¹ Cuesehuätucuä Israel ttö̧ja̧, korotö ttö̧ja̧ tteseuhua'anömä. Hueinö jȩ'cuä̧ tu̧cuo̧ca̧a̧ ucutumä unöchiinätö̧jä̧ CUINÄHUA̧TU̧CU̧ DIOSRÖ. ² Ja̧'hua̧nö̧ ja̧'a̧ttö̧ cu̧cuȩ́ cuähuätucu'inä adinä iyiyäcuaa ja̧'hua̧ta̧'a̧nö̧ ppa̧a̧dö̧ uva cu̧ju̧nu̧'i̧nä̧ adinä iyiyäcuaa. ³ Jahuätömä TÖ̧Ä̧NÄHUA̧ i̧rȩjä̧ttö̧mä̧ juayabomä tti̧ji̧yä̧cuo̧tö̧; ja̧'hua̧nö̧ päi'omenä, Efraínmä Egipto rȩjȩra̧a̧ ppa̧huä̧chä̧cua̧ ja̧'hua̧nö̧ ja̧'a̧nä̧ yaute moró̧ jahuätö ttucuäcuotö ttu̧cuȩmä̧ adihuocötä Asiria rȩjȩttö̧mä̧. ⁴ TÖ̧Ä̧NÄHUA̧RÖ̧ ucuotönö iyähuämä ttiyiyäcuotö jahuätömä, ja̧'hua̧ta̧'a̧nö̧ eseunömä to̧i̧yä̧cua̧ juo̧u̧mä̧ jahuätörömä. Kuicu ttiyö'inä huattö moró̧ jä̧i̧nö̧a̧nö̧ ji̧yä̧cuä̧u̧ jahuätö ttu̧cuȩmä̧; o'cajuiyönä ttucumä huedocönötä̧ ttucuäcuotö. Ttu̧cuȩmä̧ ttucuäcuotö jitötä ttu̧cuȩ jö̧nä̧; ttȩpi̧yä̧cuo̧tö̧ TÖ̧Ä̧NÄHUA̧ ojusodera̧'a̧mä̧. ⁵ ¿Ucutumä däje jȩ'cuä̧tu̧cuä̧cua̧'a̧ttö̧ pä'cäri jȩtta̧ pä'ö pojopö ku̧nä̧huä̧ mo̧ro̧mä̧, TTÖ̧Ä̧NÄ̧HUA̧RÖ̧ pä'cäri ku̧nä̧huä̧ mo̧ro̧mä̧? ⁶ Ja̧'hua̧nö̧ ja̧'a̧, Topittö, si'epö tticuomȩttö̧ ki̧'ä̧tö̧mä̧, Egipto ttö̧ja̧tä̧ yo̧mȩtȩ ca̧ca̧tö̧ ttu̧ju̧nä̧cuo̧tö̧ ja̧'hua̧ta̧'a̧nö̧ Menfis ttö̧ja̧tä̧ ttu'turäcuotö. Ortigas adiyätä pärätä rö̧ä̧nä̧ mi̧cuäumä 'choipäcua'a ja̧'hua̧ta̧'a̧nö̧ cuoju odehuiyätucumä soä'cuatä rȩä̧chä̧chä̧cua̧'a̧. ⁷ Ro̧ȩcuä̧ mo̧ro̧mä̧ täcö rȩbȩhua̧'a̧; mitähuä mo̧ro̧mä̧ täcö icha'a. Israel ttö̧ja̧ o'catoi'önä ja̧u̧ tö'cö o'cajuiyönä ttu̧huo̧jua̧ ji'ähuitö. Profetastö̧mä̧ tta̧mö̧cuädö jui'ächächätö ja̧'hua̧ta̧'a̧nö̧ ttö̧ja̧sa̧ a̧'cua̧rö̧hua̧nä̧ ucuocumä ja̧'a̧tä̧ra̧'a̧ juo'ächö, rö̧ä̧nä̧ suronä jȩö̧ttö̧ juhua'atäcu rö̧ä̧nä̧ öjö'cö juiyönä̧tä̧ jö̧ttö̧. ⁸ Dios u̧mö̧huä̧ya̧ tta̧huä̧rä̧cuä̧cuä̧ i̧sa̧mä̧ Efrain isotörö'i̧nä̧ tta̧'a̧rö̧. Ttö̧ja̧mä̧ 'chuttäda pä'ö jȩpö̧ ku̧ni̧'ȩnä̧tö̧ i̧cho̧mȩ punämä̧. ⁹ Jahuätömä̧ ro̧ȩnä̧ suronä̧ jȩpi̧nä̧tö̧ ji̧yȩnö̧ mo̧ro̧ Guibeáttö jȩtti̧nö'ä̧nö̧tä̧. Diosmä suronä̧ jȩti̧nö̧ jä̧ji̧nä̧tä̧ ro̧ȩpä̧cuä̧u̧. ¹⁰ TÖ̧Ä̧NÄ̧HUA̧MÄ̧ pä'ö: ''Israel