¹ Ttötä cha̧mo̧nä̧ pä'ähuinösä isajurumä pä̧huä̧rö̧jö̧nä̧ topocö chä̧cua̧sä̧; ¿ Tta̧'a̧nö̧ pä'ö uborö jerupajurumä pä̧huä̧rö̧jö̧nä̧ tocha? ² Ja̧'hua̧nö̧ jö̧ttö̧mä̧, ¿Tta̧'a̧nö̧ rö̧'a̧nä̧ jo̧mȩ hua̧ jä̧ttö̧ Dios ju'toju kö̧mä̧, o'cajuiyönä ju̧ru̧hua̧mä̧ ju'toju kö̧mä̧ tta̧'a̧nö̧ rö̧ä̧nä̧ iyö'anö hua̧jä̧ttö̧? ³ Ttämä amucuädä'ijösä ro̧ȩcuä̧mä̧ yapareehuätörötä jö̧cö̧ pä'ö, ja̧'hua̧ta̧'a̧nö̧ suronä jö̧mä̧ suronä jȩpä̧tö̧rö̧tä̧. ⁴ ¿Diosmä topocö ja̧'a̧ ttö yȩchö̧mä̧ ja̧'hua̧ta̧'a̧nö̧ chi̧'cho̧mȩ'i̧nä̧? ⁵ Ja̧'hua̧ta̧'a̧nö̧ yapare'inä isó 'cua̧rö̧nä̧ jȩchä̧'i̧ttö̧mä̧, ⁶ huȩi̧nä̧tä̧ ro̧ttȩpä̧cu̧sä̧ DIOS'INÄ u̧huo̧jua̧cua̧'a̧nö̧ ttö chö̧jä̧'i̧ji̧. ⁷ Adiu jȩpu̧ chi̧jä̧'i̧ttö̧ jarochi'öttömä, churonä jȩpu̧ chi̧jö̧ttö̧mä̧, juo̧u̧ttö̧ chu̧mu̧mä̧ suro joepajaa, ⁸ ja̧'hua̧nö̧ jo̧ca̧a̧ jö̧ttö̧mä̧, chadita'anä ja̧a̧tä̧ topittö korotö ttöcuäcua'anö; juo̧u̧ cuäcuähuämä ttö chu̧cuȩ kö̧nä̧huo̧mȩttö̧tä̧ ttȩmä̧cua̧'a̧nö̧. ⁹ Ttö chämiso'quittö Käraju köadihuä pä̧huä̧ tochinättö̧mä̧, ja̧'hua̧nö̧ jö̧ttö̧mä̧ chippeyänä kö̧ ojusode apate ä'ca ttä̧'a̧rö̧ ki̧nä̧ji̧sä̧, ¹⁰ ja̧'hua̧nö̧ ja̧'a̧ttö̧ ka̧rá̧ u̧cuȩ́ ote kijära'anä ja̧'a̧tä̧ topiju chirecuarö, ja̧'hua̧ta̧'a̧nö̧ korotö juajurö töcuotäcua'anö. ¹¹ Cuä'ö icuähuä surojönä̧ jö̧mä̧; ja̧u̧mä̧, cuä'ö icuähuä surojömä röji pä'ö icuähuä ttö̧ja̧tä̧ ro̧ttȩpä̧cua̧sä̧. ¹² Isopäi'önä ja̧u̧mä̧ ocurä hua'are reju o'cajuiyö̧nä cuo'ö icua'a jä̧'i̧nö̧'a̧nö̧ jö̧ ja̧'a̧ juhua'atäcu chu̧cuä̧ cuähuä'i̧nä̧ cuo'ö icua'anö ja̧'a̧. ¹³ Ttö yadocuinö̧ttö̧mä̧ adihuomenä̧ jȩä̧cuä̧huä̧ jättepomenä chu̧mö̧huäyotö u̧mä̧tö̧cö̧, nä̧tö̧cö̧ jahuätömä ttöcu pä'ächäcuähuinä̧tö̧, ¹⁴ ¿ja̧'hua̧nö̧ ja̧'a̧mä̧ tocu jȩchä̧cua̧'a̧ttö̧ Dios ttörö suronä̧ jȩpä̧ji̧ päöttömä? ¿Ja̧u̧ ro̧ȩpa̧ttö̧ pä'ö ichomenä̧, ja̧u̧rö̧ tocu chädätäcua'attö? ¹⁵ ¿Ja̧u̧ttö̧mä̧ cha̧ju̧ ku̧cuä̧ba̧ jacuättö chu'uttächi'önä jȩpi̧nö̧mä̧ ucuturu'i̧nä̧ cu'uttächi'ätucunä̧ jȩpo̧cö̧ pinö? ¿Ja̧u̧tä̧ jo̧ca̧'a̧ cu̧cuä̧ba̧ jacuättö o'catoi'önä̧rö̧ tta̧'cua̧rö̧ iyinömä̧? ¹⁶ Ttö usurä ȩmä̧huä̧tö̧ pä̧huä̧ttöttö tto̧dȩpä̧rä̧'i̧jö̧ttö̧mä̧, ja̧'hua̧nö̧ jo̧ca̧'a̧ttö̧mä̧ recua rö̧ä̧nä̧ ajau kä̧to̧cä̧chö̧nä̧mä̧ jȩpo̧cö̧ pä'ijösä, ¹⁷ ja̧'hua̧nö̧ jo̧ca̧'a̧ttö̧mä̧ chu̧cuä̧mä̧ katätämä̧ cuocö pä'ijösä ja̧'hua̧ta̧'a̧nö̧ ttä̧'o̧tö̧ to'ätörö'i̧nä̧ ttu̧cuä̧mä̧ iyä'ijösä, ¹⁸ isopäi'önä̧ cha̧'ö̧cuä̧i̧tä̧ päi'önä rȩyo̧mä̧ ttötäcu jä'o jö̧nä̧ böojuo'inö̧, ja̧ju̧ recuarörö̧mä̧ o'ipinö̧sä̧, cha̧ju̧ ku̧cuä̧ba̧ttö̧ päi'önä̧. ¹⁹ ¡Ya̧tȩ ö̧'ca̧tä̧huä̧ta̧ recuä rö̧jä̧cu̧ 'cua̧ra̧rö̧ topä'ijösä, ya̧tȩ ö̧'ca̧tä̧huä̧ta̧ jui̧'a̧rö̧ tochomenä̧mä̧; ²⁰ A̧mi̧so'quinä adiunä päoca'a jö̧ttö̧mä̧ juhua'amä chä̧ji̧mö̧ ovejas tti̧jȩti̧yu̧ttö̧ du'osȩnö̧ pätti'önä juä'ocuoca'attö̧, ²¹ ttö̧ja̧ reyotörö ttö suronä jȩchä̧'i̧jö̧ttö̧, juhua'amä ötahuiyä äpatettömä ppä'ädösä pä'ö topö jȩchä̧'i̧jö̧ttö̧mä̧, ja̧'hua̧nö̧ jö̧ttö̧mä̧ i'cächätucui ttö suronä̧ jȩchä̧'i̧jö̧! ²² Ttö isopäi'önä pi̧yȩ jȩchä̧'i̧jö̧ttö̧mä̧, chu'upi'ca 'choähuächönä jȩö̧ttö̧mä̧ ja̧'hua̧ta̧'a̧nö̧ chujo 'chu̧huä̧ro̧mȩttö̧ 'toi'önä jȩö̧ttö̧mä̧. ²³ Juhua'amä Diosttö si'epö icuähuä yedecua'attö̧; uruhuottö'i̧nä̧, pi̧yȩmä̧ jȩcha̧ pä'önä jo̧ca̧'a̧ ji̧na̧'a̧. ²⁴ ¡Oro adicuä juäinämä ttömä cha̧'cua̧ huä̧nä̧ro̧'cö̧sä̧, ja̧'hua̧ta̧nö̧ ucurutä esetösä'inä pä'ocösä; ²⁵ ttö chidepänä chesehuönä ji̧nö̧mä̧ rö̧ä̧i̧nä̧'a̧, ttötä chamonä chu̧mu̧nä̧ aditö rö̧ä̧' i̧nä̧ ku̧nä̧ri̧nö̧sä̧, ja̧'hua̧nö̧ ja̧'a̧ttö̧ ro̧ȩcuä̧mä̧ 'cächö ro̧ȩpi̧ttö̧!. ²⁶ Mo̧ro̧ ka̧cua̧ ösäruhua'a'i̧nä̧ topinösä̧, yodo ka̧cua̧ ösäruhuönä i̧'cha̧'i̧nä̧ topinösä̧, ²⁷ ja̧'hua̧ta̧nö̧ yä̧huä̧'i̧nä̧mä̧ chamiso'qui jahuättömä uhuo tedähua'anö'inä jä̧cu̧sä̧, ttö chu̧mu̧nä̧ chänä'inä chu̧do̧pu̧nä̧ pä'iönä jahuatörö ²⁸ -piyȩ'i̧nä̧mä̧ ttö̧ja̧rö̧ cuähuä ja̧'a̧ ja̧'hua̧nö̧ ja̧'a̧ttö̧ röji pähuä isotötä ro̧ttȩpa̧pä'ö ja̧'a̧, Dios ju'toju ru̧hua̧rö̧ chä̧ppu̧ta̧ra̧'a̧ttö̧. ²⁹ ¡Ttömä esehuocö pä'ijösa ttö ttörö kö'cocotö tottepo'ächa'anä'inä ko̧ro̧nö̧mä̧ esehuä'ijösän ja'huätörö ro̧ȩcuä̧ ichomenämä, ja̧'hua̧nö̧ jö̧ttö̧mä̧ pocu ichö ro̧'ȩpä̧tu̧cui̧ttö̧! ³⁰ Ja̧'hua̧nö̧ ja̧'a̧nä̧'i̧nä̧, ttö chättömä räopaca'a ja'huätörö suronä ja̧ pä̧huä̧mä̧. ³¹ ttö chojusodenä ko̧cuä̧tö̧ chumuhuäyotämä̧ pä'ocotö päjijätö, ¿Dijä̧ttö̧ tomä jȩru̧pa̧sä̧ Job ucuomettö̧mä̧ sudädi'önä cuocö pä'ijösä päö'anö hua̧mä̧? ³² (Ja̧'hua̧nö̧ ja̧'a̧nä̧'i̧nä̧ i̧chä̧cuä̧hua̧mä̧ ötahuiyättö ttu̧cuä̧ iyähuomemä ki̧'i̧po̧cö̧, ttömä 'cuäopönätä̧ chapatemä ba'epä'ijösä 'cuä'opö i̧huä̧tö̧rö̧mä̧), ja̧'hua̧nö̧ jȩchö̧ juiyä'ijöttömä, ¡pa̧'a̧nö̧ suronä yȩpä̧'i̧'ö̧jä̧ pä'ätucuittö! ³³ Jarodö jȩchö̧mä̧ dajö́ icuocö pinösä̧ ttö̧ja̧ jȩttö̧'a̧nö̧mä̧, ³⁴ ttö̧ja̧ recuätörö yedecua'attö, chahuaruhuä ttöjö'cocö'inä yedecunä ji̧nä̧cu̧sä̧, ja̧'hua̧nö̧ ja̧'a̧ttö̧ 'coröchiötä ki̧nö̧sä̧ i̧mi̧'i̧nä̧ räocuä juiyönä, ¡ja̧'hua̧nö̧ jö̧ttö̧mä̧ jiähuätucuittö jarodö jȩchi̧nö̧mä̧! ³⁵ ¡Ya̧tȩ ä̧ju̧cua̧ peö jȩö̧ttö̧mä̧ ttörö! topi, pi̧yȩtä̧ kö̧nä̧rö̧sä̧; ädäta'a̧na̧tä ja̧'a̧tä̧ topi o'cajuiyönä ju̧ru̧hua̧tä̧ ¡jä̧yä̧́ jȩchi̧nö̧ yȩyö̧cu̧ä̧ pu̧ttö̧mä̧! ³⁶ Ja̧'hua̧nö̧ jö̧ttö̧mä̧ jueinätä̧ i̧jȩcua̧ra̧'a̧nä̧ ka̧ji̧sä̧; chunä puttähuo̧bu̧ huä̧ji̧ya̧'a̧nö̧. ³⁷ Ttö jiähuajisä juo̧u̧rö̧ o'cajuiyönä jȩchi̧nö̧a̧'u̧cuä̧; juo̧ú̧ ru̧hua̧rö̧tä̧ jueönä jiähuajisä̧. ³⁸ Chi̧rȩjä̧'i̧nä̧ ja̧'hua̧ta̧'a̧nö̧ sahuähuä o̧mä̧'i̧nä̧ 'cuäopönä̧tä̧ yo̧mȩtȩnä̧, ³⁹ ja̧'hua̧ta̧'a̧nö̧ ja̧huä̧jä̧ u̧cuä̧ cuähuä jä̧huä̧jä̧rö̧ chimitoca'a cuä'ijusäcö̧ ja̧u̧ u̧ru̧hua̧rö̧ a̧'cua̧rö̧ toe'ächönä jȩpä̧'i̧ju̧sä̧cö̧, ⁴⁰ ja̧'hua̧nö̧ jö̧ttö̧mä̧ trigo bahuajueimä soä'cuatä bahuönä̧ jȩpi̧ juhua'atäcu cebada bahuajueimä isä'cuatä bahuönä." Job i̧huȩnȩmä̧ pa̧'a̧nö̧tä̧ ucuocu cä'ädinö.