¹ Ja̧u̧nu̧ o'ca'a Adán irecua Evacu ji̧nä̧ yo̧mȩtȩ pä'i'inödo. Ja̧'hua̧nö̧ ja̧'a̧ möchaju pä'i'inäjudo. Uhuäbecuinäjudo ki̧tti̧rö̧, Caín pä'ö mi̧cua̧rö̧. Jahuäju pä'inäjudo: ―Täcö chi̧tti̧rö̧ ku̧nä̧rä̧ju̧sä̧, Chu̧ru̧hua̧ Chö̧ä̧nä̧hua̧ Dios i̧yä̧cua̧sä̧― pä'inäjudo. ² Ja̧u̧ o'ca'anä ku̧nä̧ri̧nä̧ju̧do ka̧ra̧ ki̧tti̧rö̧, Caín ö̧jä̧hua̧rö̧. I̧mi̧mä̧ o'inätödo Abel pä'ö. Jahuätö böo juottomenä, Abel o̧vȩja̧stö̧rö̧ pöttädö aditinödo. Caínmä pätta ku̧nu̧ aditinödo. ³ Recuo mo̧ro̧ ttö̧ja̧cui̧nö̧ o'ca'a, Caín ö'ätta cuähuättö i'cächinödo Tu̧ru̧hua̧ Diosrö iya pä'ö. ⁴ Abel'inä o̧vȩja̧stö̧rö̧ ä'canä u'uttädinä̧u̧ttu̧ i'cächinödo, ttidepä adihuomettö Tu̧ru̧hua̧ Diosrö iya pä'ö. Dios eseunu topinödo Abelrö'inä, öäre iyähuä'inä. ⁵ Ja̧'hua̧nö̧ ja̧'a̧nä̧ Caínrömä, öäre iyähuä'inä esehuocö pinödo. Ja̧'hua̧nö̧ ja̧'a̧ Caín rö̧ȩnä̧ ra̧huä̧ri̧nö̧do. Ö'ä nori'chunu jȩpö̧ ra̧huä̧ri̧nö̧do. ⁶ Ja̧'hua̧nö̧ ja̧'a̧ Tu̧ru̧hua̧ Dios pä'inödo Caínrö: ―¿Tta̧'a̧nö̧ pä'ö cu̧ra̧huä̧rä̧ cui'ä nori'chunu jȩpö̧mä̧? ⁷ Adiu jȩcu̧'u̧ttu̧mä̧, adihuäcua'a ¿isodi̧? Ucu adiu jȩcu̧'o̧ca̧'a̧ jö̧ttö̧mä̧, surojö tta̧hua̧rä̧cu̧jä̧ suronä jȩa̧ pä'ö. Ja̧'hua̧nö̧ ja̧'a̧nä̧ suronä jȩä̧cuä̧huä̧ttö̧mä̧ cujuru'a̧nö̧ ja̧'a̧ ucumä― päinäcudo. ⁸ Koronö mo̧ro̧ Caínmä ö̧jä̧hua̧ Abelrö pä'inödo: ―Mȩji̧yä̧ra̧'a̧ cuetächaja. Ja̧'hua̧nö̧ ja̧'a̧nä̧ mȩji̧yä̧ra̧'a̧ttö̧ Caínmä ö̧jä̧hua̧ Abelrö cuä'ö icuinödo. ⁹ Ja̧'hua̧nö̧ ja̧'a̧ Tu̧ru̧hua̧ Dios jä'epinödo Caínrö: ―¿Tȩnȩ jä̧ttö̧ cu̧jä̧hua̧ Abélmä? Ja̧u̧ ädätinödo: ―¿Juäitä? Jȩru̧pa̧sä̧. ¿Ttömä chö̧jä̧hua̧rö̧ tta̧huä̧rä̧cuä̧huä̧ i̧sa̧ päi'önä kö̧sä̧ tä̧ji̧? ¹⁰ Tu̧ru̧hua̧ Dios pä'inödo: ―¿Tta̧'a̧nö̧ pä'ö jȩcu̧'ä̧jä̧ttö̧ pi̧yȩmä̧? Ttö topösä cu̧jä̧hua̧ ucuoja rȩjȩ cuocua'a. ¹¹ Ja̧'hua̧nö̧ ja̧'a̧ttö̧ pi̧jä̧ttö̧mä̧ surojö 'cuäopäcua'a ucuru. Ucu cuä'ö cuicuäjäcu cu̧jä̧hua̧ ucuoja rȩjȩ 'cucuächiä̧jä̧ttö̧mä̧ ucumä ya'opö i̧cuä̧hua̧tä̧ cu̧jä̧cua̧jä̧. ¹² Rȩjȩmä̧ cu̧cuȩ cuähuä ku̧nu̧ cuadita'anä u̧huä̧ju̧ttu̧ huȩjo̧ca̧'a̧ jä̧cua̧'a̧. Cuojusodenä'inä cu̧ju̧ juiyönä jope'ötä cu̧jä̧cua̧jä̧. ¹³ Ja̧'hua̧nö̧ ja̧'a̧ Caín ädätinödo Tu̧ru̧hua̧ Diosrö: ―Ro̧ȩcuä̧nä̧ pä'ö ku̧nä̧hua̧ pädi'äjimä abora̧'a̧tä̧ päi'önä chami 'quidächi'ö juiyönä jä̧cu̧sä̧. ¹⁴ Chö̧jä̧'i̧jo̧mȩttö̧mä̧ jitä mo̧ro̧tä̧ ya'opö cuicuäcusä. Ucuttumä dajahuächötä chö̧jä̧cua̧sä̧. Chojusodenä'inä chö̧jö̧ juiyönä jope'ötä chö̧jä̧cua̧sä̧. Ka̧ra̧'i̧nä̧ ttörö