¹ Efraín ucuocuomenämä, ttö̧ja̧ je'ecue'ö ttö̧'ä̧hui̧nä̧tö̧. Israel ttö̧ja̧ttö̧mä̧ ucuounä ko̧cuä̧tö̧ ja̧'a̧ttö̧, ja̧'hua̧nö̧ ja̧'a̧nä̧ huȩnȩ juinö Baalrö uccuo teäu ta'anö, ja̧'hua̧nö̧tä̧ tottepächa pä'ö patecuächinätö̧. ² Jitämä, yabocu suronätä̧ jȩpö̧ ko̧cuä̧tö̧. Ja'huätömä ttiäre pärätänä i̧sa̧ a̧u̧cuä̧ aditätö, tätähuä'camä a̧'cua̧cu̧nä̧ aditinätö, juiyome ttö̧'i̧nä̧ rä'epö, o'catoi'önä 'co̧'ö̧ aditätötä juinätö̧. Ttö̧ja̧mnä̧ ja'huätörömä pä'ätö: "Ja'huätömä cuä'ö ttiyäcua'a ä'canämä pacalla i̧tti̧ a̧'u̧cua̧ tätähuä'ca chu̧'o̧pä̧tö̧. ³ Ja̧'hua̧nö̧ ja̧'a̧ttö̧ ja'huätömä muä'canä isoppa ra̧'i̧nö̧'a̧nä̧tä̧ ttö̧rä̧cuo̧tö̧, ajiya isoppa mo̧ro̧ päi'a'a rä̧'i̧nö̧'a̧nö̧, isä'cua u̧huä̧ju̧ pe'ö tticuomenä rȩjȩttö̧ oto coächa'a ja̧'i̧nö̧'a̧nö̧, ocurä ttujuhuomenä isoppa cäepä'inö'anö. ⁴ Ttötäsä CUÄNÄHUA̧ DIOSMÄ Egipto rȩjȩttö̧ kä̧mä̧dö̧. Ucutumä ka̧rá̧ cui̧ä̧nä̧hua̧ diosmä toätöjä ttötätä ja̧a̧; ucutumä ttö̧cuȩ pä̧ri̧ä̧tu̧cua̧'a̧nö̧ ja̧a̧ ttörömä, ka̧ra̧ tti̧ji̧pu̧nä̧ ttoädömä to'aa. ⁵ Dea juiyomettö̧'i̧nä̧ ttä̧dä̧ri̧nä̧u̧jä̧, rȩjȩ́ jo̧ä̧jä̧ttö̧'i̧nä̧. ⁶ Ja̧'hua̧nö̧ ja̧'a̧ cu̧cuȩtö̧cu̧ ko̧mȩnä̧ ucutumä esehuinätö̧jä̧; ja̧'hua̧nö̧ ja̧'a̧ttö̧ esehuinätö̧jä̧ cuamiso'qui jacuättö. Ja̧'hua̧nö̧ ja̧'a̧ttö̧ ucutu ö̧ni̧chi̧i̧nä̧tö̧jä̧. ⁷ Muyähui jä̧i̧nö̧'a̧nö̧ chi̧jȩcuä̧cua̧sä̧ jahuätörö; tti̧'chö̧a̧u̧cuä̧ ttötä ttä̧dä̧rä̧cua̧sä̧, yähui ttä̧huä̧ra̧a̧ jä̧i̧nö̧'a̧nö̧. ⁸ Ajé yähui i̧tti̧rö̧ näu̧cu̧rö̧ cuäicuta'anö. Ttö'inä cuäö chicuä̧cua̧sä̧ amucanä muyähui cuäö icuta'anö, dea i̧sa̧rö̧ sesepicu jȩä̧i̧'a̧nö̧. ⁹ Ttömä ucutu Israel ttö̧ja̧rö̧ si'epö chi̧cuä̧cua̧sä̧, ¿Di̧jä̧ttö̧ ucuturu