¹ Ichätucui, TÖ̧Ä̧NÄ̧HUA̧CU̧ ppa̧tä̧chä̧tu̧cua̧. Ja̧'hua̧nö̧ ja̧'a̧ ja̧u̧mä̧ ppo̧u̧cu̧ jö̧nä̧ 'toru icuinä̧u̧jä̧, ja̧'hua̧nö̧ ja̧'a̧ ja̧u̧mä̧ nä̧tä̧chö̧ttö̧mä̧ tö̧'ȩji̧'ö̧mä̧ aditö i̧cuä̧cuä̧u̧jä̧; Ja̧u̧mä̧ tötta päi'önä jȩi̧nä̧u̧jä̧, ja̧'hua̧nö̧ ja̧'a̧nä̧ töttamä juäopä̧cuä̧u̧jä̧. ² Todäre mo̧ro̧ o'ca'a, pä'äjita'anö ta̧'cua̧ri̧'ö̧nä̧ jȩä̧cuä̧u̧jä̧; huäbodäcuä mo̧ro̧ päi'omenä äräbe'ö u̧ju̧nä̧cuo̧tö̧jä̧ ja̧'hua̧nö̧ jo̧mȩnä̧ ujutumä ja̧u̧ ä'ca jo̧mȩ tö̧jä̧cuo̧tö̧jä̧. ³ Tu̧huo̧juä̧chö̧nä̧ jȩpi̧tö̧, TÖ̧Ä̧NÄ̧HUA̧; tu̧huo̧jui̧pö̧nä̧ jȩpi̧tö̧. I̧chä̧cuȩmä̧ isopäi'önä̧tä̧ jä̧cua̧'a̧ mo̧ro̧ juoa'a jä̧'i̧nö̧'a̧nö̧; Ja̧u̧mä̧ ttö̧ja̧cua̧'a̧cu̧ i̧chä̧cua̧ ajiya icha'a jä̧'i̧ja̧'a̧nö̧, du'o juoa'acu ajiya ichoya rȩjȩ acuäbe'a'a jä̧'i̧nö̧'a̧nö̧. ⁴ ¿Däjetä jȩchä̧cua̧'a̧ttö̧ ucutu Efraín ahuaruhuäruhuä 'cotörömä? ¿Däjetä jȩchä̧cua̧'a̧ttö̧ ucutu Judá ttö̧ja̧rö̧mä̧? Ucu cua̧'cua̧ cu̧huȩnä̧rö̧nä̧ mo̧ro̧ päia'a ajiya isoppa jä̧'i̧nö̧'a̧nö̧ ja̧'a̧, yo̧ȩi̧cu̧ yo̧'cu̧nö̧ roppa coepächa'a jä̧'i̧nö̧'a̧nö̧ ja̧'a̧. ⁵ Ja̧'hua̧nö̧ ja̧'a̧ttö̧ profetatö̧rö̧mö̧ ppo̧u̧cu̧ pätti'önä cui'ö chicuinä̧u̧, jahuätörömä chi̧huȩnȩnä̧tä̧ cuä'ö chicuinä̧u̧. Ucu huecu huȩnȩmä̧ tȩya̧u̧ jä̧'i̧nö̧'a̧nö̧ kä̧dȩpö̧ ja̧'a̧. ⁶ Ja̧'hua̧nö̧ ja̧'a̧, Ttömä pä̧huä̧rö̧jä̧cu̧sä̧ tta̧'cua̧ huȩnȩrä̧cuä̧huä̧tä̧ i̧sa̧rö̧ ku icu iyähuämä̧cö̧ ja̧'hua̧ta̧'a̧nö̧ Dios u̧huo̧ju̧ huȩnȩmä̧ ttiäre ku icu iyähuättö'inä abonänö jö̧ ja̧'a̧. ⁷ Adán ji̧nö̧ta'anö, jahuätömä ötodecuinö̧mä̧ 'to'ocu icuinä̧tö̧; ja̧'hua̧nö̧ jȩpö̧ Ttörö päcumä jȩtä̧cuo̧tä̧jä̧ pättinö̧mä̧ jȩpo̧co̧tö̧ pinä̧tö̧. ⁸ Galaadmä ji̧yȩtȩ ötahuiyä surönä̧ jȩpö̧tä̧ cuä'ähuö icuätö ttidepiyu ji̧na̧'a̧. ⁹ jisate isotö nä̧u̧cuärä̧tö yä̧tȩrö̧ tta̧ttä̧ra̧'a̧ jä̧'i̧nö̧'a̧nö̧ jö̧nä̧, Ja̧'hua̧ta̧'a̧nö̧ Sacerdotetö̧cu̧ ppä'ädäcuau Siquen mänänä kä'cottö cuä'ähuö tticua pä'ö; Ja̧'huätömä̧ Suronä̧ jȩpö̧ cuä'äu tticuinö̧mä̧ dä'ä ttöhuähuä ji̧na̧'a̧. ¹⁰ Israel ttö̧ja̧ ttojusodettö topinösä̧ ji̧yȩtȩ ro̧ȩi̧nä̧ surojö; Efraín ahuaruhuä ttidepä iyä'chähuäu jȩtti̧nö̧mä̧ pȩnȩtä̧ Israelnä̧ ka̧'a̧. ¹¹ Ja̧'hua̧ta̧'a̧nö̧ ucutu, Judá'inä̧ ujunä̧huä̧ttö̧ ö̧ca̧ca̧tä̧cua̧, ja̧'hua̧ta̧'a̧nö̧ ttö pä'äjita'a̧nö̧ ppa̧dä̧di̧po̧ mȩnä̧mä̧ jitötä ttidepiyunä̧.