¹ Acaz ö̧ji̧nö̧ mo̧ro̧, Jotan i̧tti̧'i̧nä̧, Uzías i̧tti̧'i̧nä̧ ruhuo hue'inä̧tö̧ Judá rȩjȩnä̧, jahuata'anö Rezínmä ru̧hua̧ ki̧nö̧ Aram rȩjȩnä̧, jahuata'anö Remelías i̧tti̧ Pekamä ru̧hua̧ ki̧nö̧ Israel rȩjȩnä̧, ja̧hua̧nö̧ ja̧'a̧ jahuätömä 'chi̧nä̧tö̧ Jerusalénra̧'a̧ rohuähuö, ja̧'hua̧nö̧ ja̧'a̧nä̧ juruhuocotö pinätö̧. ² David ojudera̧'a̧ ji'ähuinätö̧ Aram'mä Efraín isotöcu jä'ecuäji pä'ö. Ja̧hua̧nö̧ ttä̧ju̧cuo̧mȩnä̧ yettecui'a'attö ttamiso'quinä'inä tti̧ä̧hui̧nä̧u̧, umöhuäyotö'inä tti̧'ä̧hui̧nä̧tö̧, dauhuiyä isoppa du'omenä tti̧ä̧hua̧'a̧ jä̧'i̧nö̧'a̧nö̧ päi'önä̧. ³ Ja̧'hua̧nö̧ ja̧'a̧ TÖ̧Ä̧NÄ̧HUA̧ Dios pä'inö Isaíasrö: täi cui̧tti̧ Sear Jazubcu ru̧hua̧ Acazrö to'cu'a, ja̧u̧mä̧ aje i̧sä̧rä̧ 'cho̧mȩ beipome, ttöäre töcuähuome ö̧jä̧cua̧. ⁴ pa̧'a̧nö̧ ji'ähuirö: Ttu̧huȩcuä̧nä̧ kä̧hui̧, cua̧'cua̧ tta̧cuȩcuä̧, ye'ecu'i̧nä̧ yecuecuä'chä, ju̧huä̧ma̧ o̧cu̧ma̧ jä̧'i̧nö̧'a̧nö̧ jä̧ma̧mä̧, pitömä rö̧ä̧nä̧ tta̧mi̧su̧rä̧chi̧'ä̧u̧ ucuru Rezim'i̧nä̧, Aram'i̧nä̧, Remalías i̧tti̧ Peka'inä. ⁵ Aram'i̧nä̧, Efraín'i̧nä̧, Remalías i̧tti̧'i̧nä̧, suronä jȩtta̧ pä'ö amocuädätö ucuru, jahuätömä pa̧'a̧nö̧ pä'ätö: ⁶ Judá ötahuiyä ttö̧ja̧rö̧ rohuäu ticua, ja̧hua̧nö̧ jȩtä̧u̧ yettecui'äcuotö jahuätömä, ju̧huȩnȩ do'ächi'ö ujututä tu̧ru̧hua̧ ka̧ra̧ ru̧hua̧rö̧ tu̧ju̧nä̧cuo̧tö̧jä̧ Tabeel i̧tti̧rö̧. ⁷ Ja̧'hua̧nö̧ ja̧'a̧nö̧ tu̧ru̧hua̧ Diosmä̧ pa̧'a̧nö̧ pä'ö: Pi̧yȩmä̧ 'cuäopö jiyäcua'a, ⁸ Aram u päi'önä jo̧mȩmä̧ Damasco ja̧'a̧, jahuata'anö Damasco u päi'önä jo̧mȩmä̧ Rezin ja̧'a̧. Sesenta y cinco a̧'ȩ päi'omȩnä̧ Efraín ötahuiyä ttö̧ja̧mä̧ totte'ächäcuotö, ya'ate ötahuiyä'i̧nä̧ ki̧'i̧pö̧ juiyönätä. ⁹ Efraín umä Samaria ja̧'a̧, Samaria umä Remalias i̧tti̧ ja̧'a̧. Ja̧hua̧nö̧ ja̧'a̧nä̧ ucumä cua̧'cua̧ huȩnä̧rö̧ 'quiyönä cu̧jo̧ca̧'a̧ jö̧ttö̧mä̧, juhua'a yabomä cu̧ji̧yä̧cua̧jä̧.'' ¹⁰ Ja̧hua̧nö̧ ja̧'a̧ tu̧ru̧hua̧ Dios pä'äji ta'anö ucuocuinö ru̧hua̧ Acazrö. ¹¹ Jä'epi Cu̧ru̧hua̧ Diosrö ji̧yȩtȩ i̧jȩcuä̧; jahuata'anö pi̧jä̧ rȩjȩ dea'attö'i̧nä̧ abonä̧nö̧ täcunä jähuä'i̧nä̧, jahuata'anö mo̧ro̧jä̧ ju'toju ro̧mȩttö̧'i̧nä̧ abonä̧nö̧ jähuä'inä. ¹² Ja̧hua̧nö̧ päcu Acaz ädätinö: Ttömä jä̧dȩpi̧yä̧cua̧sä̧ Chö̧ä̧nä̧hua̧ Diosrömä, ji̧yȩtȩ'i̧nä̧ ka̧cuä̧mö̧mä̧ to̧chi̧yä̧cua̧sä̧ jö̧nä̧. ¹³ Ja̧'hua̧nö̧ ja̧'a̧ Isaás pä'inö: '' ä̧ju̧cuä̧tu̧cui̧ David ojusode ka̧cuä̧tö̧. ¿Ttö̧ja̧ tta̧mi̧ 'quittächi'a pä'ö ka̧cuä̧mö̧ tocu'ätucua pä'ö jo̧mȩnö̧ pa̧jo̧cuä̧cha̧'a̧ tä̧ji̧?