¹ TÖ̧Ä̧NÄ̧HUA̧ ucuocua'a ä̧ju̧cui̧, ucutu Israel ttö̧ja̧mä̧. TTÖ̧Ä̧NÄ̧HUA̧MÄ̧ ucuturu suronä jȩpä̧tö̧jä̧ pä̧u̧jä̧, pi̧jä̧ rȩjȩnä̧ ka̧cuä̧tö̧mä̧, isopäi'önä huȩnȩmä̧ juiya'attöcö̧ ötodecuinönä tta̧'cua̧ ttu̧huȩnä̧ro̧ca̧'a̧ttö̧cö̧ pi̧jä̧ rȩjȩnä̧mä̧ juiya'a Dios u̧huo̧juö̧mä̧. ² Surojuoecuätä ka̧'a̧, yapareäcuähuätä, ttö̧ja̧rö̧ cuä'ö icuähuätä, nä̧u̧cuä̧rä̧cuä̧huä̧tä̧ ja̧'hua̧ta̧'a̧nö̧ ttirecua pocojuru jȩä̧'chä̧cuä̧huä̧tä̧. Ttö̧ja̧mä̧ ttucuotoca'a hueähuä huȩnȩ päömä jȩpo̧cotö päjätö, ja̧'hua̧ta̧'a̧nö̧ cättädi'oca'atä ttö̧ja̧rö̧mä̧ cuä'äu icuätö. ³ Ja̧'hua̧nö̧ ja̧'a̧ttö̧ rȩjȩmä̧ joipächa'a juhua'atäcu ja̧huä̧jä̧nä̧ ka̧cuä̧tö̧'i̧nä̧ cuänö tti̧cuä̧u̧; de'a isotötä ja̧'hua̧ta̧'a̧nö̧ ppi̧yu̧ mo̧ro̧jä̧nä̧ co̧'ä̧rä̧tö̧tä̧, juhua'atäcu aje po̧i̧'i̧nä̧, 'coru juo'ähuätö. ⁴ Ja̧'hua̧nö̧ totte'ächa'anä ya̧tȩ'i̧nä̧ ja̧'hua̧nö̧ jȩpä̧ji̧ pä'ömä toa'a; ya̧tȩ'i̧nä̧ juhua'a yabonömä ja̧'hua̧nö̧ jȩpä̧ji̧jä̧ pä'anämä cuiyähuä. Isopäi'önä ucutu ja̧'a̧, sacerdotetö̧, ja̧'hua̧nö̧ jȩpä̧tö̧jä̧ pä̧dä̧u̧mä̧. ⁵ Ucutu sacerdotetö̧ mo̧ro̧mä̧ ucuotocotö cuäcuotöjä ja̧'hua̧ta̧'a̧nö̧ profetatö̧ ucuturu yodomä̧ ttucuotoco̧u̧ ttäcuotäjä, ja̧'hua̧nö̧ jo̧mȩttö̧ Israel ttö̧ja̧ tta̧ju̧ jä̧'i̧nö̧'a̧nö̧ huotörömä si'epö chi̧cuä̧cua̧sä̧. ⁶ Chu̧mö̧huäyotömä si'epö icuähuotö jö̧nä̧tä̧ huotö Ttö chutu'cö ttieruhuomettö̧. Isopäi'önä ucutu sacerdotetömä Dios u̧huo̧ju̧ huȩnȩmä̧ ya'ocuinä̧tö̧jä̧, ja̧'hua̧nö̧ ji̧nö̧ ta'anö Ttö'i̧nä̧ ucuturu chumöhuäyotö sacerdotetö̧ jö̧nä̧mä̧ ȩmo̧cö̧ chä̧cua̧sä̧. Isopäi'önä ucutumä Ttöttö hueähuä huȩnȩ cu̧ni̧chi'inä̧tö̧cua̧'a̧ttö̧, Ttömä Cu̧ä̧nä̧hua̧tu̧cu̧ Dios cha'anä̧, ja̧'hua̧ta̧'a̧nö̧ ucutu cui̧tti̧mö̧tu̧cu̧ru̧mä̧ chu̧ni̧chi̧'ä̧cuä̧cua̧sä̧. ⁷ Sacerdotetö̧mä̧ yabonö rö̧ttä̧chö̧ta'anö̧ Ttörö yabonö̧ surojutä jȩpä̧tö̧. Jahuätömä ucuo teäcuähuämä dä'ä ttuhuähuänä̧tä̧ pärotö icuinä̧tö̧. ⁸ Jahuätömä ttö̧ja̧ surojö jȩttö̧ jähuänä̧tä̧ cuä̧nö̧ ka̧cuä̧tö̧; jahuätömä surojö yabonö jȩtti̧ya̧tö̧tä̧ pä'ätö. ⁹ Ttö̧ja̧rö̧'i̧nä̧ sacersotetö̧rö̧'i̧nä̧ yoräteunä̧tä̧ jä̧cua̧'a̧; o'catoi'önä̧rö̧ surojötä jȩtta̧'a̧ttö̧ ro̧dȩpä̧cuo̧tö̧; Ttömä jitörä jȩti̧nö̧'a̧cuä̧tä̧ ppa̧dä̧di̧pä̧cuo̧tö̧. ¹⁰ Jahuätömä ttucua'anä̧ su'ädi'ocotö ttäcuotö; jahuätömä ttidepä ttiyä'chäcuöhua'anä tti̧tti̧mö̧rö̧mä̧ ku̧nä̧ro̧co̧tö̧ ttäcuotö, juhua'amä TTÖ̧Ä̧NÄ̧HUA̧TTÖ̧ oto juottächinomettö̧. ¹¹ Jahuätömä korotönö jȩttä̧'chä̧cuä̧hua̧tä̧ pä'ätö, vinotä̧ rö̧ä̧nä̧ ahuätö hueinö huȩnȩmä̧ ttunichi'önä̧tä̧. ¹² Chumöhuäyotömä̧ dauttö adicuä o'carötä jä'epö ä̧ju̧cuä̧tö̧ ja̧'hua̧ta̧'a̧nö̧ ttitta'camä̧ 'cuä̧o̧pä̧cuȩtä̧ jiähua'a. Rö̧ä̧nä̧ ttamöcuädömä surojöra̧'a̧tä̧ o̧i̧pä̧chä̧u̧ ja̧'hua̧nö̧ ja̧'a̧ttö̧ Dios päina'acu̧ jȩpö̧ ttö̧ja̧jueimä ttidepä iyä'chäcuäutä ka̧cui̧nä̧tö̧ jahuätömä. ¹³ Möä'ca ju'tättö isotörö cuä'ö icu iyätö ja̧'hua̧ta̧'a̧nö̧ juhua'attö incienso'i̧nä̧ kuhuätö, dauhuiyä robles'i̧nä̧, álamos'i̧nä̧ ja̧'hua̧ta̧'a̧nö̧ terebintos'i̧nä̧ dea'attö̧, juhua'amä dauhuiyä dea'atä ja̧'a̧ttö̧ adihuomemä. Ja̧'hua̧nö̧ ja̧'a̧ttö̧ tti̧tti̧mö̧ nä̧tö̧mä̧ juorötä ttidepä iyä'chäcuähuätö ja̧'hua̧ta̧'a̧nö̧ ttö̧jo̧ri̧mö̧ nä̧tö̧'i̧nä̧ ttirecuo pocöcu jȩpä̧'chä̧cuä̧huä̧tö̧. ¹⁴ Ttömä ro̧'ȩpo̧cö̧ chä̧cua̧sä̧ tti̧tti̧mö̧ nä̧tö̧ ttidepä ttiyä'chäcuähua pä'ö a̧mö̧cuädäjätörömä ja̧'hua̧ta̧nö̧ ttö̧jo̧ri̧mö̧ nä̧tö̧ ttirepocöcu jȩttä̧'chä̧cuä̧huö̧tö̧rö̧mä̧. Ja̧'hua̧nö̧ ja̧'a̧ u̧mä̧tö̧'i̧nä̧ ja̧'hua̧ta̧'a̧nö̧tä̧ ttidepä iyä'chäcuähuätörö usätö ja̧'hua̧nö̧ jȩpö̧ jahuätömä ttidepä iyä'chäcuähuätö i̧sa̧rö̧ cuä'ö icu ttö̧ä̧nä̧huä̧'carö ttiyönä jȩpä̧tö̧. Ja̧'hua̧nö̧ ja̧'a̧ttö̧ pittö ttö̧ja̧mä̧ hueähuä huȩnȩ ttucuotoca'attö si'epö icuähuäcuotö. ¹⁵ Ucu, Isrsel ttö̧ja̧sa̧mä̧ cuirecua pocojucu cuidepä cuiyä'chäcuähuina̧'a̧nä̧, Judá ttö̧ja̧mä̧ huȩnȩcuä̧cho̧co̧tö̧ ttäcuotö. Gilgalra̧'a̧mä̧ ucutumä cui̧'chä̧tu̧cuä̧; Bet avénra̧'a̧'i̧nä̧ cui̧'chä̧tu̧cuä̧ ja̧'hua̧ta̧'a̧nö̧ ji̧yȩtȩ i̧mi̧nä̧ huȩnȩtö̧mä̧ päcuätucuä: "TTÖ̧Ä̧NPHUA̧MÄ̧ kö̧ pä'ömä" ¹⁶ Ja̧'hua̧nö̧ ja̧'a̧ Israel ttö̧ja̧mä̧ tta̧mi̧ 'qui'ädäcuähuinätö̧ päcäyä mö̧ä̧ya̧ a̧mi̧'quiädäcuähua'a jä̧'i̧nö̧'a̧nö̧. ¿Tocu TTÖ̧Ä̧NÄ̧HUA̧MÄ̧ tta̧huä̧ra̧tö̧ pä'ömä̧ i'cächäcuotöttö̧ ovejas i̧tti̧rö̧ jä̧'i̧nö̧'a̧nö̧mä̧? ¹⁷ Efraín ahuaruhuämä tätähuä'ca ucuo te'ähuätucu ppä'ächi'inä̧tö̧; katätä ku̧ni̧pi̧tö̧. ¹⁸ Ttahuoya au tä̧ttä̧mä̧cho̧mȩnä̧, jahuätömä yabonö̧tä̧ ttirecua̧mö̧ pocotucu jȩpä̧'chä̧cuä̧huä̧tö̧; tturuhuotömä ja̧'hua̧nö̧ jȩttö̧mä̧ dä'ärö̧jo̧co̧u̧. ¹⁹ Ttujuabiyämä kä̧ru̧'coppatä juatädi'äcuotö; ja̧'hua̧nö̧ jo̧mȩnä̧ jahuätömä iyä'chö jȩttä̧ji̧ jähuänä dä'ä ttuttäcuotö.