¹ "Tta̧'cua̧ ttȩmö̧nä̧ ppä'ädäcuähuotö, tta̧'cua̧ ttȩmö̧nä̧ ppä'ädäcuähuotö, chumöhuäyotömä: Pä'ö ttu̧ru̧hua̧ Diosmä. ² Ucuocui Jerusalénnä ka̧cuä̧tö̧rö̧ rȩrö̧jö̧nö̧ topönö̧ ja̧'hua̧ta̧'a̧nö̧ ji'ähuitö suronä a̧mä̧cönä huȩttä̧ra̧'a̧dä̧ adicuämä täcö beipächäja'a, suronä jarodä'chö surojö hua'arenä ro̧ȩcui̧yä̧cuo̧tö̧ TTÖ̧Ä̧NÄ̧HUA̧MÄ̧ o'cajuiyönä suronä todärenä päi'önä jȩtti̧nö̧mä̧ ȩmi̧nä̧tö̧. ³ Ya̧tȩ i̧huȩnȩ jä'epörö huoa'a rä̧mi̧pa̧'a̧ "Rȩjȩ de'a jui̧yä̧jä̧ ra̧'a̧ttö̧mä̧ TÖ̧Ä̧NÄ̧HUA̧ u̧mä̧nä̧ jo̧mȩnö̧ päi'önä jȩpö̧ ku̧nä̧tu̧cui̧; jue'epätucui Arabára̧'a̧ttö̧mä̧, ji̧mä̧tȩ mä̧nä̧ pä̧i̧cu̧nä̧ jopö 'chä̧cuä̧huä̧mä̧ TÖ̧Ä̧NÄ̧HUA̧ u̧mä̧nä̧" ⁴ O'cajuiyönä pämäroppämä yorätehuächi'önä cäecuächäcua'a, ja̧'hua̧ta̧'a̧nö̧ o'cajuiyönä de'a'i̧nä̧, mö̧ä̧'quiyö'i̧nä̧ yorecuächäcua'a; ja̧'hua̧ta̧'a̧nö̧ rȩjȩ cäröcanö arisanö jo̧mȩmä̧ mȩji̧yä̧ päi'äcua'a pämäroppätä yorecuäcua'a, yu̧'cu̧ri̧nö̧ hui̧sä̧cuä̧cho̧mȩmä̧ mȩji̧yä̧tä̧ päi'äcua'a; ⁵ ja̧'hua̧ta̧'a̧nö̧ TTÖ̧Ä̧NÄ̧HUA̧ usärunä öadihuämä i̧jȩcuä̧chä̧cua̧'a̧ o'catoi'önä ttö̧ja̧ tottäcuotö ji̧nä̧ yo̧mȩtȩnä̧; ja̧'hua̧nö̧ ja̧'a̧ TTÖ̧Ä̧NÄ̧HUA̧ änä ucuocu pä'ö ucuocuinö ji̧nö̧mä̧. ⁶ Ji̧yȩtȩ rä̧mi̧pö̧mä̧ pä'a: "Huopi." ka̧ra̧mä̧ ädätö: ¿Däje huocha'anö ja̧'a̧ttö̧?" "O'cajuiyönä de'amä mejiyä'chetä ja̧'a̧, ja̧'hua̧ta̧'a̧nö̧ o'cajuiyönä jueö pä'ö utodecuinömä de'attö ȩ'u̧ jä̧'i̧nö̧'a̧nö̧ ja̧'a̧. ⁷ Mȩji̧yä̧'chemä jo'ö icu, TTÖ̧Ä̧NÄ̧HUA̧ amiyuppa ja̧u̧nä̧ huä̧mȩ ppöomenä; isopäi'önätä̧ ttö̧ja̧mä̧ mȩji̧yä̧ isä́'cua jä̧'i̧nö̧'a̧nö̧tä̧ huotö. ⁸ Mȩji̧yä̧ isä'cuamä jo'ö icu, ȩ'u̧'i̧nä̧ jurunä hua'ö icu, ja̧'hua̧nö̧ ja̧'a̧nä̧ Tu̧ru̧hua̧ Dios ihuȩnȩmä̧ 'cuäopönä̧tä̧ kä̧cuȩ." ⁹ Mö̧ä̧'ca ju'toju jä'canä 'cha'achi Siónra̧'a̧cu̧, adihuä huȩnȩ jicuähuome, pä̧i̧cu̧nä̧ 'qui'ächö huopi'i Jerusalénttö̧. Ucu adihuä huȩnȩ i'cächömä, cui̧huȩ pä̧i̧cu̧nä̧ rä̧mi̧pö̧nä̧, yecuecuoca'atä ji'ähuitö Judá ötahuiyänä̧ ka̧cuä̧tö̧rö̧mä̧: "¡Pȩnȩtä̧ kö̧ TTÖ̧Ä̧NÄ̧HUA̧MÄ̧ pä'ö!" ¹⁰ Topi, TTÖ̧Ä̧NÄ̧HUA̧ Diosmä ichö curä rohuäu ju̧ru̧hua̧ jä̧'i̧nö̧'a̧nö̧ ichö ujuruhua pä'ötä; ja̧'hua̧ta̧'a̧nö̧ öjo juruhuojonä ruhuo hue'ö ja̧u̧mä̧ juhua'atäcu jitämä ttö̧ji̧pö̧nä̧ ppä'ädö ȩmä̧huo̧tö̧mä̧ ja̧u̧ ä'canä 'chä̧tö̧. ¹¹ Ja̧u̧tä̧ ovejastö̧rö̧ tta̧huä̧rä̧cuä̧huä̧ i̧sa̧ ucuäje'a'a jä̧'i̧nö̧'a̧nö̧ u̧cuä̧jȩ'ä̧cua̧mä̧, ja̧u̧tä̧ oveja i̧tti̧mö̧rö̧ öjonä ca̧ca̧tö̧ ö̧jö̧nä̧cua̧ ja̧'hua̧ta̧'a̧nö̧ cä̧ȩpä̧rä̧cua̧ amiso'qui tö'cönä̧nö̧ jo̧mȩ becuänö̧, tto̧ȩcuä̧nä̧ jueönä juȩ'ȩpä̧rö̧ o̧i̧pä̧cua̧ ovejastö̧ ppo̧'ä̧tö̧ tta̧ju̧tö̧ yo'epätö atate ajätörömä. ¹² ¿Dijä̧ttö̧ ajiya rejö u̧mö̧ jacuä i̧so̧'ta̧nä̧ pa̧ja̧ti̧nö̧mä̧, mo̧ro̧jä̧'i̧nä̧ u̧mö̧nä̧ pa̧ja̧ti̧nö̧mä̧, rȩjȩ i̧sa̧ppȩ cä̧hui̧'ta̧nä̧ ȩnö̧ 'chu̧'ä̧ri̧nö̧mä̧, a̧mä̧cö̧ rö̧nä̧huäbinä̧ möä'ca'i̧nä̧ rö̧nö̧ pa̧ja̧ti̧nö̧mä̧, po̧ri̧yä̧'tä̧ päi'ome'i̧nä̧ pa̧ja̧ti̧nö̧mä̧? ¹³ ¿Dijä̧tttö̧ TÖ̧Ä̧NÄ̧HUA̧ a̧mö̧cuädö ttu̧'ȩpä̧ri̧nö̧mä̧, huȩnȩ 'qui'epö ro̧ȩcuä̧ i̧sa̧ ro̧ȩpi̧nä̧cu̧di̧? ¹⁴ ¿Tidettö ȩmi̧na̧'a̧ttö̧ pa̧'a̧nö̧ huo̧juȩcu̧nä̧ jȩä̧cuä̧huä̧mä̧? ¿Dijä̧ ja̧u̧rö̧ huo̧juȩti̧nö̧mä̧ pa̧'a̧nö̧ jäyä päöjuiyönä korojuei jȩa̧ pä'ömä, ja̧'hua̧ta̧'a̧nö̧ u̧huo̧juȩti̧nä̧cu̧ u̧huo̧jua̧ pä'ömä, u̧huo̧juȩti̧nä̧cu̧ ttu̧huȩpä̧rä̧huä̧ mä̧nä̧mä̧? ¹⁵ Topi, pi̧jä̧nä̧ ka̧cuä̧tö̧ ttidepiyumä ajiya dabi era'a jä̧'i̧nö̧'a̧nö̧ ja̧'a̧ korojuei iso'tanä, ja̧'hua̧ta̧'a̧nö̧ i̧sa̧ppȩ a̧mä̧cö̧ rö̧nä̧huäcänä ttö̧nö̧'a̧nö̧ ja̧'a̧ a̧mä̧ca̧ pä'ömä. ¹⁶ Líbano daumä ocu ajiyamä̧cö̧ ttöäre iyähuä rö̧ä̧nä̧ ku icu ttiya pä'ö ji̧na̧'a̧. ¹⁷ O'catoi'önä ttö̧ja̧mä̧ rö̧ä̧nä̧mä̧ huocotö ja̧u̧ ä'ca jo̧mȩttö̧mä̧; to̧ö̧u̧ jahuätömä toa'a jä̧'i̧nö̧'a̧nö̧tä̧. ¹⁸ ¿Tide a̧'cua̧rö̧nä̧ pa̧ja̧tö̧ toäcua'attö̧ Diosrömä? ¿Ti'ca tätähuä'canä cu̧'a̧ta̧'a̧nö̧ jä̧ttö̧? ¹⁹ ¡Ji'cate tätähuä'ca! Ya̧tȩ kö̧ adicuä ttö̧ja̧sa̧tä̧ korojuei a̧'cua̧juä̧ päi'önä 'co̧'ö̧mä̧: orottö ttä̧rä̧dö̧ adicuä ttö̧ja̧sa̧'i̧nä̧ ja̧'hua̧ta̧'a̧nö̧ cä̧rȩnä̧sa̧ pärätättö a̧di̧cuä̧sa̧ äcuepö rö̧nä̧'chö̧. ²⁰ Ttöäre iyähuä ki icu ttiya pä'ömä juäppa juoächocö dauttö ȩmä̧huä̧; ja̧u̧mä̧ ya̧tȩrö̧ usu tätähuä'ca ö̧ä̧nä̧huä'ca aditiyarö pä'ömä pparuhuächö ma̧ä̧chö̧ juiyäcua'anö̧. ²¹ ¿Cuieruhua'adi̧? ¿Ä̧ju̧cuo̧cö̧ pi̧nä̧jä̧di̧? ¿Cuieruhua'amä ji'äcuähuocö pi̧nö̧jä̧di̧ ä̧cuo̧mȩnä̧ kä̧mä̧do̧mȩttö̧mä̧? ¿Ttu̧cuȩpä̧ri̧'o̧ca̧'a̧di̧ pi̧jä̧ rȩjȩ uhuäbe'inö'i̧nä̧? ²² Ja̧u̧tä̧ ja̧'a̧ chumä rȩjȩ huä̧mȩnä̧ kä̧hua̧ räopome huä̧mȩ pö̧mä̧; ja̧'hua̧ta̧'a̧nö̧ ka̧cuä̧tö̧mä̧ mä̧rä̧cä̧yu̧ jö̧nä̧tä̧ huotö ja̧u̧ ä'ca jo̧mȩttö̧mä̧. Ja̧u̧tä̧ ja̧'a̧ isode tojuhua pä'ö ttisetäda'a jä̧ji̧'a̧nö̧ mo̧ro̧jä̧nä̧ setädömä i̧sä̧ta̧ pö̧jö̧ta̧ tto̧ȩcuä̧ta̧ ja̧'a̧nö̧ ja̧'hua̧ta̧'a̧nö̧ cähuetö isodenä̧ ttö̧jä̧'i̧ja̧'a̧nö̧ ttö̧ja̧ pä'ö. ²³ Ja̧u̧mä̧ ruhuotörömä jui'äde'ö jui'ätörä pätti'önä ja̧'hua̧ta̧'a̧nö̧ pi̧jä̧ ruhuotörö'i̧nä̧ mi̧cuähuocotö