¹ ¿Dí jä̧ttö̧ ujutu jitähuinö esetinömä?Jahuata'anö¿Dirö jä̧ttö̧ tu̧ru̧hua̧ ujuru i̧jȩcui̧'i̧na̧'a̧mä̧? ² Iso päi'önä ja̧u̧mä̧ Dios ä'ca jo̧mȩttö̧ pöttächö böo ju'huinö, dauttu 'cärächipö jareönä räopa'a jä̧'i̧nö̧'a̧nö̧ jö̧nä̧, jahuata'anö ujupo'tiyä rȩjȩ jo̧mȩ jacuäcu doächa'a jä̧'i̧nö̧'a̧nö̧ jö̧nä̧; Ujutu totomȩnä̧ ja̧u̧nä̧mä̧ öadihuä'inä, ösäru'inä jui'inö. ³ Ja̧u̧mä̧ pi̧jä̧ ttö̧ja̧ ttöjö'cococu pinö, ya̧'o̧cuä̧rö̧tä̧ ya̧tto̧cuä̧ri̧nä̧cu̧; Ja̧hua̧nö̧ ja̧'a̧ttö̧ a̧'u̧rö̧jä̧cu̧ rö̧ä̧nä̧ a̧'cua̧ tta̧'ȩcui̧nö̧. Tottarö pä'ö kö'cocotö pinätö, ihueye ttöjö'cococu ja̧'a̧ttö̧, ujutu'inä ja̧u̧ru̧ ucuotocotö pinätö̧jä̧. ⁴ Ja̧hua̧nö̧ ja̧'a̧nä̧ pärocua'attö ja̧u̧mä̧ ujutu tumärichei'i̧nä̧, ta̧'cua̧ tta̧tȩcu̧'i̧nä̧ cä'ecu huä̧nä̧u̧ ȩpi̧nö̧; Ujututä ubara ttutu'anö jö̧mä̧, ubara ttu'inö ja̧u̧tä̧, ja̧hua̧nö̧ ja̧'a̧nä̧'i̧nä̧ ja̧'a̧ta̧ totinä̧cu̧ chutä toea'anä, tö̧ä̧nä̧hua̧ Diosttö ro̧ȩcuä̧cö̧ pä'ö, suronä jȩa̧'a̧ttö̧cö̧ pä'ö amocuädinä̧tö̧jä̧. ⁵ Ujututä suronä jȩpö̧ jarodä'chö tö̧jö̧ micuä päi'önä ja̧u̧tä̧ ubara ttu'inö; Ujututä toteö'anö ja̧'a̧nä̧ ja̧u̧tä̧ to'e'inö, ro̧ȩcuä̧ ubara ttutu'anö jö̧mä̧ ubara ttu'inö ja̧u̧tä̧, ujutu tö̧ä̧nä̧hua̧ Dioscu eseunu tö̧ja̧ pä'ö, ja̧u̧ru̧ cuäcuättina̧'a̧ttö̧, ja̧u̧ öttahuiyä ji̧nö̧nä̧tä̧ ujutumä aditö icuähuotö pä'in'inä̧tö̧jä̧. ⁶ Ujutumä o'ca toi'önä ohueja re'tehuächinö u̧ru̧hua̧ to̧'a̧ a̧'cua̧rö̧nä̧ huinätöjä̧; Ya̧cu̧ pö̧nä̧ tu̧mä̧nä̧mä̧ kara'acutä o'ipö icuinä̧u̧jä̧, ja̧hua̧nö̧ ji̧yä̧cu̧ tu̧ru̧hua̧tä̧ cä'epö u̧huä̧ni̧nä̧cu̧ ujutu o'catoi'önä suronä jȩti̧nö̧mä̧. ⁷ Suronä jȩttä̧cu̧'i̧nä̧, cuäcuättäcu'inä ättömä ädätocö pinö; Ohuejarö cuä'ö icuähuome ttȩpa̧'a̧ jä̧'i̧nö̧'a̧nö̧ ttȩpi̧nä̧cu̧, jahuata'anö ohuejamä uhuo'che 'cuiähuä ttö̧ja̧ ttä'ca jo̧mȩ 'corunä ö̧ja̧'a̧ jä̧'i̧nö̧'a̧nö̧, ja̧u̧'i̧nä̧ ä bahuepoca'a 'corunä̧tä̧ ki̧nö̧. ⁸ Koro'inä jȩo̧ca̧'a̧ ji̧na̧'a̧nä̧ cuä'ö'icu ro̧ttȩpi̧nä̧cu̧;¿Di jä̧ttö̧ ahuaruhuä pinätöttö, ja̧u̧ru̧ a̧mo̧cuädinömä? Ja̧u̧mä̧ pi̧jä̧ttö̧ tta̧'cua̧rö̧ ku̧nä̧rä̧tö̧ttö̧mä̧ jȩpö̧ i̧cuä̧hua̧ pinö; Ja̧u̧mä̧ cuä'ö tticuinäcu chahuaruhuä suronä jȩtti̧nö̧ micuä päi'önä. ⁹ Suronä jȩä̧cuä̧huä̧ i̧sa̧ 'corupäi'omenä hua'ö icua pä'ö ttötö'anö ttötinäcu, ja̧hua̧nö̧ ja̧'a̧nä̧ järe ru̧hua̧ hua'ö icuäcuomȩ rutinätö ja̧u̧ru̧, suronä jȩo̧ca̧'a̧ ji̧na̧'a̧nä̧'i̧nä̧, jahuata'anö yapare huȩnȩ ucuocuoca'a ji̧na̧'a̧nä̧'i̧nä̧ ja̧hua̧nö̧ ttötinä̧cu̧. ¹⁰ Jahuata'anö Diostä ji̧na̧'a̧ ja̧hua̧nö̧ jȩpi̧nö̧mä̧, ubara ttu'u usurä ȩmä̧hua̧ pä'ö. Ja̧hua̧nö̧ ja̧'a̧ttö̧ ja̧u̧mä̧ chutä Diosrö iyähuä ofrenda päi'önä iyähuinö surojö micuä päi'önä, Jahuata'anö chutä ahuaruhuä pinätö̧cu̧ kä̧nö̧ a̧'cua̧rö̧ beipocö u̧ju̧nä̧ra̧ pä'ö, ja̧hua̧nö̧ ja̧'a̧ttö̧ Dios amocuädinömä ja̧u̧nä̧tä̧ pätecuächäcua'a. ¹¹ Ja̧u̧nu̧ o'ca'a chutä usurä ȩmä̧huä̧ji̧ micuä päi'önä, chutä u̧huo̧ju̧nä̧ tȩa̧u̧ ko̧mȩ do'ächö ö̧jä̧cua̧. Ttö chu̧mu̧huä̧ya̧ adihuä i̧sa̧mä̧ recuätö ttö̧ji̧pö̧nä̧ jȩä̧cua̧; jahuata'anö ja̧u̧tä̧ jä̧cua̧'a̧ jahuätö suronä jȩttä̧'chö̧ cä'ecu u̧huä̧nä̧huä̧cua̧mä̧. ¹² Ja̧hua̧nö̧ ja̧'a̧ttö̧ ttötä recuätö ttö̧ja̧rö̧ chi̧yä̧cua̧mä̧, jahuata'anö ruhuotörö ttucuotö'anö ttucuotäcuotö ja̧u̧ru̧, jahuata'anö juruhuätöcu ȩmä̧cua̧ adihuä juäi. Pi̧yȩ 'cuäopäcua'a ja̧u̧ru̧mä̧ 'corupäi'ome jobö päi'önä iyähuina̧'a̧ttö̧, ja̧u̧mä̧ suronä jȩä̧cuä̧huä̧ i̧sa̧ pä'ö ottinä̧cu̧. Ja̧hua̧nö̧ ja̧'a̧nä̧'i̧nä̧ recuätö suronä jȩttö̧ chutä a̧mo̧nä̧ ȩmö̧ huä̧nä̧hui̧nö̧, suronä jȩä̧cuä̧huä̧ ttö̧ja̧rö̧ tö̧ä̧nä̧hua̧ Diosrö ucuocu iyinö ja̧u̧mä̧.