¹ Ja̧'hua̧nö̧ ja̧'a̧ttö̧ jitämä, Ttö Jobmä̧, jädepäcujä, chucuocumä̧ ä̧ju̧cui̧ttö̧; adiu ä̧ju̧cui̧ttö̧ o'cajuiyönä̧ chu̧cuo̧cu̧mä̧. ² Jitä, topittö, chä ba'epö, kä̧mä̧dö̧ ucuocuinösä̧. ³ Chucuocumä jueö huȩnȩtä̧ räopa'a chamiso'quittömä; chämä ucuocua'a päcuäi chu̧huo̧jö̧ huȩnȩtä̧. ⁴ TÖ̧Ä̧NÄ̧HUA̧ a̧'cua̧ru̧hua̧tä̧ ja̧'hua̧nö̧ ttörö jȩpi̧nö̧mä̧; o'cajuiyönä ju̧ru̧hua̧ a̧mi̧yuppamä cha̧'cua̧rö̧ iyina'a. ⁵ Ucu jȩ'cu̧'a̧nö̧ jö̧ttö̧mä̧, ädätittö; chä'ca jo̧mȩttö̧ cui̧huȩnȩmä̧ adiu jȩpö̧ ku̧nö̧ ja̧'hua̧ta̧'a̧nö̧ ä̧rä̧mi̧'ö̧ kä̧mä̧di̧. ⁶ Topittö, Ttö'i̧nä̧ ucu jö̧ta̧'a̧nö̧ yorätehua̧sä̧ Dios toomenämä̧; ttö'i̧nä̧ redä'ca i̧sa̧ppȩttö̧ a̧di̧cua̧sä̧. ⁷ Topittö, ttörö yecuecua pä'ömä juya'a; ja̧'hua̧ta̧nö̧ ttö pädömä ucurumä amä̧co̧cö̧ jä̧cuȩ. ⁸ Ttö chä̧jucuo̧mȩnä̧mä̧ isopäi'önätä ucuocuäjijä̧; ttömä cucuocua'a rä̧mi̧pa̧'a̧ ä̧ju̧cuä̧ji̧sä̧: ⁹ Ttömä surojömä jui̧'a̧sä̧ ja̧'hua̧ta̧'a̧nö̧ surojö jȩä̧cuä̧huä̧'i̧nä̧ jui̧'a̧sä̧; ttömä suronä jȩpä̧ji̧jä̧ jö̧nä̧mä̧ pä'ähuocösä, juhua'atäcu ttönämä juiya'a suronä jȩä̧cuä̧huä̧mä̧. ¹⁰ Topittö, Diosmä ttöcu urohuähua pä'ö pätecuächa'a; Ja̧u̧mä̧ toäcusä a̧bo̧i̧ya̧ jö̧nä̧tä̧. ¹¹ Ja̧u̧mä̧ chö̧jä̧pi̧yä̧nä̧ nö̧'cö utäcusä; chi̧'cho̧mȩmä̧ o'cajuiyötä to̧ä̧rä̧cu̧sä̧. ¹² Topittö, pi̧yȩ pa̧'a̧nö̧ jä̧cua̧'a̧ päcumä jui̧'a̧jä̧, ttötä chädätäcujä, Diosmä isopäi'önä̧tä̧ ttö̧ja̧sa̧ttö̧'i̧nä̧ abonä̧nö̧ böo ja̧'a̧. ¹³ ¿Tta̧'a̧nö̧ pä'ö Ja̧u̧cu̧mä̧ päcuä'chäcuähua'attö? Chutä jȩö̧mä̧ ujuturumä jiähua pä'ömä juiya'a. ¹⁴ Diosmä ya'utenä̧tä̧'i̧nä̧ todärenä̧tä̧'i̧nä̧ ucuocu, ttö̧ja̧sa̧mä̧ toöjuiyönä̧tä̧. ¹⁵ 'Cua̧ti̧nä̧'i̧nä̧, yodo i̧jȩcuä̧chö̧nä̧'i̧nä̧, ttö̧ja̧sa̧ täcunä ä'i'omenä'i̧nä̧, ä̧'ä̧ppä̧nä̧ pä̧nö̧ ä'i'omenä'i̧nä̧. ¹⁶ Ja̧'hua̧'a̧nö̧ ja̧'a̧ Dios ttö̧jä̧ tta̧ja̧ säju baepu pä̧i̧cu̧nä̧nö̧ pä'ö ttu̧huo̧juä̧chi̧'a̧rö̧ pä'ö, ¹⁷ suronä jȩpu̧ ttö̧jo̧mȩttö̧ räepu icua pä'ö, ja̧hua̧ta̧nö̧ ttötä ja̧'a̧ pä'äu ttö̧jö̧ttö̧ otonänö 'que'ȩpa̧ pä'ö. ¹⁸ Diosmä ttö̧jä̧ i̧sa̧ a̧'cua̧rö̧ tta̧'a̧rö̧ cua'are rejura'a i̧'chä̧'a̧nö̧ jo̧mȩttö̧. ¹⁹ Ttö̧ja̧ i̧sa̧mä̧ ro̧ȩcua̧ cua̧ ä̧'ä̧ppä̧nä̧ ö̧'ö̧nä̧ baracuäcu, ihue'quiyu