ö̧'o̧cui̧'ö̧ttö̧mä̧, huäinä cuä'ö i̧cuä̧cua̧sä̧― pä'inödo Caínmä. ¹⁵ Ja̧'hua̧nö̧ ja̧'a̧ Tu̧ru̧hua̧ Dios Caínrö ädätinödo: ―Juhua'acumäcö̧. Ka̧ra̧'i̧nä̧ ucuru cuä'ö icuttumä, ucuru cuä'ö icuinöttö'inä abonänö päi'önä ja̧u̧ ahuaruhuärömä sietenö huotörö chö̧tä̧bo̧tä̧cua̧sä̧― pä'inödo Dios. Märuhuä tuttepa'a jä̧'i̧nö̧'a̧nö̧ Tu̧ru̧hua̧ Dios Caínrö huȩyu̧cuä̧ ötinäcudo, korotö'inä ja̧u̧ru̧ topö cuä'ö tticu juiya pä'ö. ¹⁶ Ja̧'hua̧nö̧ ja̧'a̧ttö̧ Caín Tu̧ru̧hua̧ Dioscu ucuocuäjomettömä i̧hui̧nö̧do Nod rȩjȩra̧'a̧ ö̧ja̧ pä'ö. Nod rȩjȩmä̧ Edén pättattömä kä̧hua̧ räopome päte'ö ji̧na̧'a̧do. ¹⁷ Ja̧u̧nu̧ o'ca'a Caínmä irecuacu ji̧nä̧ yo̧mȩtȩ pä'i'inödo. Ja̧'hua̧nö̧ ja̧'a̧ yaju möchaju pä'i'inäjudo. Uhuäbecuinäjudo ki̧tti̧ Enocrö. Caínmä ötahuiyä rö̧ä̧ö̧ aditinödo. Ja̧u̧ ötahuiyä i̧mi̧mä̧ o'inödo Enoc pä'ö, i̧tti̧ i̧mi̧ ta'anö. ¹⁸ Ja̧'hua̧nö̧ ja̧'a̧ Enocmä i̧tti̧rö̧ ku̧nä̧ri̧nö̧do Iradrö. Iradmä, Mehujael jä'o pinödo. Ja̧'hua̧ta̧nö̧ Mehujaelmä, Metusael jä'o pinödo. Metusaelmä, Lamec jä'o pinödo. ¹⁹ Lamecmä i̧rȩcua̧mö̧rö̧ ta̧ju̧rö̧ ȩmi̧nö̧do̧. Karaju Ada pä'ö micuinäjudo. Karaju Zila pä'ö micuinäjudo. ²⁰ Adamä ki̧tti̧ Jabalrö uhuäbecuinäjudo. Jabal ahuaruhuä'cotömä ttoju odehuiyämä isotö ttuhuo'chettö adicuä odehuiyänä ka̧cui̧nä̧tö̧do. Ja̧'hua̧ta̧nö̧ ttä̧ji̧mö̧rö̧ pöttädö aditö ka̧cui̧nä̧tö̧do. ²¹ Jabal ö̧jä̧hua̧mä̧ Jubal pä'ö micuinödo. Jubal ahuaruhuä'cotömä arpa oba'inä 'po̧rä̧rö̧, ja̧'hua̧ta̧nö̧ mära ona'inä ppö'ö jȩpö̧ ka̧cui̧nä̧tö̧do. ²² Zila'inä ki̧tti̧rö̧ uhuäbecuinäjudo, Tubal-caín pä'ö mi̧cua̧rö̧. Tubal-caínmä rö̧ȩnä̧ 'quiyö juäi ocuränä ȩttö̧ 'ta'tapö adicuä i̧sa̧ pinödo. Tubal-caín öjähuajumä Naama pä'ö micuinäjudo. ²³ Koronö mo̧ro̧ Lamecmä i̧rȩcua̧mö̧rö̧ pä'inödo: Ada'inä Zila'inä ttö chi̧huȩnȩ pädömä ä̧ju̧cuä̧tu̧cui̧ttö̧. Ucutu ttö Lamec chi̧tti̧mö̧ tta̧ju̧tu̧ ä̧ju̧cuä̧tu̧cui̧ttö̧ chucuocumä. Ya̧tȩ ttörö cuäcuäpäjirö cuä'ö icuäjisä, mö̧ä̧ya̧rö̧'i̧nä̧ suronä jȩa̧'a̧ttö̧. ²⁴ Caínminärö suronä 'cuäopinöttö'inä abonänö suronä 'cuäopäcua'a ttörö. ²⁵ Adán pä'äji ta'anö irecua Evacu ji̧nä̧ yo̧mȩtȩ pä'i'inödo. Jahuäju ki̧tti̧rö̧ uhuäbecuinäjudo. I̧mi̧mä̧ o'inäjudo Set pä'ö. ―Chö̧ä̧nä̧hua̧ Diostä iyäjäcuasä ka̧ra̧ chi̧tti̧rö̧, Caín cuä'ö icuinäcu Abel pä̧ro̧cua̧rö̧ i̧yä̧cua̧sä̧― pä'inäjudo. ²⁶ Set'inä i̧tti̧rö̧ ku̧nä̧ri̧nö̧do, Enós pä'ö mi̧cua̧rö̧. Ja̧u̧nu̧tä̧ Tu̧ru̧hua̧ Diosrö ttucuocua pä'ö kä̧mä̧di̧nä̧tö̧do.