¹ Ttö̧ja̧mä̧ pi̧jä̧ pa̧ja̧cuä̧chö̧nä̧ ttö̧ja̧cua̧ pä'ö recuächinätödo. Tti̧tti̧mö̧ nä̧tö̧rö̧'i̧nä̧ ku̧nä̧ri̧nä̧tö̧do. ² Tö̧ä̧nä̧hua̧ Dios i̧tti̧mö̧ huotömä ttö̧ja̧ tti̧tti̧mö̧ nä̧tö̧mä̧ juiyo adiu tta̧'cua̧cua̧'a̧ topinätödo. Ja̧'hua̧nö̧ ja̧'a̧ jahuätörö topö, jahuätöttö yajute pö̧nä̧ ȩmi̧nä̧tö̧do tti̧rȩcua̧mö̧ päi'önä. ³ Ja̧'hua̧nö̧ ja̧'a̧ Tu̧ru̧hua̧ Dios pä'inödo: “Ttö Cha̧cua̧ru̧hua̧mä̧ ttö̧ja̧ ttami iso'quinä 'cuäopönämä ucuocuocösä, hua'ä ttö̧ja̧ ja̧'a̧ttö̧. Ja̧'hua̧nö̧ ja̧'a̧ttö̧ ciento veinte a̧'ȩ jo̧mȩtä̧ ttö̧ja̧cuä̧cuo̧tö̧”. ⁴ Ja̧u̧nu̧ pä̧nä̧mä̧, ja̧u̧nu̧ o'ca'a'inä ttö̧ja̧ juiyo otopätö ka̧cui̧nä̧tö̧do pi̧jä̧nä̧mä̧. Tö̧ä̧nä̧hua̧ Dios i̧tti̧mö̧ huotö tti̧tti̧mö̧ u̧mä̧tö̧mä̧, ttö̧ja̧ tti̧tti̧mö̧ nätö̧ttö̧ tti̧rȩcua̧mö̧ päi'önä ȩmö̧, tti̧tti̧mö̧rö̧ ku̧nä̧ri̧nä̧tö̧do. Jahuätömä korotöttö'inä abonänö ttujuruhua'attö, o'ca toi'önä ttö̧ja̧ ttu̧huo̧jui̧nä̧u̧do. ⁵ Tu̧ru̧hua̧ Dios topinödo pi̧jä̧ ttö̧ja̧ juiyo rö̧ȩnä̧ suronä jȩtta̧'a̧. Jahuätö o'ca juiyönä ttamöcuädömä surojötä amöcuädö ka̧cui̧nä̧tö̧do 'cuäopönä. ⁶ Tu̧ru̧hua̧ Dios ttö̧ja̧rö̧ aditina'attö, a̧'cua̧ tta̧'ȩcui̧nö̧do, aditinä̧u̧ pi̧jä̧ttö̧ rö̧ȩnä̧ suronä jȩtto̧mȩnä̧. ⁷ Tu̧ru̧hua̧ Dios pä'inödo: ―Pi̧jä̧ttö̧ be'epäjipö chi̧cuä̧cua̧sä̧ ttö̧ja̧rö̧ ttö cha̧di̧ti̧nä̧u̧ru̧'i̧nä̧, de'a isotörö'inä, rȩjȩnä̧ do'ähuätörö'inä, ju'toju co̧'ä̧rä̧tö̧rö̧'i̧nä̧. Ttö jahuätörö chaditina'attö cha̧'cua̧ tta̧'ȩcu̧sä̧―. ⁸ Ja̧'hua̧nö̧ ja̧'a̧nä̧ Tu̧ru̧hua̧ Dios Noérömä eseunu topinödo. ⁹ Pi̧yȩ huȩnȩdo Noé ö̧ji̧nö̧ huȩnȩmä̧, Noémä adihuä i̧sa̧ pinödo. 'Cuäopönä Tö̧ä̧nä̧hua̧ Dios hueötä jȩpö̧ ki̧nö̧do. Noé ö̧ji̧nö̧ pä̧nä̧mä̧ Noémä Tö̧ä̧nä̧hua̧ Diosrö pä̧huä̧ rö̧jö̧ jȩpö̧ ki̧nö̧do. ¹⁰ Noé i̧tti̧mö̧ huämetucuä ku̧nä̧ri̧nö̧do Sem'inä, Cam'inä, Jafet'inä. ¹¹ Ja̧'hua̧nö̧ ja̧'a̧nä̧ korotö ttö̧ja̧ o'ca toi'önä suronä jȩpö̧ rohuähuä'chö ka̧cui̧nä̧tö̧do Tö̧ä̧nä̧hua̧ Dios ä'ca jo̧mȩttö̧. ¹² Tö̧ä̧nä̧hua̧ Dios topinödo pi̧jä̧ra̧'a̧ttö̧ ttö̧ja̧ o'ca toi'önä suronätä jȩpö̧ ttö̧ja̧cua̧'a̧. ¹³ Ja̧'hua̧nö̧ ja̧'a̧ Tö̧ä̧nä̧hua̧ Dios pä'inödo Noérö: “Ttö chamöcuädäjimä o'ca toi'önä ttö̧ja̧rö̧ be'epäjipö chi̧cuä̧cua̧sä̧, jahuätö suronä jȩpö̧ rohuähuä'chö ttö̧ja̧cua̧'a̧ttö̧. Jahuätörö'inä, pi̧jä̧ o'ca juiyönä ka̧cuä̧tö̧rö̧'i̧nä̧ to'ädö chi̧cuä̧cua̧sä̧,” pä'inödo Dios. ¹⁴ “Ja̧'hua̧nö̧ ja̧'a̧ttö̧ huoi'ca aditi adihuä juäi dauhuiyättö. Jahuä'ca huoi'ca jacuä o̧ca̧hui̧yä̧'i̧nä̧ aditi. Ja̧'hua̧ta̧nö̧ huoi'canä oyä rö̧jö̧mä̧ jacuänä'inä, u̧mi̧nä̧'i̧nä̧ tätö aditi dö'cäu juäittö. ¹⁵ Huoi'camä pa̧'a̧nö̧ aditi. Öotomä ciento treinta y cinco metros jo̧mȩnä̧. Ja̧'hua̧ta̧nö̧ öcähuemä veintidós metros jo̧mȩnä̧. Trece metros abonänö jo̧mȩnä̧ ju'tojucumä. ¹⁶ Ja̧'hua̧ta̧nö̧ huä̧bo̧jä̧cuä̧ jo̧mȩnä̧ aditi. Ja̧'hua̧ta̧nö̧ huoi'ca isode beipome medio metro jo̧mȩ huäosenötä jä̧cua̧'a̧nö̧. Äpate'inä ku̧ni̧ huoi'ca i'esubä jo̧mȩ. ¹⁷ Ajiya suhuädi'önä huȩdä̧cua̧sä̧. Ja̧'hua̧ta̧nö̧ o'ca toi'önä tta̧'cua̧rö̧ ku̧nä̧rä̧tö̧rö̧ be'epäjipö chi̧cuä̧cua̧sä̧, pi̧jä̧ o'ca juiyönä ka̧cuä̧tö̧rö̧mä̧. O'ca toi'önä pi̧jä̧nä̧ ka̧cuä̧tö̧mä̧ hua'ö tticuäcuotö. ¹⁸ Ucurutä ji'äu chu̧ju̧nä̧cua̧sä̧ ucuru iso päi'önä jȩchä̧cuȩ huȩnȩmä̧. Huoi'canä docuhuächäcuotöjä, ucu'inä, cui̧tti̧mö̧'i̧nä̧, cui̧tti̧mö̧ tta̧ju̧'i̧nä̧, cu̧jo̧ri̧mö̧'i̧nä̧. ¹⁹ Ja̧'hua̧ta̧nö̧ cutaja huoi'ca jacuä de'a isotö pi̧jä̧nä̧ ka̧cuä̧tö̧rö̧mä̧, tti̧rȩcua̧mö̧cu̧ pö̧nä̧, isajucu, ubocu, ucu ta'anö a̧dȩcuä̧tö̧ ttö̧ja̧cui̧'ä̧cua̧'a̧nö̧. ²⁰ Ppi̧yu̧ttu̧'i̧nä̧, de'a isotöttö'inä, rȩjȩ do'ähuätöttö'inä ta̧ju̧ pö̧nä̧ dottächäcuotö ucucu, a̧dȩcuä̧tö̧ ttö̧ja̧cui̧'ä̧cua̧'a̧nö̧. ²¹ Ucutu cu̧cuȩtu̧cu̧'i̧nä̧, de'a isotö ttu̧cuȩ'i̧nä̧ o'ca juiyönä cuäcuähuämä do'ädi huoi'ca jacuä,” pä'inödo Dios. ²² Ja̧'hua̧nö̧ jȩpi̧nö̧do Noé, Tö̧ä̧nä̧hua̧ Dios hueinö ta'anö.