¹ Pi̧yȩ ja̧'a̧ Amós i̧tti̧ Isaíasrö i̧jȩcuä̧chi̧nö̧mä̧ Judás ttö̧ja̧ ttötö'cö'inä, Jerusalén ötahuiyä ötö'cö'inä. ² Röji mo̧ro̧ päi'omenä, Tu̧ru̧hua̧ ojusodenä koro de'attö'inä abonä̧nö̧ rö̧ä̧cua̧'a̧; o'ca toi'önä tti̧rȩji̧yä̧ pö̧nä̧ ka̧cuä̧tö̧mä̧ tti̧'chä̧cuo̧tö̧ ja̧u̧ru̧tä̧. ³ Recuätö ttötahuiyä jö̧ odunättö̧ ichö pättäcuotö: "Ti̧'chä̧tu̧cua̧ Tu̧ru̧hua̧ ö̧jo̧mȩ, Jacob Ö̧ä̧nä̧hua̧ Dios ojusodenä, ja̧u̧tä̧ u̧huo̧juȩta̧tö̧ pä'ö juhuämä mänänä ti̧'chö̧nä̧. Siónttömä räopäcua'a hueähuä huȩnȩ, juhua'a jö̧ ta̧'a̧nö̧ Jerusalénttömä räopäcua'a Dios i̧huȩnȩtä̧. ⁴ Ja̧u̧tä̧ pä'ö i̧cuä̧cua̧ recuätö ttii̧rȩji̧yä̧ pö̧nä̧ ka̧cuä̧tö̧rö̧. Curodiyä ji̧nö̧mä̧ pärohuächäcua'a rȩjȩ 'cuȩ'cuä̧cänätä, juhua'a jö̧ ta'anö dacuodiyämä 'cuiähuobönätä. Juhua'a yabocumä tti̧rȩji̧yä̧ pö̧nä̧ ka̧cu̧ä̧tu̧cu̧mä̧ curämä juiyäcua'a, curä ttörohuähua pä'ö huo̧juȩtä̧cuä̧huä̧'i̧nä̧ juiyäcua'a. ⁵ ¡Ichätucui, Jacob ahuaruhuä, ti̧'chä̧tu̧cua̧ Tu̧ru̧hua̧ i̧tȩa̧u̧nä̧. ⁶ Ucumä icuipinöjä̧ cutahuiyä ttö̧ja̧rö̧. Jacob ahuaruhuärö, jahuätömä kä̧hua̧ räopa'acuttö ichätö huettötä rö̧ä̧nä̧ jȩpä̧'chä̧tö̧, filisteos ttö̧ja̧ ttumäri'ätä, juhua'a jö̧ ta'anö ko̧ro̧jä̧ttö̧ ichäcuähuotocu jȩttä̧cuä̧ pä'äu ku̧nä̧tö̧. ⁷ Cui̧rȩjä̧ttö̧ pärätä'inä, oro'inä, rö̧ä̧nä̧ suädi'önä ku̧nä̧rö̧jä̧. Cuiäre rö̧ä̧nä̧ micuäu juäimä beipächoca'a. Juhua'a jö̧ ta'anö Cui̧rȩjä̧ttö̧mä̧ suädi'önä ku̧nä̧rö̧jä̧ cuä̧ji̧mö̧ ca̧hua̧yu̧tu̧ru̧, juhua'a jö̧ ta'anö cuiäre caruquiyä'inä rö̧ä̧nä̧ pa̧ja̧cuä̧ juiyönä ka̧'a̧. ⁸ Cui̧rȩjä̧ttö̧mä̧ suädi'önä ku̧nä̧rö̧jä̧ tätähuä o'catä. Jahuätömä jitötä ttömönä adicuätä ucuotö jȩpä̧tö̧, ja̧'hua̧nö̧ jö̧ ta'anö jitötä ttödo'chiyänä adicuätä. ⁹ Ttö̧ja̧mä̧ ttihue'quiyunä pä̧mä̧dö̧ ja̧rȩyu̧ pä'i'ö ucuotö pätta'anä pä'äjita'anömä ttä̧rä̧mi̧'i̧yä̧cuo̧tö̧. ¹⁰ Tätucui cudajahuächätucua