¿jahuata'anö Diosrö'i̧nä̧ ka̧cuä̧mö̧ tocu'ätucu'anö ja̧'a̧ tä̧ji̧ a̧mi̧'quiächia pä'ö? ¹⁴ Ja̧'hua̧nö̧ ja̧'a̧ tu̧ru̧hua̧ Diostämä̧ koro juäi i̧jȩcuä̧ ucuturu cu̧huo̧juä̧tu̧cua̧ pä'ö pi̧yȩ i̧jȩpä̧cuä̧mä̧. Yajute isaju u̧mä̧tö̧ jähuättö 'cu̧'hu̧ä̧pa̧ju̧mä̧ muchaju kä̧nö̧, uborö kuhuäbecuäcuaju. Jahuata'anö ja̧u̧ i̧mi̧mä̧ ojäcuaju EMANUEL pä'ö. ¹⁵ Jahuata'anö böo pi'ome jobö lechetä, mayátä a̧huä̧cua̧, jahuata'anö adiutä ȩmö̧, surojömä ya̧huo̧cuä̧rä̧cua̧ . ¹⁶ Pide ji̧'qui̧cha̧hua̧ adiutä ȩmö̧ surojö ya̧huo̧cuä̧rä̧cua̧'a̧ ä'canä, pi̧jä̧ rȩjȩttö̧ ta̧ju̧ huotö ruhuotö ucu yecuecuä'i̧jä̧u̧mä̧ cättädi'äcuotö. ¹⁷ Ja̧hua̧nö̧ ja̧'a̧ tu̧ru̧hua̧tä̧ jȩä̧cua̧ ucucu tticha pä'ö o'catoi'önä cuä'o ojusodenä ka̧cuä̧tö̧mä̧, Efraín Judá ttö̧ja̧cu̧ ö̧jo̧mȩttö̧ 'cä̧i̧chi̧no̧mȩttö̧ kä̧mä̧dö̧ jitä pi̧yȩ mo̧ro̧ jobö ttichocome jä̧'i̧jo̧mȩttö̧'i̧nä̧ abonä̧nö̧, pi̧yȩmä̧ Asiria ru̧hua̧rö̧ iyö icuinö'a̧nö̧ pä'ö päa'a. ¹⁸ Ji̧yȩnö̧ pä̧nä̧ TÖ̧Ä̧NÄ̧HUA̧ Dios jua̧pö̧ huo̧ä̧cua̧ na̧nö̧rö̧ Egipto rȩjȩra̧'a̧ttö̧ tticha pä'ö, jahuata'anö mayatörö'inä Asiria rȩjȩra̧'a̧ttö̧ tticha pä'ö. ¹⁹ Jahuätömä o'catoi'önä ichö ttö̧ja̧cuä̧cuo̧tö̧ ajehuiyä räopö jö̧ o̧du̧nä̧, idoriyänä, rädo so̧ä̧'cua ko̧mȩ'i̧nä̧, o'cajuiyönä mȩji̧yä̧'che äjicuäcuähuotö ttucuä'che ko̧mȩ'i̧nä̧. ²⁰ Ji̧yȩnö̧ mo̧ro̧ TÖ̧Ä̧NÄ̧HUA̧ Dios navaja so̧o̧dänä quirö i̧cuä̧cua̧, Eufrate ajettö i'cächäcuähuäcua'a Asiria ja̧'a̧ Umä uhuo'che'inä, öjohuiyä'inä 'to'opö i̧cuä̧cua̧ i'ä i̧'sa̧'chȩ'i̧nä̧. ²² JI̧yȩnö̧ mo̧ro̧ ya̧tȩ ubo u̧ju̧nä̧rä̧cua̧ pä̧cä̧yu̧rö̧ ovejarö ta̧ju̧rö̧. ²¹ Päcäyä ovejastö̧ ttatateja leche rö̧ä̧nä̧ ka̧'a̧ttö̧ jahuätö ttiya'attö ja̧u̧mä̧ u̧cuä̧cua̧ queso isähua i'cächu iyö rȩjȩnä̧ kä̧tö̧mä̧ ttucuäcuotö queso isähua. ²³ Jiyenö moro adihuome milnö jomenä micuähuinome jitämä so̧ö̧tä̧ rädocätä ja̧'a̧. ²⁴ U̧mä̧tö̧ ttichäcuotö 'po'obönä 'po'i ȩmö̧ rȩjȩmä̧ de'atä juoächina'a resabä. ²⁵ Jahuätömä otomenä ttö̧jä̧cuo̧tö̧ mi̧cattö pättiyu resabä ye'ecu rädocä ovejatö̧ pä̧cä̧yu̧ ttucuome ja̧'a̧.