pätti'önä jȩpö̧. ²⁴ Juätömä pä'ötä ku̧nä̧huo̧tö̧tä̧ huotö, pä'ötä ihuehui apiyä yucha'a rȩjȩttö̧mä̧, ji̧yȩnö̧ ja̧u̧ jahuätörö ppuomenä ja̧'hua̧ta̧'a̧nö̧ hua'ö tticuäcuotö jahuätömä ajiya isoppa döomenä mȩji̧yä̧'cua coepächa'a jä̧'i̧nö̧'a̧nö̧ huotö. ²⁵ ¿Di a̧'cua̧rö̧nä̧ cu̧'a̧tä̧tu̧cuä̧cua̧sä̧ttö̧? Pä'ö surojöttö 'quȩ'ȩcua̧mä̧. ²⁶ ¡Topi, mo̧ro̧jä̧ra̧'a̧cu̧tä̧! ¿Dijä̧ si̧ri̧'co̧rö̧ aditinömä̧? Ja̧u̧tä̧ juȩ'ȩpä̧rö̧mä̧ uhuäbe'inomettö rutädipö o'catoi'önä̧rö̧ tti̧mi̧ pönä huopö. Ujuru urohue'a'i̧nä̧ ja̧'hua̧ta̧'a̧nö̧ ö̧rä̧'i̧nä̧ ujurunä hua̧ ji̧yȩtȩ'i̧nä̧ recuärö̧jö̧'i̧nä̧ recuäröjoco̧cu̧. ²⁷ ¿Dä̧bö̧ ucu päcua'attö̧ Jacobrö ja̧'hua̧ta̧'a̧nö̧ jue'ö huȩnȩ pä'ö icuätucui Israel Ttö chumä̧nä̧mä̧ dajö icuähua'a TTÖ̧Ä̧NÄ̧HUA̧NÄ̧ ja̧'hua̧ta̧'a̧nö̧ chuä̧nä̧hua̧ Diosmä 'cuä'opinö ttörö ro̧ȩpa̧ pä'ömä? ²⁸ ¿Ieruhuoca'a ji̧na̧'a̧di̧? ¿Ä̧ju̧cuo̧ca̧'a̧ ji̧na̧'a̧di̧? Ja̧u̧ Dios hua'ö icuocörömä, ja̧u̧ Tu̧ru̧hua̧ pi̧jä̧ rȩjȩ beipome jubö päi'önä̧ uhuäbe'inömä, 'cuä'ächi'ocö yorö'iso juiyöpächi'ocö, u̧huo̧ju̧'i̧nä̧, ttu̧huȩpä̧rö̧'i̧nä̧ tto̧ȩpä̧ra̧rö̧ pä'ömä juiya'a ja̧u̧ru̧mä̧. ²⁹ Ja̧u̧mä̧ 'cuä'ächi'örö ujuru iyö jui̧yö̧pa̧rö̧ ujuru ujuruhuächi'önä̧ jareönä jȩpö̧ tto'ädö iyö. ³⁰ Ttö̧ja̧ mö̧ä̧yotö'i̧nä̧ 'cuä'ächi'ätö ja̧'hua̧ta̧'a̧nö̧ ttujurumä jui'ätö, umötö̧ möäyotömä ta'ö'i̧nä̧ mo̧'ä̧tö̧, ³¹ Ja̧'hua̧nö̧ ja̧'a̧nä̧ jitö TTÖ̧Ä̧NÄ̧HUA̧NÄ̧ kä̧tö̧mä̧ ttujurumä jareächi'önä ttäcuotö; jahuätömä cottäcuotö muca pare 'cua̧rö̧nä̧; juätömä jottäcuotö 'cuächi'äcuähuä juiyönä; juätömä tti̧'chä̧cuo̧tö̧ ja̧'hua̧ta̧'a̧nö̧ 'cuättächi'oca'atä.