¹ Isaí ötta'ca kä'co päte'ö jo̧mȩttö̧ räopäcua'a, ja̧hua̧nö̧ ja̧'a̧ ya̧juä̧tȩ dau ö̧na̧juä̧ttö̧ adiu u̧huä̧ju̧ huä̧ja̧'a̧ jä̧'i̧nö̧a̧nö̧ jö̧nä̧. ² Tu̧ru̧hua̧ Dios a̧'cua̧ru̧hua̧mä̧ ja̧u̧ru̧ ö̧jä̧mä̧dä̧cua̧, a̧'cua̧ru̧hua̧ttö̧ huo̧juä̧huä̧'i̧nä̧,ttu̧huȩpä̧rä̧chi̧'ä̧cuä̧huä̧'i̧nä̧, a̧'cua̧ru̧hua̧ttö̧ huo̧juȩtä̧cuä̧huä̧'i̧nä̧, juruhuäcuähuä'i̧nä̧, a̧'cua̧ru̧hua̧ttö̧ huo̧juä̧chi̧'ä̧cuä̧huä̧'i̧nä̧, Tu̧ru̧hua̧rö̧ yecuäcuähuä'inä. ³ Ja̧u̧ jȩö̧mä̧ tu̧ru̧hua̧rö̧ ye'ecunu kä̧cuä̧huä̧tä̧ jä̧cua̧'a̧; Ja̧u̧mä̧ ro̧ȩpi̧yä̧cua̧ chutä ö'ärenä toömä, jahuata'anö ä̧ja̧nä̧ ä̧ju̧cu̧'i̧nä̧ isopäi'önä ttötä ja̧'a̧ pä'ömä, pä'ocö jä̧cua̧. ⁴ Ja̧hua̧nö̧ jo̧ca̧'a̧ usurä isotörömä adiunä kä̧cuä̧huä̧ttö̧tä̧ ppä̧dä̧rä̧cua̧, jahuata'anö yoräteunä̧tä̧ pä'ö u̧ju̧nä̧cua̧ pi̧jä̧ rȩjȩttö̧ usurä isotörömä. Ja̧u̧mä̧ ättö rä̧o̧po̧'quȩ i̧so̧'quȩnä̧tä̧ cuä'ö i̧cuä̧cua̧ rȩjȩmä̧, juhua'a jö̧ ta̧'a̧nö̧ jarodätörömä ättö räopoppa a̧mi̧yuppanä̧tä̧ ppö'ö cuä'ö i̧cuä̧cua̧. ⁵ Adihuä juäimä ttäcänä juärocuächönä rä̧ya 'ca̧tä̧chä̧ra̧'a̧ jä̧'i̧nö̧'a̧nö̧ jä̧cua̧'a̧, jahuata'anö iso päi'önä jähuämä ttu'upi'canä̧ ca̧tä̧chä̧rö̧nä̧ rä̧ya jä̧'i̧nö̧'a̧nö̧ jä̧cua̧'a̧. ⁶ Böo ähuirimä ohuejacu ö̧jä̧cua̧, jahuata'anö yähui huȩyu̧pa̧mä̧ chivo ji̧'qui̧cha̧hua̧cu̧ ä̧'ä̧cua̧, päcäyä'inä, böo mö yähui'inä, päcäyä bä̧rȩpa̧'i̧nä̧, jahuätömä ji̧nä̧ yo̧mȩtȩ cuettächäcuotö. Ja̧hua̧nö̧ ja̧'a̧ ya̧tȩ ji̧'qui̧cha̧hua̧mä̧ jahuätörö tta̧huä̧rä̧cua̧. ⁷ Jahuata'anö päcäyä isajumä oso isajucu kahuaruhuaju jö̧nä̧tä̧ cuä̧nö̧ kö̧jä̧cua̧ju̧, jahuata'anö tti̧tti̧mö̧mä̧ ji̧nä̧ yo̧mȩtȩ 'cuä'ächö ttö̧'ä̧cuo̧tö̧. Jahuata'anö böo mö yähuimä ojiyä'chetä cuä̧nö̧ ö̧jä̧cua̧ päcäyä ucua'a jä̧'i̧nö̧'a̧nö̧ jö̧nä̧. ⁸ Ya̧tȩ ji̧'qui̧cha̧hua̧mä̧ äca äjunä ö̧ä̧rȩhuä̧cua̧, ja̧hua̧nö̧ ja̧'a̧ ji̧'qui̧cha̧hua̧ ahuate ttajococumä ni̧'a̧ äca i̧tti̧mö̧ ttö̧'o̧mȩ u̧mu̧ räädö'anö ja̧'a̧. ⁹ O'ca juiyönä surojö jui̧'a̧ chidepiyunä̧mä̧ jahuätöttömä ya̧tȩ'i̧nä̧ toa'a suronä jȩpö̧ si'epö icu'anö hua̧mä̧; Ja̧hua̧nö̧ ja̧'a̧ttö̧ tu̧ru̧hua̧ttö̧ huo̧juä̧huä̧tä̧ suhuädi'äcua'a pi̧jä̧ rȩjȩnä̧mä̧, aje rö̧o̧tottö ajiya huä̧do̧tä̧ra̧'a̧ jä̧'i̧nö̧'a̧nö̧ jö̧nä̧. ¹⁰ Ji̧yȩnö̧ mo̧ro̧, Isaí ahuaruhuä 'cotöttö