¹ Jati jahuätöhue iso päi'önä reppeächi'önä pä'ö icuähuä huȩnȩ huȩyu̧ti̧'i̧pö̧, juhua'a jö̧ ta̧'a̧nä̧ surojö hueähuä huȩnȩ uhuäbe'ätöhue. ² ¡Jahuätömä adiunä jȩpä̧tö̧rö̧ jȩtti̧yo̧nä̧ cuä̧tä̧dä̧rä̧tö̧, chötahuiyättö usurä isotörö nä̧u̧cuä̧rä̧tö̧, jȩtta̧ pä'ö ttu̧ju̧nä̧rö̧'i̧nä̧ jȩtti̧yo̧nä̧ 'cho̧'i̧pä̧rä̧tö̧, rȩcua̧mu̧ ttiäre'i̧nä̧ ȩmi̧pä̧rä̧tö̧, jahuata'anö reyotörö'i̧nä̧ nä̧u̧cuä̧rä̧tö̧! ³ ¿Däje jȩcu̧'ä̧tu̧cuä̧cua̧'a̧ jä̧ttö̧ ucutumä̧ ji̧yȩnö̧ mo̧ro̧ juiyo otottö rötädipö si'epö icua pä'ö i̧chä̧cuä̧ pätecuächö mo̧ro̧ päi'omȩnä̧mä̧? ¿Di ö̧ja̧'a̧cu̧ jocu'ätucuäcua'a jä̧ttö̧ ppädäyucuacu pä'ömä, jahuata'anö tȩnȩ cuti'ätucuäcua'a jä̧ttö̧ cuiäretucu rö̧ä̧nä̧ micuäu juäimä? ⁴ Yori'iso ki̧'i̧pi̧yä̧cua̧'a̧, jahuata'anö ucutumä cärenä ttutätucuacu pä'ö jö̧ttö̧'i̧nä̧, ja̧hua̧nö̧ jo̧ca̧'a̧ jö̧ttö̧mä̧ cuä'ö tticuätucuacu pä'ö jö̧ttö̧'i̧nä̧ ttȩmi̧pä̧cuo̧tö̧jä̧. Pi̧yȩ o'ca juiyönä 'cuäopa'anä, ö̧'ä̧i̧mä̧ huirochi'oca'a jä̧cua̧'a̧; ja̧hua̧nö̧ jo̧ca̧'a̧, juhua'a yabocutä öjonä te'ädö ro̧ȩpa̧ pä'ötä ö̧jä̧cua̧. ⁵ ¡Isoo, Asirios ttö̧ja̧hue, ju̧huo̧'quȩ i̧so̧'quȩ ja̧'a̧ cha̧mi̧ surächi'omenä cuä'önö ro̧dȩpo̧'quȩmä̧! ⁶ Ttömä hue'inösä ttö̧ja̧ suronä jȩä̧cuä̧huä̧ ttö̧ja̧rö̧, jahuata'anö rö̧ä̧nä̧ cha̧mi̧ surächi'önä jȩä̧cuä̧huä̧ ttö̧ja̧ ttabo'iyotö pätti'önä, jahuata'anö ttötä hue'ösä ttiäre rö̧ä̧nä̧ micuäu juäi'i̧nä̧ tti̧nä̧u̧cui̧ya̧tö̧ pä'ö, jahuata'anö ötahuiyä mä̧nä̧nä̧ pähua redähua tti̧'cuȩ'cuo̧mȩnä̧ tti̧jȩpö̧ dea'a päi'a'a jä̧'i̧nö̧'a̧nö̧ pätti'önä jȩtta̧tö̧ pä'ö. ⁷ Ja̧hua̧nö̧ ja̧'a̧nä̧ pi̧yȩmä̧cö̧ ji̧na̧'a̧ ja̧u̧ jȩa̧ pä'ö amocuädinömä, ja̧u̧mä̧ pa̧'a̧nö̧ jȩchä̧cua̧sä̧ pä'ömä amocuädocö pinö. A̧mi̧so'quinämä ku̧nä̧rö̧ recuätö tti̧rȩji̧yä̧ pö̧nä̧ ka̧cuä̧tö̧rö̧ jȩpö̧'icu'i̧nä̧, si'epö icua pä'ötä. ⁸ Ja̧hua̧nö̧ ja̧'a̧ttö̧ ja̧u̧mä̧ pä'ö:''¿Ttö chu̧mö̧huäyotömä korotö ruhuotöttä'i̧nä̧ abonänö ruhuotömä̧cö̧ tä̧ji̧? ⁹ ¿Calmo ötahuiyämä, Carquemis'anömä jo̧co̧mȩ tä̧ji̧?