¹ Israel, ucu CUÄ̧NÄ̧HUA̧ Dioscutä ppa̧'a̧chi̧, ucutä suronä jȩ'cu̧nä̧tä̧ mo̧ä̧chi̧nö̧jä̧. ² JA̧U̧RU̧ jiäu icuí suronä jȩ'cui̧nö̧ji̧nö̧ ja̧'hua̧nö̧ jȩpu̧ CUÄ̧NÄ̧HUA̧CU̧ ppa̧'ä̧chi̧. JA̧U̧RU̧ pä'í: "Ujutu suronä jȩtti̧nö̧ji̧nö̧ o'cajuiyönä u̧ni̧chi'i ja'hua̧ta̧nö̧ adiunä jö̧tä̧ ȩmu̧, UCURUTÄ ta̧u̧ huä̧nä̧rö̧ tiyähua'anö ujutu tesehuomettö̧. ³ Asiriamä ppädo̧co̧u̧ täcuotöjä; ujutu cabayu̧tu̧nä̧mä̧ huä̧mä̧do̧co̧tö̧ täcuotöjä curä rohuä'umä. Ujutumä ujututä tumu̧nä̧ taditähuä pä'ocotö täcuotöjä: "Ucutumä ujutu ttö̧ä̧nä̧huo̧tö̧ jö̧nä̧'inä pö'ocotöjä; ja̧'hua̧nö̧ ja̧'a̧ttö̧ ttä'ottö reyotö 'cua̧rö̧nä̧ huotömä UCUNÄ̧TÄ̧ re toäcuähuä ka̧'a̧". ⁴ Ttöttö 'cä̧ttȩcuä̧chi̧na̧'a̧nä̧ jahuätörö ppä̧dä̧dä̧cua̧sä̧; Jahuätörö ttöttä rȩpȩdä̧cua̧sä̧, ttö chö̧rao̧huä̧ri̧nö̧tä̧ ja̧u̧ru̧ 'cä̧'ȩpö̧ icuinömä̧. ⁵ Ttötä Israelrö chi̧yȩpä̧rä̧cua̧sä̧; Ȩu̧ 'cärächäcua'a lirio dau jä̧'i̧nö̧'a̧nö̧ ja̧'hua̧ta̧'a̧nö̧ Libanottö Cedro dau ihuehui appiyä yuchächa'a jä̧'i̧nö̧'a̧nö̧. ⁶ Ä̧na̧jui̧yä̧'i̧nä̧ setächäcua'a; A̧'cua̧cu'i̧nä̧ a̧'cua̧'cuä̧cua̧'a̧ olivas dauhuiyä a̧'cua̧cu̧'a̧nö̧, ja̧'hua̧ta̧'a̧nö̧ ö̧a̧mȩ'i̧nä̧ a̧dö̧nä̧ 'chopäcua'a Libanottö cedro dau jä̧'i̧nö̧'a̧nö̧. ⁷ Ttö̧ja̧mä̧ pä'äjita'anä ttö tto̧dȩpä̧ra̧'a̧nä̧ ttö̧jä̧cuo̧tö̧; Ja'huätömä ttottächäcuotö u̧huä̧ju̧ 'chärächä'inö'a̧nö̧ ja̧'hua̧ta̧'a̧nö̧ i̧u̧cuä̧cua̧'a̧ uva ȩ'u̧cua̧'a̧ jä̧'i̧no̧'a̧nö̧. Ucuounä ttö̧jä̧cuo̧tö̧ Libanottö uva ucuou'anö. ⁸ ¿Efraín, TTÖMÄ tocha pä'ömä jui̧'a̧sä̧ ja'huätö tätähuä'ca ucuo tettäumä? TTÖ pä'äji ji̧no̧mȩ jö̧nä̧ jȩchä̧cua̧jä̧ ja̧'hua̧ta̧'a̧nö̧ tta̧dä̧rä̧cua̧jä̧. TTÖMÄ ciprés dau jä̧'i̧nö̧'a̧nö̧ hua̧sä̧, ja̧u̧ dau ojiyämä 'cuäopönätä ja̧tu̧'u̧. TTÖTTÖTÄ ichäcua'a u̧huä̧ju̧mä̧." ⁹ ¿Ya̧tȩ huo̧jua̧mä̧ huo̧juä̧chi̧ö̧ pi̧yȩmä̧? ¿Ya̧tȩ ttö̧ȩpä̧rä̧chi̧ö̧mä̧ pi̧yȩmä̧ huo̧juä̧chi̧ö̧? O'cajui yönä TÖ̧Ä̧NÄHUA̧ jȩö̧mä̧ adihuö, ttä̧'cua̧ huȩnä̧rä̧tö̧mä̧ juo̧nä̧tä̧ 'chä̧tö̧, ja̧'hua̧nö̧ ja̧'a̧nä̧ jarodätörömä jahuätörömä ro̧ȩpu̧.