kada'ca päi'önä hua̧mä̧ cä̧ȩpä̧cua̧ ttö̧ja̧ tturuhuo i̧sä̧ta̧ a̧'cua̧rö̧nä̧ jä̧ta̧. Ttö̧ja̧mä̧ ja̧u̧ru̧tä̧ ttu̧sä̧rä̧cuo̧tö̧, ja̧u̧ 'cuä'ächö ö̧jo̧mȩmä̧ chutä öadihuättötä a̧'cua̧cu̧nä̧ kä̧dȩpa̧'a̧ttö̧. ¹¹ Ji̧yȩnö̧ mo̧ro̧, tu̧ru̧hua̧mä̧ pä'äji ta̧'a̧nö̧ u̧mö̧ cä'epö ujuru i̧jȩpä̧cua̧ ahuaruhuä ka̧cui̧pi̧nä̧tö̧rö̧ ppa̧huä̧da̧ pä'ö Asiria rȩjȩnä̧'i̧nä̧, Egipto rȩjȩnä̧'i̧nä̧, Patros rȩjȩnä̧'i̧nä̧, Cus rȩjȩnä̧'i̧nä̧, Elam rȩjȩnä̧'i̧nä̧, Sinar rȩjȩnä̧'i̧nä̧, Hamat rȩjȩnä̧'i̧nä̧, jahuata'anö aje rö̧oto kä'co i̧sä̧sa̧nä̧ ka̧cui̧pi̧nä̧tö̧rö̧'i̧nä̧. ¹² Pi̧jä̧ pa̧ja̧cu̧nä̧ ka̧cuä̧tö̧rö̧ ji̧ta̧tȩ i̧sä̧ta̧ ucuo i̧sä̧ta̧ cä'epö i̧jȩpä̧cua̧, Israel ttö̧ja̧ttö̧ icuicuotö pinätö̧rö̧ ji̧nä̧ yo̧mȩtȩ pä'i'ö u̧cuo̧cuä̧cua̧, juhua'a jö̧ ta̧'a̧nö̧ Judá ttö̧ja̧ttö̧ 'quȩ'ȩcuä̧chi̧nä̧tö̧ pinätö̧rö̧'i̧nä̧ u̧cuo̧cuä̧cua̧, rȩjȩttö̧mä̧ pa̧ja̧cuä̧nö̧ jo̧mȩnä̧ ka̧cuä̧tö̧rö̧. ¹³ Ja̧u̧mä̧ 'quȩ'ȩpö̧ i̧cuä̧cua̧ Efraín suronä ä'cuoyäunu ucuocuinö ji̧nö̧mä̧, juhua'a jö̧ ta̧'a̧nö̧ Judá suronä jȩa̧ pä'ö amocuädinö ji̧nö̧'i̧nä̧ 'cui'opö icuähuäcua'a. Ja̧hua̧nö̧ ja̧'a̧ttö̧ Efraínmä Judárö suronä pä'ä'chömä u̧cuo̧cui̧yä̧cua̧, pärocua'attö Judá'inä Efraínrö pä̧i̧cu̧nä̧ ra̧huä̧rö̧nö̧ pä'ä'chömä u̧cuo̧cui̧yä̧cua̧. ¹⁴ Ja̧hua̧nö̧ jo̧ca̧'a̧, jahuätömä kä̧hua̧ mo̧ä̧cha̧'a̧cu̧ päte'ö ka̧cuä̧tö̧ Filisteo ttö̧ja̧cu̧ rohuäu tti̧'chä̧cuo̧tö̧, ja̧hua̧nö̧ ja̧'a̧ttö̧ jahuätömä ji̧nä̧ yo̧mȩtȩnä̧ pä'i'ö kä̧hua̧ räopa'acu ka̧cuä̧tö̧ tturuhuo päi'önä ka̧cu̧ 'chottipäcuotö. Jahuätö ttujurumä rȩbȩhuä̧cua̧'a̧ Edom ötahuiyänä'inä, Moab ötahuiyänä'inö, ja̧hua̧nö̧ ja̧'a̧ttö̧ Amón ötahuiyä ttö̧ja̧mä̧ jahuätö huettötä jȩttä̧cuo̧tö̧. ¹⁵ Tu̧ru̧hua̧mä̧ Egipto rȩjȩttö̧ aje rö̧o̧tomä jo'ädö i̧cuä̧cua̧. Ja̧hua̧nö̧ ja̧'a̧ttö̧ chutä a̧'cua̧ru̧hua̧ ujurunä u̧mö̧ te'eädö cä̧ȩpä̧cua̧ Eufrate aje huä̧mo̧tonä, ja̧hua̧nö̧ ja̧'a̧ ko̧ro̧mö̧ttö̧ ta'cherenö jo̧mȩnä̧ aje o̧rä̧ 'cä̧'chä̧chi̧pä̧cua̧'a̧, ttö̧jä̧pi̧yä̧ 'ca̧tä̧chä̧rö̧ oya ka̧cua̧'a̧nä̧ aje jo̧ä̧jä̧nä̧ 'cuättopa pä'ö. ¹⁶ Mä̧nä̧ päi'äcua'a chutä u̧mu̧huäyotö ka̧cui̧pi̧nä̧tö̧ pinätö Asiria rȩjȩnä̧ ppa̧ttä̧chö̧nä̧ päi'önä, Israel ttö̧ja̧ Egipto rȩjȩra̧'a̧ttö̧ rättopomenä 'cuäopinö ji̧nö̧'a̧nö̧ jö̧nä̧.