¹ ¿Dijä̧ttö̧ pide Edom rȩjȩ Bosra ötahuiyättöra̧'a̧ttö̧ ichömä, ö̧'ca̧tä̧huä̧ta̧ tu̧huä̧ta̧ 'ca̧tä̧u̧mä̧? ¿Dijä̧ttö̧ ja̧u̧mä̧ ucuonä 'ca̧tä̧cuä̧huä̧ta̧ rö̧ä̧nä̧ ujuru jähuänä a̧'cua̧ u̧huȩnä̧rö̧tä̧ 'cu̧cuȩcua̧mä̧? Ja̧u̧mä̧ Ttötä ja̧'a̧, adihuomenä jȩä̧cuä̧huä̧tä̧ ucuocu ja̧'hua̧ta̧'a̧nö̧ chujurunä̧tä̧ ttu̧ji̧pö̧nä̧ ppädäda pä'ötö hua̧mä̧. ² ¿Tta̧'a̧nö̧ pä'ö cui̧ä̧rȩta̧mä̧ tuhua'attö̧ ja̧'hua̧ta̧nö̧ uva 'cuȩ'cuä̧huo̧mȩ kä̧'i̧jö̧ 'cua̧rö̧nä̧ hua̧jä̧ttö̧? ³ Ttömä katätä uvamä 'cuȩ'cu̧ kä̧'i̧jö̧sä̧, yorö'iso ttö̧ja̧mä̧ yotöte'i̧nä̧ ttö̧cu̧mä̧ ppä'ächi'ocotö pä'ijätö. Ttömä chö̧'ä̧i̧nä̧ kȩdö̧ icuinö̧sä̧, chu̧'ä̧i̧nä̧mä̧ nö̧'cuächipö. Ucuojamä chu̧'ca̧tä̧huä̧ta̧mä̧ 'cho'cheipina̧'a̧ ja̧'hua̧nö̧ jo̧mȩnä̧ chu̧'ca̧tä̧huä̧ti̧yu̧mä̧ o'cajuiyötä 'cucuächipina'a. ⁴ Ja̧'hua̧nö̧ ja̧'a̧ Ttömä pärocua'acu micuä jȩchä̧cuȩ mo̧ro̧ tta̧'a̧ri̧nö̧sä̧ ja̧'hua̧nö̧ jo̧mȩnä̧ ä'coji jinö̧'a̧nö̧ ttö̧ja̧cu̧nä̧ ppädäda pä'ö jö̧ a̧'ȩ rȩbȩhuä̧ja̧'a̧. ⁵ Ttömä topinö̧sä̧, ya̧tȩ'i̧nä̧ ppädö'anö hua̧mä̧ toina̧'a̧, Ttötämä jä'ecuinö̧sä̧ ppädö'anö hua̧mä̧ toa'attö̧, ja̧'hua̧nö̧ jo̧mȩnä̧ cha̧mö̧nä̧ chöjohuiyätä isojuodepönä i'cächinä̧cu̧sä̧, cha̧mi̧surächi'äji ujurutä kiopinä̧cu̧sä̧. ⁶ Ttömä cha̧mi̧ surunä̧tä̧ jähuänä̧tä̧ ttö̧ja̧rö̧mä̧ kȩdö̧ icuinö̧sä̧ ja̧'hua̧ta̧'a̧nö̧ chö̧'ä̧i̧nä̧tä̧ tä̧ttä̧ma̧chö̧nä̧ jȩpi̧nö̧sä̧ ja̧'hua̧nö̧ jȩpö̧ ttö̧ja̧ ttucuoja rȩjȩ huerächi'önä jȩpi̧nö̧sä̧. ⁷ Ttömä chucuocuä̧cua̧sä̧ TTÖ̧Ä̧NÄ̧HUA̧MÄ̧ pi̧yȩ jȩchä̧cua̧sä̧ päinö jȩpö̧ ötodecuinö̧'i̧nä̧, aditähuättö adihua'a topö ra̧huä̧huä̧'i̧nä̧. Ttömä