¹ Kara'anä̧mä̧ Eliúmä yabocu ucuocuinö: ² "Chucuocua'a ä̧ju̧cuä̧tu̧cui̧, ucutu huo̧juä̧huä̧ ttö̧ja̧mä̧; ä̧ju̧cuä̧tu̧cui̧ttö̧, ucutu huo̧jui̧'ä̧cuä̧huä̧ ku̧nä̧rä̧tö̧mä̧. ³ Ja̧'hua̧nö̧ ja̧'a̧ tä̧ja̧mä̧ ucuocumä huo̧jui̧a̧'a̧ ttu̧cuä̧ tucuomenä nö tu̧huo̧jua̧'a̧ jä̧'i̧ja̧'a̧nö̧. ⁴ Ta̧mö̧nä̧ pa̧ja̧tö̧tä̧ adiumä tȩmä̧cuo̧tö̧jä̧: ujutu ta̧mö̧nä̧ pa̧ja̧tö̧tä̧ tu̧'o̧cui̧'ä̧tu̧cua̧ adihuäjueimä. ⁵ Ja̧'hua̧nö̧ ja̧'a̧ Jobmä pä'inö: Ttömä surojömä jui̧'a̧sä̧, ja̧'hua̧nö̧ ja̧'a̧nä̧ Diosmä adihuomenä jȩä̧cuä̧huä̧mä̧ iya pä'ocö päji. ⁶ Cha̧mö̧cuädömä̧ chu̧ju̧nä̧ra̧'a̧, ya̧pa̧rȩhua̧ pä'ötä pä̧'ä̧hua̧sä̧. Chuttahuiyämä yorö'iso huahuächica'a, surojö jȩä̧cuä̧huä̧mä̧ juida'anä̧. ⁷ ¿Ka̧ra̧ Job'a̧nö̧ hua̧'i̧nö̧ ö̧ja̧'a̧, ajiya ttahua jä̧'i̧nö̧'a̧nö̧ ya̧'a̧huȩ'ö̧ rötömä̧, ⁸ jitö suronä a̧mö̧cuädätucu cue'ächömä ja̧'hua̧ta̧nö̧ suropätucu cue'ächömä? ⁹ Ja̧'hua̧nö̧ ja̧'a̧ ja̧u̧mä̧ pä'inö: Yorö'iso micuähuoca'a ya̧tȩ ttö̧ja̧sa̧ eseäcuähuä ȩmö̧'ca̧ Diosrö pä̧huä̧rö̧jö̧ jȩpö̧rö̧mä̧. ¹⁰ Ja̧'hua̧nö̧ ja̧'a̧ttö̧ ä̧ju̧cuä̧tu̧cui̧ttö̧ ucutu huo̧jui̧'ä̧cuä̧huä̧ ttö̧ja̧mä̧: Dios surojö jȩa̧ pä'ömä tö'cömä ko̧cö̧ jä̧cua̧; suronä jȩpä̧ji̧ ö̧jo̧mȩcu̧mä̧ o'cajuiyönä ju̧ru̧hua̧ tö'cönänömä ko̧cö̧ jä̧cua̧. ¹¹ Ja̧u̧mä̧ ya̧tȩ ttö̧ja̧sa̧ aditähuä jä̧ji̧mä̧ ppa̧'a̧di̧pö̧; Ja̧u̧mä̧ yotucu pönä tta̧mö̧cuä̧dö̧ micuä ttö̧'o̧cui̧'ö̧nä̧ jȩpö̧. ¹² Ja̧'hua̧ta̧'a̧nö̧ Diosmä su̧ro̧pa̧rö̧mä̧ ja̧'a̧tä̧ to̧ä̧cua̧ ja̧'hua̧ta̧'a̧nö̧ o'cajuiyönä ju̧ru̧hua̧mä̧ adihuomenä jä̧cuȩmä̧ ji'ähuocö. ¹³ ¿Di hueinä̧cu̧ jä̧ttö̧ pi̧jä̧ tta̧huä̧ra̧ pä'ömä? ¿di jä̧ttö̧ pi̧jä̧ o'cahuiyönä aditinömä chutä huea pä'ö? ¹⁴ JA̧U̧TÄ̧ a̧monä amucuädö aditö u̧ju̧ni̧nä'attömä, JA̧U̧TÄ̧TÄ̧ ja̧'a̧ a̧'cua̧ ru̧hua̧rö̧ amiyuppa ppu'ö ku̧ni̧nö̧mä̧, ¹⁵ ja̧'hua̧nö̧ ja̧'a̧ttö̧ ttö̧ja̧ ttidepämä o'cajuiyönä rȩjȩra̧'a̧tta̧ ppa̧huä̧chö̧'a̧nö̧ ja̧'a̧ pä'äjita'anö ¹⁶ Jitä ucu cu̧huo̧juä̧chi̧ö̧ttö̧mä̧, pi̧yȩ ä̧ju̧cui̧; ttö pädö. ¹⁷ ¿Adihuäjuäi a̧u̧tu̧mä̧ hueöanö ja̧'a̧ tä̧ji̧? ¿Ucumä ro̧cuȩpu̧anö ja'a täji Dios adihuä i̧sa̧ ju̧ru̧hua̧rö̧mä̧? ¹⁸ Dios, dijä̧ttö̧ ru̧hua̧rö̧ päö'anö hua̧mä̧: 'ucumä suronä jȩpö̧jä̧' ko̧ro̧nö̧mä̧ pä'ö juiyo adihuä i̧sa̧jä̧: '¿Ucutumä suronätä̧ jȩpä̧tö̧jä̧?' ¹⁹ Dios, dijä̧ttö̧ ucuo te'ähuocömä ötahuiyänä hue'ätörö ja̧'hua̧ta̧'a̧nö̧ pärätättö ruhuotörö'inä usurä isotöttö'inä abonänö, jua'amä jitötä tta̧mo̧nä̧ ttu̧mu̧nä̧ ttaditina'a̧ttö̧. ²⁰ Jeruhua'anätä̧ hua'ö tticuäcuotö; yodo kä̧hua̧ jue'ö päi'a'a yȩ'ȩpö̧ icuähuäcuyotö ja̧'hua̧nö̧tä̧ 'cuätto'äcuotö; ttö̧ja̧ juruhuätömä ttȩpä̧cuä̧u̧ oto, ja̧'hua̧nö̧ ja̧'a̧nä̧ ttö̧ja̧ ttu̧mu̧nä̧mä̧cö̧. ²² ja̧'hua̧nö̧ ja̧'a̧ttö̧ Diosmä to̧pä̧rö̧ ya̧cu̧pö̧nä̧rö̧ to̧pä̧rö̧; ja̧u̧mä̧ cui̧'cho̧mȩtä̧cu̧ to̧pä̧rö̧. ²¹ Yo̧ö̧'i̧nä̧ juiyäcu, yo̧ä̧sa̧ päi'ä pä'ö'inä tta̧'a̧ro̧cö̧ suronä jȩpä̧'chä̧tö̧ tta̧mo̧nä̧tä̧ ttödajuächa pä'ö'inä. ²³ Diosmä recuä rö̧jo̧co̧cu̧ ttö̧ja̧rä̧ yabocu usähua pä'ömä; recuä rö̧jo̧ca̧'a̧ ya̧tȩ ttö̧ja̧sa̧rö̧'i̧nä̧ ja̧u̧ ä'ca jo̧mȩtö̧ ro̧ttȩpa̧ pä'ömä. ²⁴ JA̧U̧MÄ̧ juruhuätöjä pä'ätörö si'epö icu jȩttö̧'i̧nä̧ u̧huo̧jua̧'a̧ttö̧ rȩcuä̧ rö̧jo̧co̧cu̧ u̧huo̧jua̧ pä'ömä; JA̧U̧TÄ̧ ku̧nu̧ korotörö ruhuo cuetta pä'ömä. ²⁵ Pa̧'a̧nö̧tä̧ jȩpö̧ JA̧U̧MÄ̧ jȩttö̧'i̧nä̧ täcö u̧juo̧jua̧'a̧ttö̧; JA̧U̧MÄ̧ jahuätörö yodo ttieruhua'anä ichö 'cho'ipö si'epu i̧cuä̧u̧. ²⁶ JA̧U̧MÄ̧ korotö totta'anä 'cuä'ö icu ttö̧ja̧rö̧ cuä̧'ö̧ icuätörö 