jacuä'inä cädö juiyönä , ²⁰ u̧cuä̧'i̧nä̧ pä̧cuä̧ juiyönä Ja̧'hua̧ta̧nö̧ a̧'cua̧nä̧ eseunu ucuinö'inä öjö'cö juiyönä ²¹ Idepä'inä tottöjuiyönä si'ähuächö; ihue'quiyu, uhuähuocö ji̧nö̧'i̧nä̧, jitäma huäkö'cotä i̧jȩcuä̧chä̧cu̧. ²² Iso päi'önätä, a̧'cua̧ru̧hua̧mä̧ tö'cöpächö hua'are ra̧'a̧cu̧tä̧, a̧'cua̧rö̧mä̧ cuä'ö icuätö ttö̧jo̧cua̧'a̧cu̧tä̧. ²³ Ja̧'hua̧nö̧ ja̧'a̧nä̧ ya̧tȩ angel hua̧ ja̧u̧ru̧ ppä'ädö jiähua'anö hua̧ ö̧jö̧ttö̧mä̧, ppädäcuähua i̧sa̧, ya̧tȩ ángel milesnö jo̧menä ttirecuomettö, ja̧u̧ru̧ i̧jȩpa̧ pä'ö pa̧'a̧nö̧ ja̧'a̧ iso jö̧nä̧mä̧ pä'ö, ²⁴ ja̧'hua̧nö̧ ja̧'a̧nä̧ angel hua̧ ja̧u̧ru̧ re topö Diosrö jiättumä: "ppä'ädi pittö hua'are rejura̧'a̧cu̧ mo̧ttä̧chö̧'a̧nö̧ huotörö; po̧cui̧pä̧ji̧sä̧ ja̧u̧ru̧ ppä'ädörömä," ²⁵ Ja̧hua̧nö̧ ja̧'a̧ idepämä ji̧'qui̧cha̧hua̧ sa̧'cu̧rä̧ hua̧ jä̧'i̧na̧'a̧nö̧ pärohuächina'a; ujurumä pä'äjita'anö̧ ppa̧huä̧chi̧'ä̧cua̧'a̧ mö̧ä̧ya̧ pä̧nä̧ ujuru ji̧nö̧ta̧'a̧nö̧. ²⁶ Ja̧u̧mä̧ Diosrö u̧cuo̧cuä̧cua̧ ja̧'hua̧nö̧ jo̧mȩnä̧ Diosmä ja̧u̧rö̧ rȩpȩä̧cua̧, chutä Dios i'ä topö esehuarö pä'ömä. Diosmä ttö̧ja̧sa̧ i̧rȩbȩhuö̧nä̧ jȩpö̧. ²⁷ Ja̧u̧nö̧ o'ca'a ja̧u̧mä̧ korotö ttä'ca jo̧mȩttö̧ rä̧'ö̧ kä̧nö̧mä̧ pä̧cua̧: Ttömä suronä̧ jȩpi̧nö̧sä̧ ja̧'hua̧ta̧'a̧nö̧ ku'quecutä jȩpi̧nö̧sä̧ ja̧u̧mä̧ isopäi'önä ji̧na̧'a̧, ja̧'hua̧nö̧ suronä jȩchi̧na̧'a̧nä̧ Diosmä ro̧ȩpo̧co̧cu̧ pi̧nö̧sä̧. ²⁸ Diosmä cha'cuarömä hua'are rejura̧'a̧tä̧ ȩpa̧'a̧nä̧ ppa̧'a̧di̧pö̧ ppädinä̧cu̧sä̧; ttö cha̧'cua̧rö̧mä̧ tȩya̧u̧mä̧ yabonö̧tä̧ toäcua'a. ²⁹ Topittö, Diosmä pi̧yȩ o'cajuiyönä jȩpö̧ ttö̧ja̧sa̧ ya̧tȩnä̧mä̧, todärenä̧mä̧, huäbodäcuänä jö̧nä̧'i̧nä̧, ³⁰ a̧'cua̧rö̧ hua'are rejura̧'a̧ttö̧ ppa̧huä̧di̧pa̧ pä'ömä, a̧'cua̧rö̧nä̧ tȩya̧u̧ tejädarö pä'ömä. ³¹ Adiu ä̧ju̧cui̧, Job juhua'atäcu ttörö ä̧ju̧cui̧ttö̧; 'coruchi'ö ja̧'hua̧nö̧ ku'coröchi'omenä ttömä chu̧cuo̧cuä̧cua̧sä̧. ³² Ji̧yȩtȩ päcua päcuttömä̧, ädätittö; ucuocui, ja̧'hua̧nö̧ jo̧mȩnä̧ ucumä suronä jȩpo̧cö̧jä̧ pä'ö chu̧huo̧juä̧cua̧sä̧. ³³ Ja̧'hua̧nö̧ jo̧ca̧'a̧ jö̧ttö̧mä̧, ttörö ä̧ju̧cui̧; 'corunä kä̧nö̧ ja̧'hua̧nö̧ jo̧mȩnä̧ huo̧juä̧huä̧ huȩnȩ chu̧huo̧juȩtä̧cua̧jä̧."