¹ Ja̧u̧nu̧ o'ca'a Tu̧ru̧hua̧ Dios pä'inödo Noérö: “Jitä pä̧nä̧ ucutä pä'ijöjä ttörö pä̧huä̧ rö̧jö̧ jȩpö̧ kö̧mä̧. Ja̧'hua̧nö̧ ja̧'a̧ttö̧ ucu'inä, ucu cuahuaruhuä'inä do'ächätucui huoi'ca jacuä. ² De'a isotö adihuä juo'otöttö sietenö huotörö u̧mä̧tö̧rö̧'i̧nä̧, sietenö huotörö nä̧tö̧rö̧'i̧nä̧ ȩpi̧. De'a isotö koro juo'otö suro juo'otö ubo ya̧tȩrö̧'i̧nä̧, isaju yajuterö'inä ȩpi̧. ³ Koro juo'otöttö ju'toju co̧'ä̧rä̧tö̧ttö̧'i̧nä̧, ko̧ro̧mö̧ttö̧nö̧ ta̧ju̧ru̧ u̧mä̧tö̧rö̧'i̧nä̧, ko̧ro̧mö̧ttö̧nö̧ ta̧ju̧ru̧ nä̧tö̧rö̧'i̧nä̧ ȩpi̧, o'ca toi'önä koro juo'otö isotöttö'inä ttö̧ji̧pä̧cua̧'a̧nö̧. ⁴ Sietenö mo̧ro̧ o'ca'a huȩdä̧cua̧sä̧ ajiyamä cuarentanö mo̧ro̧, cuarentanö yodo ichäcua'a. Pi̧jä̧ttö̧ ttö chaditinä̧u̧ru̧ ttö̧ja̧rö̧'i̧nä̧, de'a ka̧cuä̧tö̧rö̧'i̧nä̧ o'ca toi'önä bettipächönä be'epäjipö chi̧cuä̧cua̧sä̧,” Tu̧ru̧hua̧ Dios pä'inödo Noérö. ⁵ Noé jȩpi̧nö̧do o'ca juiyönä Tu̧ru̧hua̧ Dios hueäji ta'anö. ⁶ Aje suhuädi'inömä Noé seiscientos a̧'ȩ ku̧nä̧ri̧nö̧do. ⁷ Täcö ajiya icha pä'ö tö'cöhuächi'omenä, Noé do'ächinödo huoi'canä, i̧tti̧mö̧ tta̧ju̧'i̧nä̧, i̧tti̧mö̧'i̧nä̧, ö̧jo̧ri̧mö̧'i̧nä̧ aje suhuädomenä ttö̧ji̧pa̧ pä'ö. ^{10 8} Dottächäja'attömä ko̧ro̧mö̧ttö̧nö̧ todäre mo̧ro̧ o'ca'a, ajiya täcö ichina'ado. ⁹ De'a isotöttö adihuä isotö'inä korotö'inä, ju'toju co̧'ä̧rä̧tö̧'i̧nä̧, rȩjȩnä̧ do'ähuätö'inä tti̧rȩcua̧mö̧cu̧ pö̧nä̧ isajucu, ubocu huoi'canä Noécu do'ächinätödo, Tö̧ä̧nä̧hua̧ Dios Noérö hueäji ta'anö. ¹¹ Kä̧hua̧tö̧ ta̧ju̧ päi'omenä fecha diecisietenä ji̧na̧'a̧do ajiya ichina'amä. Noé seiscientos a̧'ȩ huinödo aje suhuädinömä. Ja̧u̧nu̧tä̧ mo̧ro̧ rȩjȩ ri'ächö ajiyamä ju'tojucu tö'epö suhuädi'ina'ado. Mo̧ro̧jä̧ra̧'a̧ttö̧'i̧nä̧ ajiya rö̧ȩnä̧ ichina'ado. ¹² Cuarentanö mo̧ro̧, cuarentanö yodo ichina'ado ajiyamä pi̧jä̧ra̧'a̧. ¹³ Sietenö mo̧ro̧ ajiya ichäcua'a ä'canä huoi'canä do'ächinödo Noé'inä, irecua'inä, i̧tti̧mö̧ Sem'inä, Cam'inä, Jafet'inä, i̧tti̧mö̧ tti̧rȩcua̧mö̧ huämetucuä'inä. ¹⁴ Jahuätöcu do'ächinätödo de'a ka̧cuä̧tö̧'i̧nä̧, de'a isotö ttö̧ja̧ ttä̧ji̧mö̧'i̧nä̧, rȩjȩnä̧ do'ähuätö'inä, ju'toju co̧'ä̧rä̧tö̧'i̧nä̧. ¹⁵ O'ca toi'önä a̧'cua̧rä̧tö̧mä̧ Noécu ta̧ju̧ pö̧nä̧ huoi'ca jacuä do'ächinätödo. ¹⁶ Do'ächinätödo koro juo'otö i̧sa̧ttö̧'i̧nä̧ ubocu isajucu, Tö̧ä̧nä̧hua̧ Dios hueinö ta'anö Noérö. Dottächäji o'ca'a, Tu̧ru̧hua̧ Dios huoi'ca äpate mö̧'ȩpö̧ icuinödo. ¹⁷ Cuarentanö mo̧ro̧ ajiya ichina'ado. Aje su'ädi'ö ajiya ju'tojucu 'chahuächö ta'anö huoi'ca'inä cäecuina'ado ju'tojucu. ¹⁸ Ajemä ji̧nä̧ isocutä suhuädi'omenä, huoi'camä cäecuächina'ado. ¹⁹ Aje rö̧ȩnä̧ suhuädi'a'attö, de'a'inä o'ca juiyönä, inähuiyä'inä o'ca juiyönä jacuoto päi'önä suhuädina'ado. ²⁰ Inähuiyä'inä jacuoto päi'äji o'ca'a, ji̧nä̧ siete metros jo̧mȩ juhua'a yabocu suhuädina'ado. ²¹ Ja̧'hua̧nö̧ ja̧'a̧ttö̧ hua'ö icuinätödo pi̧jä̧nä̧ ka̧cui̧nä̧tö̧mä̧, ttö̧ja̧'i̧nä̧, ju'toju co̧'ä̧rä̧tö̧'i̧nä̧, de'a isotö ttö̧ja̧ ttä̧ji̧mö̧'i̧nä̧, de'a ka̧cuä̧tö̧'i̧nä̧, rȩjȩnä̧ do'ähuätö'inä. ²² O'ca toi'önä de'anä ka̧cuä̧tö̧mä̧ ttö̧ja̧'i̧nä̧, de'a isotö'inä, pi̧jä̧ttö̧ tta̧'cua̧rö̧ ku̧nä̧rä̧tö̧mä̧ hua'ö icuinätödo. ²³ Noé uhuoi'canä Noécutä ka̧cui̧pä̧jä̧tö̧mä̧ a̧dȩcuä̧tö̧ ka̧cui̧pi̧nä̧tö̧do. Korotörömä o'ca toi'önä ttö̧ja̧rö̧'i̧nä̧, de'a isotörö'inä, rȩjȩnä̧ do'ähuätörö'inä, ju'toju co̧'ä̧rä̧tö̧rö̧'i̧nä̧ to'ädö icuinödo Tu̧ru̧hua̧ Dios. Jahuätö o'ca toi'önä to'e'inätödo. ²⁴ Ciento cincuenta mo̧ro̧ jo̧mȩnä̧, aje joächö juiyönä ri̧na̧'a̧do.