¹ De'a jui̧yä̧jä̧'i̧nä̧, de'a jui̧yä̧jä̧ Arabá'i̧nä̧ eseu ttö̧ja̧cuä̧cuo̧tö̧, ja̧'hua̧ta̧'a̧nö̧ de'a jui̧yä̧jä̧'i̧nä̧ esehuäcua'a, ja̧'hua̧ta̧'a̧nö̧ adiyä ju̧huȩnȩ ka̧cu̧'i̧nä̧ ȩ'u̧mä̧ huȩjä̧cua̧'a̧. De'attö ȩ'u̧ jä̧'i̧nö̧'a̧nö̧ ² rö̧ä̧nä̧ ȩ'u̧cuä̧cua̧'a̧ ja̧'hua̧nö̧ ȩ'u̧cu̧ rö̧ä̧nä̧ eseumä ra̧huä̧cuȩ; Líbano usärumä iyähui'äcua'a, Carmelo mö̧ä̧'ca'i̧nä̧, Sarón'inä öadihuämä̧; jahuätömä TÖ̧Ä̧NÄ̧HUA̧ usäru tottäcuotö, Tu̧ru̧hua̧ Dios öädihuämä. ³ Ttu̧mö̧pi̧yä̧ ji̧yu̧huä̧u̧rö̧ ttujuru iyi, ttihue'quiyu ttö̧ä̧huä̧u̧rö̧ ttö̧ä̧u̧ juiyönä jȩpi̧tö̧, ⁴ jicuähuaja jitö ttamiso'quinä ye'ecuätörö," ¡Ttujuruhuäcua'anö̧, ye'ecu'i̧nä̧ yettecu juiyäcua'anö! Topätucui, Cu̧ru̧hua̧ Dios i̧chä̧cua̧ jȩtti̧nö̧ micuä jö̧nä̧ ro̧ȩpa̧ pä'ö. Ja̧u̧mä̧ i̧chä̧cua̧ ra̧huä̧pi̧jo̧mȩttö̧ cu̧ji̧pö̧nä̧ ppädacu pä'ö. ⁵ Ja̧'hua̧nö̧ ja̧'a̧ ä̧to̧cä̧tö̧mä̧ tottäcuotö ja̧'hua̧ta̧'a̧nö̧ ä̧ju̧cuo̧co̧tö̧mä̧ ttä̧ju̧cuä̧cuo̧tö̧. ⁶ Ttö̧ja̧sa̧ co̧ppȩco̧ppȩ 'chu̧mä̧ tȩ'u̧rä̧ töa'a jä̧'i̧nö̧'a̧nä̧ tö̧ä̧cua̧ ja̧'hua̧ta̧'a̧nö̧ i̧huȩnȩ jui'ä'ijömä ra̧huä̧cua̧, ja̧'hua̧ta̧'a̧nö̧ ajiya'i̧nä̧ räopäcua'a arabáttömä juhua'atäcu de'a jui̧yä̧jä̧tö̧mä̧ ajiya juruhuoya huerächäcua'a. ⁷ Rȩba̧ i̧sa̧ppȩ du̧'a̧ppȩttö̧mä̧ ajiya acuo'ta jö̧nä̧tä̧ pärohuächäcua'a, rȩjȩ jo̧i̧nä̧jä̧ttö̧mä̧, aje i̧sa̧rä̧ttö̧mä̧, de'a isotö ttö̧ja̧cui̧no̧mȩttö̧mä̧, ya'utenä jahuätö ttö̧'ȩji̧no̧mȩttö̧mä̧, isä'cuamä ona ajenä kä̧'i̧nö̧ juei kä̧cua̧'a̧. ⁸ Juȩnȩ mänä rä̧mä̧mä̧ surojö'i̧nä̧ jui̧yä̧mä̧ pä'ö o̧ttä̧cuä̧mä̧. Su̧ro̧pa̧mä̧ juä̧mä̧nä̧mä̧ jopocö jä̧cua̧. Ja̧'hua̧nö̧ ja̧'a̧nä̧ cueächa pähui'inä̧cu̧tä̧ jä̧cua̧'a̧ i̧'chä̧cua̧mä̧. Huo̧juȩcu̧nä̧ a̧mö̧cuädocö ja̧huä̧mä̧nä̧mä̧ 'cho̧cö̧ jä̧cua̧. ⁹ Mu̧ yähui'i̧nä̧ ju̧huȩnȩmä̧ ko̧cö̧ jä̧cua̧, de'a i̧sa̧ pä̧i̧cua̧'i̧nä̧ ja̧huä̧mä̧nä̧mä̧ ko̧cö̧ jä̧cua̧; ja̧u̧ juotörömä juorömä po̧cui̧cuo̧ca̧'a̧ jä̧cua̧'a̧, ja̧'hua̧nö̧ ja̧'a̧ ȩmä̧hua̧tä̧ jä̧cua̧'a̧ ja̧huä̧mä̧nä̧ i̧'chä̧cua̧. ¹⁰ TÖ̧Ä̧NÄ̧HUA̧ ttö̧ji̧pö̧nä̧ ppä̧di̧nä̧u̧tä̧ ppa̧ttä̧chä̧cuo̧tö̧mä̧ ja̧'hua̧ta̧'a̧nö̧ Siónra̧'a̧cu̧ ichö kä̧nö̧ ra̧ttä̧cuo̧tö̧, ja̧'hua̧ta̧'a̧nö̧ eseäcuähuä beipächocömä̧ ttuoiyänä kä̧cua̧'a̧; rö̧ä̧nä̧ tteseunä jö̧ 'tö̧ȩpo̧'ä̧chä̧cuo̧tö̧, barau'i̧nä̧, ajacuähuä'i̧nä̧ jahuätönä̧mä̧ juiyäcua'a.