, ¡Aja! Curä tturohuäumä otmenä̧ji̧ 'cö̧'ö̧, su̧ro̧da̧u̧ ttu̧ru̧hua̧ pä̧i̧cu̧nä̧ huoömä ja̧'hua̧ta̧'a̧nö̧ curä rohuäu huottömä̧. ²⁶ ¿Paremä ucu cu̧huo̧ju̧ jähuänä co̧'ä̧rö̧, ja̧u̧ ujuabiyä kä̧hua̧ ö'ohue ja̧'a̧cu̧ setächia'amä? ²⁷ ¿Paremä ucu huecuäcu mo̧ro̧jä̧ ju'tojucu co'ö ja̧'hua̧ta̧'a̧nö̧ iä ötomemä ju'toju ppä'ö? ²⁸ Ja̧u̧mä̧ po̧ri̧yä̧'tä̧ päi'ome kö̧ ja̧'hua̧ta̧'a̧nö̧ ä̧'chu̧ jo̧mȩ beipome ojusode aditö, ko̧ju̧ppa̧'a̧ abotä. ²⁹ Jua'attötä ö̧'o̧ra̧rö̧mä̧ usu; i'äriyämä yorö'iso otonä̧ huähua'a. ³⁰ I̧tti̧mö̧mä̧ ucuojatä ahuätö; ttö̧ja̧ hua'inä̧tö̧ ttö̧'o̧jo̧mȩ'i̧nä̧, ja̧u̧mä̧ ju̧huȩnȩtä̧ kö̧.