ttö̧ja̧rö̧ chö̧'o̧cui̧'o̧mȩnä̧mä̧, dea juiyäjättö̧ Uva ttö̧'o̧cui̧'a̧'a̧ jä̧'i̧nö̧ a̧nö̧ jö̧nä̧. Higo dauttö u̧huä̧ju̧ huȩju̧ pä̧nä̧ ä̧cuo̧menä̧ huȩjö̧i jä̧'i̧nö̧'a̧nö̧ jö̧nä̧, pocuipinö̧sä̧ tä̧do̧tö̧ ttö̧ä̧nä̧huo̧tö̧ pi̧nä̧tö̧rö̧. Ja̧'hua̧'a̧nö̧ ja̧'a̧nä̧ juätömä̧ tö̧ä̧nä̧huo̧tö̧ Baal Peor pä̧ttä̧u̧ ttö̧ja̧'a̧cu̧ 'chi̧'ȩnä̧tö̧ ja̧'hua̧nö̧tä̧ jahuätömä̧ ucuo te'ähuienä̧tö̧ ttö̧ä̧nä̧hua̧'ca dä'ärö̧jä̧'catä. Jahuätömä Jahuätömä̧ pä'äjita̧'a̧nö̧ ppa̧'ä̧chi̧nä̧tö̧ ttö̧ä̧nä̧huo̧tö̧rö̧ ro̧ȩi̧nä̧ rȩpȩttä̧u̧rö̧mä̧ ttedecuäu jö̧'ä̧nö̧tä̧ huotörö. ¹¹ Ja̧'hua̧nö̧ ja̧'a̧ Efraín-nä, ujurumä coa'a ppiyuhuä jä̧'i̧nö̧'ö̧nö̧. Täcö uhuäpächocotö ppo̧'ä̧tö̧mä̧. Yabocumä nä̧tö̧ mu̧chotömä̧ toä'cua'a, yabocumä o'ca juoähuoca'a yabocumä ppo̧'ätö̧rö̧mä̧. ¹² . Ja̧'hua̧'a̧nö̧ ja̧'a̧nä̧ cui̧tti̧mu̧ru̧ cu'uttädöttömä̧ ttömä̧ chȩpä̧cua̧sä ya̧tȩrö̧'i̧nä̧ chu̧ju̧ni̧'o̧ca̧'a̧. ¡Jahuätuhue Ji̧yȩnö̧ ttö̧ 'cä̧di̧pä̧cho̧mȩnä̧ juätöttö! ¹³ Ttömä Efraínrö topä'ijösä, Tiro ötahuiyä jä̧'i̧ja̧'a̧nö̧ hua̧, aje jäyoto huȩnȩhuä̧ 'cua̧rö̧nä̧, ja̧'hua̧nö̧ ja̧'a̧nä̧ Efraínmä i̧tti̧mö̧rö̧ ȩpä̧cua̧ ya̧tȩ cuä'ö icua pä'ö ȩpa̧'a̧ 'cua̧rö̧nä̧. "TTÖ̧Ä̧NÄ̧HUA̧, iyitö-- ¿Däje iyäcuotöttö. ¹⁴ Ttöacuä jacuättö ppöecuächönä jȩpi̧tö̧ ja̧'hua̧ta̧'a̧nö̧ ttatateja huȩrä̧cho̧co̧u̧ ttäcuotö. ¹⁵ "Gigal ötahuiyättö ji̧na̧'a̧ suronä jȩtti̧na̧'a̧mä̧, juorö kä̧mä̧dö̧ ja̧'a̧ ja'huätörö chöjö'cö juiyönä ja̧'a̧mä̧. Ja'huätö suronä jȩtti̧na̧'a̧ttö̧, TTÖTÄ rä'epö chicuäcuotö chojusodettöma. TTÖMÄ repe'ocösä ja'huätörö po yabocumä; Tturuhuotö ruhuo hue'ätö'inä jarodätötä huotö. ¹⁶ Efrainmä märicheitä hua̧ ja̧'jua̧nö̧ ja̧'a̧ttö̧ ihuehui appiyä'inä joächächa'a; jua'amä u̧huä̧ju̧'i̧nä̧ huȩjo̧ca̧'a̧. Ja'huätö tti̧tti̧mä̧rö̧ ttu̧ju̧nä̧ra̧'a̧nä̧'i̧nä̧, TTOTÄ cuä'ö chö̧tä̧cua̧sä̧ ja'huätö tti̧tti̧mö̧ rȩpȩttä̧u̧ru̧mä̧." ¹⁷ CHO̧Ä̧NÄ̧HUA̧ Dios ja'huätörömä kö'cocö jä̧cua̧ CHUTÄ hueö ta'anö jȩtto̧ca̧'a̧ttö̧. Ja'huätömö pi̧jä̧ pa̧ja̧cu̧nä̧ koromenö cue'ächötä ttö̧jä̧cuo̧tö̧.