¹ Efraínmä kä̧ru̧'coppatä cuä̧nö̧ kö̧, ka̧hua̧ räopa'acuttö kä̧ru̧'co̧huoppa o'ca'anä 'chö̧. Ja̧u̧mä̧ uyaparemä yabonö̧tä̧ rö̧'ä̧dö̧ ja̧'hua̧ta̧'a̧nö̧ suronä jȩö̧'i̧nä̧. Jahuätömä Asiria ttö̧ja̧cu̧ esecuätö, ja̧'hua̧ta̧'a̧nö̧ olivo a̧dȩja Egiptora̧'a̧ ȩpä̧tö̧. ² TTÖ̧Ä̧NÄ̧HUA̧MÄ̧ Judá ttö̧ja̧rö̧ pärocua'a micuä jȩpä̧'i̧jö̧, ja̧'hua̧ta̧'a̧nö̧ Jacob jȩä̧'i̧jö̧ jähuänä̧mä̧ ro̧ȩpä̧cua̧; Ja̧u̧mä̧ jȩi̧nö̧ mi̧cuämä i̧mi̧tä̧cua̧. ³ Ja̧ju̧ ku̧cuä̧ba̧ jacuättö Jacobmä̧ uböo ö̧jä̧pö̧ i̧sä̧'ca̧ kada'ca 'chu̧'ä̧ri̧nö̧, ja̧'hua̧ta̧'a̧nö̧ buo juo'inö̧'ca̧mä̧ Dioscu rohuähuinö̧. ⁴ Ja̧u̧mä̧ ángelcu rohuäu isojuo'epinö̧, ja̧u̧mä̧ ajahuinö ja̧'hua̧ta̧'a̧nö̧ ppädarö pä'ö jä'epinö̧. Ja̧u̧mä̧ Diosrömä huo̧jui̧'i̧nö̧ Betelttö; juorötä Dios ja̧u̧cu̧ ucuocuinö̧. ⁵ Pide Ja̧'a̧ TÖ̧Ä̧NÄ̧HUA̧MÄ̧, Dios o'cajuiyönä ju̧ru̧hua̧mä̧; "TÖ̧Ä̧NÄ̧HUA̧" pä'ö ota pä'ö hua̧ i̧mi̧mä̧. ⁶ Ja̧'hua̧nö̧ ja̧'a̧ttö̧ Dioscu ppa̧'ä̧chä̧tu̧cui̧. Esecuinö̧mä̧ 'quiyönä 'chu̧'ä̧rö̧ ka̧cuä̧tu̧cui̧ ja̧'hua̧ta̧'a̧nö̧ adiu jȩö̧nä̧'i̧nä̧ juhua'atäcu 'cuäopönä̧tä̧ cu̧ru̧hua̧tu̧cu̧ Diosrömä tta̧'ä̧rä̧tu̧cui̧. ⁷ Järe iyä ttö̧ja̧mä̧ rö̧nö̧ iyähuäcämä adiu pa̧ja̧to̧cocätä ku̧nä̧rä̧tö̧ ttu̧mö̧nä̧mä̧; jahuätömä nä̧u̧cuä̧rä̧cuä̧huä̧tä̧ kö'cätö. ⁸ Efraínmä pä'inö: "Ttömä isopäi'önä̧tä̧ ru̧hua̧ juo'inö̧sä̧; ttötä cha̧mö̧nä̧ pa̧ja̧tö̧ ruhuo juoähuämä po̧cui̧pi̧nö̧sä̧. Ttö chaditähuämä o'cajuiyönä̧tä̧ jahuätömä surojömä po̧cui̧po̧co̧tö̧ ttäcuotö, yorö'iso suronä jȩchö̧'i̧nä̧." ⁹ "Ttötäsä TTÖ̧Ä̧NÄ̧HUA̧ Egipto rȩjȩttö̧ kä̧mä̧dö̧ cu̧ä̧hua̧tu̧cu̧ Diosmä. Ttömä odehuiyä o̧ta̧ttö̧ 'tö̧ä̧huä̧nä̧ ttö̧ja̧cua̧ pä'ö ppä̧dä̧dä̧cuo̧tö̧, pä'cäri kä̧cuȩ mo̧ro̧ jȩpö̧ ku̧nä̧huö̧ta'anö. ¹⁰ Ttömä profetacu ucuocuinö̧sä̧, ja̧'hua̧ta̧'a̧nö̧ ucuturumä i̧jȩcuä̧chö̧mä̧ rö̧ä̧nä̧ i̧jȩpi̧nö̧sä̧. Profetatö̧nä̧ huȩnȩtö̧ jiäcuähuämä iyinösä̧." ¹¹ Galaadnä̧mä̧ suronä jȩä̧cuä̧huä̧tä̧ ka̧'a̧, isopäi'önä̧tä̧ ttö̧ja̧mä̧ tti̧mi̧cuämä juittäcuotö. Gilgalttömä pä̧cä̧yu̧rö̧ cuä'äu icuätö; ku icu iyähuä o'ca i̧nä̧ o'quimä de'a u'chunö jö̧nä̧ pȩja̧'a̧ jä̧'i̧nö̧'a̧nö̧ pä̧cua̧'a̧. ¹² Jacobmä Aram rȩjȩra̧'a̧ tö'ipächinö; Israelmä irecuarö u̧ju̧nä̧ra̧ pä'ömä aditinö̧; ja̧'hua̧nö̧ ja̧'a̧ ja̧u̧mä̧ ovejas pä̧cuä̧yu̧ jö̧nä̧ ka̧cuä̧tö̧rö̧ tta̧'ä̧ri̧nö̧ irecuarö u̧ju̧nä̧ra̧ pä'ömä. ¹³ Israel ttö̧ja̧rö̧mä̧ TTÖ̧Ä̧NÄ̧HUA̧TÄ̧ räepu icuinö Egiptottömä Dios hueö jȩpu̧ kö̧nä̧, ja̧'hua̧ta̧nö̧ ja̧u̧nä̧tä̧ känö JA̧U̧MÄ̧ tta̧'a̧ri̧nö̧. ¹⁴ Efrainmä TTÖ̧Ä̧NÄ̧HUA̧ juiyo amisurächiönä jȩpi̧nö̧. Ja̧'hua̧nö̧ ja̧'a̧ttö̧ Ö̧Ä̧NÄ̧HUA̧MÄ̧ ja̧'a̧tä̧ to̧ä̧cua̧ suronä jȩpu̧ cuä'ö icuinöjinömä ja̧u̧nä̧tä̧ ko̧nä̧ ja̧'hua̧nö̧ jȩpu̧ ppa̧cuä̧di̧nä̧cu̧ usuräcua pä'ö.