¹ Israelmä päi'inätö̧ uva ppuruhuächiö u̧huä̧ju̧ o̧cha̧ rö̧ȩnä̧ huȩja̧a̧ jä̧i̧nö̧'a̧nö̧. U̧huä̧ju̧ o̧cha̧ yabocu huȩjö̧ta̧'a̧nö̧, juo̧u̧mä̧ kuicu iyähuä rö̧ä̧chö̧nä̧ aditinö. Ja̧'hua̧ta̧'a̧nö̧ ti̧rȩjä̧ttö̧ juayabocu ttaditomenä, juo̧u̧mä̧ aditicuinö 'quiädö ku̧nä̧huä̧ o'ca'inä. ² Ttami iso 'quittö iso jo̧cö̧́ ttamucuädinömä; jitämä ttami 'quittächi apeö ja̧a̧ jahuätömä suronä jȩtti̧nö̧mä̧. Kuicu ttiyö'inä surojoȩpä̧cua̧ TÖ̧Ä̧NÄHUA̧; 'quittädinö o'ca'inä suro jottepäcuotö jitötä. ³ Ja̧'hua̧nö̧ ja̧'a̧ttö̧ jahuätö pätäcuotö: "Tu̧ru̧hua̧ ujuturö hueörömä toätöjä ¿Tta̧a̧nö̧ jȩa̧nö̧ ja̧'a̧ttö̧ ujuturömä?" ⁴ Yapäretä ucuocuätö jahuätömä̧ ja̧'hua̧ta̧'a̧nö̧ esecu pä'ö ttö̧ju̧nö̧'i̧nä jȩpo̧co̧tö̧. Adihuome ttö̧ju̧na̧jueimä surojötä kö̧ninätö̧jä̧. ⁵ Samaria ttö̧ja̧mä̧ ye'ecu ttö̧ja̧cuä̧cuo̧tö̧ Bet Aven ttö̧nä̧huä̧'ca päcäyä'carö, Ju̧huȩnȩ ttö̧ja̧mä̧ jahuätörö a̧'u̧ ttöttäcuotö, jitö sacerdotetö̧ tätähuä'ca ucuo te'ähuätö jahuätörö ttesehuinö̧ta'anö̧ a̧'cua̧cui̧nö̧ juiya'a topö. ⁶ Jahuätömä ttȩpä̧cuä̧ Asiriara̧'a̧ ru̧hua̧rö̧ mippounä iyähuotö jö̧nä̧. Efraínmä eseäcuähuocö jä̧cua̧, Israel ttö̧ja̧mä̧ dä'ä ttuttäcuotö ttö̧ä̧nä̧huä̧'canä̧. ⁷ Samaria ru̧hua̧mä̧ si'epö chi̧cuä̧cua̧ dau isodä aje huä̧mȩnä̧ ro̧dä jä̧'i̧nö̧'a̧nö̧. ⁸ Ju'toju ka̧cuo̧mȩ surojö jȩtti̧no̧mȩmä̧ si'epö icuäcua'a. ¡Pi̧yȩ ja̧'a̧tó Israel ttö̧ja̧ surojö jȩtti̧nö̧mä̧! So̧ö̧tä̧, rädoquiyätä bahuäcua'a ku icu iyähuome jinomemä̧. Ttö̧ja̧mä̧ möä'ca topö pättäcuotö: "¡Tto'epitö!" ja̧'hua̧ta̧'a̧nö̧ po̧ri̧yä̧'tä̧ jo̧mȩmä̧ "¡Ujuturu ju̧rä̧chi̧'i̧!" ⁹ Israel ttö̧ja̧mä̧, Guibeá ötahuiyättö kä̧mä̧dö̧ surojömä jȩpi̧nä̧tö̧; ja̧u̧mä̧ 'quiyönä 'chu̧'ä̧rä̧cuä̧u̧ kä̧'i̧jö̧jä̧. Curämä Guibeá ttö̧ja̧rö̧mä̧ rȩbȩhuo̧ca̧'a̧ jä̧cua̧'a̧ surojö i̧tti̧mö̧rö̧mä̧? ¹⁰ Ttörö pä̧huä̧rö̧jo̧mȩnä̧, Ttömä jahuätörö ro̧dȩpä̧cua̧sä̧. Ttö̧ja̧mä̧ o'catoi'önä̧tä̧ to'ija̧'a̧cu̧ a̧mö̧cuädö ttö̧ca̧ca̧cuä̧cuo̧tö̧ ja̧'hua̧ta̧'a̧nö̧ rö̧ä̧nä̧ surojö jȩtti̧nö̧nä̧ nö'cö ttötäcuotö. ¹¹ Efraín ttö̧ja̧mä̧ päcäyä isaju ki̧tti̧mö̧ äjicuäcuähuotö u̧huä̧ju̧ ote kärätö jä̧'i̧nö̧'a̧nö̧ hua̧, ja̧'hua̧nö̧ ja̧'a̧ttö̧, Ttömä ttu̧ru̧pä̧'quȩ a̧di̧huä̧'quȩ käcuoränä chu̧nö̧'cä̧cua̧sä̧. Ttömä Efraín u̧ru̧pä̧'quȩ käcuoränä chu̧nö̧'cä̧cua̧; Judámä do̧ä̧cua̧; Jacobtä chuätä a̧mö̧nä̧ pa̧ja̧tö̧ sahua'anä. ¹² Ucututä adihuäjäi ö̧huä̧ju̧tä̧ ku̧nä̧tu̧cui̧ ucutucu todecusä päinö jinö ö̧huä̧ju̧tä̧ ca̧ca̧tä̧tu̧cui̧. Amucuädätucui cuaditätu cuäcuome, TÖ̧Ä̧NÄHUA̧ ichomenä juo̧ú̧tä̧ ppä̧dä̧cua̧nö tti̧ji̧pu̧nä̧ ja̧'hua̧nö̧ ja̧'a̧ttö̧ ucuturö adihuäjuäitä ichäcua'anö ajiya ichaa ja̧i̧nö̧'a̧nö̧. ¹³ Ja̧hua̧nö̧ ja̧'a̧nä̧ ucutumä surojueitä ku̧ni̧nä̧tö̧jä̧ ja̧'hua̧ta̧'a̧nö̧ suräjuäitä ca̧ca̧ti̧nä̧tö̧jä̧. Ucutumä suräjuäitä esetinätö̧jä̧ ja̧'hua̧nö̧ ja̧'a̧ttö̧ ucutötä amucuädö ucuo teäu su̧ro̧dä̧u̧rö̧ ku̧ni̧nä̧tö̧jä̧.

,

¹⁴ Ja̧'hua̧nö̧ ja̧'a̧ ahuaruhuä ttieruhuächi'önä jo̧mȩ 'cä̧tȩttö̧ ä̧rä̧mi̧'ä̧cua̧ ja̧'hua̧ta̧'a̧nö̧ ötahuiyä 'quiyönä tto'epö adicuämä si'epö icuähuäcua'a. Salmán Bet Aven ttö̧ja̧rö̧ si'epö icuinö̧ ta'anö ya'utenä̧ curänä ruhuäu, tta̧ju̧tö̧mä̧ tti̧tti̧mö̧cu̧ ppo̧u̧cu̧ päi'önä 'cui'ö tticuinö̧. ¹⁵ Ja̧'hua̧nö̧ ji̧nö̧ ta'anö̧ 'cuäopäcua'a ucutu, Betel ötahuiyä ka̧cuä̧tö̧rö̧mä̧, rö̧ä̧nä̧ suronä jȩ'cui̧nä̧tu̧cu̧ ta'anö̧. Mo̧ro̧ juoomenä̧mä̧, Israel ttö̧ja̧ ttu̧ru̧hua̧mä̧ o'cajuiyönä si'epö i̧cuä̧hua̧tä̧ jä̧cua̧."