¿Hamat ötahuiyämä Arfad'anömä jo̧co̧mȩ tä̧ji̧?¿Jahuata'anö Samaria ötahuiyämä Damasco'anömä jo̧co̧mȩ tä̧ji̧? ¹⁰ Ttö chu̧mu̧nä̧mä̧ recuätö tti̧rȩji̧yä̧ pö̧nä̧ ka̧cuä̧tö̧ttö̧ ttö̧ä̧nä̧huä̧ tätähuä o'ca ku̧nä̧rä̧tö̧rö̧ juruhuinösä̧, jahuata'anö koro juäi a̧'cua̧jui̧yä̧ bäreu aditinä̧tö̧ Jerusalenttö̧'i̧nä̧, Samariattö'i̧nä̧ abonä̧nö̧. ¹¹ Ja̧hua̧nö̧ jȩpi̧nö̧sä̧ Samaria ttö̧ja̧rö̧'i̧nä̧, jahuata'anö ttiäre tätähuä'quiyu'i̧nä̧. ¿Ja̧hua̧nö̧ jȩchi̧yö̧'a̧nö̧ hua̧sä̧ tä̧ji̧ Jerusalen ttö̧ja̧rö̧'i̧nä̧, ttiäre tätähuä'quiyu'i̧nä̧?'' ¹² Ja̧hua̧nö̧ ja̧'a̧ tu̧ru̧hua̧ o'ca juiyönä Sionttö̧'i̧nä̧, Jerusalenttö̧'i̧nä̧ jȩa̧ pääji cädomenä, ttötä ro̧dȩpä̧cua̧sä̧ Asiria ru̧hua̧ chutä amiso'quittö amocuädö ucuo teäumä. ¹³ Ja̧hua̧nö̧ ja̧'a̧ttö̧ ja̧u̧mä̧ pä'ö: ''Pi̧yȩ jȩchö̧mä̧ ttötä cha̧mo̧nä̧ chu̧huo̧ju̧'i̧nä̧, cha̧mo̧nä̧ chujuru'i̧nä̧ ja̧'a̧ jö̧nä̧. Jahuata'anö ttötä ja̧'a̧ huo̧juȩcu̧nä̧ a̧mo̧cuädäcuähuä ku̧nä̧rö̧mä̧, ttötä ja̧'a̧ ttö̧ja̧ tti̧rȩji̧yä̧ pö̧nä̧ ka̧cuä̧tö̧rö̧ 'cho'ipinömä̧. Jahuata'anö ttötä ja̧'a̧ ttiäre rö̧ä̧nä̧ micuäu juäi nä̧u̧cui̧nö̧mä̧, jahuata'anö böo päcäyä 'cuȩ'cu̧'icua'a jä̧'i̧nö̧'a̧nö̧ hueähuä ruhuotörö 'cuȩ'cu̧'icumä ttötä. ¹⁴ Ttötä chu̧mö̧nä̧ iyähui'inä̧cu̧sä̧ ruhuomä, jahuata'anö o'ca juiyönä rȩjȩttö̧ ya̧tȩ ppiyuhuä iä icuipomȩttö̧ ö̧ca̧ca̧ta̧'a̧ jä̧'i̧nö̧'a̧nö̧ tti̧rȩji̧yä̧ pö̧nä̧ ka̧cuä̧tö̧rö̧ chö̧ca̧ca̧ta̧ pä'ö. Ya̧tȩ'i̧nä̧ toina̧'a̧ ppiyuhuä ujuabä cäepa'a jä̧'i̧nö̧'a̧nö̧ cäepa pä'ömä, jahuata'anö ya̧tȩ'i̧nä̧ toina̧'a̧ ä yä'epö huoa pä'ömä̧. ¹⁵ ¿Ö̧da̧pä̧'quȩmä̧ hueö'anö ja̧'a̧ tä̧ji̧ ju̧huä̧'quȩnä̧ ö̧'co̧rä̧cua̧rö̧mä̧?¿Jahuata'anö dau ro'ö 'cuiocuäcämä juhuäcätä a̧mo̧nä̧ eseäcuähua'a tä̧ji̧ juhuäcänä 'cui'opöttö'i̧nä̧ abonä̧nö̧? Jahuata'anö i̧so̧'quȩmä̧ cäepö'anö ja̧'a̧ tä̧ji̧ ju̧huo̧'quȩtä̧ cättepö'anö huotörömä, jahuata'anä dauttu adicuä'ca ötta'camä cäepö'anö ja̧'a̧ tä̧ji̧ ya̧tȩ ttö̧ja̧'i̧sa̧rö̧mä̧. ¹⁶ Ja̧hua̧nö̧ ja̧'a̧ tu̧ru̧hua̧ su̧ro̧da̧u̧ ttu̧ru̧hua̧ Diosmä, ru̧hua̧ u̧mu̧huäyotö curä rohuäcuähuä ttö̧ja̧rö̧ hui̧ttä̧chä̧chö̧nä̧ jȩä̧cua̧. Uruhuo ucuo teäumä ocurä neba nebanö cuoa'a jä̧'i̧nö̧'a̧nö̧ cuo'ö icuäcua'a. ¹⁷ Israel ttö̧ja̧ tti̧tȩa̧u̧mä̧ ocurätä jö̧nä̧ pärohuächäcua'a, jahuata'anö surojö juiyömä o̧cu̧ma̧tä̧ jö̧nä̧ jä̧cua̧'a̧; jahuata'anö ya'ate mo̧ro̧tä̧ cuo'ö icuäcua'a so̧ä̧'cua'i̧nä̧, i̧sä̧'cua̧ suräjä'cua'i̧nä̧. ¹⁸ Tu̧ru̧hua̧ Diosmä rȩjȩ öadihuä si'epö i̧cuä̧cua̧, jahuata'anö rȩjȩ cuähuä adiu ppu̧ru̧huä̧jä̧'i̧nä̧ ki̧'i̧pö̧ juiyönätä; jahuata'anö ya̧tȩ ubo na̧'ä̧chö̧ ujuru jui̧'a̧ ö̧ja̧'a̧ jä̧'i̧nö̧'a̧nö̧ pä̧i̧'ä̧cuä̧jä̧ ju̧huä̧jä̧mä̧. ¹⁹ Jahuata'anö dauhuiyä koro beipächa'anä ka̧cui̧pä̧ji̧mä̧ a̧'u̧cu̧nä̧tä̧ jä̧cua̧'a̧, jahuata'anö ji̧'qui̧cha̧hua̧'i̧nä̧ ö̧'a̧ja̧ta̧'a̧nö̧tä̧. ²⁰ Ja̧u̧nu̧ mo̧ro̧mä̧, Israel ttö̧ja̧ttö̧ ka̧cui̧pi̧nä̧tö̧'i̧nä̧, jahuata'anö Jacob ahuaruhuä 'cotöttö ka̧cui̧pi̧nä̧tö̧'i̧nä̧ juhua'a yabomä tta̧'cua̧ ttu̧huä̧nä̧ri̧yä̧cua̧ ja̧u̧ cuä'ähuä'chö icuinö̧rö̧mä̧, ja̧hua̧nö̧ ja̧'a̧nä̧ Tu̧ru̧hua̧ttö̧tä̧ ppä'ädäcuähuotö ttö̧jä̧cuo̧tö̧, surojö jui̧'a̧ Israel ttö̧ja̧ ttö̧ä̧nä̧hua̧ Diosttötä. ²¹ Jahuata'anö Jacob ahuaruhuä'cotö ka̧cui̧pi̧nä̧tö̧mä̧ ppa̧ttä̧chä̧cuo̧tö̧ ju̧ru̧hua̧ Dioscutä. ²² Israel, ucu cutahuiyämä rȩba̧ aje röoto jäyoto pä̧ba̧ jä̧'i̧nö̧'a̧nö̧ huotö, ja̧hua̧nö̧ ja̧'a̧nä̧ jahuätöttömä a̧'u̧cu̧nä̧tä̧ ja̧'a̧ ttö̧ji̧pä̧cuo̧tö̧mä̧. Si'epö icuäcua'amä täcö jȩpö̧ ku̧nä̧hui̧'i̧na̧'a̧, si'epö'icua pä'ö amocuädö u̧ju̧ni̧nö̧mä̧ jo̧mȩnö̧ ro̧'ȩpö̧ cä̧dä̧cua̧. ²³ Ja̧hua̧nö̧ ja̧'a̧ su̧ro̧da̧u̧ ttu̧ru̧hua̧ tu̧ru̧hua̧mä̧, täcö be'epäjipö icua päinö mo̧ro̧ ja̧'a̧tó pi̧jä̧ rȩjȩnä̧mä̧. ²⁴ Ja̧hua̧nö̧ ja̧'a̧ su̧ro̧da̧u̧ ttu̧ru̧hua̧ tu̧ru̧hua̧mä̧ pa̧'a̧nö̧ pä'ö: Ttö chu̧mu̧huäyotö Sionnä ka̧cuä̧tö̧mä̧, yecuecuätucuó Asirios ttö̧ja̧rö̧mä̧. Ja̧u̧mä̧ ötta'ca i̧so̧'quȩnä̧ cä'epö cuäa pä'ömä jo̧mȩnö̧ kö̧ ucuru, Egipto ttö̧ja̧ jȩtti̧nö̧ta̧'a̧nö̧. ²⁵ Ja̧hua̧nö̧ ja̧'a̧nä̧ yecuecuä ja̧u̧ru̧mä̧, täcö a̧'u̧cua̧'a̧tä̧ o'ca'a ttö chö̧'ä̧i̧ chö̧ra̧huä̧rä̧ji̧mä̧ beipächäcua'a, jahuata'anö ttö chö̧'ä̧i̧tä̧ jȩpö̧ icuäcua'a ja̧u̧ ru̧hua̧rö̧. ²⁶ Ja̧hua̧nö̧ ja̧'a̧ su̧ro̧da̧u̧ ttu̧ru̧hua̧ tu̧ru̧hua̧mä̧ u̧mu̧nä̧ 'chu̧huä̧dä̧cua̧ iso'que päjure rappä isappänä jahuätörö cuäa pä'ömä, ji̧yȩnö̧ pä̧nä̧ Madian ttö̧ja̧rö̧ rohuäu ujuruhuinö'a̧nö̧ Oreb i̧nä̧huättö. Ja̧u̧mä̧ öjo aje röoto huä̧mȩnä̧ cä'epö ujuru i̧jȩpä̧cua̧ Egipto ttö̧ja̧rö̧ i̧jȩpi̧nö̧'a̧nö̧. ²⁷ Ja̧u̧nu̧ mo̧ro̧, cu̧'u̧pi̧'canä ä̧mä̧cö juäi cäepö ttu̧huä̧na̧'a̧ jä̧'i̧nö̧'a̧nö̧ jä̧'i̧jö̧mä̧ jahuata'anö cu̧ru̧pä̧'quȩnä̧ yugo isodä 'ca̧tä̧dö̧ ttu̧huä̧na̧'a̧ jä̧'i̧nö̧'a̧nö̧ jä̧'i̧jö̧mä̧ jȩpö̧ icuähuäcua'a. ²⁸ Jahuätö ttabo'iyotömä Ajat ra̧'a̧ttö̧ ichö 'cuä'opinä̧tö̧ Migron pä'ö micuome; Micmanämä ttöäre hua'adö rutinätödo. ²⁹ Jahuätömä ihueye 'cuäocuome huä̧mȩnä̧ 'cuä'opö Gebara̧'a̧ pä̧jä̧mi̧nä̧tö̧. Ramá ötahuiyämä ttö̧ȩpi̧na̧'a̧, ja̧hua̧nö̧ päi'omenä Guibeánä ka̧cuä̧tö̧ Saul ahuaruhuä pinätö̧mä̧ dö'ecuächinä̧tö̧. ³⁰ ¡Galim ittiju, pä̧i̧cu̧nä̧ huopö ajuähui!¡Adiunä ä̧ju̧cui̧ Lais!¡juiyo usurä isome Anatotmä¡ ³¹ Jahuata'anö Madmenanä̧ ka̧cuä̧tö̧mä̧ dö'ecuächätö, jahuata'anö Gebimnä̧ ka̧cuä̧tö̧mä̧ jopö tö'ipächätö ttä̧tȩcuä̧ttö̧ ttö̧ji̧pa̧ pä'ö. ³² Pi̧yȩ mo̧ro̧ ja̧u̧mä̧ 'chu'ädö ku̧nä̧hua̧ ö̧jä̧cua̧ Nob pä'ö micuome, juhuorötä u̧mu̧ cä̧ȩpä̧cua̧ Sión ittijuru, Jerusalén muä'cattö. ³³ Topätucui, su̧ro̧da̧u̧ ttu̧ru̧hua̧ ju̧ru̧hua̧ Diosmä̧ dauhuiyä bäreu a̧na̧jui̧yä̧ 'cui̧'ö̧ i̧cuä̧cua̧ pä̧i̧cu̧nä̧ ttö̧ȩpö̧nä̧ päi'önä; jahuata'anö dauhuiyä ju'toju jähuämä 'co̧rä̧u̧ icuähuäcua'a, jahuata'anö ucuo jähuä'i̧nä̧ rȩjȩnä̧tä̧ päi'önä. ³⁴ Ja̧u̧mä̧ ju̧huä̧nȩ de'a ka̧cu̧ttu̧ dauhuiyä bäreumä ödapä̧'quȩnä̧ 'co̧rä̧u̧ i̧cuä̧cua̧, jahuata'anö Lívano rȩjȩttö̧ ucuo jähuämä rȩjȩnä̧tä̧ päi'önä mo̧ä̧chä̧cua̧'a̧.