¹ Yo̧ö̧mä̧ jahuätöttö räopächäcua'a tta̧'cua̧ttö̧ jö̧nä̧ kä̧'i̧jö̧mä̧. Mo̧ täbocumä, Zabulón ahuaruhuärö'i̧nä̧, Neftali ahuaruhuärö'i̧nä̧ ttucuomä jȩpö̧ icuinö̧, ja̧'hua̧nö̧ ja̧'a̧nä ja̧u̧nu̧ o'ca'a Ja̧u̧mä̧ ttucuo ttö̧ju̧mä̧rö̧mä̧ jȩä̧cuo̧tö̧, rö̧ä̧ aje 'chä̧cuä̧huä̧mä̧nä̧ ka̧cuä̧tö̧rö̧'i̧nä̧, Jordán aje yabonä̧nö̧ ka̧cuä̧tö̧rö̧'i̧nä̧, Galileanä ka̧cuä̧tö̧rö̧'i̧nä̧. ² Ttö̧ja̧ yo̧ö̧nä̧ cue'ächinä̧tö̧mä̧ rö̧ä̧nä̧ tȩya̧u̧nä̧ kä̧dȩpö̧ topinä̧tö̧; jitö pi̧jä̧ rȩjȩnä̧ttö̧ hua'are isoppanä̧ ka̧cui̧nä̧tö̧rö̧mä̧, tȩya̧u̧mä̧ jahuätörö tejädina'a. ³ Ucumä ttö̧ja̧ ttirecuächönä̧ jȩpi̧nö̧jä̧; Ucumä rö̧ä̧nä̧ ttseunä jȩpi̧nö̧jä̧. Jahuätömä Ja̧u̧ ä'ca jo̧mȩttö̧mä̧ ttesehuäcuotö, cuähuä huȩjö̧ mo̧ro̧ esehua'a jä̧'i̧ja̧'a̧nö̧, 'chottipäji yotucunä̧rö̧ ttiyä'chomenä ttesehua'a jä̧'i̧jö̧'a̧nö̧. ⁴ Ja̧'hua̧nö̧ ja̧'a̧ a̧mä̧cö̧nä̧ ttu̧ru̧pä̧'quȩnä̧ huȩjö̧'i̧nä̧, odiyä ttu'upi'ca jo̧mȩ huȩju̧mä̧, ttötta'ca suronä huehueinä̧'camä, Ucumä si'epö icuinö̧jä̧ Madián ttö̧ja̧rö̧ ji̧nö̧ta'anö̧. ⁵ Ttö̧ja̧ recuätö ttö̧jä̧pö̧ o'camä 'cuȩ'cu̧ tti̧cuä̧cuȩ ja̧'hua̧ta̧'a̧nö̧ ttö̧'ca̧tä̧huä̧ti̧yö̧ ttucuoja tuhuecuächäjimä ku i̧cuä̧huä̧cuȩ ocurämatä̧ jö̧nä̧. ⁶ Ja̧hua̧nö̧ ja̧'a̧ ji̧'qui̧cha̧hua̧ uhuäpächäjirömä tu̧ru̧hua̧tä̧ i̧yä̧jä̧u̧jä̧; jahuata'anö ruhuo huea pä'ö'i̧nä̧ ujuru iyähui'äjäcu, ja̧hua̧nö̧ ja̧'a̧ttö̧ i̧mi̧mä̧ o̧ttä̧cua̧: Ji̧nä̧'isocu huȩnȩ 'qui̧ȩcuä̧rä̧cuä̧huä̧'i̧sa̧, Dios o'ca juiyönä ju̧ru̧hua̧, Tä'o ö̧jö̧ be'ipocö, Huȩnȩ juiyönä kö̧ ucuo'i̧sa̧ jö̧nä̧. ⁷ Ja̧u̧mä̧ cädi'äcuähuä juiyönä̧tä̧ huȩä̧cua̧, jahuata'anö rohuäcuähuä'i̧nä̧ juiyönä 'cuäopönätä ö̧jä̧cua̧, David mi̧nä̧ ru̧hua̧ ö̧'i̧no̧mȩttö̧ huȩä̧cua̧ adiunätä, surojö'i̧nä̧ juiyönätä, ja̧u̧mä̧ tta̧'cua̧ adihuächi'önä i̧yä̧cua̧ ja̧u̧nu̧ pä̧nä̧ kä̧mä̧dö̧ beipächö juiyönä 'cuäopönätä. Pi̧yȩmä̧ jueönätä huȩä̧cua̧ tu̧ru̧hua̧ Diosmä, recuätö huotö ttu̧ru̧hua̧mä̧, ihueye churutä ja̧hua̧nö̧ pä̧huä̧rö̧ja̧'a̧ttö̧ ⁸ TÖ̧Ä̧NÄ̧HUA̧MÄ̧ i̧huȩnȩ to'ija̧'a̧cu̧ ucuocu hue'ö Jacobrö ja̧'hua̧nö̧ jo̧mȩnä̧ ja̧u̧ jä̧ji̧mä̧ Israel ttö̧ja̧rö̧ ma̧ä̧mi̧na̧'a̧. ⁹ Ttö̧ja̧mä̧ o'catoi'önä̧tä̧ ttu̧huo̧juä̧cuo̧tö̧, Efraín'i̧nä̧ ja̧'hua̧ta̧'a̧nö̧ Samarianä ka̧cuä̧tö̧'i̧nä̧ juätömä pä'ätö ucuo te'äumä juhua'atäcu ttamiso'quinä ucuo te'äumä: ¹⁰ "Redä'cattö 'qui'ädö adicuämä maächina'a ja̧'hua̧nö̧ ma̧ä̧chi̧na̧'a̧nä̧ inä o'qui 'ta'ö adicuättö ttaditäcuotöjä; sicomoro dauhuiyämä 'ca̧rä̧u̧ icuähua'a, ja̧'hua̧nö̧ ja̧'a̧nä̧ ujutumä ja̧u̧ ka̧cui̧no̧mȩmä̧ cedro dauhuiyättö tu̧ju̧nä̧cuo̧tö̧jä̧." ¹¹ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧MÄ̧ Rezíncu̧ tturohuäunä huȩä̧cua̧ aboiyotörö, aboiyotörömä jȩttö̧nä̧tä̧ hue'ö u̧ju̧nä̧cua̧, ¹² Arameas ttö̧ja̧ kä̧hua̧ räopa'acu ka̧cuä̧tö̧mä̧ ja̧'hua̧ta̧'a̧nö̧ filisteas ttö̧ja̧ kä̧hua̧ ma̧ä̧cha̧'a̧cu̧ ka̧cuä̧tö̧mä̧. Jahuätömä ttä cähuetö rattädi'äcuotö. Pi̧yȩmä̧ o'cajuiyönä 'cuäpa'anä, ö̧'ä̧i̧mä̧ pȩjä̧mo̧co̧cu̧; kä̧nö̧mä̧ u̧mö̧mä̧ juhua'a yabonö̧tä̧ cä̧'ȩpä̧rö̧. ¹³ Ttö̧ja̧mä̧ ji̧nä̧ juättö ttö̧ja̧rö̧ ro̧'ȩpi̧nö̧mä̧ ppa̧'ä̧cho̧co̧tö̧, ja̧u̧ TÖ̧Ä̧NÄ̧HUA̧ ju̧ru̧hua̧rö̧mä̧ usocotö ttäcuotö. ¹⁴ Ja̧'hua̧nö̧ jo̧mȩttö̧ TÖ̧Ä̧NÄ̧HUA̧MÄ̧ Israel U 'cui'opö i̧cuä̧cua̧ ja̧'hua̧ta̧'a̧nö̧ i̧hui̧ri̧'pa̧'i̧nä̧, ä̧na̧jui̧yä̧ adiyä'i̧nä̧ juhua'atäcu ajenä ka̧cu̧'i̧nä̧ ya'ute mo̧ro̧mä̧. ¹⁵ Ttö̧ja̧ tturuhuotömä ja̧'hua̧ta̧'a̧nö̧ ucuo ttö̧ja̧mä̧ U jä̧'i̧nö̧'a̧nö̧ huo̧tö̧; juhua'atäcu 'cuä̧o̧pä̧cuȩ jiäcuähuä ttö̧ja̧ yapare huo̧juȩtä̧tö̧mä̧ i̧hui̧ri̧'pa̧ jä̧'i̧nö̧'a̧nö̧ huotö. ¹⁶ Jahuätö pitö ttö̧ja̧rö̧ o'ipätömä jäyäcu juottächönä̧tä̧ jȩpi̧nö̧ ja̧'hua̧nö̧ ja̧'a̧ jahuätörö o'ipätörömä si'epö icuähuäcua'a. ¹⁷ Ja̧'hua̧nö̧ jo̧mȩttö̧ TÖ̧Ä̧NÄ̧HUA̧MÄ̧ esehuocö jä̧cua̧ juätö u̧mä̧tö̧mä̧ möäyo̧tö reyotörömä rȩrö̧jö̧nä̧'i̧nä̧ topocö jä̧cua̧ ja̧'hua̧ta̧'a̧nö̧ recuamö̧rö̧'i̧nä̧, ttö̧jä̧mä̧do̧mȩttö̧ yotucunä suropätömä ja̧'hua̧ta̧'a̧nö̧ suronä jȩpö̧'i̧nä̧ juhua'atäcu ttämä micuähuocö huȩnȩtä̧ ucuocua'a. Pi̧yȩmä̧ o'cajuiyönä 'cuäpa'anä, ö̧'ä̧i̧mä̧ pȩjä̧mo̧co̧cu̧; kä̧nö̧mä̧ u̧mö̧mä̧ juhua'a yabonö̧tä̧ cä̧'ȩpä̧rö̧. ¹⁸ Surojömä cuoa'a ocurä jä̧'i̧nö̧'a̧nö̧; Zarzas dau cuoina'a̧nö̧ ja̧'hua̧ta̧'a̧nö̧ soäi ji̧na̧'a̧nö̧; de'a adiyä cuo'ö icua'a jä̧'i̧nö̧'a̧nö̧ cuoäma isoppa i̧sä̧ma̧nä̧ cäepäji'anö. ¹⁹ TÖ̧Ä̧NÄ̧HUA̧ ju̧ru̧hua̧ ö̧'ä̧i̧nä̧ rȩjȩmä̧ cuo'ö icuäcua'a ja̧'hua̧ta̧'a̧nö̧ ttö̧ja̧ ocurä jurunä cuoi'ö jä̧'i̧nö̧'a̧nö̧ huotö. Ya̧tȩ'i̧nä̧ a̧hua̧ru̧hua̧rö̧mä̧ esecuocö jä̧cua̧. ²⁰ Jahuätömä ttu̧huo̧jua̧'a̧cu̧nä̧ ttu̧mö̧nä̧ cuäcuähuämä 'chuttädäcuö, ja̧'hua̧nö̧ 'chuttäda'anä ttucuatä yabonö ppä̧i̧ri̧jä̧cuä̧u̧; jahuätömä ttu'ohuecu i̧sä̧mö̧nä̧mä̧ 'chu'ädö ttucua'anä su'ädi'ocotö ttäcuotö. Yotucunämä tta̧mö̧nä̧ pa̧ja̧tö̧ ttöjohuiyä idepä ttucuäcuotö . ²¹ Manasésmä Efraínrö u̧cui̧'ä̧cua̧, Efraín'inä Manasésmä Judacu turuhuäcua pä'ö ttö̧ca̧ca̧cui̧'ä̧cuo̧tö̧. Pi̧yȩmä̧ o'cajuiyönä 'cuäpa'anä, ö̧'ä̧i̧mä̧ pȩjä̧mo̧co̧cu̧; kä̧nö̧mä̧ u̧mö̧mä̧ juhua'a yabonö̧tä̧ cä̧'ȩpä̧rö̧.