inähuiyä 'quȩtȩ rȩjȩ dea'a. Dios ö̧jo̧mȩttö̧ i̧tȩa̧u̧ uruhuottö. ¹¹ Ttö̧ja̧ i̧sa̧ amöcuädömä jȩpö̧ i̧cuä̧hui̧ya̧ päi'äcua̧, Ja̧u̧tä̧ ucuo tȩa̧u̧mä̧ hui̧'ä̧dö̧ i̧cuä̧hui̧ya̧ jä̧cua̧, ya̧tȩtä̧ Diostä jä̧cua̧'a̧ ja̧u̧nu̧ mo̧ro̧ ucuo i̧sa̧ jä̧cua̧mä̧. ¹² Tu̧ru̧hua̧ korottö'inä abonänö ju̧ru̧hua̧mä̧ ya'ute mo̧ro̧ jȩpö̧ ku̧ni̧nö̧, jitä ttamönä ucuo te'ähuätörö ro̧ȩpä̧cuä̧ mo̧ro̧. ¹³ Juhua'a jö̧ ta'anö o'ca juiyönä Cedro dauhuiyä Libano rȩjȩnä̧ ka̧cu̧ ju'toju jähuä'inä, juhua'a jö̧ ta'anö basán rȩjȩnä̧ ka̧cu̧'i̧nä̧. ¹⁴ Juhua'a jö̧ ta'anö ja̧u̧nu̧ mo̧ro̧mä̧ möä'quiyu ju'toju jähuä'inä möä'quiyu rȩjȩ jähuä'inä, ¹⁵ o'ca juiyunä ju'toju 'cha'achi'ipö huä̧mȩnä̧ toäcuähuäcä'inä, ju'toju ttoecuä'ca'inä. ¹⁶ O'ca juiyönä Tarsis ttö̧ja̧ ttuhuoi'quiyu'inä, o'ca juiyönä ttuhuoi'quiyu bäreu o'ca adihuä juäi'inä. ¹⁷ Ttö̧ja̧ i̧sa̧ ucuo teäumä to̧ȩ'ä̧chi̧yä̧cua̧, ttö̧ja̧ pättä'chömä jȩpö̧ icuiyäcuotö, ja̧u̧nu̧ mo̧ro̧mä̧ ya̧tȩ Diostä o'ca toi'önä ttuhuämenä hueähuä ru̧hua̧ ö̧jä̧cua̧. ¹⁸ TTÖ̧Ä̧NÄ̧HUÄ̧ ucuo tettähuä'ijimä ki̧'i̧pö̧ juiyönä jȩpö̧ i̧cuä̧cua̧. ¹⁹ Ja̧hua̧nö̧ pä̧i̧'ä̧u̧ Tö'ipächö ttödajahuächäcuotö idoriyä jacuä, rȩjȩ ahuiyä jö̧ odunä Tu̧ru̧hua̧ i̧tȩa̧u̧ ujuruttu ye'ecu. Ja̧u̧ huea pä'ö ä̧rä̧mi̧'o̧mȩnä̧ ttö̧ja̧mä̧ rö̧ä̧nä̧ yettecui'äcuotö. ²⁰ Ja̧u̧nu̧ mo̧ro̧, ttö̧ja̧mä̧ jitötä ttö̧ä̧nä̧huä̧ ucuotö jȩtta̧ pä'ö ttaditinö jinömä do'opö tticuäcuotö orottö'inä pärätättö'inä, isotö tta̧cua̧ji̧yä̧ tä̧tä̧rö̧ ttaditinö ji̧nö̧mä̧ ²¹ Jahuätömä inähuiyä dea'a idahuiyänä dodettächäcuotö, Dios i̧tȩa̧u̧ttö̧'i̧nä̧, uruhuottö'inä ttödajahuächa pä'ö. Juhua'amä Dios pi̧jä̧nä̧ ka̧cuä̧tö̧rö̧ ro̧ȩpa̧ pä'ö ö̧jä̧mä̧dö̧ pä̧nä̧ ja̧'a̧. ²² Pi̧jä̧ ttö̧ja̧'i̧sa̧rö̧mä̧ cua̧'cua̧ cu̧huȩnä̧rä̧tu̧cuó, a̧'cua̧ro̧ppamä i̧ji̧yu̧nä̧tä̧ ka̧'a̧ttö̧, ¿Ja̧u̧mä̧ däje mi̧cuä̧hua̧jä̧ttö̧?.