'cua̧rö̧nä̧ suronä jȩtta̧'a̧ttö̧. ²⁷ päinö'anö tti̧'cho̧ca̧'a̧ jä̧yä̧cu̧ 'quä̧'ipä̧chö̧ tti'cha'attö. ²⁸ ja̧'hua̧nö̧ jȩpö̧, usurä isotö churutä 'chä̧nö̧ tta'ahuönä jȩpi̧nä̧ttö̧: JA̧U̧MÄ̧ ä̧ju̧cui̧nä̧ jahuätö ta̧'cua̧ ta̧ȩcu̧ huotta'a. ²⁹ Ja̧u̧ 'coruchi'ö ö̧'o̧mȩnä̧mä̧, ¿Doijä̧ttö̧ ro̧ttȩpa̧'a̧nö̧ hua̧ pä'ö'anö hua̧mä̧? Ja̧u̧ i'ä daju icuttömä, ¿Dijä̧ttö̧ toö'anö hua̧mä̧? Ja̧u̧mä̧ ko̧ro̧jä̧ ttö̧ja̧rö̧ ruhuonä̧ hue'ö ttö̧ja̧sa̧rö̧mä̧ yoräteunä̧tä̧, ³⁰ Su̧ro̧pa̧ ruhuonä̧ hue'ö juiya pä'ömä, ja̧'hua̧nö̧ jö̧ttö̧tä̧ ttö̧ja̧rö̧ ro̧ȩcuä̧mä̧ ji̧yȩtȩ'i̧nä̧ ro̧ȩcuä̧mä̧ juiyäcua'a. ³¹ Ta̧mö̧cuädätucua yu̧a̧tȩ Diosrö päöttömä: ttömä isopäi'önä̧tä̧ huȩnȩcuä̧chö̧sä̧, ja̧'hua̧nö̧ ja̧'a̧nä̧ yabonö̧mä̧ surojömä jȩpo̧cö̧ chä̧cua̧sä̧, ³² tochö juiyönä jö̧ huo̧juȩti̧ttö̧, ttömä surojö jȩpä̧ji̧sä̧, ja̧'hua̧nö̧ jȩcha̧'a̧nä̧ juhua'a yabonö̧mä̧ jȩpo̧cö̧ chä̧cua̧sä̧. ³³ ¿Ucutu cuamöcuädätucumä Diosmä ttö̧ja̧sa̧ suronä jȩä̧ji̧tä̧ ro̧ȩpä̧cua̧'a̧ tä̧ji̧, ucutu Dios jȩö̧ chuju'cätucuoca'amä? Ucutumä̧ pojopö ȩmä̧tu̧cui̧, ttömäcö ja̧'a̧. Ja̧'hua̧nö̧ ja̧'a̧ ji'ähuätucuitö ucutu cu̧huo̧juä̧tu̧cu̧. ³⁴ Ttö̧ja̧ huo̧jui̧'ä̧cuä̧huä̧ ku̧nä̧rätö̧mä̧ ttörö pättäcuotö, ja̧'hua̧nö̧ jö̧ta'anö, yotucu pönä huo̧juä̧huä̧ ku̧nä̧rö̧mä̧ ä̧ju̧cu̧mä̧ pä̧cua̧: ³⁵ Job huo̧huä̧huä̧'i̧nä̧ jui̧'a̧ kä̧nö̧ ucuocu; i̧huȩnȩmä̧ huo̧juä̧huä̧ huȩnȩ jo̧ca̧'a̧. ³⁶ Suro Jobrö ro̧ȩcuo̧mȩcu̧ tȩpö̧ttö̧mä̧ a̧'u̧cu̧nä̧tä̧ jȩi̧nö̧ jähuänä̧tä̧'i̧nä̧ su̧ro̧pa̧ ucuocua'a jä̧'i̧nö̧'a̧nö̧ ucuocuäjomȩttö̧. ³⁷ Ja̧hua̧nö̧ ja̧'a̧ ja̧u̧mä̧ suronä̧ jȩä̧cuä̧huä̧mä̧ ji̧nä̧ yabonö jȩpö̧; ujutu tä'ca jo̧mȩttö̧ u̧mö̧pi̧yä̧nä̧ 'pȩ'ö̧nä̧ ya̧'a̧huȩ'ö̧; Diosrö to'ija̧'a̧cu̧ rö̧ä̧nä̧ ucuocu."