¹ Ja̧'hua̧nö̧ ja̧'a̧ pitö huämetucuämä juhua'a yabonö̧ Jobrömä ädätocotö pinä̧tö̧ juhua'amä chutä toäcuähuomenä̧mä̧ adihuä i̧sa̧ ja̧'a̧ttö̧. ² Ja̧'hua̧nö̧ päi'omenä Ram a̧hua̧ru̧hua̧ bus ttö̧ja̧sa̧ Berequel i̧tti̧ Eliúmä rö̧ä̧nä̧ ra̧huä̧ri̧pi̧nö̧; Jobrö rö̧ä̧nä̧ ra̧huä̧ri̧pi̧nä̧ juhua'amä Diossrötä pättäjueimä a̧mö̧nä̧ pa̧ja̧tö̧tä̧ adiu jȩpö̧sä̧ pähuiyäcu. ³ Eliúmä rö̧ä̧nä̧ ra̧huä̧ri̧pö̧nä̧ ahuaruhuä huämetucuä jo̧mȩnä̧ huäjätucu juhua'amä Jobrö ttädätiyococu, ja̧'hua̧nö̧ ja̧'a̧nä̧'i̧nä̧ jähuätömä Jobrömä yabocutä suronä pä'ächinätö. ⁴ Ja̧'hua̧nö̧ ja̧'a̧ Eliúmä̧ Jobcu ucuocua pä'ö tta̧huä̧rä̧ja̧ö̧a̧ ji̧na̧'a̧, juhua'amä korotömä ja̧u̧ttö̧'i̧nä̧ yabonänö ttä̧mö̧ ji̧na̧'a̧. ⁵ Ja̧'hua̧nö̧ ja̧'a̧nä̧ Eliú toomenä pitö huämetucuämä ttädätoca'a ji̧yä̧cu̧ rö̧ä̧nä̧ ra̧huä̧ri̧pi̧nö̧. ⁶ Ja̧'hua̧nö̧ ja̧'a̧ Buz ttö̧ja̧sa̧ Baraque i̧tti̧ Eliúmä ucuocumä pä'inö: "Ttömä mö̧ä̧ya̧sä̧, ucutumä täcö tä̧mö̧jä̧. Ja̧'hua̧nö̧ ji̧yä̧cu̧ cha̧mi̧'qui'ächi'äjisä, chucuocu juiyönä jä̧ja̧'a̧ ttö cha̧mö̧cuädömä. ⁷ Pä'äjisä: "Recuo mo̧ro̧ ki̧nö̧tä̧ ucuocu'anö jä̧ja̧'a̧, recuo mo̧ro̧ ka̧cui̧nä̧tö̧tä̧ huo̧juä̧huä̧ huȩnȩmä̧ ttu̧huo̧juȩta̧'a̧nö̧ ja̧'a̧. ⁸ Ja̧'hua̧nö̧ ja̧'a̧ ttö̧ja̧sa̧mä̧ a̧'cua̧ru̧hua̧rö̧ ku̧nä̧rö̧; o'cajuiyönä ju̧ru̧hua̧ a̧mi̧yuppatä ja̧'a̧ ttu̧huo̧jui̧pö̧nä̧ jȩo̧ppa̧mä̧. ⁹ Ttö̧ja̧ ttucuo ku̧nä̧rä̧tö̧tä̧mä̧ jo̧ca̧'a̧ huo̧juä̧tö̧mä̧, ja̧'hua̧ta̧'a̧nö̧ böecuächätötämä̧ jo̧ca̧'a̧ adihuomenä jȩä̧cuä̧huä̧ huo̧jui̧'ä̧tö̧mä̧. ¹⁰ Ja̧'hua̧nö̧ ji̧yä̧cu̧ ttömä ucuturu pä'ösä: Ä̧ju̧cuä̧tu̧cui̧ttö̧; ttö'i̧nä̧ chu̧huo̧ju̧ huȩnȩ pä̧dä̧cua̧sä̧. ¹¹ Ä̧ju̧cuä̧tu̧cui̧, ucutu hui̧huȩnȩtu̧cu̧ ttä̧'a̧ri̧nö̧sä̧ ; ttömä ä̧ju̧cui̧nö̧sä̧ jihuähuätucumä ucutu päcuätucua pä'ö cuamuhuädätucua'anä . ¹² Jueönämä, to̧pä̧ri̧nö̧sä̧, ucuturu ja̧'hua̧nö̧ ja̧'a̧nä̧ Job esecuächi'önämä adätö ucuohuocotö pinättö̧jä̧. ¹³ pa̧'a̧nö̧mä̧ päcuätucuäjó: '!Po̧cui̧pä̧tö̧jä̧ huo̧jä̧cuä̧mä̧!' Diostä ro̧ȩpä̧cua̧ Jobmä; yautecu ttö̧jä̧ i̧sa̧mä̧ jȩ'ö̧ juiya'a. ¹⁴ Ja̧'hua̧'a̧nö̧ ja̧'a̧nä̧ Job ttörömä suronä pä'ö ucuocuocö, ja̧'hua̧'a̧nö̧ ja̧'a̧ttö̧ ucutu päcuäjätucumä ädätocö chä̧cua̧sä̧. ¹⁵ Pitö huämetucuä u̧mä̧tö̧mä̧ pättö juiyönä pä̧i̧'ä̧u̧; Job-rö'inä ttädätö juiyönä huotö; jua'a yabocu koro pätta pä'ö'inä jui'ätö. ¹⁶ ¿Tta̧dä̧rö̧'a̧nö̧ ja̧'a̧ ttucuocuoca'attö̧, ju̧enetä ttädätoca'a ttö̧jo̧cua̧'a̧ttö̧? ¹⁷ Isocö, ttö'inä chä̧dä̧tä̧cua̧sä̧; ttö'inä pä̧dä̧cua̧sä̧ chu̧huo̧ju̧mä̧. ¹⁸ Pädä pä'ömä rö̧ä̧nä̧ ku̧nä̧rö̧sä̧; a̧'cua̧ru̧hua̧mä̧ ttö jacuä kä̧nö̧ hueäcusä. ¹⁹ Topätucui, chamöcamä vino a̧tti̧pa̧ pä'ö mö̧'ȩpö̧ ttu̧ju̧na̧'a̧ jä̧'i̧nö̧'a̧nö̧ jä̧cu̧sä̧; 'carähuäba jareäba, ppa'ö icua pä'ö jä̧'i̧nö̧'a̧nö̧. ²⁰ Ttömä chucuocuä̧cua̧sä̧ ja̧'hua̧nö̧ jö̧ttö̧ adiunä̧nö̧ pä̧di̧'ä̧cua̧sä̧ 'cua̧ra̧'a̧; chä ba'epö chä̧dä̧tä̧cua̧sä̧. ²¹ Ttesehuipönä̧tä̧mä̧ i̧jȩpo̧cö̧ chä̧cua̧sä̧, ja̧'hua̧ta̧'a̧nö̧ ya̧tȩrö̧'i̧nä̧ ucuo teäcuähuä ojiyämä iyocö chä̧cua̧sä̧. ²² Jȩru̧pa̧sä̧ a̧u̧ juei ojiyä chiya pä'ömä; ja̧'hua̧nö̧ jȩchö̧ttö̧mä̧ ttörö aditinö̧mä̧ a̧'u̧cua̧'a̧tä̧ jö̧ o'ca'a si'epö i̧cuä̧cua̧sä̧.