chu̧cuo̧cuä̧cua̧sä̧ o'cajuiyönä TÖ̧Ä̧NÄ̧HUA̧ ujuturu ppädinö̧'i̧nä̧, ja̧'hua̧ta̧'a̧nä̧ Israel ttö̧ja̧rö̧ rö̧ä̧nä̧ re ö̧ji̧nö̧'i̧nä̧. Ja̧u̧ rȩrö̧jö̧nä̧ toömä ujuturu ppä'ädönö i̧jȩpi̧nö̧ juhua'atäcu aditähuämä rö̧ä̧nä̧ jȩchä̧cua̧sä̧ päinö̧nä̧ jȩpö̧ esecuinö'i̧nä̧. ⁸ Ja̧'hua̧nö̧ ja̧'a̧ttö̧ Ja̧u̧mä̧ pä'inö: Isopäi'önä jahuätötä ja̧'a̧ chahuaruhuämä, ppo̧'ä̧́ttö̧ ttucuomä jui'ätörö ja̧'a̧nä̧; Ja̧u̧mä̧ jahuätörö ppä̧dä̧cuä̧huä̧sa̧ jö̧nä̧ pä'i'inö̧. ⁹ O'cajuiyönä jahuätö usurä ttȩmä̧u̧nä̧mä̧, Ja̧u̧'i̧nä̧ usurä ȩmä̧hui̧nö̧, ja̧'hua̧nö̧ jo̧mȩnä̧ u̧mö̧huä̧ya̧ huȩnȩ ȩcuä̧ i̧sa̧mä̧ ä'ca jo̧mȩttö̧mä̧ ppä'ädinö̧. Ja̧u̧ Eseu repeönä̧mä̧ ujuturu surojöttö rä'epö ppä'ädinö̧. Ja̧'hua̧nö̧ ppä'ädömä Ja̧u̧mä̧ jahuätörö äräbe'ömä mo̧ täbocutä päi'önä o'catoi'önä̧rö̧ ȩpi̧nö̧. ¹⁰ Ja̧'hua̧nö̧ ja̧'a̧nä̧ jahuätömä jarodinä̧tö̧ ja̧'hua̧nö̧ jarodömä A̧'cua̧ru̧hua̧ surojö jui̧'a̧rö a̧'cua̧ tta̧'ȩpi̧nä̧tö̧. Ja̧'hua̧nö̧ jo̧mȩnä̧ tta̧bo̧i̧ya̧ pä'i'ö jahuätucu rohuähuinö. ¹¹ Ahuaruhuämä mo̧ täbocu Moisés ö̧ji̧nö̧ pä̧nä̧ 'cuäopinö a̧mö̧cuädinä̧tö̧, jähuätömä pä'inö̧tö̧: ¿Tȩnȩ ö̧ja̧'a̧ttö̧ Diosmä, tide ji̧na̧'a̧ttö̧ ovejastö̧rö̧ tta̧'ä̧rä̧tö̧rö̧ aje rö̧ä̧to jacuättö ttö̧ji̧pö̧nö̧ rä'epö ppä'ädinö̧mä̧? ¿Tȩnȩ ö̧jä̧ttö̧ Diosmä, A̧ö̧cua̧ru̧hua̧ surojö jui̧'a̧rö̧ jahuätö ttö̧'cä̧tȩ jo̧mȩ ku̧ni̧nö̧mä̧? ¹² ¿Tȩnȩ ö̧jä̧ttö̧ Diosmä, Tide ji̧na̧'a̧ttö̧ Moisés u̧huo̧jua̧'a̧cu̧nä̧ i̧sä̧mö̧nä̧ ujuru'inä̧, öadihuä'i̧nä̧ i̧jȩcuä̧chö̧nä̧ jȩpi̧nö̧mä̧ ja̧'hua̧ta̧'a̧nö̧ aje'i̧nä̧ 'cä̧'ȩpi̧nö̧mä̧, chutä a̧mö̧nä̧ pa̧ja̧tö̧ i̧mi̧'i̧nä̧ 'cuäopönä kö̧nä̧ jȩpö̧mä̧? ¹³ ¿Tȩnȩ ö̧jä̧ Diosmä, aje täcuome päte'ö o'ipinö̧mä̧? Rȩjȩ yo̧rä̧tȩhuä̧jä̧nä̧ cabayu joa'a jä̧'i̧nö̧'a̧nö̧, jahuätömä ttottepo̧co̧u̧ pinä̧tö̧. ¹⁴ Pä̧cä̧yu̧ jä̧'i̧nö̧'a̧nö̧ ppämäropära̧'a̧cu̧ huä̧mi̧pä̧tö̧rö̧mä̧, 'cuä'ächi'ö ttö̧'ä̧jö̧ma̧ pä'ö TÖ̧Ä̧NÄ̧HUA̧ a̧'cua̧ru̧hua̧rö̧ iyinä̧u̧. Ja̧'hua̧nö̧tä̧ ucumä cumöhuäyotörömä̧ o'ipinö̧jä̧, ucutä cua̧mö̧nä̧ pa̧ja̧tö̧ cui̧mi̧mä̧ ra̧huä̧huä̧ jö̧nä̧tö̧ ja̧ pä'ömä. ¹⁵ Mo̧ro̧jä̧ra̧'a̧ttö̧ rötädipö topi, ja̧'hua̧ta̧'a̧nö̧ adiu cua̧'cua̧ pö̧nö̧ ä̧ju̧cui̧ surojö juiyome ku̧jo̧mȩttö̧. ¿Tȩnȩ ka̧'a̧ttö̧ ucu cuä'cuoyäumä, ja̧'hua̧ta̧'a̧nö̧ cujuru jȩ'cu̧mä̧? Ucu re cu̧ju̧mä̧ ja̧'hua̧ta̧'a̧nö̧ rȩrö̧jö̧nö̧ to'cumä ujututtö oto pä̧i̧ä̧prö̧ ja̧'a̧. ¹⁶ Ja̧'hua̧nö̧ ja̧'a̧ Ucutäjä ujutu tä'omä, Abraham'i̧nä̧, Israel ttö̧ja̧'i̧nä̧ ttieruhuäcu cua'anä, ujutumä tä'o Diosjä. Ujuturu ttö̧ji̧pö̧nö̧ ppädinö̧mä̧ cui̧mi̧tä̧ ji̧na̧'a̧ mo̧ täbocutä päi'önö. ¹⁷ TTÖ̧Ä̧NÄ̧HUA̧ ¿Tta̧'a̧nö̧ pä'ö cu̧mä̧nä̧ttö̧mä̧ rä̧to̧pä̧chä̧rö̧nä̧ jȩ'cuä̧u̧jä̧ttö̧ ja̧'hua̧ta̧'a̧nö̧ ta̧mi̧so'qui 'quitädäcuäunä ucuru pä̧huä̧rö̧ja̧'a̧cu̧mä̧ jȩtö̧ juiyönä? Adihuomenä̧tä̧ ppa̧'a̧chi̧ cu̧mö̧huäyotörömä, ttahuaruhuä 'cotö cuiäre chuiya pä̧cui̧nä̧u̧rö̧mä̧. ¹⁸ Ucu cuahuaruhuärömä a̧'u̧cu̧nä̧tä̧ mo̧ro̧ jo̧mȩtä̧ cu̧jo̧mȩ surojö juiyome ttö̧ja̧cu̧nä̧ ku̧ni̧jä̧, ja̧'hua̧nö̧ ji̧na̧'a̧nä̧ taboiyotömä ujuturu 'cuȩ'cu̧ icuinä̧tö̧. ¹⁹ Ujutumä̧ jitö ucu yorö'iso ruhuonä huȩcuo̧co̧u̧ ji̧nö̧'anö juo'ächinä̧tö̧jä̧, jitö yorö'iso cuimi̧'i̧nä̧ o'ocotö ji̧nö̧'a̧nö̧ huotöjä."