¹ Topi, recuätö curä ruhuä ttu̧ru̧hua̧mä̧ täcö 'choipa pä'ötä ja̧'a̧tó Jerusalén'inä, Judáttö ttu̧cuȩ i̧yo̧pä̧rä̧cuä̧huä̧ ttö̧ja̧rö'i̧nä̧, o'catoi'önä pan (i̧ri̧si̧) i̧yo̧pä̧rä̧tö̧rö̧'i̧nä̧ ja̧'hua̧ta̧'a̧nö̧ ajiya ttahua pä'ö i̧yo̧pä̧rä̧tö̧rö̧'i̧nä̧. ² Ju̧ru̧hua̧rö'inä, curä rohuähuäcuähuä i̧sa̧rö̧'i̧nä̧, huȩnȩttö̧ ttö̧ji̧pa̧ pä'ö ttejächi'önä ppä̧dä̧rä̧cuä̧huä̧ i̧sa̧rö̧'i̧nä̧, Dios i̧huȩnȩ jiäcuähuä'i̧sa̧rö̧'i̧nä̧, ä'canä 'cuäopä̧cuä̧ jiähuä̧rä̧cuä̧huä̧ i̧sa̧rö̧'i̧nä̧, bö̧o̧'i̧sa̧ jö̧nä̧ hua̧rö̧'i̧nä̧; ³ Ttö̧ja̧ ttu̧ru̧hua̧ cincuentanö jo̧mȩnä̧ huotörö hueähuä'i̧sa̧rö̧'i̧nä̧, ttö̧ja̧ ttucuotäcuru'inä, huȩnȩ jo̧mȩnä̧ 'quȩcuä̧ i̧sa̧rö̧'i̧nä̧, koro jueittö tä̧tä̧rö̧ adicuä i̧sa̧rö̧'i̧nä̧, ja̧'hua̧ta̧'a̧nö̧ märirö'inä. ⁴ Ttömä päcuotö muäyotö ä'canä oicuä ttö̧ja̧ päi'önä ttö̧ja̧cua̧ pä'ö chu̧ju̧nä̧cua̧sä̧, ja̧'hua̧ta̧'a̧nö̧ muäyotötä huettäcuotö jahuätörömä. ⁵ Ttö̧ja̧mä̧ o'catoi'önä ttabo iyotötä pätti'äcuotö, ya̧cu̧ pö̧nä̧ ka̧ra̧ ka̧ra̧nö̧, ja̧'hua̧ta̧'a̧nö̧ ttipeyänä ka̧cuä̧tö̧rö̧'i̧nä̧; i̧tti̧mä̧ pä̧i̧cu̧nä̧ ra̧huä̧rö̧ yepe'ä̧cua̧ bö̧o̧'i̧sa̧rö̧. Ja̧'hua̧ta̧'a̧nö̧ suro i̧sa̧ micuähuocömä ucuotäcuähua̧ pä̧'ä̧hua̧rö̧ ucuttu'inä abonänö hua̧sä̧ ttömä pä̧cua̧. ⁶ Ya̧tȩ ubomä̧ 'chuhuädä̧cua̧ uböorö jä'o ojusodenä kö̧rö̧ ja̧'hua̧ta̧'a̧nä̧ pä̧cua̧: "Ucumä ku̧nä̧rö̧jä̧ cua̧tto̧cua̧ pä'ö cu̧'ca̧tä̧huä̧ta̧; ucu ujutu tu̧ru̧hua̧ päi'önä ku̧ja̧ pä'ätöjä̧ ruhuo huecuatö pä'ö, ja̧'hua̧ta̧'a̧nö̧ pi̧yȩ surojuhuächinö cu̧mu̧nä̧ huecuhua pä'ö. ⁷ Ja̧u̧nu̧ mo̧ro̧ ja̧u̧mä̧ huopö ja̧hua̧ta̧'a̧nö̧ pä̧cua̧: Ttömä recuä rö̧jö̧ iyähuä i̧sa̧ päi'önämä chö̧ji̧yä̧cua̧sä̧; Ttömä jui̧'a̧sä̧ pan ire o̧si̧'i̧nä̧, i̧sä̧ti̧yu̧'i̧nä̧. Ucumä ja̧u̧ ötahuiyä ttö̧ja̧rö̧ hueähuä i̧sa̧ jö̧nä̧mä̧ cu̧ji̧ni̧yä̧cua̧jä̧. ⁸ A̧a̧ isopäi'önä jȩ'cua̧ttö̧jä̧ ötahuiyä ttö̧ja̧ ttu̧ru̧hua̧ chö̧jö̧nä̧ päi'önä. Jerusalén'inä pparächi'ö ma̧ä̧chä̧cua̧'a̧, ja̧'hua̧ta̧'a̧nö̧ Judá'inä ma̧ä̧chi̧na̧'a̧, dä̧bö̧ pä'öjä̧ttö̧ ti̧hhuȩnȩ tucuocu'inä jȩttö̧'i̧nä̧, Tu̧ru̧hua̧ Tö̧ä̧nä̧hua̧ öjö'cocö jȩta̧'a̧ttö̧, öadihuä ö̧jö̧'i̧nä̧ totta'anä Tu̧ru̧hua̧ i'äre tuä'cua päi'önä jȩtta̧'a̧ttö̧. ⁹ Jahuätö suronä jȩttä̧ji̧mä̧ jeruhuoca'a tti'änä i̧jȩpö̧nä̧ jiähua'a: ja̧'hua̧ta̧'a̧nö̧ jahuätö surojö jȩttä̧ji̧mä̧ jiähuä̧ra̧'a̧ Sodomattö̧ ji̧nö̧a̧'a̧nö̧; jahuätömä daju tticua pä'ömä jjuiya'a ¡Ayoo jahuätuhue! Ttumönätä surojö i'cächäcuähuäjä̧tó jitötätä. ¹⁰ Ji'ähui ttö̧ja̧ surojö juiyönä kä̧tö̧rö̧mä̧ adiutä 'chä̧cua̧'a̧ pä'a, a̧a̧ jahuätö ja̧'a̧ ttaditähuä u̧huä̧ju̧ttö̧ ttucuäcuotömä. ¹¹ ¡Iso, suronä jȩpö̧hue! suronätä 'chä̧'cua̧ chutä amönä aditäjimä micuä päi'önä ä̧tȩcua̧ päi'önätä ö̧jä̧cua̧ ja̧u̧mä̧. ¹² Chu̧ju̧nä̧rä̧u̧ chumöhuäyotö, cuabo iyotömä ppo̧'ä̧tö̧tä̧ pätti'äcuotö; ja̧'hua̧ta̧'a̧nö̧ nä̧tö̧tä̧ huettäcuotö jahuätömä. Ttö chahuaruhuä, jitö mänä suräjämänä'inä ja̧'hua̧ta̧'a̧nö̧ mä̧nä̧ cui̧'chä̧tu̧cua̧ pä'ö cuamöcuädinämä'inä jerutö tticuäcuotö. ¹³ Tu̧ru̧hua̧ tö̧ä̧nä̧hua̧tä̧ jo̧mȩnö̧ kö̧ roji pä'ö'icuähuä päa pä'ö, ja̧u̧mä̧ täcö jo̧mȩnö̧ kö̧ yä̧huä̧i̧nä̧ jȩtti̧nö̧ jiähua pä'ö ötahuiyä ttö̧ja̧rö̧. ¹⁴ Tu̧ru̧hua̧mä̧ i̧chä̧cua̧ ötahuiyättö ucuo isotö pä'ähuotörö'inä, tä̧mö̧ jo̧nä̧ huotörö'inä ro̧ȩcuä̧ i̧sa̧ päi'önä:''Ja̧'hua̧ta̧'a̧nö̧ ucutumä surojuo'epö jȩpö̧ icuinätöjä juätta uva pätta; jahuata'anö usurä isotörö nä̧u̧cuä̧rä̧cuä̧huä̧ ttö̧ja̧mä̧ cuojusodenätä̧ ka̧cuä̧tö̧. ¹⁵ ¿Dä̧bö̧ pä'ö kä̧dö̧ i̧nȩpä̧'chö̧ cuicuätucua'attö̧ ucutumä ttö cuahuaruhuä usurä isotörö tti'ä no̧ri̧'chu̧nu̧ jȩpo̧ ttö̧ra̧huä̧rö̧nä̧? Pi̧yȩ ja̧'a̧ su̧ro̧da̧u̧ ttu̧ru̧hua̧ Tö̧ä̧nä̧hua̧ Dios ji'äu päinömä. ¹⁶ Tu̧ru̧hua̧ Tö̧ä̧nä̧hua̧ pä'inö Sión i̧tti̧mö̧ nä̧tö̧mä̧ tta̧mö̧nä̧ repeäcuähuätä huotö, tti'cho̧mȩnä̧mä̧ ichätö ttupiyä sanebänötä, ja̧'hua̧ta̧'a̧nö̧ tti'ärenä nori'chunutä jȩpö̧ kö'cähuä jȩpä̧'chä̧tö̧, rosurosunö tö'ätö ttö̧jä̧pi̧yä̧nä̧ tottatö pä'ö. ¹⁷ Ja̧'hua̧nö̧ ja̧'a̧ttö̧ Tu̧ru̧hua̧mä̧ huare huasi i'qui oyanä 'cärächu märichei huȩä̧cua̧ Sión i̧tti̧mö̧ nä̧tö̧rö̧, jahuata'anö ttuhuo'che mo̧'ä̧chö̧ sahueba päi'önä jȩä̧cua̧. ¹⁸ Ji̧yȩnö̧ mo̧ro̧mä̧ Tu̧ru̧hua̧ Tö̧ä̧nä̧hua̧ 'choipäcua̧ rö̧ä̧nä̧ micuäu ttutturuhuä'canä ttö̧nä̧huä̧'i̧jö̧, ttunä a̧'cua̧cu̧nä̧ ttu̧huȩnä̧huä̧'i̧jö̧ pöttähuä obä, yodo kä̧hua̧ pä'ö tȩo̧bu̧ jö̧nä̧ räopa'a jä̧'i̧nö̧'a̧nö̧ jö̧ juäi'inä. ¹⁹ Ttä̧ja̧nä̧ a̧'cua̧cu̧nä̧ rö̧jö̧ o̧sa̧'i̧nä̧, ttu̧mö̧ca̧ca̧nä̧ rö̧nä̧cuä̧huä̧'i̧nä̧ ja̧'hua̧ta̧'a̧nö̧ ttunä tȩä̧ta̧ huȩnä̧rä̧cuä̧huä̧'i̧nä̧; ²⁰ Tti'ä 'ca̧huä̧cuä̧huä̧ o̧ta̧'i̧nä̧, cuoräu o̧sa̧ ttu̧jä̧pö̧ ttutturuhuä'canä ru̧nä̧huä̧'i̧nä̧, ttu̧cuä̧ba̧ 'quiyönä ti̧ä̧dä̧cuä̧huä̧'i̧nä̧ ja̧'hua̧ta̧'a̧nö̧ a̧mȩhuoya ȩjö̧ o̧ca̧'i̧nä̧, pärätä emähuä märä'inä. ²¹ Ja̧u̧mä̧ ttödo'che o̧bö̧'i̧nä̧ 'cho̧i̧pä̧cua̧, ja̧'hua̧ta̧'a̧nö̧ tti̧ji̧yu̧nä̧ a̧'cua̧cua̧ pä'ö ru̧nä̧rä̧cuä̧huä̧'i̧nä̧. ²² Pä'cärinä jȩpö̧ ö'cäu 'ca̧tä̧cuä̧huä̧ o̧ta̧'i̧nä̧, ttunä huȩnä̧cuä̧huä̧ o̧ta̧'inä, ttu̧mö̧nä̧ ppo̧ö̧ juäi ȩpä̧cuä̧huä̧'i̧nä̧. ²³ ja̧'hua̧ta̧'a̧nä̧ tti'ä toäcuähuä odiyä ttu̧mö̧nä̧ 'chuä̧rä̧cuä̧huä̧'i̧nä̧, ttupiyä a̧tto̧cuä̧ o̧ta̧'i̧nä̧, jahuata'anö ttö̧'ca̧tä̧huä̧ti̧yu̧'i̧nä̧. ²⁴ A̧dö̧nä̧ a̧mȩu̧ jueimä huautä päi'äcua'a; ttäcä isäya rä̧'i̧nö̧ jueimä suröjuäi isappätä rä̧cua̧'a̧, ttunä a̧'cua̧cu̧nä̧ 'cuittähuä'ijö jueimä cahuäränö jä̧cua̧'a̧; ja̧'hua̧ta̧'a̧nö̧ pö̧jä̧ta̧ pä'cärinä 'ca̧tä̧cuä̧huä̧ta̧ jä̧'iji̧ jueimä, hua'are pä̧nä̧ 'ca̧tä̧cuä̧huä̧ta̧ i̧di̧cuä̧ta̧tä̧ jä̧cua̧'a̧; tta̧'cua̧cuä̧'i̧nö̧ surojötä jä̧cua̧'a̧. ²⁵ Ucu cumöhuäyotomä curä'chunä 'cui'cuipö icuähuäcuotö pätti'äcuotö, ja̧'hua̧ta̧'a̧nö̧ cumöhuäyotö rohuäu juruhuätömä curä ttörohuähuomettö hua'ö tticuäcuotö. ²⁶ Jerusalén äpate bäreö a̧'cua̧ tta̧huȩcuä̧cua̧'a̧, ajuähuäcuähuätä kä̧cua̧'a̧; ja̧'hua̧ta̧'a̧nö̧ katähuajutä pä'i'ö rȩjȩtä̧ kö̧'ä̧mä̧dä̧cua̧ju̧.