¹ Ja̧u̧nu̧ o'ca'a, TÖ̧Ä̧NÄ̧HUA̧ Jobrö isoppa jiuruhuoppanä huopömä pä'inö: ² ¿Dijä̧ttö̧ pi̧yȩ yo̧u̧ chadita pä'ö cha̧mö̧cuädina'acö ieruhua'anä i'cächömä? ³ Ja̧'hua̧nö̧ ja̧'a̧, cuäcänä ti̧'ä̧dä̧cuä̧hui̧ ubo 'cua̧rö̧nä̧, ja̧'hua̧nö̧ jo̧mȩnä̧ ji̧yȩtȩ jä'epö chäjucuäcuajä ja̧'hua̧nö̧ jädepomenä cuädäta pä'ötä jä̧cua̧'a̧. ⁴ ¿Tȩnȩ cu̧ji̧nä̧ttö̧ Ttö̧ rȩjȩ chuhuäbeinö̧mä̧? Ji'ähuittö, rö̧ä̧nä̧ huo̧juä̧huä̧ cu̧ju̧nä̧rö̧ttö̧mä̧. ⁵ ¿Di ji̧na̧'a̧ttö̧ öotomä pȩnȩ jubötä jä̧cua̧'a̧ pä'inö̧mä̧? Ji'ähuitö, cu̧huo̧juö̧ttö̧mä̧. ¿Di ji̧na̧'a̧ttö̧ ja̧u̧ öoto pa̧ja̧cuä̧mä̧ otodinö̧mä̧? ⁶ ¿Däjenä kada'camä 'chu̧huä̧rö̧nä̧ ku̧nä̧hui̧'i̧na̧'a̧ttö̧? ¿Dijä̧ttö̧ ido'qui ä̧cuo̧mȩnä̧ iso'qui rutinö̧mä̧ ⁷ si̧ri̧'cö̧ yo̧mȩtȩnä̧ mo̧ro̧ päia'a ra̧'i̧nä̧tö̧ ja̧'hua̧ta̧'a̧nö̧ Dios i̧tti̧mö̧ o'catoi'önä eseu huottäcuotö? ⁸ ¿Di ji̧na̧'a̧ttö̧ aje 'quȩrä̧hui̧a̧'a̧ äpate mö̧'ȩpi̧nö̧mä̧, ttöacuä jäcuättö räopa'a jä̧'i̧nö̧'a̧nö̧ räopäja'amä--- ⁹ Ajiya isoppa ö̧'ca̧tä̧huä̧ta̧ chu̧'ca̧ti̧nö̧mä̧ juhua'atäcu rö̧ä̧nä̧ yo̧u̧ i̧sä̧ta̧nä̧ juä'opinö̧mä̧? ¹⁰ Ja̧u̧ ji̧na̧'a̧ Ttö aje rö̧o̧tomä pȩnȩ jubö beipäcua'a pä'ö chu̧ju̧ni̧nö̧mä̧ ja̧'hua̧ta̧'a̧nö̧ Ttömä tto'epö kä̧nö̧ äpate'i̧nä̧ ku̧nu̧mä̧, ¹¹ pa̧'a̧nö̧ pä'inö̧sä̧: "Ucumä pȩnȩ jubötä cui̧rȩbȩhua̧já̧, juhua'a yabonö̧mä̧cö̧; pȩnȩ ja̧'a̧ Ttö 'to'opö chu̧nä̧cuo̧mȩmä̧ aje ppau obi ucuo tecuäumä. ¹² ¿Ya'utenämä, ucu ku̧ji̧nö̧ mo̧ro̧ttö̧ kä̧mä̧dö̧mä̧, mo̧ro̧ juoa pä'ö'i̧nä̧ hue'ä'ijöjä ja̧'hua̧ta̧'a̧nö̧ mo̧ro̧ juoaja'amä a̧di̧tä̧cuȩ o'cajuiyönä u̧huo̧jua̧'a̧mä̧, ¹³ pi̧jä̧ rȩjȩ o'cajuiyönä 'chu̧huä̧ra̧ pä'ömä, ttö̧ja̧ suropätörö'i̧nä̧ jäyäcu yȩ'ȩpö̧ icu'anö ja̧'a̧ pä'ömä? ¹⁴ Rȩjȩmä̧ a̧'cua̧juä̧mä̧ pärohuächa'a redä'ca pä̧mä̧dö̧nä̧ tattomenä pärohuächa'a jä̧'i̧nö̧'a̧nö̧; o'cajuiyönä̧tä̧ pi̧yȩnä̧tä̧ i̧jȩcuä̧cha̧cua̧'a̧ huäkä'co jö̧nä̧tä̧ pö̧jä̧tö̧ pätecu 'ca̧tä̧cuä̧huä̧ta̧ jä̧'i̧nö̧'a̧nö̧. ¹⁵ Ttö̧ja̧ suropätömä i̧tȩya̧u̧mä̧ ya'ocuätö; suronä tta̧mö̧cuädäjimä cä'ädi'ätö. ¹⁶ Aje rö̧o̧to räopome topö i̧hui̧nö̧jä̧? ¿Aje rö̧o̧to dȩa̧'a̧ttö̧'i̧nä̧ yabonä̧nö̧ cue'ächö i̧hui̧nö̧jä̧? ¹⁷ ¿Hua'are reju äpate'i̧nä̧ i̧jȩcuä̧chi̧nä̧cu̧jä̧? ¿Topinö̧jä̧ yo̧ppa hua'are isoppa äpate'i̧nä̧? ¹⁸ ¿Rȩjȩ öcähue'i̧nä̧ huo̧jui̧'i̧nö̧jä̧? Ji'ähuittö, o'cajuiyönä cu̧huo̧ju̧ttö̧mä̧. ¹⁹ ¿Tené ka̧'a̧ jä̧ttö̧ tȩu̧ mä̧nä̧ra̧'a̧ 'cuächö 'chä̧cuä̧huä̧mä̧mä̧ ja̧'hua̧ta̧nö̧ tené ka̧'a̧jä̧ttö̧ yo̧'ö̧ idepiyumä? ²⁰ ¿Ucumä tȩ'a̧u̧ra̧'a̧cu̧ ocuipa'anö ja̧'a̧ tä̧ji̧ ja̧'hua̧ta̧nö̧ yo̧'ö̧ aditö ö̧jo̧mȩcu̧'i̧nä̧? ¿Ucumä po̧cui̧pö̧ juiyö'anö ja̧'a̧ tä̧ji̧ jahuätö ttu̧mä̧nä̧ra̧'a̧ ppa̧tta̧cha̧ pä'ö? ²¹ Ucurumä täcö jeruhuoca'a, cuhuäpächinö o'ca'atä ja̧'a̧ttö̧; !täcö rö̧ä̧'ö̧nä̧ a̧ȩ hua̧jä̧! ²² Po̧cui̧pi̧nö̧jä̧ di̧ya̧hua̧ppȩ ca̧ca̧tö̧ hua'adö ku̧nä̧huo̧mȩ, ja̧'hua̧ta̧nö̧ topinöjä̧ diyau o̧'qui̧ hua'adö ku̧nä̧huo̧mȩ'i̧nä̧, ²³ pi̧yȩmä̧ TTÖTÄ hua'adö chu̧ju̧ni̧nö̧ curä rohuähuäcuäcuä päi'ö mo̧ro̧ pä'iomenä jä̧cuä̧ pä'ö? ²⁴ ¿Timäjä̧ttö̧ mä̧nä̧ cu'upä örohuö'inä 'cä̧'chö̧ icuämämä ja̧'hua̧nö̧ ja̧'a̧nöä̧'i̧nä̧ kä̧rö̧'co isoppa kä̧cua̧ rä'opa'cutu pi̧jä̧ra̧'a̧ pperetomemä?. ²⁵ ¿Dijättö uhuäbe'inömä ajiya u'tojuttu huerächö suhuäda pä'ömä, ja̧'hua̧nö̧ jö̧ juiyöttömä dijätö cu'upä rou'inä ichönä jȩpi̧nö̧mä̧, ttö̧ja̧sa̧ toächä̧jä̧nä̧ ajiya'inä ichönä jȩpi̧nö̧mä̧, ²⁶ ja̧'hua̧ta̧'a̧nö̧ de'a jui̧yä̧jä̧nä̧'i̧nä̧, ttö̧ja̧sa̧ ya̧tȩ'i̧nä̧ toächome, ²⁷ ja̧'hua̧nö̧tä̧ iyepa'a rȩjȩ cuähuä ppöröhuocome'inä ja̧'hua̧ta̧'a̧nö̧ to̧ä̧cho̧mȩ'i̧nä̧, ja̧'hua̧nö̧ i̧yȩpo̧mȩnä̧ dede'cuamä ppuru'unä buo juoa'a? ²⁸ ¿Ju'tojuttu ichoyamä jä'o ku̧nä̧roya tä̧ji̧? ¿Di öacuä jacuättö icha'a jä̧ttö̧ mo̧ro̧ päi'a'a diyaumä? ²⁹ ¿Di öacuä jacuättö icha'a jä̧ttö̧ diyahuo'quimä? ¿Dijä̧ttö̧ tȩa̧u̧ iyinömä mo̧ro̧jä̧ra̧'a̧ttö̧ sä̧ru̧hua̧ppȩ kä̧dȩpö̧nä̧? ³⁰ Ajiya'inä dajahuächa'a ja̧'hua̧ta̧'a̧nö̧ pärohuächa'a inähuä 'cua̧rö̧nä̧tä̧; täcuome huä̧mȩnä̧mä̧ diyahuo'quitä ja̧'a̧. ³¹ ¿Ucuohuinörö̧ u̧rä̧u̧sä̧ ku̧na̧'a̧nö̧cö̧, Oriónrö̧ nö̧'cähuappä ejädö cuicu'anö hua̧jä̧cö̧? ³² Si̧ri̧'cö̧ pä̧cuä̧yu̧nö̧ rö̧jä̧tö̧rö̧ ocuipa'anö hua̧jä̧cö̧ ttu̧rȩja̧ pä'ö pähuichinö mo̧ro̧ tti̧jȩcuä̧cha̧ pä'ömä? ¿Aje yähui isajuru ki̧tti̧mö̧cu̧ ocuipa'anö hua̧jä̧? ³³ ¿Mo̧ro̧jä̧ jä̧cuȩ pä'ö ku̧nä̧huä̧'i̧nä̧ huo̧jua̧jä̧? ¿Mo̧ro̧jä̧ttö̧ hueähuä huȩnȩmä̧ pi̧jä̧ rȩjȩnä'inä cutu'anö ja̧'a̧ tä̧ji̧? ³⁴ ¿Cui̧huȩnȩmä̧ ajiya isoppa ra̧'a̧cu̧ huu'cui'anö ja̧'a̧, ajiya rö̧ä̧nä̧ ichoya ucuru a̧tto̧i̧'a̧cu̧ pä'ömä? ³⁵ Cu'upä rou'i̧nä̧ rä̧o̧pa̧ pä'ömä huecu'anö ja̧'a̧ tä̧ji̧ jahuätö pȩnȩtä̧ ka̧cuä̧tö̧jä̧ pättacu pä'ömä? ³⁶ ¿Di̧jä̧ttö̧ huo̧juä̧huä̧ huȩnȩ ajiya isoppanä̧ ku̧ni̧nö̧mä̧ ja̧'hua̧ta̧nö̧ huo̧jui̧'ä̧cuä̧huä̧'i̧nä̧ ajiya i̧sa̧ppȩnä̧ iyinö̧mä̧? ³⁷ ¿Di̧jä̧ttö̧ ajiya isoppä pperecuächomenä̧ ö̧'a̧ta̧nö̧ juä'amä̧. ¿di̧ja̧ttö̧ 'ca̧nä̧ri̧yö̧ ajiya a̧cuä̧yu̧ mo̧ro̧ja̧rä̧ttö̧ toö icuä'anö̧ juä̧'a̧mä̧. ³⁸ ajiya isoppäppämä̧ 'quiyä'ca pä'ömä pijä̧ rȩjȩmä̧ Korö'cacu päi'a 'quichunä̧tä̧ che'ecuäcuäcuätä. ³⁹ ¿Mö̧ yähui isaju ku̧'o̧ya̧rö̧ cuäcu'anö̧ ja̧'a̧nö̧cö̧ tti̧tti̧mö̧ suttädi'önä cuiyö'anö̧cö̧ ⁴⁰ jahuätö ttäjuttö durupö ttö̧'ȩjo̧mȩnä̧mä̧ juhua'atäcu dajahuächäcuähuome, dajahuächo'cotö tta̧'a̧rö̧ ttö̧'ȩja̧'a̧dä̧mä̧? ⁴¹ ¿Dijä̧ttö̧ cuervos ttu̧cuä̧ iyömä tti̧tti̧mö̧ Diosrö ajaunö̧ jättepomenä̧mä̧ ja̧'hua̧ta̧'a̧nö̧ ttu̧cua̧ jui̧yä̧u̧ juiyupächätörömä?