¹ Pi̧yȩ ja̧'a̧ TÖ̧Ä̧NÄ̧HUA̧ päömä: A̧mö̧cuädö topi jueö pähuämä, jȩpi̧ adiu surojö juiyö; ja̧'hua̧nö̧ ja̧'a̧ Ttö ra̧huä̧pi̧jö̧ttö̧ ttö̧ji̧pö̧nä̧ ppädädömä tö'cö ka̧'a̧, ja̧'hua̧ta̧'a̧nö̧ Ttö adiu jȩchö̧mä̧ i̧jȩcuä̧cho̧mȩtä̧ päia'a. ² Ya̧tȩ pi̧yȩ jȩpö̧rö̧mä̧ adiunä̧tä̧ jä̧cua̧'a̧ ja̧'hua̧ta̧'a̧nö̧ ja̧u̧ jȩa̧ pä'ö a̧'cua̧ huȩnä̧rö̧mä̧. Ja̧u̧mä̧ 'cuächi'äcuähuä mo̧ro̧ to̧ä̧cua̧, ucuo juiyönä̧mä̧ jȩpo̧cö̧ jä̧cua̧, u̧mö̧nä̧mä̧ u̧ju̧nä̧rä̧cua̧ korojuei surojö jȩa̧ pä'ötä. ³ Korojä̧ ttö̧ja̧sa̧rö̧mä̧ a̧ päcuä TÖ̧Ä̧NÄ̧HUA̧CU̧ ichö jö̧nä̧tä̧ juo'ächinö: Isopäi'önätä̧ TTÖ̧Ä̧NÄ̧HUA̧MÄ̧ u̧mö̧huäyotöttö rä'epö i̧cuä̧cua̧sä̧ pä'anä̧mä̧." Urä'cäyä 'cä̧'ä̧hua̧mä̧ päöjuiya'anö̧ ja̧'a̧: Topätucuittö̧, ttömä dau joächächinä̧i̧sä̧." ⁴ Ja̧'hua̧nö̧ ja̧'a̧ TTÖ̧Ä̧NÄ̧HUA̧MÄ̧ pi̧yȩ pä'ö: Ttörä'cäyä 'cä'ähuotömä Ttö chu̧mo̧ro̧ 'cuä'ächi'äcuähuä mo̧ro̧ topätömä ja̧'hua̧ta̧'a̧nö̧ Ttö cheseunä jö̧ ȩmä̧tö̧mä̧ Ttö chesecuinö 'quiyönä 'chu̧'ä̧rä̧cuä̧huä̧tö̧, ⁵ jahuätörömä chojusodenä chu̧ju̧nä̧cuo̧tö̧ chidepiyuttö ttoecuäbä jacuä tti̧tti̧mö̧ u̧mä̧tö̧rö̧'i̧nä̧ nä̧tö̧rö̧'i̧nä̧ ku̧nä̧rä̧cuä̧huä̧ttö̧'i̧nä̧ abonä̧nö̧ adihuome. Ttömä ju̧huȩnȩ chiyäcuotö kä̧cuä̧huo̧mȩ mo̧ro̧ ki̧ä̧mö̧nä̧ kä̧cuo̧mȩ. ⁶ Ja̧'hua̧ta̧'a̧nö̧ ko̧ro̧jä̧ttö̧ ichäcuähuotömä tta̧mö̧nä̧ pa̧ja̧tö̧ TTÖ̧Ä̧NÄ̧HUA̧CU̧ pätti'äcuotö ppättädarö pä'ö juhua'atäcu TÖ̧Ä̧NÄ̧HUA̧ i̧mi̧ repe'ätömä ttucuota pä'ö, chu 'cuä'ächi'ö pä̧mä̧dä̧cuä̧huä̧ mo̧ro̧ a̧mö̧cuädö pä̧mä̧dö̧mä̧ ucuotäcuähuocö'i̧nä̧ rä'epö icuocömä ja̧'hua̧ta̧'a̧nö̧ chesecuinönä̧ 'quiyönä 'chu̧'ä̧rä̧cuä̧u̧mä̧, ⁷ chidepiyu möä'ca surojö juiyä'cara̧'a̧cu̧ chi̧'cä̧chä̧cua̧ ja̧'hua̧ta̧'a̧nö̧ Ttörötä ucuocuäcuähuodenä rö̧ä̧nä̧ eseu u̧ju̧nä̧ jȩchä̧cua̧; iäre ku icu iyähuämä ja̧'hua̧ta̧'a̧nö̧ i̧sa̧rö̧ ku icu iyähuomettö ku icu iyomenä̧mä̧ ȩmä̧hyu̧i̧yä̧cua̧. Ja̧'hua̧nö̧ ja̧'a̧ttö̧ Ttö chojusodemä ttö̧ja̧ o'catoi'önä̧tä̧ Diosrö ucuocuäcuähuode pättäcuode. ⁸ Tö̧ä̧nä̧ha̧mä̧ Diosmä pa̧'a̧nö̧ pä'ö, Israel ttö̧ja̧ suronä jȩttä̧u̧rö̧ cca̧ca̧tö̧mä̧, Ttömä ji̧nä̧ korotörö'i̧nä̧ chö̧ca̧ca̧tä̧cua̧sä̧." ⁹ ¡Ucutu de'a isotö pä̧i̧cuä̧tö̧mä̧, ichätucui cucui'ätucua, ucutu o'catoi'önä de'a isotöjä̧! ¹⁰ Ucuturu tta̧'ä̧rä̧tö̧mä̧ o'catoi'önä̧tä̧ ä̧to̧cä̧tö̧, jahuätömä huo̧jui̧'o̧co̧tö̧. Jahuätö o'catoi'önä a̧hui̧ri̧tö̧ tti̧huȩnȩ jui'ätö hueyapocotö jö̧nä̧ huotö. Jahuätömä 'cua̧ti̧cuä̧tö̧ ja̧'hua̧ta̧'a̧nö̧ cuä'ipö ä'ähuätä kö'cätö. ¹¹ Ä̧hui̧ri̧tö̧mä̧ rö̧ä̧nä̧ ppäicuätö; yorö'iso su'ädi'ocotö; jahuätömä isotörö tta̧'ä̧rä̧tö̧ ttu̧ȩpä̧rä̧cuä̧huä̧ juiyönä̧tä̧; jitö ttamöcuäda'acutä ppa̧'ä̧chi̧nä̧tö̧, yotucunä suronä̧ jȩpö̧tä̧ yabonänö ttȩma̧ pä'ätö. ¹² Ichätucui jö̧nä̧tä̧ pä'ätö, vino'i̧nä̧, ni̧yu̧ ajiya'i̧nä̧ tahuätucua. Yo̧ȩi̧mo̧ro̧mä̧ jitä mo̧ro̧ jö̧ta'anö jä̧cua̧'a̧, jitä mo̧ro̧ttö̧'i̧nä̧ abonä̧nö̧."