¹ Ja̧'hua̧nö̧ ja̧'a̧ Tö̧ä̧nä̧hua̧ Dios yorö'iso unichi'ocö pinödo Noérö, o'ca toi'önä de'a isotörö Noécu huoi'ca jacuä ka̧cuä̧tö̧rö̧'i̧nä̧. Ja̧'hua̧nö̧ ja̧'a̧ Tö̧ä̧nä̧hua̧ Dios jȩpi̧nö̧do aje huämenä kä̧rö̧'coppa kä̧rö̧'co̧hua̧ pä'ö. Ja̧'hua̧nö̧ ja̧'a̧ täcö aje a̧'cuo̧po̧nä̧ joächina'ado. ² Ja̧'hua̧nö̧ ja̧'a̧ ajiya'inä rȩjȩttö̧ cuä̧tä̧chi̧'i̧na̧'a̧do. Mo̧ro̧jä̧ra̧'a̧ttö̧ ajiya'inä täcö ichö cädina'ado. ³ Aje'inä a̧'cuo̧po̧nä̧ joächina'ado ciento cincuenta mo̧ro̧ jo̧mȩnä̧. ⁴ Kä̧hua̧tö̧ sietenö päi'omenä, fecha diecisietenä ji̧na̧'a̧do, huoi'ca huä̧mä̧di̧na̧'a̧mä̧ möä'ca ju'tä, Ararat pä'ö micuä'canä. ⁵ Ajemä ji̧nä̧ isocu joächina'ado. Kä̧hua̧tö̧ dieznö huotö päi'omenä, fecha ä̧cuo̧mȩnä̧ mo̧ro̧ ji̧na̧'a̧do, inähuiyä ju'toju ohuä'inä tottönä uhuähuinömä. ⁶ Cuarentanö mo̧ro̧ tta̧huä̧rä̧ji̧ o'ca'a, Noé chutä aditinä'ca mö̧ȩcuodä ba'epinödo. ⁷ Cuervo ppiyuärö co'epö icuinödo. Ja̧'hua̧nö̧ ja̧'a̧ cuervo ppiyuämä co̧'ä̧rö̧tä̧ ri̧nö̧do, aje joächa pä'ö tta̧'ä̧rö̧. ⁸ Noé cuervo ppiyuärö co'epö icuäji o'ca'a, ya̧tȩ palomarö co'epö icuinödo, rȩjȩ täcö joipächa pä'ö topö i̧'cha̧ pä'ö. ⁹ Ja̧'hua̧nö̧ ja̧'a̧nä̧ paloma pä'äji ta'anö ppa̧'ä̧chi̧nö̧do huoi'cara̧'a̧, ö̧jä̧mä̧do̧mȩ juiya'attö, aje joächoca'attö. Ja̧'hua̧nö̧ ja̧'a̧ Noé palomarö pä'äji ta'anö u̧mö̧ ki̧'ä̧dö̧ do'ädinödo huoi'ca jacuä. ¹⁰ Noé ji̧nä̧ sietenö mo̧ro̧ tta̧huä̧rä̧ji̧ o'ca'a, pä'äji ta'anö palomarö huoi'cattö u̧mi̧cu̧ co'epö icuinödo. ¹¹ Täcö ni̧pä̧cha̧'a̧ paloma olivo isojä jareojä änä yö̧ä̧rä̧nö̧ i'cächinödo. Noé ja̧'hua̧nö̧ huo̧jui̧nö̧do ajemä täcö joächa'a pä'ö. ¹² Noé ji̧nä̧ tta̧'ä̧ri̧nö̧do sietenö mo̧ro̧. Pä'äji ta'anö palomarö co'epö icuinödo. Ja̧'hua̧nö̧ ja̧'a̧ paloma pä'äji ta'anö ppa̧'ä̧cho̧cö̧ pinödo. ¹³ Rȩjȩ joipinömä Noé