¹ Topätucui, ya̧tȩ ru̧hua̧mä̧ adiu jueönä huȩä̧cua̧, jahuata'anö hueähuä ttö̧ja̧'i̧nä̧ adiunätä̧ huettäcuotö. ² Jahuätöttö ya̧cu̧ pö̧nä̧rö̧mä̧ isoppa rö̧ä̧nä̧ döomettö dajahuächö ttö̧ji̧pa̧'a̧ jä̧'i̧nö̧'a̧nö̧ jö̧nä̧ jä̧cua̧'a̧, jahuata'anö rȩjȩ jo̧ä̧jä̧nä̧ ajiya 'cuäoi'a'a jä̧'i̧nö̧'a̧nö̧ jö̧nä̧, jahuata'anö rȩjȩ du̧'huä̧jä̧nä̧ inähuättö ttinö jö̧nä̧ u̧ju̧tä̧ra̧'a̧nä̧ ttö̧ja̧'a̧ jä̧'i̧nö̧'a̧nö̧ jö̧nä̧. ³ Jahuätö tti'äriyänä tottömä huäjunätä to̧ttä̧rä̧cuo̧tö̧, juhua'a jö̧ ta̧'a̧nö̧ jahuätö ttä̧ja̧hui̧yä̧nä̧ ttä̧ju̧cu̧mä̧ huäjunätä ttä̧ju̧cuä̧rä̧cuo̧tö̧. ⁴ Jarodäcuähuä i̧sa̧mä̧ ttu̧huȩcuä̧nä̧ a̧mo̧cuä̧dä̧cua̧ u̧huo̧juä̧chi̧'a̧ pä'ömä, jahuata'anö i̧huȩnȩttö̧ tta̧tta̧huä̧'jö̧'i̧nä̧ jurunänö huäjunä u̧cuo̧cuä̧cua̧. ⁵ Jarodäcuähuä i̧sa̧rö̧mä̧ ucuotäcuähuä'i̧sa̧jä̧ ucumä jö̧nä̧mä̧ pähuiyäcua'a, jahuata'anö yapare jiäcuähuä i̧sa̧rö̧mä̧ kada'cattö päi'önä adihuä'i̧sa̧jä̧ jö̧nä̧mä̧ pähuiyäcua'a. ⁶ Ja̧hua̧nö̧ ja̧'a̧ttö̧ jarodäcuähuä'i̧sa̧mä̧ ucuocu'i̧nä̧ ja̧'a̧tä̧ra̧'a̧ jö̧tä̧ ucuocu, jahuata'anö amiso'quittömä surojötä uhuäbecu rötäcu ja̧'a̧ttö̧ jȩö̧'i̧nä̧ surojötä jȩpö̧, ja̧hua̧nö̧ ja̧'a̧ttö̧ u̧ru̧hua̧ Diosrö'inä yaparetä ucuocu. Ttucua ppä̧i̧rö̧jä̧u̧ru̧'i̧nä̧ iyocö, juhua'a jö̧ ta̧'a̧nö̧ ajiya ttahua pä'ö a̧di̧rö̧jä̧u̧ru̧'i̧nä̧ iyocö. ⁷ Ja̧u̧ ya̧pa̧rȩhua̧ aditähuämä ihueye surojötä ja̧'a̧. Ja̧u̧ uhuäbe'ömä surojö jarodäcuähuätä jö̧, jahuata'anö yapare huȩnȩttö̧tä̧ usurä isotö juttächiyarö pä'ö, iso pä̧u̧jä̧cö̧ pä'ö a̧mo̧cuädö. ⁸ Ja̧hua̧nö̧ ja̧'a̧nä̧ adihuä'i̧sa̧mä̧ adihuä juäitä amocuädö jȩpö̧; ja̧hua̧nö̧ ja̧'a̧ttö̧ aditähuä juäittömä adihuä juäitä i̧jȩcuä̧chö̧nä̧ jȩpö̧ 'quiyönä kö̧. ^{9 10} Ucutu nä̧tö̧, adiunä ka̧cuä̧tö̧mä̧ ä̧rä̧mi̧'ö̧ ä̧ju̧cuä̧tu̧cui̧ttö̧; Ucutu chi̧tti̧mö̧ nä̧tö̧ cua̧'cua̧ juiyönä ka̧cuä̧tö, chi̧huȩnȩ chucuocumä ä̧ju̧cuä̧tu̧cui̧. Jitä adiunä cu̧jä̧tu̧cu̧mä̧ ya'ute du'huo jö̧ o'ca'amä cuijiyuhuächi'äcuotöjä, jahuata'anö uva u̧huä̧ju̧ jä̧ji̧mä̧ beipächäcua'a, ja̧hua̧nö̧ ja̧'a̧ttö̧ ku̧nä̧huä̧ u̧huä̧ju̧ juhua'a yabocumä juiyäcua'a ¹¹ Ucutu nä̧tö̧, adiunä ka̧cuä̧tö̧mä̧ cua̧'cua̧ tta̧'ȩcu̧tä̧ tti̧'ä̧huä̧tu̧cui̧; jahuata'anö ucutu adiunä kä̧tö̧mä̧ cu̧'ca̧tä̧huä̧tu̧cu̧ adiu o̧ta̧mä̧ ko̧'ä̧dä̧cuä̧u̧ icu juiyönä̧tä̧ kä̧tu̧cui̧; ja̧hua̧nö̧ ja̧'a̧nä̧ re ruhuä ju'ipö 'ca̧tä̧cuä̧huä̧ta̧tä̧ 'ca̧tä̧huä̧tu̧cui̧. ¹² Jahuata'anö cuamucatucunä 'ta'tapäcuäu huopö kä̧nö̧ pä'ätucui, a̧di̧huä̧jä̧ rȩjȩhue, juiyodí cuähuä u̧huä̧ju̧mä̧ adiu ppuruhuinä̧jä̧, jö̧nä̧. ¹³ Chu̧mu̧huäyotö tti̧rȩjä̧nä̧mä̧ so̧ä̧cua'inä ja̧'a̧nä̧ rädo ocäcu arisanö jä̧'cuatä räopäcua'a, o'ca juiyö odehuiyä pö̧nä̧ eseäcuähuätä kä̧'i̧jo̧mȩ'i̧nä̧, juhua'a jö̧ ta̧'a̧nö̧ pi̧yȩ ötahuiyättö tta̧'cua̧ adiunä 'porächö pä'cäri jä̧'i̧jö̧mä̧ juiyäcua'a. ¹⁴ Juhua'a jö̧ ta̧'a̧nö̧ ruhuo isodemä icuicuäcua'a, ötahuiyä bäreu ttö̧ja̧ ttirecuä'ijömä juiyäcua'a, ju'tojunä kä̧nö̧ to̧ttä̧ra̧ pä'ö tätö ku̧nä̧huä̧'ca jä̧'i̧jä̧'camä, 'cuäopönätä käju rejutä juhuächäcuome, jahuata'anö isotö de'a ka̧cuä̧tö̧ mö̧rö̧tö̧ eseu cue'ächö ttö̧jo̧mȩ'i̧nä̧ ja̧'a̧nä̧, pä̧cä̧yö̧'i̧nä̧ ttucuä'che cuä̧nö̧tä̧ ttö̧ja̧cuä̧cuo̧mȩ. ¹⁵ Ju'toju ru̧hua̧ a̧'cua̧ru̧hua̧ ujuturu ö̧jä̧mä̧do̧mȩnä̧, jahuata'anö rȩjȩ dauhuiyä jui̧yä̧jä̧mä̧, cuäcuähuä ku̧nä̧huä̧jä̧ rȩjȩtä̧ päi'önä pä̧ro̧huä̧chä̧cuä̧jä̧, jahuata'anö cuäcuähuä ppöruhui'ö yȩä̧hui̧'ä̧jä̧mä̧ de'a a̧di̧huä̧jä̧tä̧ pä̧i̧'ä̧cuä̧jä̧. ¹⁶ Ja̧u̧nu̧ o'ca'amä ucuotö kä̧cuä̧huä̧mä̧, rȩjȩ de'a jui̧yä̧jä̧nä̧tä̧ kä̧cua̧'a̧, juhua'a jö̧ ta̧'a̧nö̧ jueönä ucuotäcuähuämä kä̧cua̧'a̧ cuähuä ppöruhuäjä̧ rȩjȩnä̧. ¹⁷ Adicuättö jueönä ro̧ȩcuä̧mä̧, huȩnȩ juiyönä kä̧cuä̧huä̧tä̧ jä̧cua̧'a̧; juhua'a jö̧ ta̧'a̧nö̧ rojinä ro̧ȩcuä̧mä̧ ttu̧huȩcuä̧nä̧ kä̧cuä̧huä̧'i̧nä̧ ja̧'a̧nä̧, 'cuäopönätä ucuotäcuähuä'inä jä̧cua̧'a̧. ¹⁸ Jahuata'anö ttö chumuhuäyotömä ttö̧ja̧cuä̧cuo̧tö̧ eseutä kä̧cuä̧huo̧mȩ, juhua'a jö̧ ta̧'a̧nö̧ ttoju odehuiyämä jo̧mȩnö̧ adicuometä, huȩnȩ'i̧nä̧ juiyönä 'cuä'ächö pä̧cuä̧huo̧mȩtä̧. ¹⁹ Ja̧hua̧nö̧ ja̧'a̧nä̧ ajiya o'qui ju'tojuttu mo̧ö̧ttö̧mä̧, de'a ko̧mȩtä̧ mo̧ä̧cua̧'a̧, juhua'a jö̧ ta̧'a̧nö̧ ötahuiyä'inä o'ca juiyönätä jȩpö̧ icuähuäcua'a, ja̧hua̧nö̧ ja̧'a̧nä̧ ucutumä eseutä cu̧jä̧cuo̧tö̧jä̧ cu̧ju̧nä̧huä̧tu̧cu̧'i̧nä̧ aje acuäyunu jo̧mȩ ku̧ni̧nä̧tö̧mä̧, cuä̧ji̧mö̧tu̧cu̧ ttucuä'che'inä beipächocome. ²⁰ Ja̧hua̧nö̧ ja̧'a̧ttö̧ cuä̧ji̧mö̧ mö̧rö̧tö̧rö̧'i̧nä̧, pä̧cä̧yö̧rö̧'i̧nä̧ ju̧huȩnȩtä̧ cuȩpä̧cuo̧tö̧jä̧ ttucuä'che ko̧mȩtä̧.