¹ Ä̧rä̧mi̧'ö̧ tejädi'i; Cui̧tȩa̧u̧mä̧ täcö rebehua'a, ja̧hua̧nö̧ ja̧'a̧ttö̧ tu̧ru̧hua̧ öadihuämä ucurutä tejäda'a. ² Jahuata'anö yo̧ö̧ jähuämä pi̧jä̧ rȩjȩnä̧ ttoecuächomenä, juhua'a jö̧ ta̧'a̧nö̧ yo̧ö̧mä̧ pi̧jä̧ ttö̧ja̧rö̧ 'quiyönä juäoi'äcua'a; ja̧hua̧nö̧ ja̧'a̧nä̧ tu̧ru̧hua̧mä̧ ucurutä i̧tȩjä̧dä̧cua̧, ja̧u̧ öadihuämä ucunä̧tä̧ i̧jȩcuä̧chä̧cua̧'a̧ ja̧'a̧ttö̧. ³ Ttö̧ja̧mä̧ ttichäcuotö ucu cui̧tȩa̧u̧ttu̧ kä̧dä̧pa̧'a̧cu̧tä̧, juhua'a jö̧ ta̧'a̧nö̧ ruhuotö'inä ttichäcuotö ucuttutä kä̧dȩpö̧nä̧ mo̧ro̧ juhua'acutä. ⁴ Cui'äriyä ye'ädö topi ucutä cuippeyenä. O'ca toi'önä ji̧nä̧ yo̧mȩtȩ pä'i'äjätömä ucurutä ichätö. Ucutä cui̧tti̧mö̧mä̧ otottö ttichäcuotö, jahuata'anö cui̧tti̧mö̧ nä̧tö̧rö̧mä̧ ttöjohuiyänä tti'cächäcuotö. ⁵ Ucutä ja̧hua̧nö̧ tocu'huomenä huäjunä cuesehuä̧cua̧jä̧, cua̧mi̧so̧'qui̧ttö̧mä̧ eseäcuähuätä suhuädi'äcua'a, tti̧rȩji̧yä̧ pö̧nä̧ ka̧cuä̧tö̧mä̧ aje röotonä ichö rö̧ä̧nä̧ micuäu juäi 'cächö tti̧yä̧cua̧jä̧, jahuata'anö ttidepiyu pönä ka̧cuä̧tö̧ttö̧ ruhuo jähuämä ucurutä 'cächö ttiyäcuotö. ⁶ Tocu'huä̧cua̧jä̧ cameyututtu a̧ttä̧chi̧'a̧'a̧, Efattö'inä, Madiánttö'inä ichätörömä; o'catoi'önä jahuätömä ttichäcuotö Sebattö; jahuata'anö tti'cächäcuotö oro'inä, a̧mȩu̧nä̧ 'chopö juäi'inä, juhua'a jö̧ ta̧'a̧nö̧ tu̧ru̧hua̧rö̧ eseu ra̧huä̧huä̧'i̧nä̧ ra̧ttä̧cuo̧tö̧. ⁷ Cedarttö o'catoi'önä äjicuäcuähuotömä ucutä cuä'ca jo̧mȩ ttö̧ca̧ca̧cui̧'ä̧cuo̧tö̧, jahuata'anö i̧sa̧rö̧ cuä'ö'icu 'cähuä ttö̧ja̧mä̧ ucuru recuä rö̧jö̧ ppättädäcuotö; Tu̧ru̧hua̧rö̧ amocuädö i̧sa̧rö̧ ku'icu iyähuomettö ttiya pä'ö eseunu iyähuä; Jahuata'anö pä̧dä̧cua̧sä̧ juiyo rö̧ä̧nä̧ adihuode ttö chojusodemä, jö̧nä̧. ⁸ ¿Titö ju'huotö jä̧ttö̧ pitömä ju'toju isoppa jä̧'i̧nö̧'a̧nö̧ jö̧nä̧ co̧'ä̧rä̧tö̧mä̧, jahuata'anö palomatö ttäjura̧'a̧ tti̧'cha̧'a̧ jä̧'i̧nö̧'a̧nö̧ jö̧nä̧ 'chä̧tö̧mä̧? ⁹ Isopäi'önä ä̧cuo̧mȩnä̧ Tarsisra̧'a̧ttö̧ huoi'quiyunä ichätömä ttörötä tta̧ttä̧rä̧cuo̧tö̧, jahuata'anö cui̧tti̧mö̧rö̧mä̧ otottö tti'cächäcuotö, jahuätöcumä tti'cächäcuotö cuiäre pärätä'inä, oro'inä, cu̧ru̧hua̧ cu̧huä̧nä̧hua̧ Dios i̧mi̧nä̧, jahuata'anö Israel ttö̧ja̧ ttö̧ä̧nä̧hua̧ Dios surojö jui̧'a̧ i̧mi̧nä̧, ihueye ja̧u̧tä̧ ja̧'a̧ttö̧ ucuturu ucuotäcuähuotö cu̧jä̧tu̧cu̧nä̧ jȩpi̧nö̧mä̧. ¹⁰ Kara'attö ichäcuähuotötä jä̧cua̧'a̧ ju'tojunä ttocuepinö o'ca jareächi'önä ttaditäcuotömä, ja̧hua̧nö̧ ja̧'a̧ttö̧ curuhuotö ruhuotömä ucurutä ppättädäcuotö; Ja̧hua̧nö̧ ja̧'a̧nä̧ ihueye ttötä ra̧huä̧ri̧pö̧ ro̧dȩpi̧nä̧cu̧jä̧, juhua'a jö̧ta̧'a̧nö̧ ttötä adiunä chamocuädomettö ucurumä rȩrö̧jö̧nä̧ to̧chä̧cua̧sä̧. ¹¹ Ucu cuiäre äpatiyämä 'cuäopönätä ba̧ȩcuä̧rä̧cua̧'a̧; Mo̧ro̧'i̧nä̧, yodo'i̧nä̧ mu̧ȩcuä̧ juiyönätä, tti̧rȩji̧yä̧ pö̧nä̧ ka̧cuä̧tö̧ttö̧ ttiäre rö̧ä̧nä̧ micuäu juäi ucurutä 'cächö tiya pä'ö, ruhuotö'inä ttumuhuäyotöcu pö̧nä̧ ja̧hua̧nö̧tä̧ jö̧nä̧ 'cächö ttiya pä'ö. ¹² Ruhuotö ja̧'a̧nä̧ ucuru ppä'ädocotömä tottepo'ächäcuotö; Ja̧hua̧nö̧ ja̧'a̧ttö̧ jahuätö ttö̧ja̧ tti̧rȩji̧yä̧ pö̧nä̧ ka̧cuä̧tö̧ttö̧mä̧ ya̧tȩ'i̧nä̧ ö̧ji̧pö̧ juiyönätä jȩpö̧ icuähuäcua'a. ¹³ Lívanottö̧ adihuä juäimä ucurutä rȩbȩhuä̧cua̧'a̧, jahuata'anö ciprésttö'inä, abetosttö'inä, pinottö'inä, juhua'amä ttö chö̧jo̧de a̧'cua̧cuä̧chi̧'ö̧nä̧ cuadita pä'ö jä̧cua̧'a̧; ja̧hua̧nö̧ ja̧'a̧ttö̧ ttö chö̧jä̧dä̧ro̧mȩmä̧ adiunä̧tä̧ pä'ö chu̧ju̧nä̧cua̧sä̧. ¹⁴ Ucuru suronä pä'ä'chinä̧tö̧ tti̧tti̧mö̧mä̧ ttichäcuotö cuä'ca jo̧mȩ ttihue'quiyunä pä̧mä̧dö̧ ucuotö jȩtta̧ pä'ö, jahuata'anö o'catoi'önä ucuru kö'cocotö pinätö'inä cu̧jä̧pö̧ kada'ca jo̧mȩ ttö'ä ja̧rȩyu̧nu̧ pä'i'ö ucuotö jȩttä̧cuo̧tö̧; Ja̧hua̧nö̧ ja̧'a̧ jahuätömä pättäcuotö, tu̧ru̧hua̧ Israel ttö̧ja̧ ttö̧ä̧nä̧hua̧ Dios öäre ötahuiyämä Sióntä ja̧'a̧, jö̧nä̧. ¹⁵ Ra̧huä̧rä̧'chö̧ icuicuome ji̧no̧mȩmä̧, jahuata'anö cu̧mä̧ni̧yä̧nä̧ ya̧tȩ'i̧nä̧ cueächocome ji̧no̧mȩmä̧, ttötä beipocö jähuättö a̧'cua̧cu̧nä̧ jȩchä̧cua̧sä̧ ucurumä, ja̧hua̧nö̧ ja̧'a̧ttö̧ eseäcuähuätä kä̧cua̧'a̧ o'catoi'önä cui̧tti̧mö̧ 'cotöra̧'a̧ päi'önä beipächö juiyönä. ¹⁶ Jahuata'anö pi̧jä̧ pa̧ja̧cu̧nä̧ ka̧cuä̧tö̧mä̧ adihuä juäi cuähuättö ttu̧cuä̧jȩ'ä̧cua̧jä̧, juhua'a jö̧ta̧'a̧nö̧ ruhuotömä ttöäre rö̧ä̧nä̧ micuäu juäi 'cächö tti̧yä̧cua̧jä̧; Jahuata'anö cu̧huo̧juä̧cua̧jä̧ ttötä ja'a cu̧ru̧hua̧ ucu cu̧ji̧pö̧nä̧ ppädäcuähuä'i̧sa̧mä̧ pä'ö, jahuata'anö ucuru iyähuinömä, Jacobmi̧nä̧ ujuru i̧sa̧ pinömä ttötä ja̧'a̧ pä'ö. ¹⁷ Bronce kö̧'i̧jo̧mȩmä̧ ttömä chi̧'cä̧chä̧cua̧sä̧ oro, jahuata'anö hierro kä̧'i̧jo̧mȩmä̧ plata chi̧'cä̧chä̧cua̧sä̧; Jahuata'anö dauhuiyä o'ca kä̧'i̧jo̧mȩmä̧ bronce chi̧'cä̧chä̧cua̧sä̧, jahuata'anö i̧nä̧huiyä kä̧'i̧jo̧mȩmä̧ hierro chi̧'cä̧chä̧cua̧sä̧. Ttömä jȩchä̧cua̧sä̧ eseäcuähuätä hueacu pä'ö, juhua'a jö̧ta̧'a̧nö̧ adiunä kä̧cuä̧huä̧'i̧nä̧, jueö jähuä'i̧nä̧ o̧i̧pä̧cua̧jä̧. ¹⁸ Ucu cui̧rȩjä̧ttö̧mä̧ täcö ä̧ju̧cuä̧cuä̧hui̧yä̧cua̧'a̧ suronä jȩä̧cuä̧huä̧ jä̧'i̧jö̧mä̧, ja̧hua̧nö̧ ja̧'a̧ttö̧ yorö'isotä juiyäcua'a cuidepiyu surojuhuächa pä'ö jȩä̧'chä̧cuä̧huä̧ jä̧'i̧jö̧mä̧, Ja̧hua̧nö̧ ja̧'a̧ttö̧ 'quiyönä tto̧ȩcuä̧rä̧'camä ocuhuä̧cua̧jä̧ ''ki̧'i̧cuä̧'' pä'ö, juhua'a jö̧ta̧'a̧nö̧ cuäpatiyämä o̧cu̧huä̧cua̧jä̧ ''ra̧huä̧huä̧'' pä'ö. ¹⁹ Täcö recuä rö̧ji̧yä̧cua̧jä̧ mo̧ro̧ kä̧hua̧ i̧tȩa̧u̧ttö̧ kä̧dȩpa̧cu̧ pä'ömä, juhua'a jö̧ta̧'a̧nö̧ yodo kä̧hua̧ i̧tȩa̧u̧ttö̧ tejädacu pä'ö'inä; Ttö cu̧ru̧hua̧tä̧ jä̧cua̧'a̧ ucu cui̧tȩa̧u̧ beipocö jähuämä, ucu cuhuadihuämä ttö cu̧huä̧nä̧hua̧ Diosttötä kä̧dȩpä̧cua̧'a̧. ²⁰ Mo̧ro̧ kä̧hua̧ i̧tȩa̧u̧mä̧ dajahuächiyäcua'a, yodo kä̧hua̧ i̧tȩa̧u̧'i̧nä̧ toepo'ächiyäcua'a, ja̧hua̧nö̧ ja̧'a̧ ttö cu̧ru̧hua̧tä̧ jä̧cua̧'a̧ cui̧tȩa̧u̧ beipocö jähuämä, ja̧hua̧nö̧ ja̧'a̧nä̧ re ruhuä pä'i'ö ajuäcuähuä jä̧'i̧jö̧tä̧ ja̧'a̧ beipächä̧cuä̧mä̧. ²¹ O'catoi'önä ucu cuahuaruhuämä surojö jui'ätötä ttö̧ja̧cuä̧cuo̧tö̧; Jahuätötä jä̧cua̧'a̧ tti̧rȩjä̧ ttu̧ju̧nä̧rä̧cuo̧tö̧mä̧ 'cuäopönä̧tä̧, dau isade bahuademä ttö chu̧ju̧na̧detä jä̧cua̧'a̧, ihueye ttö chu̧mu̧nä̧ adicuätä jä̧cua̧'a̧ ja̧u̧mä̧, ttö chöadihuätä i̧jȩcuä̧cha̧ pä'ö. ²² A̧'u̧cu̧nä̧tä̧ jö̧mä̧ pärohuächäcua'a milnö jo̧mȩnä̧, pi̧yȩ ppo̧ö̧ pa̧ja̧cuä̧mä̧, ötahuiyä bäreu jähuätä juhuächäcua'a, ja̧hua̧nö̧ ja̧'a̧ttö̧ ttö cu̧ru̧hua̧tu̧cu̧mä̧ jeruhua'ara̧'a̧tä̧ jurunänö pätecuächa pä'ö jȩchä̧cua̧sä̧.