¹ ¡"Sacerdotes pi̧yȩ ä̧ju̧cuä̧tu̧cui̧! ¡Israel ttö̧ja̧ adiu ä̧ju̧cuä̧tu̧cui̧! ¡Ru̧hua̧ ojusodenä̧ ka̧cuä̧tö̧ ä̧ju̧cuä̧tu̧cui̧! Isopäi'önä̧tä̧ ucuturu ro̧ȩcuä̧cuȩmä̧ icha'a. Ucutumä Mizpa ötahuiyättömä ttä̧ttȩcuä̧ jö̧nä̧tä̧ huä'ijätöjä ja̧'hua̧ta̧'a̧nö̧ Taborttömä po̧i̧ huo̧cuä̧sa̧ setädö rötähuä̧sä̧ jö̧nä̧tä̧. ² Pä̧i̧cuä̧tö̧mä̧ ttö̧ja̧rö̧ cuäcuähuänä̧tä̧ täcunä juo'ächinä̧tö̧, ja̧'ha̧nö̧ jo̧mȩttö̧ jahuätömä o'catoi'önä̧tä̧ ro̧dȩpä̧cuo̧tö̧. ³ Ttömä Efraín ttö̧ja̧rö̧mä̧ huo̧jua̧sä̧, Israel ttö̧ja̧mä̧ Ttörömä dajahuächocotö. Efraín ttö̧ja̧ jitämä ttidepä iyä'chäcuähuätö jö̧nä̧tä̧ pärohuächinä̧tö̧; Israel ttö̧ja̧mä̧ surojuo'ächinä̧tö̧. ⁴ Surojö jȩttö̧ttö̧ Diosrömä ppa̧ttä̧chö̧ juiyönä jä̧u̧, juhua'amä ttamucuädönä̧mä̧ ttirecua pocojucu jȩä̧'chä̧cuä̧huä̧tä̧ ttamucuäda'attö ja̧'hua̧nö̧ jo̧mȩttö̧ Tö̧ä̧nä̧hua̧rö̧rö̧ jerupätö. ⁵ Israel ttö̧ja̧mä̧ ucuo tettäutä surojuoepä̧u̧; ja̧'hua̧nö̧tä̧ Israel ttö̧ja̧mä̧ ja̧'hua̧ta̧'a̧nö̧ Efraín ahuaruhuämä surojö jȩttö̧tä̧ tto̧ȩpä̧rä̧cuä̧u̧; ja̧'hua̧ta̧'a̧nö̧ Judá ttö̧ja̧'i̧nä̧ ja̧u̧ jähuätä tto̧ȩpä̧rä̧cuo̧tö̧. ⁶ Jahuätömä pä̧cuä̧yu̧nö̧ ji̧nä̧ yo̧mȩtȩnä̧ tti̧'chä̧cuo̧tö̧ TtÖ̧Ä̧NÄ̧HUA̧RÖ̧ usumä ja̧'hua̧nö̧ ttusa'anä po̧cui̧po̧co̧tö̧ ttäcuotö, juhua'amä jahuätöttömä oto 'cä̧i̧pä̧chi̧na̧'a̧ttö̧. ⁷ Jahuättömä TTÖ̧Ä̧NÄ̧HUA̧RÖ̧ a̧ jȩtä̧cuo̧tö̧jä̧ pättina̧'a̧cu̧mä̧ jȩtto̧ca̧'a̧, ja̧'a̧tä̧ tti̧tti̧mö̧rö̧ ttu̧ju̧nä̧rä̧'cho̧mȩttö̧. Ja̧'hua̧nö̧ ja̧'a̧ yodo kä̧hua̧ jareönä rö̧nä̧ pä'cäri jȩttä̧'i̧jo̧mȩ pönä'i̧nä̧ yo̧mȩtȩnä̧ si'epö icuähuäcua'a. ⁸ Guideá ötahuiyättö i̧sa̧ ä̧ja̧ i̧sä̧na̧nä̧ ppö'ätö ja̧'hua̧ta̧'a̧nö̧ Rama