¹ TTÖMÄ Israel ttö̧ja̧rö̧ ppädada pä'ösä, ja̧'hua̧'a̧nö̧ ja̧'a̧nä̧ Efraín suronä̧ jȩi̧nö̧tä̧ i̧jȩcuä̧cha̧'a̧, Samaria ttö̧ja̧ suronä jȩtti̧nö̧ta'anö̧ yoräteunä̧tä̧ ja̧'a̧, ja'huätömä yaparetä jȩpö̧ kä̧cuä̧tö̧; ya̧tȩ nä̧u̧cuä̧rä̧cuä̧huä̧ i̧sä̧ doächö'anötä, ja̧'hua̧ta̧nö̧ nä̧u̧cuä̧rä̧cuä̧huä̧ isotömä nä̧u̧cuä̧tö̧ mänätö'inä. ² Ja'huätö ttamiso'quinä̧mä̧ huo̧juä̧chi̧'o̧co̧tö̧ TTÖMÄ unichi'ocösä ja'huätö o'catoinä suronä jȩttö̧mä̧. Jitämä jahuätö suronä jȩttö̧mä̧ kärächi'ä̧u̧jö̧; ja'huätömä ttö chi'ä ä'catä ka̧cuä̧tö̧. ³ suronä jȩttö̧nä̧tä̧ ttu̧ru̧hua̧ eseunä jȩpä̧tö̧, su̧ru̧da̧u̧ tturuhuotö'inä yapare ji'ähuätö. ⁴ Ja'huätö o'catoi'önä ttirecua pocojucu jȩpä̧tö̧, pan ȩttä̧huä̧ i̧sa̧ ȩtto̧mȩ jä̧i̧nö̧'anö du'unä huotö, ppö̧ä̧mi'o̧mȩjubu ocurä tta̧tä̧dä̧rö̧ ö̧ja̧'a̧ jä̧i̧nö̧'a̧nö̧. ⁵ Ru̧hua̧ pä'cäri jȩo̧mȩnä̧mä̧, su̧ro̧do̧u̧ tturuhuotö'inä vinottö̧ a̧'ti̧poya autä tä̧'ä̧mä̧chä̧tö̧. Ja̧u̧mä̧ ja'huätö jarodä ya̧'a̧huä̧'chä̧tö̧rö̧tä̧ esecu. ⁶ Ttamiso'quimä pan ȩttä̧huä'ca duhua'a jä̧'i̧nö̧'a̧nö̧ huottö, ttamucuädäjimä iso 'cua̧rö̧nä̧ jȩpä̧tö̧. Ttö̧ro̧huä̧rö̧mä̧ ja̧'cuo̧ppö̧nä̧ yodojö̧ta̧'a̧nä̧ pu̧ttä̧chä̧u̧; Mo̧ro̧ päia'amä ocurä röarä jä̧'i̧nö̧'a̧nö̧. ⁷ Ja'huätömä o'catoi'önä pan ȩttä̧hu̧ä'ca cuoa'a jä̧'i̧nö̧a̧nö̧ huotö, ja̧'hua̧nö̧ ja̧'a̧ttö̧ tturuhuotörö'inä cuä'äutä icuätö. Ruhuo hue'ätömä to'e'ätö; ja̧'hua̧nö̧ ja̧'a̧nä̧ ja'huätöttömä̧ ja̧tȩ'i̧nä̧ TTÖRÖ huopönömä jä'epocotö. ⁸ Efraínmä chutä amonätä ttöjacu̧mä huihuacuächö. Efraínmä i̧ri̧si̧ bocuocosi̧ jä̧'i̧nö̧'a̧nä̧tä̧ hua̧. ⁹ Ichäcuähuotötä ujuru 'chottipä'anä, ja̧'hua̧nö̧ ja̧'a̧nä̧ chutämä jȩru̧pa̧. Uhuo'che'inä teipa'anä, ja̧'hua̧nö̧ ja̧'a̧nä̧ chutämä jȩru̧pa̧. ¹⁰ Jou̧ ä'cattömä öjö'cö juiyönä ji̧na̧a̧ ucuo tettäu israel; ja̧'hua̧nö̧ ja̧'a̧nä̧, jähuätömä ppa̧'a̧cho̧ co̧tö̧ pinätö̧ TTÖ̧Ä̧NÄHUA̧ DIOSRÖ, usudä̧ usocotö pinätö̧, ja̧'hua̧nö̧ o'cajuiyönä jȩtta̧nä̧'inä. ¹¹ Unöcutaanö amucuädö juiö jäepinö Efraínmä Egitpo ttö̧ja̧ ppättadarö päö juo̧nö̧ o'caa Asiria rȩjȩra̧a̧ i̧hui̧nö̧. ¹² Jahuätö tticho̧mȩnä̧, ttöttä ba̧dȩpä̧cua̧sä̧ jahuätärö, ppi̧yu̧ ju'tonä co̧ä̧rä̧tö̧rö̧ 'chuttädaa ja̧i̧nö̧'a̧nö̧ 'chudädäcuotö. ttötä ro̧dȩpä̧cuo̧tö̧ o'catoinärö̧. ¹³ ¡ucutuhué! jahuaamä ucutu ttöttö 'quȩcui̧chi̧nä̧tö̧ cua̧a̧ttö̧. Surojötä jähuätörö surojoepumä ttö huedocö jȩtta̧a̧ttö̧ ja̧'hua̧nö̧ jo̧ca̧a̧ttö̧mä̧ ppä̧dä̧ dä̧u̧, ja̧'hua̧nö̧ ja̧'a̧nä̧mä̧ jahuätömä yaparehuätö ttörömä. ¹⁴ Jahuätömä ttami iso'qui o'cajuiyönämä ttörö huopönömä̧ jä'epocotö pä'ijätö, ja̧'hua̧nö̧ ja̧'a̧nä̧ ttä̧'ä̧ma̧nä̧ttö̧tä̧ ajahuä'ijätö. Jahuätömä u̧huä̧ju̧ ote'i̧nä̧, vino isoya jareö''i̧nä̧ ca̧ca̧tä̧tö̧ ja̧'hua̧nö̧ jȩpö̧ ttaboja'a ttöjärächi'inä̧cu̧sä̧. ¹⁵ Ttömä cu̧huo̧juȩtä̧'i̧ja̧'a̧nä̧ ttöjohuiyä'i̧nä̧ juruhuächi'önä ttujuru chiyina̧'a̧nä̧, jahuätömä Ttörö to'ija'acu suronä̧tä̧ a̧mö̧cuädätö. ¹⁶ Jahuätömä 'chi̧'pö̧mä̧ ichätö ja̧'hua̧nö̧ ja̧'a̧nä̧ Ttö mo̧ro̧jä̧nä̧ kö̧rö̧mä̧ ppa̧'ä̧cho̧co̧tö̧. Jahuötmä 'po'obö 'cuäubö jä̧'i̧nö̧'a̧nö̧ huotö. Su̧ro̧da̧u̧ curä'chunä 'cuä'äu tti̧cuä̧u̧ tti̧huȩnȩnä̧mä̧ surojuoecuätö ttucuocua'attö. Ja̧u̧ huȩnȩmä̧ Egipto rȩjȩttö̧mä̧ ya̧huä̧huä̧cuä̧huä̧ jö̧nä̧tä̧ jä̧cua̧'a̧.