cu̧ja̧cui̧'ä̧tu̧cu̧nä̧ ppä̧dä̧cua̧mä̧? ¹⁰ ¿Jitämä, cu̧ru̧hua̧tu̧cu̧mä̧ tó ö̧jä̧ttö̧, ja̧u̧mä̧ ucuturömä ötahuiyä o'cajuiyönä ppädö'anö̧ ja̧'a̧ tä̧ji̧? ¿Tó ttö̧ja̧cuä̧ttö̧ curuhuotö ruhuo hue'ätömä̧ ucutumä pä̧'i̧nätöjä Ttörömä: Tu̧ru̧hua̧ ruhuonä hue'örö iyitö jö̧nä̧mä̧? ¹¹ Ttömä ucuturumä cu̧ru̧hua̧tu̧cu̧rö̧ iyinösä̧ chami surächi'äcu ja̧'hua̧ta̧'a̧nö̧ chamisurächi'äcu rä'epö icuinö̧sä̧. ¹² Efraín suronä jȩö̧mä̧ rö̧ä̧chi̧na̧'a̧, ja̧'hua̧ta̧'a̧nö̧ ja̧'hua̧nö̧ jȩpä̧ji̧jä̧ pähuä'i̧nä̧ ca̧ca̧cuä̧chi̧na̧'a̧. ¹³ Uhuäpächomenä baraumä ja̧u̧ru̧mä̧ rȩbȩhuä̧cua̧'a̧, ja̧'hua̧nö̧ ja̧'a̧nä̧ ja̧u̧ tti̧tti̧mä̧ a̧mö̧cuädocö jä̧cua̧'a̧, ja̧'hua̧nö̧ jo̧mȩttö̧ uhuäpächä̧cuȩ mo̧ro̧ pätecuächomenä̧mä̧, ja̧u̧mä̧ ja̧ju̧ ku̧cuä̧ba̧ jacuättömä rä'opocä jä̧cua̧. ¹⁴ ¿Ttö jahuätörö hua'are rejöttö rä'epö icu ppädäda'anä̧ tä̧ji̧? ¿Jahuätörömä hua'arettö rä'epö icu ppädäda'anä̧ tä̧ji̧? ¿Torö, hua'are rejuttö, si'epö i̧cuä̧hua̧tä̧ hua̧jä̧? Re kä̧cuä̧huä̧mä̧ chi'äre jacuä dajahuächina̧'a̧. ¹⁵ Efraínmä ahuaruhuättö'i̧nä̧ yabonä̧nö̧ ru̧hua̧ ja̧'a̧nä̧, kä̧ru̧'coppa kä̧hua̧ räopa'acuttö i̧chä̧cua̧; TÖ̧Ä̧NÄ̧HUA̧TTÖ̧ kä̧ru̧'cohuoppamä de'a jui̧yä̧jä̧ra̧'a̧cu̧ttö̧ ppuäcua'a. Efraín du'omä juo'epö i̧cuä̧cuȩ ja̧'hua̧nö̧ jo̧mȩnä̧ rejuhuiyämä ajiyamä joäcua'a. Ttaboiyotömä korojuei rö̧ä̧nä̧ micuäu jähuä aditö ku̧nä̧huö̧mä̧ barö tticuiyäcuotö. ¹⁶ Samaria ttö̧ja̧tä̧ jä̧cua̧'a̧ ttu̧huȩnȩcuä̧chä̧cuo̧tö̧mä̧, juhua'amä Diosrö kö'cö jui'ö ttu̧ra̧huä̧rä̧'i̧ja̧'a̧ttö̧. Jahuätömä curä'chuttötä totte'ächäuotö; tti̧tti̧mö̧ ppo̧'ä̧tö̧mä̧ ppo̧u̧cu̧ pätti'önä 'cui'ö icuähuäcuotö ja̧'hua̧ta̧'a̧nö̧ nä̧tö̧ muchotömä 'cä'ö icuähuäcuotö.