ötahuiyättö'i̧nä̧ trompetanä̧. Bet Avénttö̧mä̧ curä tturohuäumä ttajautä rä̧mi̧pa̧'a̧: ¡Benjamín ujutumä ucu cuo'ca'anä tichäcuotöjä! ⁹ Efraín ttö̧ja̧mä̧ ro̧ȩcuä̧ mo̧ro̧ si'epö icuähuäcuotö. Israel ttö̧ja̧ ttahuaruhuä 'cotöttömä isopäi'önä̧tä̧ 'cuäopäcua'a pä'ömä ji'ähuäjuisä Ttömä. ¹⁰ Judá ttö̧ja̧ tturuhuotömä tti̧rȩjä̧ beipome yabonä̧nö̧ rö̧'ä̧dä̧tö̧ 'cua̧rö̧nä̧ huotö. Ttö chu̧'ä̧i̧mä̧ ajiya juatädi'a'a jä̧'i̧nö̧'a̧nö̧ jä̧cua̧'a̧. ¹¹ Efraín ahuaruhuämä kȩdö̧ icuähuäcuotö; ja̧u̧mä̧ ttucuo'inä ucuotocomettö̧, juhua'amä churutä pä̧huä̧rö̧jo̧mȩnä̧ tätähuä o'catä ucuo teähuä'ija'attö ¹² Ttömä Efraínrö̧mä̧ ppȩrȩpö̧ jä̧'i̧nö̧'a̧nö̧tä̧ chä̧cua̧sä̧, ja̧'hua̧ta̧'a̧nö̧ Judá ahuaruhuärömä pparuhuächönä̧ jȩö̧ jä̧'i̧nö̧'a̧nö̧tä̧. ¹³ Efraín ahuaruhuä ttumärichei tottäcuähuomenämä ja̧'hua̧ta̧'a̧nö̧ Judá ttö̧ja̧ ttöttahuiyä tottäcuähuomenämä, Efraín ahuaruhuämä Asiria ttö̧ja̧rö̧'i̧nä̧, Judá ttö̧ja̧rö̧'i̧nä̧ ucuo ru̧hua̧rö̧ tottäjiyatö pä'ö huȩnȩ ȩcua̧ ttö̧ja̧rö̧ hue'inä̧tö̧. Ja̧'hua̧nö̧ huetta'anä ttumarichei'i̧nä̧, ttöttahuiyä'i̧nä̧ aditö tticua pä'ömä jo̧mȩnö̧mä̧ huocotö pinätö̧. ¹⁴ Ttömä Efraín ahuaruhuärömä mu yähui jä̧'i̧nö̧'a̧nö̧ chä̧cua̧sä̧ ja̧'hua̧ta̧'a̧nö̧ Judá ahuaruhuärömä mu yähui i̧tti̧mö̧ jä̧'i̧nö̧'a̧nö̧. Ja̧'hua̧ta̧'a̧nö̧ Ttömä si'epö'i̧nä̧ chicuäcuotö ja̧'hua̧nö̧ jȩpi̧'ö̧ oto; tudipä̧chä̧cua̧sä̧, ja̧'hua̧nö̧ jo̧mȩnä̧ ya̧tȩ'i̧nä̧ toäcua'a jahuätörö ppäda pä'ömä. ¹⁵ Ttömä̧ 'chi̧'i̧pö̧'ca̧ chu̧ji̧no̧mȩcu̧ ppa̧dä̧chä̧cua̧sä̧, jahuätö suronä jȩpi̧nä̧tö̧jä̧ pä'ö ttu̧huo̧juä̧chi̧'o̧mȩ jubö ja̧'hua̧nö̧ jä̧u̧ Ttörö ttusäcuotö, ajaunö Ttörö ttusome jubö päi'önä.