BABILONIATTÖ HUE'ÄHUOTÖRÖ EZEQUÍAS ȨMI̧NÖ̧ HUȨNȨ
1
Babiloniattö ru̧hua̧ Baladán i̧tti̧, Merodac Baladán hueinö pä̧nä̧mä̧, Ezequíasrö hue'inödo cuyäru isojänä huȩyu̧tu̧, ja̧hua̧nö̧ ja̧'a̧nä̧ koro mippoönä iyähuä'inä jönä; Ja̧u̧mä̧ ä̧ju̧cui̧na̧'a̧ ji̧na̧'a̧ Ezequíasmä na̧'ä̧chi̧nö̧, ja̧hua̧nö̧ ja̧'a̧nä̧ ja̧u̧ u̧mä̧richeittömä täcö pi̧'i̧pä̧ji̧ pä'ö.
2
Ezequíasmä esehuinö ru̧hua̧ hue'ähuotörö'inä, ttiäre mipponä ppä'ädö iyähuäcu tti̧rȩbȩhua̧'a̧ topö; ja̧hua̧nö̧ ja̧'a̧ttö̧ ja̧u̧mä̧ jahuätö hue'ähuotörö i̧jȩpi̧nö̧ öäre rö̧ä̧nä̧ micuäu juäi pä̧jo̧mȩ: Oro'inä, plata'inä, a̧dö̧nä̧ a̧mȩu̧'i̧nä̧, a̧dȩ isoya'inä, ju'hua'a jö̧ ta̧'a̧nö̧ cu'upä pä̧jo̧mȩ'i̧nä̧, koro'i̧nä̧ o'ca juiyönä hua'adö ötä'ijö pä̧jo̧mȩ i̧jȩpi̧nö̧. Chutä uruhuo ko̧mȩttö̧'i̧nä̧, ojusodettö'inä, yo̧mȩtȩ'i̧nä̧ ki̧'o̧ca̧'a̧ ji̧na̧'a̧ Ezequías jahuätörö i̧jȩpo̧co̧mȩ jo̧mȩmä̧.
3
Ja̧hua̧nö̧ ja̧'a̧ Diosttö huȩ'ä̧hua̧ Isaíasmä topö 'chi̧nö̧ ru̧hua̧ Ezequíasrö, jahuata'anö jäepinä̧cu̧: ''¿Jahuätö u̧mä̧tö̧mä̧ tottö ichäjätö jä̧ttö̧? jahuata'anö ¿Däjetä jittähuäjäcuttö jahuätömä?'' Ja̧hua̧nö̧ ja̧'a̧ Ezequías ädätinö: ''Oto kä̧jä̧ Babilonia rȩjȩra̧'a̧ttö̧ ichäjätö, pä'ö.
4
Juhua'a yabocu Isaías jä'epinö̧: ¿Jahuätömä däjetä tottättö cuojusodettömä? Ezequías ädätinö: Jahuätömä o'ca juiyönä chojusodenä ka̧cu̧ topäjätö. Ji̧yȩtȩ'i̧nä̧ ki̧'o̧ca̧'a̧ ja̧'a̧ jahuätörö chojusodenä ka̧cu̧ rö̧ä̧nä̧ micuäu juäittö chi̧jȩpo̧cö̧ jä̧ji̧mä̧.''
5
Ja̧hua̧nö̧ ja̧'a̧ Isaíasmä pä'inö Ezequíasrö: ''Tu̧ru̧hua̧ ju̧ru̧hua̧ i̧huȩnȩ ä̧ju̧cui̧:
6
''Pi̧yȩ u̧mo̧ro̧mä̧ rȩbȩhua̧ pä'ötä päi'a'a ucu cuojusodenä, cuä̧do̧tö̧ mi̧nä̧ ca̧ca̧tö̧ ttötino̧mȩttö̧ kä̧mä̧dö̧ jitä pi̧yȩ mo̧ro̧ jobö ka̧cu̧mä̧, ȩmi̧cuä̧cua̧'a̧ Babilonia rȩjȩra̧'a̧. Ja̧hua̧nö̧ ja̧'a̧ttö̧ pi̧nȩmä̧ ji̧yȩtȩ'i̧nä̧ ku̧ni̧cui̧yä̧cua̧'a̧, ja̧hua̧nö̧tä̧ pä'ö tu̧ru̧hua̧mä̧.
7
Ja̧hua̧nö̧ ja̧'a̧ttö̧ ucutä cui̧tti̧mö̧ttö̧'i̧nä̧, cuahuaruhuä jö̧nä̧ huotöttö'inä, jahuätörömä ȩmi̧cuä̧cua̧'a̧ rö̧ä̧nä̧ usurä ȩmä̧u̧ kä̧nö̧ Babilonia ru̧hua̧ ojusodenä adicuä ttö̧ja̧tä̧ pätti'önä.
8
Ja̧hua̧nö̧ ja̧'a̧ Ezequíasmä pä'inö Isaíasrö: ''Tu̧ru̧hua̧ i̧huȩnȩ ucuocuäjimä adihua'a, jö̧nä̧ päina̧'a̧mä̧ pa̧'a̧nö̧ a̧mo̧cuäda'attö jina'a: '' Ji̧nä̧ ttö chö̧jä̧i̧ mo̧ro̧tä̧ huȩnȩ juiyänä̧ kä̧nö̧ eseu kä̧cuä̧huä̧cua̧'a̧mä̧, pä'ö.