ku̧nä̧ri̧nö̧do seiscientos uno a̧'ȩ jo̧mȩnä̧. Ä̧cuo̧mȩnä̧ kä̧hua̧ ä̧cuo̧mȩnä̧ mo̧ro̧ päi'omenä, Noé huoi'ca huämode cärö icu ba'epinödo. Aje täcö joipächa'a topinödo. ¹⁴ Kä̧hua̧tö̧ ta̧ju̧ päi'omenä fecha veintisietenä, rȩjȩmä̧ täcö adiu joina'ado. ¹⁵ Tö̧ä̧nä̧hua̧ Dios pä'inödo Noérö: ¹⁶ “Täcö huoi'cattö rä'opächätucui, ucu'inä, cui̧tti̧mö̧ tta̧ju̧'i̧nä̧, cui̧tti̧mö̧'i̧nä̧, cu̧jo̧ri̧mö̧'i̧nä̧. ¹⁷ De'a isotö, ucutäcu huoi'canä pȩjä̧tö̧rö̧, ju'toju co̧'ä̧rä̧tö̧rö̧'i̧nä̧, de'a ka̧cuä̧tö̧rö̧'i̧nä̧, rȩjȩnä̧ do'ähuätörö'inä, rä'epö icui, pi̧jä̧ rȩjȩ o'ca juiyönä tti̧'cha̧ pä'ö, rö̧ȩnä̧ tti̧tti̧mö̧rö̧ ku̧nä̧rö̧ pi̧jä̧ o'ca juiyönä ttö̧ja̧cua̧ pä'ö,” pä'inödo Dios. ¹⁸ Ja̧'hua̧nö̧ ja̧'a̧ Noé'inä, i̧tti̧mö̧ tta̧ju̧'i̧nä̧, i̧tti̧mö̧'i̧nä̧, ö̧jo̧ri̧mö̧'i̧nä̧ rä'opinätödo huoi'cattö. ¹⁹ O'ca toi'önä de'a isotö'inä, rȩjȩnä̧ do'ähuätö'inä, ju'toju co̧'ä̧rä̧tö̧'i̧nä̧ rä'opinätödo huoi'cattö. ²⁰ Huoi'cattö rättopäji o'ca'a, Noé ku icu iyähuome Tu̧ru̧hua̧ Diosrö ucuotönö aditinödo. De'a isotö'inä, ju'toju co̧'ä̧rä̧tö̧'i̧nä̧, koro juo'otö i̧sa̧ttö̧'i̧nä̧ ya̧tȩ pö̧nä̧rö̧ adihuä juo'otöttö 'chu'huädö, ku icu iyähuome ju'tä jättäpäyotörö huä̧nö̧, ku icu iyinödo Tu̧ru̧hua̧ Diosrö. ²¹ Ku icu iyähuä juiyo adiu a̧mȩhua̧'a̧ Tu̧ru̧hua̧ Diosrö rȩbȩhuo̧mȩnä̧, Tu̧ru̧hua̧ Dios pä'inödo: “Jitämä tä̧bo̧to̧cö̧ chä̧cua̧sä̧ pi̧jä̧mä̧, ttö̧ja̧ suronä jȩtta̧'a̧ttö̧mä̧. Möäyotöttö kä̧mä̧dö̧ suronätä jȩtta̧ pä'ö ttamöcuäda'anä'inä, rȩjȩmä̧ aje suhuädi'önämä jȩpo̧cö̧sä̧. O'ca toi'önä a̧'cua̧rä̧tö̧rö̧'i̧nä̧ jitämä be'epäjipö icuocösä jitä pi̧yȩnä̧ jȩchä̧ji̧'a̧nö̧mä̧. ²² Pi̧jä̧ ji̧nä̧ ko̧mȩ jubötä mo ku̧nä̧huä̧nä̧'i̧nä̧, seähuänä'inä kä̧cua̧'a̧. Du'huome'inä, diyahuome'inä, a̧'ȩ'i̧nä̧, du'huonä'inä, mo̧ro̧'i̧nä̧, yodo'inä kä̧cua̧'a̧”.